Mattheos 5
5
1Unkan wicota wanwicayaka hehan paha wan ekta iyaya; qa hen iyotanka hehan waonspewicakiye cin en hipi.
2Unkan i hdukawa qa waonspewicakiye c̣a heya;
3Tona cante mahen onśiic̣idapi kin hena wicayawaśtepi ce; maḣpiya wokiconze kin he tawapi ece.
4Tona ceyapi kin hena wicayawaśtepi; hena wicakihnapi kta.
5Tona onśiḣanpi kin hena wicayawaśtepi; maka kin de tawapi kta.
6Tona woowotanna on wotektehdapi qa ipuzapi kin hena wicayawaśtepi ce; hena imnanpi kta.
7Tona waonśidapi kin hena wicayawaśtepi; hena onświcadapi kta.
8Tona cante en ecepidan kin hena wicayawaśtepi; hena Wakantanka wanyakapi kta.
9Tona wookiye kagapi kin hena wicayawaśtepi; hena Wakantanka cinca ewicakiyapi kta.
10Tona woowotanna econpi kin on śicaya kuwapi kin hena wicayawaśtepi; maḣpiya wokiconze kin he tawapi ece.
11tohan aniiapi qa śicaya nicuwapi, qa miye on itonśniyan taku śica owasin eniciyapi kinhan, niyawaśtepi ece.
12Wiyuśkinpi qa nina cante waśte po, maḣpiya ekta ocinyopeniyanpi tanka yanka; wicaśta wokcan nitokam unpi qon hena iś eya hecen wicakuwapi qon.
13Maka miniskuya kin he niyepi. Tuka miniskuya kin he skuye śni kinhan taku e on skuyeyapi kta he; hetanhan takudan okihi kte śni, tankan eḣpeyapi kta qa wicaśta amanipi kta.
14Oyate iyoyanpa kin he niyepi. Otonwe wan paha akan kagapi kin he anaḣbepica śni ece.
15Nakun petijanjan ideyapi qa koka oḣdateya iyeyapi śni, tuka petijanjan ihupa wan en ośtanpi, hecen tipi kin ohna owasin iyoyamwicaya ece
16He iyecen wicaśta itokam iyoyanpa nitawa iyojanjan kta, hecen wicoḣan waśte nitawa wanyakapi kta, qa maḣpiya ekta ateyayapi yanke cin he yuonihanpi kta.
17Woope qa wicaśta wokcan kin mdutakuni kte śni on wahi kecinpi śni po, ihangyapi on wahi śni tuka yuecetupi kta on.
18Awicakehan heciciyapi; Maḣpiya qa maka kin atakuniśni eśta, oowa wanjidan qa oehnake wanjidan woope kin etanhan icupi kte śni, owasin ecetu kta.
19Heon etanhan, tuwe woahope kin dena wanji cistinna ahope śni, qa hecen wicaśta onspewicakiye cinhan, he maḣpiya wokiconze kin en iyotan cistinna yawapi kta; tuka tuwe ecen econ qa iyecen waonspewicakiye cinhan, he maḣpiya wokiconze kin en tanka yawapi kta.
20Miye heciciyapi ce; Wicoowotanna nitawapi kin, wowapi kagapi qa Pharisee tawapi kin isanpa tanka śni kinhan, maḣpiya wokiconze kin en ecaca oyapapi kte śni.
21Tuwedan yakte kte śni, hunkawicayapi kin eyapi keyapi nayaḣonpi; qa tuwe tin wicakte kinhan he yacopi kta ce.
22Tuka miś heciciyapi; Tuwe taku on etanhan śni sunkaku śicekidake cinhan he yacopi kta; qa tuwe sunkaku, Waḣteśni, eciye cinhan he omniciye tanka kin en ayapi kta; qa tuwe, Winitkotkoka, eciye cinhan, he Wakanśica tapeta kin en iyoḣpeyapi kta iyececa.
23Heon etanhan wośnapi nitawa owayuśna kin ekta ayahi kinhan, qa hen nisunka taku iyanionpa he yeksuya hecinhan;
24Ito wośnapi nitawa owayuśna kin itokam ehnake c̣a ekta ya wo, tokaheya nisunka kici okiciciye c̣a hehan ku qa wahduśna wo.
25Tuwe taku en aniu hecinhan he kohanna kici okiciyuwaśte wo, canku ohna kici yaun kin icunhan; okinni wayaco ekta aniye kta, qa wayaco kin iś akicita en aniye kta, qa hecen kaśka nihnakapi kta:
26Awicakehan heciciya; Tohanyan mazaśadan ehake yahdajuju śni kinhan hetanhan tankan yaku kte śni
27Wawiciḣaḣapi ecanon kte śni, hunkawicayapi qon eyapi keyapi nayaḣonpi.
28Tuka miś heciciyapi; Tuwe winoḣinca wan en etonwe c̣a cantiheye cinhan he wanna cante ekta kici Wawiciḣaḣapi econ.
29Niiśta etapa eciyatanhan kin he waḣtaniniye cinhan hduśdoke c̣a eḣpeya wo; niiśta wanji atakuniśni kinhan he waśte kta, qa tancan ocowasin Wakanśica ti kin en ehpeniyanpi kte śni.
30Qa ninape etapa kin waḣtaniniye cinhan hdakse c̣a eḣpeya wo; nihuha wanjidan atakuniśni kinhan he waśte kta, qa tancan ocowasin Wakanśica ti kin en iyoḣpeniyanpi kte śni.
31Tuwe tawicu eḣpekiye kta hecinhan kpaganpi wowapi wan qu kta, keyapi qon.
32Tuka miś heciciyapi; Tuwe tawicu eḣpekiya, wawiciḣaḣapi econ kin on etanhan śni, he wawiciḣaḣapi econkiya ece; qa tuwe winoḣinca eḣpeyapi kin he yuze cinhan he nakun wawiciḣaḣapi econ ece.
33Akeś hunka wicayapi qon heyapi keyapi nayaḣonpi; Itonśni nic̣icage kte śni, tuka taku konza Itancan kin eyakiye cinhan hena yahduecetu kta ce.
34Tuka miś heciciyapi; Taku cajedate c̣a he namaḣon ce, eye śni wo; maḣpiya kin he hecen cajedate kte śni, he Wakantanka oiyotanke tawa kin hee.
35Qa nakun maka kin de, he Wakantanka siha oahe kin ee; qa nakun Jerusalem hecen cajedate kte śni, Wicaśtayatapi tanka totonwe kin hee.
36Qa nakun nipa kin he caje yahdate kte śni, paha wanjidan kaeś ska qa iś sapa yakage kta oyakihi śni, heon etanhan.
37Tuka taku ehe cin, Han, han; Hiya, hiya, ecedan kta; taku dena sanpa kinhan he taku śica etanhan icage kta.
38Iśta wanji iśta wanjidan on etanhan, qa hi wanji hi wanjidan on etanhan, keyapi nayaḣonpi.
39Tuka miś heciciyapi; Taku śica tokic̣onpi śni po; tuka tuwe tapon etapa eciyatanhan anipe cinhan unma eciyatanhan kipazo po.
40Qa tuwe woope on niyaco qa onḣdoḣda nici kta cin kinhan, nitaśina nakun teḣinda śni wo.
41Qa tuwe wiyutapi hanska wanji hehanyan kici yeniye kta hecinhan, nom kici ya wo.
42Tuwe taku nicida kinhan qu wo; qa tuwe wonicidota hecinhan etanhan ihdamna śni wo.
43Tuwe nikiyedan un kin he waśteyadake kta, qa tuwe tokaniye cin he śiceyadake kta, eyapi qon nayaḣonpi.
44Tuka miś heciciyapi; Tona tokaniyanpi kin hena cante wicakiya po; qa tona niyaśicapi kin hena wicayawaśte po; tona śicenidapi kin hena taku waśte ecawicakicon po; qa tona taku i en iyeniyanpi qa teḣiya nicuwapi kin hena wecekiye ewicakiciya po.
45Hecen Ateyayapi maḣpiya ekta un kin he cincaniyanpi yaunpi kta; he qe anpetu wi tawa kin wicaśta śica wicaśta waśte ko en awicahinanpeya ece, qa wicaśta owotanna owotanna śni ko awicamagajuya ece.
46Tona waśtenidapi kin hena waśte wicayadapi kinhan wokajuju taku duhapi he; wamnayanpi kin hena eepi kaeś heconpi śni he.
47Qa aunka wicayayapi kin henana napewicaduzapi kinhan, taku econpi ece sanpa tukte e ecanonpi he; wamnayanpi kin hena eepi kaeś heconpi śni he.
48Heon etanhan Niyatepi maḣpiya ekta un kin he owotanna ḣinca he iyecen niś eya owotanna ḣinca un po.
सध्या निवडलेले:
Mattheos 5: DAKOTANT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Copyright 2015 American Bible Society. All Rights Reserved.