Mwamulizo 3
3
U wu wula cihuliko wo munhu
1Muli vilimu vyose vya mu mbago vyono u Mulungu yaviwumba, i nzoka yikawa yo sugu muno si nhe vilimu vyose. Holeka yikamulonjela u mucekulu yikamutya, “Ati, u Mulungu vyo yatya hongo, mulece kulya i mana ge mibici yose yono yili mu busitani?” 2Nayo u mucekulu yakayipitula inzoka yakatya, “Aa, ng'o, cosuma kulya i mana ge mibici yose ya mu busitani, 3langa hono si mana go mubici wono wuli haciligati ye busitani du, gago langa go Mulungu yacilajiliza vyono, cilece kulya, hamba kugapamiza kose, na hono cijelele du, cofwa.” 4Inzoka nayo yikamulonjela u mucekulu, yikatya, “Waco, gwe, Mbeka hamba si mofwa ng'o. 5U Mulungu yazilonga zizo, ku soko yali yamanyile vyono, hono mulye i mana go mubici wuwo, mokwenzelulwa meso genyu, nanye mowa mwehwana no mweneco Mulungu, mukuzimanya iziswanu ne zimbi.”
6Nayo mucekulu yaza kuwulanga wuwo mubici, yakawuwona vyono wo mubici wono wukwendeza ha wulangwe. Sunga ne mana gayo, maswanu muno ku wulye. Kanyhi yakehwesa nha vyono, kumbe so mubici wuwo, kosuma kutuga mahala. Hodu yakawa kuhepa i mana go mubici wuwo, yakawa kulya, yakamupela no mulume wakwe, nayo nhavivyo, yakalya. 7Nawo wali weza kulya, lo lulolulo i meso gawo gakenzelulwa wose vyono wejete, nawo wakawa kwimanya vyono wose wali cipwi. Hobaho wakawa kugahoneleza i mahamha go mukuyu, wakenozeza yikawa yo myenda yo kwitunga no kwihundiciziza.
8Na mu cinyamihe cico, wakahulika lizi lyo Mulungu yakujenda mu mugunda, u mulume yuyo hamonga no mugolece wakwe, wose wakehundika mu mibici ya mu busitani, ati u Muwaha Mulungu ho yalece kuwawona. 9U Muwaha Mulungu nayo yakawa kumucema u mulume, yakumutya, “Alo wuli hayi?” 10Nayo mulume yuyo yakapitula yakatya, “Nilihulika lizi lyako mu busitani, nane niwa kogopa, niwa kwihundika, vyono ane nili cipwi.” 11Nayo Mulungu yakamuwuza yakutya, “Alo nani mono yakulonjeye vyono agwe wuli cipwi? Wule, hamba kulya lo i mana go mubici wono nakulajiliza nghatya wulece kugalya?” 12Nayo mulume yuyo yakapitula yakatya, “U mucekulu mono wamhela ciwezane nayo, yuyo yo yamhelile likalo lilyo, nane niwa kulilya.” 13Nayo u Muwaha Mulungu yakamuwuza yuyo mucekulu, yakamutya, “Alu 'gwe, nghanici yiyi lu yono witumile?” Nayo mucekulu yakapitula yakatya, “Inzoka yo yinghonjile, nane niwa kulya.”
Wuling'anize wo Mulungu
14Holeka u Muwaha Mulungu yakawa kumitya i nzoka,
“Ku soko ye nghani yiyi yono wunozize,
wakondya kulijitwa si nhe vilimu vyose vyono vikuwa kufugwa,
kanyhi si nhe vilimu vyose vya mu mbago.
Kanyhi ku wulawa lulu,
kowa kujendela'nda,
na kanyhi kowa kwikala wukubwiga
manghundi du mu vilo vyako vyose vyo wikale wako.
15Nane nowika wisule hagati yako no mucekulu yuyu,
na hagati yo lulelo lwako no lulelo lwakwe,
wowa wali wulugu.
Lolokutijinha u mutwe,
nagwe kolomuluma mu cising'anilo.”
16Mulungu yakamulonjela nayo mucekulu, yakamutya,
“Agwe nagwe, nokuciziliziza i magaziko mu wudinghule wako we mida,
na kanyhi nokuciziliziza no wusungu lono wukusawa mwana.
Kosawa wana ko wusungu wuwaha muno,
ninga hamba nhavivyo,
kowa kwikala wukumusulumila u mulume wako,
nayo kowa yakutemile.”
17Hanyuma yayo u Mulungu
yakamulonjela u mulume yuyo, yakamutya,
“Alu agwe nagwe,
vyono mwilumbaniza no mugolece wako,
nagwe kuwa kulya i mana go mubici
wono nakulajiliza vyono Wulece kugalya,
alu vyono wakondya kwituma zono zinha zizo,
ale, yisi yilijitwa ku soko yiyo.
Na ku wulawa lulu,
yowa yikunojeye witume milimo kwe nhuguti,
na kwe vilungo vyako vyose,
ho witujile ndigwa yono yokukwila
mu vilo vyako vyose vyo wikale wako.
18Nayo yisi yocindya mabijili hamonga ne mamivya,
nagwe kowa kulya i mikalo ya mu mbago.
19Kanyhi kowa kulya vya mu nhuguti yako,
sunga kolo weza kuwuwuyila u muhangha,
hambi nha mo walawa mumo,
agwe nha wuli manghundi,
holeka kowuya kanyhi mu manghundi.”
20Adamu yakamucemela u mugolece wakwe litagwa lya “Hawa” hambi nha yo nyina we womi wose. 21Nayo Mulungu yakawanozeza Adamu hamonga no mugolece wakwe, vivwalo vye zinguwo, yakawa kuwavwika.
Adamu na Hawa wakuwingwa wawuce mu Mugunda
22Hanyuma u Muwaha Mulungu yakatya, “Alu Adamu, yaweza nha muyagwe na sese, hambi nha yakondya kuzimanya iziswanu ne zimbi, holeka yilece kuwa na lunji, yasole i mana go mubici wo wumi yalye no kwikala mumi cibitilila!” 23Holeka u Muwaha Mulungu yakamuwinjila kunze yo mugunda wa Adeni yuyo Adamu, yabite yakawulime u muhangha mono yasolwa. 24Nayo u Muwaha Mulungu yali yeza kukondya kumulavyaniza kunze ye mugunda, hodu, yakawa kuviwika viwumbwa vyono vikucemwa makelubi ku lubavu lwa kucilima yo mugunda wa Adeni, hamonga no mumaje wo moto, wono wupitukaga kose kose, so kuyikaliza inzila yono yibitile ku mubici wo wumi.
सध्या निवडलेले:
Mwamulizo 3: LLKWW
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Cigogo Bible © Bible Society of Tanzania, 2002.