NƐHIMAYA 6
6
Kava Hugbatɛngɔisia Nɛhimaya va
1Kiahuna kia Sanibalati, kɛ Tobaya, kɛ Gɛsɛmi Alabimɔi kɛ mu gɔnyɔuisia kpɛlɛɛ ti ndeni ti ma kɛ ngi bundi loonga tawao foleima gbi ii yɛ ma (kia bɛ a watii na ngi yɛ nɛteisia hɛlɛni yee gɔlɔ lameisia ma), 2Sanibalati kɛ Gɛsɛmi ti too weilɔ nya gama tɛɛ, “Wa tawao mu gomɛ a lenga fuleisia yee ngila hu Ono bulu lɔɔlei ma.” Kɛɛ ti ngililɔ nyamu va a nge. 3Fale ngi tutunga loilɔ ti gama, ngɛɛ, “Nya ngenge waa wiema tawao ngɛɛ ngu a yei la. Gbɛ va lɔ ngengei a gbe a wie la ji nga gbe ma wa va wu gama?” 4Ti too weilɔ nya gama heima naani a pelei ji hu wee tawao ngi ti gbɛmboilɔ a yee pelei na hu wee. 5Yee pele yakpei na hu wee Sanibalati hema yee lɔɔlui hu i ngi bɔilopoi yoyonilɔ nya gama kɔlɔ nyeingɔ lawongɔ ngi yeya. 6Nyɛingɔ yɛla hu yɛɛ, “Ti ndeilɔ kɛnyɛisia lia tawao Gɛsɛmi bɛ ndeilɔ yɛ bia kɛ bia kɛ Juubleisia wua ngilima a nganga la; na va mia wu bundi loo ma; tawao ndaloongɔ ngowili ji ma bi longɔ bi wote a ti mahei. 7Bi loko loonga kulɔmayialebleisia ma nde va Jelusalɛmi gohu kɔloongɔ bi ma bɛɛ, ‘Maha lɔ Juda!’ Kɛ kiahuna ba nde lɔ mahei ma kɔlooni njɛpɛi jisia ma. Fale wa naa, mu wuhitɛ.” 8Na wooma ngi too wienilɔ ngi gama ngɛɛ, “Hindei ji bonda bi ndenga ii yaa wieni; bi kpuama bi nɛmahulɔ.” 9Ajifa ti kpɛlɛɛ ti longɔ yɛla ti mu huluwa, ta ngilila, tɛɛ, “Ta gbahaŋ lɔ ngengei ma, tawao ɛɛ ngu a wie la.” Kɛɛ kiahuna O Ngewɔ kaahu ve nya wɛ.
10Folo yila ma ji ngi lini Sɛmaya, Delaya hindoloi, Mɛhɛtabɛli hindoloi yee pɛlɛ bu, na ngi magbangɔ yɛla ngi yee pɛlɛ bu. I ndeilɔ yɛɛ, “A mu gomɛ a lenga Ngewɔ wɛlei bu, hɛ wɛlei gohu tawao mu yee hɛ wɛlei lameisia gbɔwu, gbamaile tia wama bi waa va; a tɔnya kpindii ji tia waa ma bi waa va.” 11Kɛɛ ngi ndeilɔ ngɛɛ, “Nya nyikɔ bonda nga leweilɔ a pimɛ? Nya bonda nga lilɔ hɛwɛlei bu kɔɔ ngi ngi lɛvui mabawo? Ngɛɛ lii na!” 12Na wooma ngi lii henilɔ ma kɛ ngi tɔnga kɛɛ Ngewɔ ii yɛ ngi loni kulɔ bɛ, kɛ i kulɔmaya lenga kɔlongɔ nya ma, ajifa Tobaya kɛ Sanibalati ti yɛ ngi pawanga. 13Ti ngi pawani hindei ji lɔ va, kɔ ti nya huluwa tawao ti pie ngi jumbu wie a pelei ji hu wee, kɛ fale ti biyɛ nyamu ve nya wɛ, kɔɔ ti baagbua nya ma. 14Ngili a Tobaya kɛ Sanibalati O nya Yewɔi kɔloongɔ hindei jisia ma ti pieni, ngili gbɔma a nyapɔi nyaha Yewɔ yialemɔi Noadaya kɛ kulɔmayialeblaa wekeisia nasia ti longɔ yɛla ti nya huluwa.
Ngengei Gbɔyɔlei
15Fale bundi loolei i gbɔyɔilɔ Eluli yalui hu yee ji numu fele gbɔyɔngɔ mahu puu mahu felei ma. 16Tawao ji mu gɔnyɔuisia kpɛlɛɛ ti humɛnini kɛnyeisia gbi mu galangɔ ti luwangɔ yɛla kɛ ti gulanga gufe waa hu; gbamaile ti ngililɔ la kɛ ngengei ji i gbɔyɔnga mu Yewɔ gbayei hu lɔ. 17Tewengɔ na ma foloi nasia ma Juda jamangeisia ti kɔlɔ gboto yoyonilɔ Tobaya gama tawao Tobaya gɔleisia ti wailɔ ti gama. 18Gbamaile numu gbotoma ti yɛ Juda ti gbɛlɛngɔ yɛla Tobaya ma a lahedi hu wee, gbamaile ngi mblei mia yɛla a Sɛkanaya Ala hindoloi: kɛ ngi hindoloi Jɛhohenani i yɛ Mɛsulami nyahaloi wumbunga a ngi nyahala Bɛlɛkaya hindoloi. 19Kɛ gbɔma ti yɛpɛlɔ a ngi hinda yekpeisia nya ngulɔ, kɛ ti nya yɛpeisia hugɛnga a ngie. Kɛ Tobaya kɔlɔngaa yoyonga nya huluwa va.
सध्या निवडलेले:
NƐHIMAYA 6: RMB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Mende Bible Portions © Bible Society in Sierra Leone and Lutheran Bible Translators, 2020.