Sélimɛ 7
7
Nowe n jée kɔ́rɔkpɔɔgi ni
1A Yawe gi joo Nowe ma níì jo: «Jée kɔ́rɔkpɔɔgi ni ní mɔ kpaʔa wóbèle myɛ ní. Níì cán mɔ nibin mii nyaa wozinw niyɛɛ yɛ́ʔɛ ma mɔ lali syɛ̀ɛnnɛ nínge ni. 2Siin-ziin tɛ́ɛyɛ kɔrɔsiin cò yaweecǎnri féleye myɛ ni, nàɔn ní cɔlɔɔ, mí siin-ziin cò yaweenɔnʔɔri myɛ ni, nàɔn ní cɔlɔɔ, mi lége ní miyɛɛ ní kɔ́rɔw ni. 3Mí wɔ́ɔ siin-ziin tɛ́ɛyɛ kɔrɔsiin cò nyɛ̀ʔɛni féjɛɛnrɛ féleye myɛ ni, nàɔn ní cɔlɔɔ, koro ga pye bi di féleyi yaʔa yi kòro beè sìi na tári myɛ yɛ́ʔɛ kurugo. 4Níì cán canya kɔrɔsiin ga kwɔ́ɔ, mii a zěgi cáan tári na canya togoye siin ní yébiliye togoye siin ni. Kánmi bee na sìi yáriri myɛ mii faan lè, mii a dee bee pɛ́ɛ láʔa yaà tásaligi na.» 5Gee myɛ Yawe da joo n gbàn Nowe ma lè, a wi gee bee kpéʔele n foro.
Lònɛʔɛgi n tári myɛ tɔ́n
6Nowe maa taa yɛ̀ʔɛlɛ saala taanri lǎli ni lònɛʔɛgi tìgi n tári tɔ́n lè. 7A Nowe jée kɔ́rɔkpɔɔgi ni, woro ní wi céw, ní wi pìíbèle, ní wi pìíbèle càbala jàngó bi syɔɔ lònɛʔɛgi ma. 8Yaweeree di nyɛ lè wojanri, ní dee di nyɛ lè wonɔnʔɔri, n fàra féjɛɛnri, ní yáriree myɛ na di fulolo lè, 9dee bee myɛ maa jée kɔ́rɔkpɔɔgi ni siin-ziin, nàɔn ní cɔlɔɔ, n yɛlɛ ní gi ní àmɛɛ Kolocɔlɔɔ da gi joo n gbàn Nowe ma lè. 10A cányi kɔrɔsiin ga kwɔ́ɔ, a lònɛʔɛgi tìgi n tári tɔ́n.
11 #
2Pyɛ 3:6
Nowe sìíw yɛ̀ʔɛlɛ saala taanri wólo, yeziin wógi canya kɛɛ ní kɔrɔsiin wógi na, a weekpɔɔ-cùrugi púloweegéle myɛ folo n múgu, á nyɛ̀ʔɛni wéegéle wɔ́ɔ̀ múgu cángi bee na. 12A zěgi i tuun tári na n baa taa canya togoye siin ní yébiliye togoye siin. 13Cángi bee tiimaa na Nowe jée kɔ́rɔkpɔɔgi ni, woro ní wi céw, ní wi pìíbèle be lè Sɛmi, ní Kami, ní Zyafɛti, n fàra wi pìíbèle càbala taanri na, 14a sìnbirigi yaweere myɛ, ní kěgi wóro myɛ wɔ́ɔ̀ jée yaà n yɛlɛ ní di féleyi ní. Yáriri di fulolo lè tári na n yɛlɛ ní di féleyi ní, toro ní féjɛɛnri myɛ maa wɔ́ɔ̀ jée yaà n yɛlɛ ní di féleyi ní, gee bee n jo yáriri myɛ di tɛ́nɛ̄ yìrigí lè toro dee na fókaanya nyɛ lè. 15Cere yáriri myɛ ni ŋɔ́ngara nyɛ lè kánmi bee na di jée kɔ́rɔkpɔɔgi ni nàɔn ní cɔlɔɔ, Nowe kurugo. 16Yáriri féleye myɛ maa jée nàɔn ní cɔlɔɔ, n yɛlɛ ní gi ní àmɛɛ Kolocɔlɔɔ da gi joo n gbàn Nowe ma lè. Koro kàdoʔo ma a Yawe kpaaweeli tɔ́n Nowe na.
17A lònɛʔɛgi i maa tári na n baa taa canya togoye siin n tári tɔ́n, a lǒgi nɛʔɛ fwɔɔ n kɔ́rɔkpɔɔgi tugo n yìrige tári na. 18A lǒgi i fee ni lúru tári ǹjoʔo ni, á kɔ́rɔkpɔɔgi yìri n taʔa ni nyángi lǒgi ǹjoʔo ni. 19Lǒgi maa ni fee ni lúru tári ǹjoʔo ni fwɔɔ n taa n baa nyanbe-nyundɔnɔyi myɛ tɔ́n, yi nyɛ lè tári na. 20A lǒgi baa nyanbe-nyundɔnɔyi tɔ́n n sèʔê yìri yi ǹjogi ni n mɛ́tiribéle kɔrɔsiin ní tíla kwɔ́ɔ, a yi myɛ tɔ́n. 21Yala o yala ni sìi pye lè, a li i fíigi ni máari tári na, a dee bee myɛ kùu. Gee bee n jo féjɛɛnri, ní kěgi yaweere, ní sìnbirigi wóro, n fàra yáriree na di fulolo tári na lè, ní syɔɔn ye myɛw. 22Yala o yala ni ŋɔ́ngara pye lè naa tári na, a li i ŋɔ́ngi fínaagèle ni, a dee bee myɛ kùu. 23#2Pyɛ 2:5Sìi yáriri myɛ di pye tári yɛ́ʔɛ kurugo lè, a Kolocɔlɔɔ di pɛ́ɛ n láʔa yaà. Ti n pɛ́ɛ n láʔa yaà tári na. Yafyɛn da níì kòro í, fwɔɔ Nowe ní bele pe da pye ní wi ní kɔ́rɔkpɔɔgi ni lè.
Nowe n yiri kɔ́rɔkpɔɔgi ni
24A lǒgi fɛɛ n lúgu n kòro nya tári na n baa taa canya togoye kɔrɔsiin ní kpɔrigɔ.
सध्या निवडलेले:
Sélimɛ 7: CB10
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Kolocɔlɔɔ Syɛ́ɛnri © Bible Society of Côte d'Ivoire, 2008.