John 7
7
Jesus Utà Utalettàntok Yak
1Sàlà tùpo Jesus utàppù Galilee yawàlà, Judea yawà iitàppù pen masapùla molon kon nà Jew yamùk wechippù imàmuku pàk iwàtoppe tùuya'nokon. 2Màlà yattai Jew yamùk Uta'lettàtok winàkàik iwechippù tapùi pe lùkkwà yamùsak tau'ne. 3Màlàyau Jesus yakon non uya ipàk, “Talà kechii, Judea pona itàkà, molo enenupa ton uya eke pe ewe'wotokoma yentoppe. 4Ànù'là uya tonantau yà'làlà kusak pùla man, tùttu iche echii'ma. Màlàpàk sàlà yamùk kupù auya yau, tàwà wolù yawon kon kappon yamùk uya eyittutoppe ikukkà!” teppù. 5Masapùla yakon non uya là ailon te pùla iwechippù ipàk. 6Màlàpàk Jesus uya tok pàk, “Uweyu uyàssak pùla lùppù man, tùse eweyu kon màlà tàwàlàlà molonnà. 7Wolù yawon kon uya tewanma kon pe àkupù kon pen màlà, tùse tewanma kon pe tok ukussan masapùla tok nùkupù pàk àli pe iwechi màlà teuya pàk. 8Uta'lettàntok yak uchi itàtàk kon. Masa utà pùla man (sàlà pe kulu), masapùla uweyu uyàssak pùla lùppù man,” teppù. 9Wate tùpo, iwà'nàmàppù Galilee po.
10Tùse takonnon utàppù Uta'lettàntok yak ye'mappùtak, Jesus utàppù nàlà. Kappon yamùk uya ittu pùla amak yai iitàppù. 11Màlàyau Jew yamùk wechippù yeneiche Uta'lettàntok yau, “I'nai ken mùkkàlà?” teppù tok uya. 12Tukkan kon kùlottau ipàk tùuselupasan wechippù, “Wakù nen mùkkàlà,” tukaik. Tùse tùulon kon uya, “Kane, kappon yamùk yennakanài mùkkàlà,” teppù. 13Tùse ànù'là uselupappù kappon yamùk kùlottau ipàk pen, masapùla Jew yamùk yepulu ton pàk tok usenalipappù.
14Uta'lettàntok yakletapailà là iwechi tùse Jesus wewomùppù Katù yùwùk tak, kappon yamùk yenupa pàk iwepyattàppù. 15Jew yamùk usenumenkappù kulu, màlàyau tok uya, “Yà'là kasa kulu ken pùsàlà màlà yamùk ittuyan tùusenupa tùpo pùla?” teppù.
16“Enupantok uya sàlà uyiwalok pen, tùse mùkkàlà uyeuno'nàippù winàpaino,” teppù Jesus uya tok pàk. 17“Ànù'là Katù yeselu ànkuppai tùwessen wechi yau, ittu ya màlà, enupantok uya wechi Katù winàpaino pe wapùla uwinàpaino pe,” teppù Jesus uya. 18“Mùkkàlà tùyiwalà tùnkupù pàk tùuselupasen, tùnamatok yepotoppe tùuya, tùse mùkkàlà teuno'nàippù namatok ponaloppe ne'wotokomayai'nùk mùkkàlà ailon kulu, kasei pùla iwechi màlà yau. 19Moses uya kenna' law tùlùppù eyemyakù'nokon pen? Ànù'là uya amyamlo kùlottau ikupù pùla man. Yà'là pe ken iwechi pàk uwànàiche ewechi kon nai'nùk?” teppù Jesus uya. 20Màlàyau kappon yamùk uya Jesus pàk, “Àli akkwalù wechi màlà ayau. Ànùk ken uchi àwànàichi nai?” teppù. 21Jesus uya tok maimu yeikuppù, “Tewinanà eke wotoko tùkuttai, màlàyau eusenumenkasak kon kulu nettai. 22Moses uya ikupùppù walawok muleppù yattàtoppe, Jew yamùk usattàtok yawàlà pe Moses kulu nùppyattàppù pennà tùse atamo kon yamùk làkku, màlàpàk walawok muleppù yattà màlà Wàlàka'nà weyu yattai. 23Mule yattà màlà Jew yamùk Wàlàkapù weyu yattai Moses winàpaino Law ikkwàtù tukaik. Tùse ken na' uchi Wàlàka'nàtok yattai tamù'nawàlà kàyik ipittàsak uya wenai upàk ewe'naika kon nai'nùk? 24Kappon pàk àli pe suwa messaik kùkai iichensak pàk neken, tùse ailon pe ittutàk kon, ” teppù Jesus uya.
Pùsàlà Na' Mùkkàlà Christ?
25Màlà yattai tùulon kon kappon yamùk Jerusalem pon kon uya, “Pùsàlà pen ken na' mùkkàlà tok wettok iwànàiche?” teppù. 26“Mùkkàlà, mùkkàlà! tamù'nawolon kon yemlotopo ichelupa molopai yà'làlà te tok uya ipàk pùla. Itepulu yamùk uya ken na' ailon tekassak màlà pùsàlà wechi Christ pe pàk? 27Tùse ittu'nokon man i'nai motapaino pe là pùsàlà kàyik wechi. Tùse Christ uyàssak yau ànù'là uya i'nai motapai là iyàssak ittu pen,” teppù.
28Màlàyau enupan lùppù tùuya Katù yùwùk tau yau Jesus wentaimeppù, “Ewaik, kùyittuyatàik, molopai i'nai motapaino pe wechi mùttuyatàik. Uyiwalà pùla talà wechi sàlà, tùse mùkkàlà uyeuno'nàippù mùkkàlà ailon. Mùkkàlà ittu auya'nokon pùla man. 29Tùse mùkkàlà tùttuyaik masapùla ipyapai uyàssak pàk. Molopai uyeunossak ya pàk,” tukaik. 30Màlàpàk kulu anachipai tok wechippù, tùse ànù'là uya temyatù tùlùppù ipàk pen, masapùla iweyu uyàssak pùla lùppù iwechi pàk. 31Walà tùse tukkan kon uya ailon teppù ipàk. “Tùuyàssak yau ken na' Christ uya pùsàlà kàyik uya ikupùppù yentai lùiwa ittutok ipàkàlà kupù?” teppù tok uya.
32Màlàyau Pharisee yamùk uya kappon yamùk usàulàma ipàk yetappù. Màlà yattai Eke ton paatele yamùk yepulu ton molopai Pharisee yamùk uya achinnan yeunokoppù yachiik. 33Jesus uya tok pàk, “Masa malalà apyau'nokon wechi sàlà molopai wennapo màlà uyeuno'nàippù piyak. 34Uyiwa auya'nokon màlà tùse uyepolo auya'nokon pen. Molopai utàyai'nùk yak àutà kon pen màlà,” teppù Jesus uya. 35Jew yamùk usekamappopàtùppù tùyiwalà'nokon, “I'nai motak ken uchi pùsàlà kàyik utà pe iwechi màlà, tepolo pùla iwettoppe, kùtonpa kon ka' Jew yamùk Greek yamùk kùlottak iwetta'nùssak kon kùlottak lù, Greek yamùk yenupaik? 36Yà'là te ya ken uchi màlà, ‘Uyiwa auya'nokon màlà tùse uyepolo auya'nokon pen. Molopai utàyai'nùk yak àutà kon pen,’ nùkayai'nùk?” teppù Jew yamùk uya.
Wema'nàtok Tunakkwa
37Tewinan nùppù molopai eke kulu Uta'lettàn weyu yattai Jesus we'wuluukappù, molopai iwentaimeppù eke pe, “Ànù'là tùwe'nakklipasen wechi yau, tàwà nùyàpùi upyak uwuku inchiik! 38Katù Maimu uya yekamasak yawàlà, Mùkkàlà ailon tawon upàk yewan yapai màlà wema'nà tunakkwa u'ma,” tukaik. 39Wate tùuya yau ichelupappù màlà Akkwalù pàk, tùpàk ailon tawonnan nepolo woton pàk. Màlà tepose Akkwalù tùsak pùla lùppù iwechippù masapùla Jesus wuluukappù pùla iwechi pàk tùnamatok patassek yak.
40Iichelupa yetasak tùuya'nokon yau, tùulon kon kappon yamùk uya “Ailon pe làichi Katù Maimu yenpoikanài pe iwechi pe man,” teppù. 41Tùulon kon uya, “Christ nen mùkkàlà,” teppù. Tùse tùulon kon uya, “Yà'là kasa ken uchi Christ uyàpù Galilee yapai,” teppù. 42“Katù Maimu uya na' yekamasak pùla nai, David payan winà Christ uyàttok woton, David wemattok yau pata Bethlehem yapai tukaik?” teppù tok uya. 43Màlàyau echi yewan kaichalà pùla Jesus pàk tùusenumenkatok kon yau tok wechippù. 44Tùulon kon wechippù anachipai tùse ànù'là uya temyatù tùlùppù ipàk pen.
Ailon tetok pùnon Jew Yepulu yamùk
45Achinnan wennapopù, paatele yamùk yepulu ton molopai Pharisee yamùk piyak. Màlàyau, “Yà'là pe ken uchi iwechi pàk Jesus nepù auya'nokon pùn?” tukaik tok yekamappoppù tok uya. 46Achinài nan uya tok maimu yeikuppù, “Ànù'là uselupasak pùsàlà kàyik kasa pùla man,” tukaik. 47“Amyamlo nàlà ken na' yennakai?” tukaik Pharisee yamùk uya tok yekamappoppù. 48“Ànù'là ken na' ina yepulu, wapùla tewinan nà Pharisee yamùk kùlottawon uya ailon tesak ipàk nai? 49Kane! Tùse pùsamlo ilinà kappon yamùk Law ittunnan pen wechi màlà Katù uya pa'nù'nàtok yo'no,” teppù Pharisee yamùk uya. 50Nicodemus wechippù molo tok tonpa pe. Wapiya Jesus piyak iitàsak lùppù. Mùkkàlà uya yekamappoppù. 51“Kùmàlà'nokon Law yau ànù'là talumattàtok pùla man yà'là pe là iwechippù yeta, molopai ittu tùpo pùla,” tawon, teppù. 52Tok uya imaimu yeikuppù, “Àmàlà nàlà na' mùkkàlà Galilee poino? Katù Maimu yau mùwaik kulu molopai yene auya màlà Galilee yapai tùuyàpù woton Katù Maimu yenpoikanài tesak ya pùla iwechi,” tukaik. 53Tamù'nawolon kon wemeikuppù tùwùk kon tak.
सध्या निवडलेले:
John 7: PNTR
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Patamuna New Testament Revised © United Bible Societies, 1973, 2019.