Ntha 5
5
Musa na Aroni marî varî mûthamaki wa Misiri
1Musa na Aroni nîmaathiîre kûrî mûthamaki wa Misiri na makîmwîra atîrî, “Ngai-Mûnene, Ngai wa Isiraeli augîte atî, ‘Tiga andû akwa mathiî werûrî nîguo makathondeke îruga nîguo mangûngûîre.’ ”
2Nake mûthamaki nîwaûririe atîrî, “Ngai-Mûnene nîke ûû, na nînîmûthikîrîria nîkî na mbîtîkîrie andû a Isiraeli mathiî? Nie ndiîcî Ngai-Mûnene ûcio na ndingîtîkîria andû a Isiraeli mathiî.”
3Nake Musa na Aroni nîmaacokerie mûthamaki wa Misiri atîrî, “Ngai wa Ahibirania nî atumîrîrîte. Twîtîkîrie tûthiî rûgendo rwa mîthenya îthatû werûrî tûkarutîre Ngai-Mûnene, Ngai wetû îgongoona. Ethîrwa tî twîka ûguo, Ngai-Mûnene agaatûverithia na mûrimû kana mbaara.”
4Nwatî mûthamaki nîwerire Musa na Aroni atîrî, “Mue mûrenda kûgiria andû marute wîra wao nîkî? Nîmacoke onthe wîrarî wao! 5Mue andû a Isiraeli nîmwîngîvîte mûno gûkîra andû a Misiri na rîu mûrenda gûtiga kûruta wîra!”
6Mûthenya wa ûcio mûthamaki wa Misiri nîwathire anene a ngombo a Misiri na arûngamîrîri a Isiraeli na akîmeera atîrî, 7“Mûtigacoke kûvecaga andû rûûa rwa kûmba matuvarî, tiga andû mathiîcage gwîcarîria o ene. 8Na mwîgana wa matuvarî wa marîa mûndû araûmbaga nwa mo akûthiî na mbere kûmba, matikanyivanyivue. Matirî na wîra wa kwîgana na kîu nîkîo kîratûma mekara makîvoyaga rûtha rwa kûthiî kûrutîra Ngai wao îgongoona! 9Nîmavewe wîra mûnene makîria na matikarekwe magûtara nîguo matikathikagîrîrie maûndû ma maveeni.”
10Kwoguo anene a ngombo na arûngamîrîri nîmaathiîre na makîra Aisiraeli atîrî, “Mûthamaki wa Misiri auga ndagûcoka kûmûva rûûa rîngî. 11Ke auga atî mûthiîcage gwîcarîria rûûa mue ene wa kûrîa mûkarwona. Nwatî nwanginya mûmbe matuvarî megana wa ûrîa maraûmbaga mûkîvecagwa rûûa.” 12Kwoguo andû a Isiraeli nîmaathiûrûrûkire Misiri kuonthe magîcaragia rûûa. 13Nao anene a ngombo nîmeekaraga makîmaringagîrîria maûmbe matuvarî meengî wa mûthenya wata ûrîa maaûmbaga makîvecagwa rûûa. 14Anene a ngombo a Misiri nîmaarivaga arûngamîrîri a Isiraeli makîmaûragia atîrî, “Andû enyu mararega kûruta wîra wa kûmba matuvarî ta mbere nîkî?”
15Nao arûngamîrîri a Isiraeli nîmaavirire mateta mao kûrî mûthamaki wa Misiri makîmûria atîrî, “Nîkwa ûgûtwîka ûû nîkî tue ndungata ciaku? 16Tûtiravewa rûûa na nîtûrerwa tûmbe matuvarî. Nao andû aku marî na mavîtia na nîmaratûriva.”
17Nwatî mûthamaki nîwamacokerie atîrî, “Mue mûrî igûta na mûtirenda kûruta wîra na kîu nîkîo kîratûma mûmbûria mbîtîkîre mûthiî mûkarutîre Ngai-Mûnene kîgongoona. 18Cokani mûkarute wîra na gûtirî rûûa mûkaavewa. Nwatî nwanginya mûmbe matuvarî megana wata marîa mwaûmbaga mûkîvecagwa rûûa.” 19Nao arûngamîrîri a andû a Isiraeli nîmoonire atî maarî thînarî rîrîa meerirwe atî nwanginya maûmbe matuvarî wa mûthenya megana ta ûrîa maaûmbaga mbere.
20Na rîrîa maaumaga kwa mûthamaki nîmaacemanirie na Musa na Aroni. Musa na Aroni meetererete arûngamîrîri maume kwa mûthamaki. 21Nao nîmeerire Musa na Aroni atîrî, “Ngai-Mûnene nîonete ûrîa mwîkîte na nîakûmûtuîra nîûndû nîmûtûmîte mûthamaki na atongoria ake matûthûra. Nîmûmavete kîîgwatio gîa gûtûraga.”
Musa nîwatetire kûrî Ngai-Mûnene
22Nake Musa nîwacokire rîngî kûrî Ngai-Mûnene na akîmwîra atîrî, “Ngai-Mûnene, nîkwa ûravinyîrîria andû aku nîkî? Wandûmire gûkû nîkî? 23Nîûndû kuuma nathiî kûrî mûthamaki wa Misiri kwaria na rîîtwa rîaku, ke nwa kûvinyîrîria avinyagîrîria andû aya. Nawe Ngai-Mûnene gûtirî ûndû wîkîte wa kûmavonokia!”
सध्या निवडलेले:
Ntha 5: KKB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©Bible Society of Kenya, 2019