John 9
9
Jesus Uya Kàyik Enpùla Iwentusak lùppù Ipittà
1Tùutà yau, Jesus uya enpùn kàyik yeneppù tùwentuppù motapaino. 2Inenupa ton uya yekamappoppù, “Ticha, ànùk wemakuimasak pàk ken màlà enpùla pùsàlà kàyik wentuppù, pùsàlà ka'lù wapùla ikàipùnù, ichan tawonnan?” tukaik. 3Jesus uya tok maimu yeikuppù, “Pùsàlà kàyik wapùla ikàipùnù, ichan tawonnan wemakuimasak pàkànsau pùla là, tùse Katù meluntàlù usenpoikatok yai pe iwechi màlà. 4Uyeuno'nàippù wotokoyi kupù'nokon sàlà akkwa pe iwechi kùlottau. Ewalupà nùyàssan ànù'là we'wotokomatok yattai pen. 5Sàlà wolù po wechi kùlottau, Iulà mùkkàlà wolù weyu,” tukaik. 6Wate tùpo, Jesus wetattappù non pona. Non kùloimappù ya tetaku ke. Molopai itùlùppù ya enpùn kàyik yenu pona. 7Màlàyau ipàk, “Itàkà, ikolùkata Siloam itesek tuna kak,” teppù ya. Sàlà uya ‘yeunossak’ te pe iwechi màlà. Màlàyau iitàppù ikolùkappù ya, molopai iwemeikuppù pata nen uchi tense.
8Itonpa yamùk molopai tùulon kon wapiya enkui pe iwechi yennàinanùssan uya, “Pùsàlà ken na' mùkkàlà kàyik chichiu pe echii'ma enkui pe iwessak lùppù pen?” teppù. 9Tùulon kon uya, “Pùsàlà mùkkàlà,” teppù. Tùse tùulon kon uya, “Kane, mùkkàlà kasa neken iichensak man,” teppù. Kàyik uya, “Iulà mùkkàlà,” teppù. 10Màlàpàk tok uya ipàk, “Yà'là kasa ken uchi eyenu nùtakkokatai?” teppù. 11Tok maimu yeikuppù ya, “Kàyik nen, Jesus itesek, non kùloimatai molopai uyenu pàk nùki'matai molopai upàk, ‘Itàkà, tuna Siloam kak ikukata!’ nùkatai. Màlàyau utàtai ikukaik molopai nen uchi tentai,” tukaik. 12Tok uya ipàk, “I'nai ken uchi mùkkàlà?” teppù. “Ittu uya pùla man,” teppù ya.
13Tok uya mùkkàlà kàyik enpùla echippù nepùppù Pharisee yamùk piyak. 14Jew yamùk Wàlàkkattok weyu yattai màlà Jesus uya non kùloimappù molopai enpùn yenu yakkokappù. 15Màlàyau tukka Pharisee yamùk uya yekamappoppù, “Yà'là kasa ken uchi eyenu nùtakkokatai?” tukaik. Màlàyau tok pàk, “Kàyik uya non kùloimasak tùlùppù uyenu pona, màlà kukappù uya molopai yeneppù uya,” teppù ya. 16Tùulon kon Pharisee yamùk tonpa uya, “Pùsàlà kàyik wechi Katù winàpaino pe pùla man, masapùla Wàlàkka'nàtok weyu yeselu yawàlà pùla iwessak pàk,” teppù. Tùulon kon uya, “Yà'là kasa kulu ken uchi kàyik tùmakuyi yau tùwessen uya ittutok ipàkàlà kupù?” teppù. Ekkaichalà pùla tok usenumenkatok wechippù.
17Tok uya tukka kàyik yekamappoppù, “Yà'là mùkayan ken eyenu yakkokanàippù pàk?” tukaik. “Katù Maimu yepoikanài nen mùkkàlà,” teppù ya. 18Jew yamùk yepulu yamùk uya lùppù ailon te pùla iwechippù pùsàlà kàyik enpùla iwessak lùppù wenasak pata yennài pe pàk. Ikàipùnù, ichan tawonnan kà'mà tùuya'nokon ponalà. 19Màlàyau tok uya tok yekamappoppù, “Pùsàlà ichi mùkkàlà emle kon, enpùla iwentusak mùkatantàunùk? Atta nen ken uchi sàlà pe yene ya nai'nùk?” tukaik. 20Ikàipùnù, ichan tawonnan uya tok maimu yeikuppù, “Ina nùttuyan pùsàlà ina mule, enpùla iwentusak lùppù. 21Tùse yà'là kasa iwessak uya sàlà pe yene wapùla ànùk uya itenu yakkokasak ittu ina uya pùla man. Kàyik pe iwechi màlà. Yekamappokà, tùmàlà pe iichelupa toppe,” tukaik. 22Ikàipùnù molopai ichan tawonnan uya màlà wateppù, masapùla Jew yamùk yepulu yamùk pàk tùusenalipa kon pàk. Masapùla “Ànù'là uya pùsàlà mùkkàlà Christ tesak yau yenpakka màlà Jew yamùk wepilittok itak tapai,” te kasak tok uya pàk. 23Màlàpàk màlà ikàipùnù molopai ichan tawonnan uya, “Kàyik pe iwechi màlà, yekamappokà!” teppù.
24Yakon itekkwa pe tok uya enpùla echippù kàyik kà'mappù. Tok uya ipàk, “Katù yapulàtok auya itùkà, ailon pe wa kakkà! Ina nùttuyan pùsàlà kàyik wechi tùmakuyi yawon pe,” teppù. 25Tok maimu yeikuppù ya, “Tùmakuyi yawon pe là wapùla ipla là iwechi ittu uya pùla man. Tùse tewinannà tùttuyaik enpùla wechippù tùse sàlà pe nen uchi tenyaik,” tukaik. 26Molopai tok uya ipàk, “Yà'là pe ken uchi àkuttai? Atta ken eyenu yakkokatai?” teppù. 27Tok maimu yeikuppù ya, “Tekamakapùi kuichi àpàkù'nokon tà, tùse yeta auya'nokon pùn. Yà'là pe ken uchi iwechi pàk enetatu'mapai messatàu? Inenupa ton pe ka' enapai messatàu lù?” tukaik. 28Màlàyau tok uya imottùnpa pe, “Àmàlà nen mùkkàlà inenupa tùse ina mùkyamlo Moses nenupa ton. 29Ina nùttuyan Katù uya Moses yelupappù, tùse i'nailàpài là pùsàlà uyàssak ittu ina uya pùla man,” teppù tok uya. 30Kàyik uya tok maimu yeikuppù, “Tùttusen yekkwa pe pùla uyenu ipittàtai, tùse inailàpai là iyàssak ittu auya'nokon pùla man! 31Ittu'nokon man Katù uya tùmakuyi yawon maimu yeta pen. Tùse ànù'là Katù namanài molopai teselu ku'nài, mùkkàlà maimu yeta ya màlà. 32Non weppyattàppù motapai ànù'là uya enpùla iwentusak lùppù yenu yakkokasak man te yetasak pùla man. 33Pùsàlà kàyik wechi Katù winàpaino pe pùla yau yà'là là kupù ya pen sàlà epaino,” tukaik. 34Tok uya imaimu yeikuppù, “Amakuyi yau ewentuppù i'napailà, tùse na' ina yenupaiche ewechi màlà?” tukaik. Molopai tok uya yenpakkappù.
35Jesus uya, tok uya yenpakkappù yekale lùppù yetappù, iitàppù molopai yepoloppù ya. Màlàyau “Kàyik Mumu pàk uchi ailon mùkayan?” teppù ya. 36Imaimu yeikuppù ya, “ Itepulu anùk ken uchi mùkkàlà, yekamakà upàk ailon te toppe uya ipàk,” tukaik. 37Jesus uya ipàk, “Yenkasak auya man. Pùsàlà mùkkàlà àpokonpe nùselupayai'nùk sàlà pe,” teppù. 38Molopai Jesus pàk, “Ailon ukayaik àpàk uyepulu,” teppù ya. Molopai tese'mu yok iwenappù itemloto po.
39Jesus uya, “Uyàssak sàlà, sàlà non pona kappon yamùk yeselu wechi wakù pe wapùla àli pe là yenpoikaik. Enpùnon uya yentoppe molopai yennài nan wenatoppe enpùla,” teppù. 40Molopai tùulon kon Pharisee yamùk ipyau tùwessan uya wate ya yetappù, màlàyau tok uya, “ ‘Yà'là? Ina wechi nàlà na'nai'nùk enpùla?’ ” teppù ipàk. 41Jesus uya tok pàk, “Enpùla ewessak kon yau àli pe euchittuppù pen sàlà eppaino, tùse ‘Ina nenyan,’ te auya'nokon yau, molo lùppù àli kuttok auya'nokon man,” teppù.
सध्या निवडलेले:
John 9: PNTR
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Patamuna New Testament Revised © United Bible Societies, 1973, 2019.