Matana Enjil 5
5
Bag. 5.
1Jemachigi uru nalos jebelgir kujsum. Tegossinn aharro tenna hirani tekk abidi tale tosan. 2Tenn agilgi kusirgi akurkidirsum in werechiged:
3„Barkeburan newertiged fegiranbuli. Simechina mulki bitindanin. 4Barkeburan aoili. Mine tiri bitabetakkikandan. 5Barkeburan norogidted dali. Mine aridti biwirtekandan. 6Barkeburan origbuli wide eridbuli aleg abidi. Mine tiri biberkandan. Barkeburan arahmeli. 7Mine tiri birahimtakkikandan. Barkeburan a arokoni. 8Mine tiri artigi binalkandan. 9Barkeburan agendigrili. Mine artina toniandan. 10Barkeburan alen joro turbuli. Mine simechina mulki tindum. 11Barkeburun iri, irgi aïreirkran, wide turirkran, widegon indogochir were mili sudti mursiged wekran anna jiradilo. 12Gurewe, wide gurattiged eyewe. Mine inna kere bidulanin simechin tur. Ikke teran nebichigi inn owollo dareligi turirsan.“
13„Iri aridna umbud ter erun. Ama umbud on magaganoskin, minged tekki bumbudtirran? Werro nefaelankomnum, bochigir lufos zolin osichiged jakark anmenkin.“
14„Iri alamna dawi ter erun. Medine gunan dogor goibul abokimnum. 15Komsedigi ulos fuken togor aündurminan. Tudun dogor teran akujurran, kar dabul malegi dawer an. 16Ikke teran inna dawi ul agad zolin owollo, inna awdi serechigi nalw an, wide inn abo simer dalgi mejidew an.“
17„Inn ergir wemenwe sheriagongi nebiehigongi borkidirri an tasingi. Borkidiri an takomnim. 18Goiri an teran tasim. Mine ai irgi aleged wetidirrin, simegon aridton binogran. Ama sheriana were kinatodirton wer binogtakkimnum, male ta timenbokon. 19Wer on in sheriachirton habitoddekki borkidikin, wide zoligi ikke kurkidikin, edi kinay an simechina mulkin tur buwetakkin. Ama tekked awil wide kurkidil, inin tirti bidulankanin simechina mulkir.“
20„Aigon teran irgi awetidirrin, inna aley on abajilindigi wide Farisiehindigi nogmenkin, iri simechina mulkir bitokanmunun.“
21„Jri gijirkosun kurseligi wetidirtakkikosingi: ‚Bemen an. Belna tirtigon tendogor gadaya nogbun.’ 22Ama ai irgi awetidirrin, wer nutin timbeski batilged monil, tendogor gadaya wejbebun. Timbeski doshm an wetiril, tendogor gadaya dul wejbebun. Timbeski kafirm an wetirilgon jehenebn igki werisbun. 23Enna baidna gojirki gojarn agarro ebidann aharro, teddogon jilekin imbes endogor urti wekki kongi, 24teddokollo enna gojirki wakos, wide imbeskodon gendossinn aharro wide targi enna gojirki goj. 25Ekkon enna hasimgon shutte gendwe, darbir darungon, mine enna hasim ekki gadin ir undurmeningon. Gadigon ekki tenna gawasn ir bundurin, gawaskon habsir. 26Aleged ekki wetirrin, mandeton bibeltamnum fada ahardigi uskurmeningon.“
27„Iri gijirkosun kurseligi wetidirtakkikosingi: 28‚Soroskimen an.’ Ama ai irgi awetidirrin, wer nutin, en wekki urukin soroskiri an, tenna aged tekkodon soroskossum. 29Enna misi iyind on ekki atrekin, dukirgi eddeton lufosu. Mine ennai genum enna jitarton wer dabkin, enna jita male jehenebir lufe tosindogor. 30Won enna i iyindi on ekki atreri ankin, eddeton merrigi lufosu. Mine ennai genum enna jitarton wer dabkin, enna jita male jehenebir lufe tosindogor.“
31„Webugongenin: ‚Tenna engi mugil tenna mugarna bacchigi tir an.’ 32Ama ai irgi awetidirrin, wer on tenna engi mugkin, soroskanena masir, tekki asoroskirin. Mugbulgi edilgon soroskanegi aawin.“
33„Iri gijirbugongendu kurseligi webutidirsingi: ‚Jodti mursindigi jodmen an, ama enna baidigi artigi wafyer an.’ 34Ama ai irgi wetidirrin, kidir jodmenwe. Wala simeged jodmen. Mine artina tegarn agar teran. 35Wala aridted jodmen. Mine tenn osichina dawas teran. Wala Urushalimged jodmen. Mine or dulna medine ter engad. 36Wala enna urked jodmen. Mine er eskergi sir aro habbekki burumegirmunum, wala urumegi barogirmunum. 37Ama inna weregi eyo eyow anwe, wala ila ilah anwe. Inin dogor digrianil Iblisirtonum.“
38„Ir gijirsun webungi misi misiged engi, wide nelgon nelged engi. 39Ama ai irgi awetidirrin, sharigi agismenwe. Ekki enna jakum iyindin dogor jomilgi owittigi dairetir. 40Wer on ekki hasmadti weriskin, wide enna kadegi dukarki weriskin, shugagon mugtir. 41Wer on ekki saa wekki saheradti weriskin, tekkodon owigi tale. 42Ekki beddilgongi tiru. Ennaiton ewirtigi wersilgongi sudir widegirmen.“
43„Ir gijirsun webungi: ‚Enn awtindigi dol an, enna aduwigon tis an.’ 44Ama ai irgi wetidirrin, inna aduwichigi dolirw an, irgi anāleligi barkeirw an, irgi atisiligi tidirw an, wide indogochir miligi awiligon aturiligoni salitidirwe. 45Ikke awkurun, intimbab simer dalna toniandun. Minerg ankomnum, tenna masilgi abelkidin usigon adeligondogor. Wide annessigi ashugudin serechigon milichigondogor. 46Mine ir on irgi adoliligi dolkurun, inna adelkane minde? Won mekisn idi ikke aawmina? 47Won ir on imbesi agudechigi salameirkrun, inna genkane minde? Won umachi ikke aawmina? 48Ama iri kamilanwe, inn abo simer dal kamilen nawite.“
सध्या निवडलेले:
Matana Enjil 5: XNZ1912
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Published by the British and Foreign Bible Society in 1912.