1 Musa 6
6
Kejahaten jelma
1Enggo kessa makin mbuè jelma janah mersèrak mi suberri tanoh èn, janah mertubuhen daberru, 2nai idah dukak-dukak daholi Dèbata mo mberru ngo simerbaju i. Nai ikabini kalak i mo simerbaju kekelengen atèna. 3Nai mongkam mo Dèbata, “Oda Kupadiat nggelluh jelma i soh mi amman sumendah, ai persigejapen ngo kalak i, janah kennah matè. Mulai bagèndari nai oda ndorok lebbih umur kalak 120 tahun.” 4#4 Ms. 13:33 Tikanna i dekket enggo kessai lot ngo jelma i bagè ntuara i tanoh èn. Kalak i ngo pemparen simerbaju sinikabinen dukak-dukak daholi Dèbata i. Kalak èn mo pakalima-pakalima bak sitermurmur tikala sinderbi.
5 #
Mat. 24:37; Luk. 17:26; 1 Ptr. 3:20 Idah Dèbata ngo bakunè jahatna jelma i tanoh èn, karina sura-surana dak ngo jahat. 6Peselsel ngo Ia menempa kalak i janah memaingsa merian i tanoh èn. Soh mo iakap bonekna 7gabè nina mo, “Kuripasken mo jelma sienggo Kuhanaken i, bagi dekket manuk-manuk bak binatang sidèbanna i, kerna enggo Kuselselli diringKu menghanaken kalak i.” 8Tapi ukum si Noak, pesennangken atè Jahowa ngo.
Si Noak
9-10 #
2 Ptr. 2:5
En mo sukuten tersèngèt si Noak. Tellu ngo anakna, imo si Sem, si Ham dekket si Jafet. Oda lot salah pengelako si Noak, ia mo kessa selloh pengelakona tikan i nggelluhna. Mendè ngo persaorenna dekket Dèbata. 11Tapi karina jelma sidèbankenna i, jahat ngo idah Dèbata, janah kejahaten enggo selli masa barang i dikè sambing. 12Idah Dèbata mo dunia èn enggo dom kejahaten, ai karina ngo jelma i jahat.
13Nai nina Dèbata mo taba si Noak, “Enggo tutus ukurKu mengeripasken karina singgelluh. Naing Kuripasken ngo kalak i karina bak tanoh èn, ai enggo idomi kejahaten kalak i. 14Bahan mo sada keppel ntegguh ipas kayu ngkong nai bamu; baing mo merbilik-bilik ibagasen, janah daloh mo dekket tèr i ruar bak i bagasen pè. 15133 mèter mo baing geddangna keppel i, 22 mèter bellangna, janah 13 mèter datesna. 16Mersaong mo baing keppel i, janah baing mo 44 sentimèter kellang-kellang saong dekket dingdingna. Tellu tèngkat mo baing keppel i, janah bahan mo sada pèntu i bidingna. 17Ai naing Kuperoh mo laè mengeraja lako mengeripasken karinana singgelluh i tanoh èn. Ripas mo karinana silot i tanoh èn. 18Tapi ukum taba kono naing Kubaing mo perpadanen. Bengketti mo keppel i rebbak dekket sinibagesmu, bagi ma dekket anakmu bak sinibages kalak i. 19-20Arak mo mi keppel i gennep matcam manuk-manuk bak binatang-binatang simpasang simpasang, asa ulang ripas kalak i. 21Pèmaken ma mo karina matcam bagè panganen bamu dekket bai binatang-binatang i.” 22#Heb. 11:7 Nai ibaing si Noak mo karina nidokken Dèbata bana.
सध्या निवडलेले:
1 Musa 6: LAIBTD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)