Génesis 4
4
Caín ex Abel
1Moje'tzun Adán tuk'il Eva aju t-xu'jil. Oktzun ten tal Eva, ex ul itz'j jun tal, Caín tb'i ok. Tmatzun Eva kyja': Ma tzul itz'j jun wale xinaq. A Qman ma tzaj q'onte te, chi Eva. 2Ul itz'j juntl tal, Abel tb'i ok, titz'in Caín. Ate Abel ok pastoril ẍne'l; atzunte Caín aq'nal ti'j tx'otx'.
3Eltzun tyemp. At jun q'ij tzaj ti'n Caín twitz tawal tu'n t-xi tq'o'n te jun oyaj te Qman. 4Ax ikx te Abel e tzaj ti'n qe kynejel kyal t-ẍne'l aqeju tb'anilxix. Tzajtzun tke'yin Qman ex o tzalaj ti'j Abel tuk'ix ti'j toyaj. 5Atzun ti'j Caín ex ti'j toyaj, minti' o tzalaj Dios. Tzajtzun nim tq'oj Caín ex miyalnix ok twitz. 6Tzajtzun tma'n Qman te Caín: ¿Tiqu'n ma tzaj tq'oja ex miyalnix ma tz'ok twitza? 7Qa ma tb'inchaya b'a'n, ¿mlaypelo k'meta? Qatzun mi'n ma tb'inchaya b'a'n, aju il lepch ti'ja, ex in ayon tu'n tkub' ti'ja tu'n. Ex jaku kub' ti'j tu'na, chi Qman.
8At jun q'ij xi tma'n Caín te Abel aju titz'in:
—Qo' b'etel tuj kojb'il, chi Caín.
Tejtzun kypon tuj kojb'il, ok tzoqpaj Caín ti'j Abel aju titz'in, ex kub' tb'yo'n. 9Tzajtzun tqanin Qman te Caín:
—¿Jatum ta' Abel aju titz'ina?
Xitzun ttzaq'we'n Caín:
—Minti' b'i'n wu'ne. ¿Baqa kwentil wermaniye qine?
10Tzajtzun tma'n Qman te:
—¿Ti ma tb'inchaya? Aju tchk'el titz'ina ma kub' twitz tx'otx', mer ik tza'n in sch'in wi'je in tqanin tu'n tb'inchet ti'j. 11Tu'ntzun jlu kb'el tcastiwoya ex k'elex lajo'na tuj tx'otx' lu, aju ma txi k'ante tchk'el titz'ina ma kub' tb'yo'na. 12Maske aq'nana twitz tx'otx', ex mlay tzaj tq'o'ntl nim twitz tawala. B'etin xjal k'okela twitz tx'otx' ex minti' tu'n tojlana, chi Qman.
13Xitzun ttzaq'we'n Caín te Qman:
—Aju ncastiwoye lu ma'xix, mlay tzik'x wu'ne. 14Ja'lo chin elex tq'o'na ti'jxi tx'otx' lu, mlay chin tentle tuk'ila, b'etin xjal chin okele ex minti' tu'n wojlane. Kyja'tzun, noq alkyex ma tz'ok noj wi'je, chin b'el tb'yo'n, chi Caín.
15Tzajtzun ttzaq'we'n Qman:
—Mi'n. Alkye ma kub' b'yonte teya, kb'el tcastiw wuq maj, chi Qman.
Oktzun tq'o'n Qman jun techal ti'j Caín tu'ntzun mi'n tkub' b'yo'n tu'n jun xjal ok tok noj ti'j. 16Extzun Caín twitz Qman ex ax najan tuj tx'otx' Nod, tuj tjawitz q'ij ttxlaj Edén.
Qe tiyjil Caín
17Moje'tzun Caín tuk'il t-xu'jil. Oktzun ten tal t-xu'jil ex ul itz'j jun tal, Enoc tb'i ok. Kub'tzun tb'incha'n Caín jun tnam, ex Enoc tb'i ok tq'o'n, ik tza'nx tb'i tk'wa'l. 18Ate Enoc tman Irad; Irad tman Mehujael; Mehujael tman Metusael; Metusael tman Lamec. 19Kab'e t-xu'jil Lamec ten. Ada tb'i jun ex Zila tb'i juntl. 20Ultzun itz'j jun tal Ada, Jabal tb'i ok, ex atzun kyxe'chel qeju najl tjaq' ja xb'alun, qe ch'isal kye alumaj. 21At jun titz'in Jabal, Jubal tb'i, ex atzun kyxe'chel kykyaqil qe chimb'al ti'j arpa ex xux. 22Ax ikx te Zila ul itz'j jun tal, Tubal-caín tb'i ok. Ok te tx'inol k'uxb'il ex b'inchal makb'il ti'j k'uxb'il ex q'an k'uxb'il. Attoq jun tanb' Tubal-caín, Naama tb'i.
23At jun q'ij xi tma'n Lamec kye t-xu'jil kyja':
Aqeye nxu'jile, Ada ex Zila, kyb'intze aju kxel nma'ne: Kub' nb'yo'ne jun xinaq tu'nju ok tk'ixb'isa'n qine; kub' nb'yo'ne jun ku'xun tu'nju ok tb'aju'n qine.
24Qa at jun ma kub' b'yonte Caín, wuq maj k'okel t-xel ti'j, atzun weye, qa ma chin ok k'ixb'isa'ne tu'n juntl, 77 maj k'okel t-xel ti'j, chi Lamec.
Aju toxin tky'ajal Adán
25Kub'tzun tantl Adán tuk'il t-xu'jil. Ul itz'j juntl tal t-xu'jil, Set tb'i ok tq'o'n. Tmatzun Eva: Ma tzaj tq'o'n Dios juntl wale te t-xel Abel aju kub' tb'yo'n Caín, chi Eva.
26Ax ikx te Set ul itz'j jun tky'ajal, Enós tb'i ok tq'o'n. Axtzun tq'ijlalil lu tzyet kyna'n xjal Dios, ajb'en tb'i Qman kyu'n.
सध्या निवडलेले:
Génesis 4: MAMNO
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.