JOHN 10
10
Tuucing Hoipa Jesu
1“A tahtah a kang ci-in, tuu khumna tunkot panin lut loin lampi tuom panin kato-in a lut poma guta le misuom ahi hi. 2Tunkot pana lut mipa ahile a tuute a cing pa ahi hi. 3Tunkot cingpa in ama kot honin tuute in ama’ aw a za uhi. Ama in tuute a min tawh hlanin a pusuopi hi. 4Ama-a’ zosie a pusuopi zaw ciengin a mai-ah pei-in tuute in ama’ nua a zui uhi, azieh pen tuute in ama’ aw a thei uhi. 5Tuute in a melmahte uh’ nua a zui sih ding vua, a melmahte uh’ aw a thei lo ziehun ama kung panin a gelmang ding uhi,” a ci hi. 6Jesu in amate tawh tam thugentena a zah vangin bang thu gen ahei, ci a thei sih uhi.
7Tuaci’n Jesu in amate kungah, “A tahtah a kang ci-in, kei pen tuute lutna tunkot ka hi hi. 8Ka mai-a pei zosie guta le misuomte ahi uhi; ahi vangin tuute in a thu a mang sih uhi. 9Kei tunkot ka hi hi. Keima tungtawnin a lut poma kihundam ding a, sungtum pusuohin lodawnna mun a mu ding hi. 10Guta pen a gu ding, a that ding le a susie ding behin ang pei hi. Kei ka hile amate in hinna a nei thei nading ule hinna bukim a nga thei nading vua ang pei ka hi hi.
11“Kei tuucing hoi ka hi hi. Tuucing hoi in a tuute adingin a hinna a pie hi. 12Tuucing ahi lo, tuu zong a nei lo, a kiciel tuucing in ngie pei a mu ciengin a tuute nuasie-in taimang a, tua ngie in tuute manin a thezah hi. 13Ama a kiciel ahi bo ziehin tuute don loin a taimang hi. 14Keima tuucing hoi ka hi hi. Kei-ate ka thei a, kei-ate in zong kei ei thei uhi. 15Pa in kei ei thei bangin ke’n zong Pa ka thei hi. Keima in tuute adingin ka hinna ka pie hi.#Mat 11:27; Luk 10:22 16Tami tuu khumna sunga a om lo tuu dang zong ka nei lai hi. Tuu khumna ah tuate kang peipi valon ding a, amate in ka aw a ngai ding uhi. Tuaci’n tuuhon khat, tuucing khat a om ding hi. 17Ka hinna ka lahkia thei nadingin ka hinna ka pieh ziehin Pa in keima ei it hi. 18Koima in keima tung panin ka hinna ei lahpieh lo a, keima thu-a ka pieh ahi zaw hi. Keima in pieh thei nading thu ka nei a, lahkia thei nading thu zong ka nei hi. Keima in tami thupieh pen ka Pa kung pana ka nga ahi hi,” a ci hi.
19Tami thute ziehin Jew mite a kikhen leuleu uhi. 20Mi tampitah in, “Ama pen dawivei ahi a, a maw ahi bo hi. Bang dinga ama’ thu na ngai uh ahei?” a ci uhi. 21Adangte in, “Tam bangte pen dawivei khat’ thugen ahi sih hi. Dawivei khat in mittawte’ mit a vahsah thei ding amah?” a ci uhi.
Jew Mite in Jesu Niel
22Khum hunin Jerusalem ah Ki-apna Pawi om a, tua pen phalbi hun sung ahi hi. 23Biehinn huong sunga Solomon talap ah Jesu a pei kawikawi laitahin, 24a kimkotah Jew mite kikhawmin ama kungah, “Nang in bang tanvei lung nawngkai-in kote ei koi ding na hei? Messiah#10:24 Ahi sihle “Khris” na hi leh siengtahin ei gen pai ta’n” a ci uhi. 25Jesu in, “Ke’n kang gen zo a, na tahsang paupau sih uhi. Ka Pa’ min tawh ka sep zosie in keima’ thu teci a pang hi. 26Ahi vangin ka tuute na hi lo ziehun nei um sih uhi. 27Ka tuute in ka aw a za uhi. Keima in amate ka thei a, amate in ka nua ei zui uhi. 28Keima in kumtawn hinna amate ka pie a, amate a kisie ngai nawn sih ding uhi. Ka khut sung panin koima in ka tuute ei lahpieh zo sih ding hi. 29Ka Pa ei piehsate adang zosie teng sangin lienzaw a, ka Pa’ khut sung panin koima in ei lahpieh zo lo hi. 30Ka Pa le kei pumkhat ka hi uhi,” ci-in a dawng hi.
31Jew mite in ama a se nadingun suong a tung leuleu uhi. 32Jesu in, “Pa kung panin nasep hoi tampi kang lah zo hi. Tuate lahah bang pen zieha suong tawh nei se sawm uh ahei?” a ci hi. 33Jew mite in, “Nasep hoi zieha kang se sawm uh ahi sih a, nang mi maimai khat kimlai Pasien bangin nang kibawl a, ama na simmawbawl zieh ahi zaw hi,” ci-in a dawng uhi.#Siem 24:16 34Jesu in, “Na thukham bu sung vuah, ‘Keima in note pen pasien-te kang ci hi,’ ci in kigiel hi lo amah?#Late 82:6 35Pasien’ thu a tunna mite pen, ‘pasien-te’ kici ahile-Lai Siengtho lah kiphiet thei lo cileih- 36keima in, ‘Pasien’ Tapa ka hi hi,’ ka ci ziehin Pa in siensuo-in leitunga a sawl pa ahi keima kungah Pasien na simmawbawl hi, ei ci thei na hi uh amah? 37Ka Pa’ nasepte a sem lo ka hi leh ei up da mai un. 38Ahi vangin tuate sem napi a, nei up nop phiel sih uleh zong tua a nasepte beh um un. Tuaci’n note in keima sungah Pa omin kei zong Pa sunga ka op lamtah thei-in na telsiem ding uhi,” a ci hi. 39Tua ciengin amate in ama mat ding a hanciemkia vua, ahi vangin amau’ khut sung panun ama a suohta hi.
40Jordan gun kantanin ama peikia a, John in mite a baptize masahna munah tungin tuanah a om suoh hi.#Jhn 1:28 41Ama kungah mi tampi pei a, “John in lim lamdang a bawl lo vangin tam mipa tungtang John’ thu gen zosie man hi,” a ci uhi. 42Mi tampi in khum munah ama a um uhi.
सध्या निवडलेले:
JOHN 10: ZBOTF01
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Zo Bible © Bible Society of Myanmar, 2018.