Kîam 38
38
Juda na Tamarû
1Îvindarî rîu Juda nîwatiganire na aa mûrwang'ina na akîthiî gûtûûrania na mûndû ûmwe wetagwa Hira, warî wa kuuma îtûûra rîa Adulamu. 2Juda arî kûu, nîwacemanirie na mwîrîtu ûmwe Mûkanaani. Nîwamûvikirie na akîmenyana nake kîîmwîrî. Îthe wa mwîrîtu ûcio eetagwa Shua. 3Mûka ûcio nîwagîre îvu na agîciara kavîcî. Juda nîwetire kaana kau Eri. 4Mûka ûcio nîwagîre îvu rîngî na agîciara kavîcî, na agîgeta Onani. 5Nîwacokire agîciara kavîcî na agîgatuîrîra rîîtwa Shela. Kavîcî kau gagîciarwa Juda aarî Akizibu.
6Juda nîwacarîrie Eri mwana wake wa îrikithathi mwîrîtu wetagwa Tamarû atuîke mûka. 7Nwatî mîtugo ya Eri yarî mîcûku na ndîakenagia Ngai-Mûnene, kwoguo Ngai-Mûnene nîwamûragire. 8Juda nîwerire Onani mûrwang'ina na Eri atîrî, “Thiî ûmenyane kîîmwîrî na Tamarû ûrîa ûratigirwe nî mûrwanyûkwe akua na wîke ûrîa kwagîrîrîte, nîguo ûciarîre mûrwanyûkwe ciana.” 9Nwatî Onani nîwamenyire atî ciana icio itîgaatuîka ciake. Kwoguo rîrîa rîonthe amenyana kîîmwîrî na mûka wa mûrwang'ina nîwetûrûraga vinya wa ûciari nthî nîguo ndagaciarîre mûrwang'ina ciana. 10Ûndû ûcio Onani eekire nîwarakaririe Ngai-Mûnene, na Ngai-Mûnene akîmûraga wanake. 11Juda nîwerire Tamarû mûka wa mûvîcî atîrî, “Coka ûgekare kwa aguo ûrî mûka wa ndigwa, nginya rîrîa Shela mûvîcîwa agaakûra.” Juda aamwîrire ûguo nîûndû nîwetigagîra akîona takwa Shela angîûragwa ta aa mûrwang'ina. Kwoguo Tamarû nîwacokire kwao.
12Vuvarî mûka wa Juda, ûrîa warî mwarî wa Shua nîwakwire. Rîrîa Juda aathiririe mîthenya yake ya gûcakaya, ke na mûrata wake Hira ûrîa Mûadulamu nîmaathiîre Timuna kûrî andû arîa meenjaga ng'ondu ciake guoya. 13Tamarû nîwerirwe nî mûndû atî îthe wa mûthuuriwe, nîwathiîte Timuna kwenja ng'ondu ciake guoya. 14Kwoguo nîwarutire nguo irîa ciîkagîrwa nî aka a ndigwa, na agîîkunîka ûthiû na gîtambaa. Nîwacokire akîthiî agîkara nthî kîvingorî Kîam îtûûra rîa Enaimu njîrarî ya kûthiî Timuna. Tamarû nîwamenyete atî mwanake ûrîa warî kîvinga nda Kîam Juda wetagwa Shela aarî mûgima na ndaanenganagîrwa kûrî ke nîguo amûvikie.
15Juda amwona eeciririe nî mûmaraa nîûndû Tamarû nîwekunîkîte ûthiû. 16Juda nîwathiîre kûrî Tamarû mûkîrarî wa njîra, na akîmwîra atîrî, “Ûka tûmenyane nawe kîîmwîrî.” (Juda akîmwîra ûguo ndaamenyaga kana nî mûka wa mûvîcî aaragîria.)
Nake Tamarû nîwamûririe atîrî, “Nîûmva ndûî nîguo mbûke tûmenyane nawe kîîmwîrî?”
17Juda nîwacokirie atîrî, “Nîngûgûtûmanîra koori kuuma kûrî ndîthia yakwa.”
Tamarû nîwamûririe atîrî, “Kûrî kîndû ûkûndigîra nîguo nîînyitagîre nginya rîrîa ûkaandûmanîra koori?”
18Juda nîwamûcokerie atîrî, “Nîndûî ûkwenda ngûtigîre?”
Tamarû nîwamwîrire atîrî, “Mûvûri waku na mûkathî waguo, na mûragi ûcio ûnyitîte.” Nake Juda Nîwamûvere indo icio eetirie. Nîmaacokire makîmenyana kîîmwîrî, na Tamarû akîgîa îvu. 19Nake Tamarû nîwaûkîrire akîthiî mûciî na akîruta gîtambaa kîrîa eekunîkîte ûthiû nakîo na agîkîra nguo îrîa îkagîrwa nî mûka wa ndigwa.
20Juda nîwatûmire Hira, Mûadulamu ûrîa mûrata wake akavire koori kûrî mûndûmûka ûcio nîguo oce indo irîa aamûtigîrîte. Nwatî Hira ndoona mûndûmûka ûcio. 21Hira nîwaûririe andû a îtûûra rîu atîrî, “Mûndûmûka mûmaraa ûrîa wekarîte ava rûtere rwa njîra ya Enaimu arî kû?”
Nao nîmaamûcokerie atîrî, “Gûtirî mûmaraa wanethîrwa arî ava.”
22Hira nîwacokire kûrî Juda na akîmwîra atîrî, “Nie ndinamwona. Wana andû a îtûûra rîu mambîrire atî vau vatîanethîrwa na mûmaraa.”
23Juda nîwacokirie atîrî, “Nîekare nacio tûtanecambithia. Ngûtûmire ûmûvirîre koori karîa twarîkanîre nake nwatî ndûnamwona.”
24Vuva wa mîeri îthatû Juda nîwerirwe atîrî, “Tamarû mûka wa mûvîcîguo ethîrîtwe akîvûra ûmaraa, na rîu arî îvu.”
Juda nîwathanire akiuga atîrî, “Mûruteni nja ya îtûûra na mûmûvîvie.”
25Rîrîa aarutagwa nja, nîwatûmire mûndû kûrî îthe wa mûthuuriwe akîmwîra atîrî, “Mwene indo ino nîke ûmbîkîrîte îvu. Taroriani mûvûri ûyû, mûkathî, na mûragi ûyû mwone kana nîmûkûmenya nî cia û.”
26Juda nîwamenyire indo icio na akiuga atîrî, “Tamarû nî mûthingu kûngîra, nîûndû nînie nîraregire kûmûnenganîra kûrî mûvîcîwa Shela.” Juda ndaacoka kûmenyana kîîmwîrî nake rîngî.
27Rîrîa kavinda gake ga gûciara gaakinyire, nîkwamenyekire atî aarî na twana twa mathatha îvurî. 28Rîrîa twana tûu twaciaragwa, kamwe ga tuo nîkaarutire njara îmwe. Nake mûndû ûrîa wamûtethagia gûciara nîwocire rûrigi rûtune na akîrwoverera njararî yake, na akiuga atîrî, “Gaka nîko gaciarirwe mbere.” 29Nwatî nîgaacokirie njara yako ndaarî wa rîmwe, nako kau kengî gakiuma. Nake mûndû ûrîa wamûtethagia gûciara nîwaugire atîrî, “Nîwavota gwîtûrîra njîra e!” Kwoguo kaana kau nîgaatuîrîrwe rîîtwa Perezi.#38.29 Perezi: Rîîtwa rîrî na Kîhibirania riugaga, “gûtûrîkania.” 30Nake mûrwang'ina ûrîa warî na rûrigi rûtune njararî nîwacokire agîciarwa na agîtuîrîrwa rîîtwa Zera.#38.30 Zera: Rîîtwa rîîrî rîguîkaga ta rîîtwa rîa Kîhibirania rîrîa riugaga, “ûkengu mûtune wa gûgîkîa.”
सध्या निवडलेले:
Kîam 38: KKB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©Bible Society of Kenya, 2019