GIING'EETA 6
6
Munyasnacheeka buuneeda
1Iimuchu nea ghwasaang'ayiit buuneeda aba badayda ng'eanyiida, nea gwaji haweega, 2ghwadaah orjooga ASEETA haweega buuneeda gideaba aamiyaas; ak goolealeatiisa geat gadeemga gasa ak ghaghi. 3Ng'ata gwayi NG'UTAMIIDA, “Guroroodeanyu maygwandeayi sea siida damanda manda muudeanooda, aba gideaba gwandeawa saseeda, asi gweanyeakaaschi gajea bughala ea diktam.” 4Nea abeeda gwanda ng'eanyiida eemeeda Nefili aba damandida ea ghwahita damwan, ama muchu nea ghapka orjooga ASEETA ak ghwadaah haweega buuneeda, gwajiilsa diibiga. Fugiga gwandeawa uurjeenga ghang'eada garayi, ak gabiisa ea nalaat.
5Hean ghwadaah NG'UTAMIIDA gideaba niheedu munyasnacheeka buuneeda aba jeeda ng'eanyiida, ea gideaba fughareenga sean mida gurooruunatka nyaawa ea munyas galeagasean. 6Iimuchu gagiisan NG'UTAMIIDA aba jeadaanyi aba gideaba nisin siida aba badayda ng'eanyiida, ak ghwanyareas niny aba jeadaanyi. 7Ng'ata gwayi NG'UTAMIIDA, “Gaydageandeawa siida ghayi easinyi badayda ng'eanyiida, siida ea diyeanga ea diyeanga badiina jeesinga ea dariidaka humng'eeda, aba gideaba naanyareaschi aba gideaba geasinyi.” 8Iidu ghabwariiy NG'UTAMIIDA Nuhu.
Nuhu
9Suh jeacheenga Nuhu gil. Nuhu abeeda niny siida doabiiwaadi, meeyeateena ghuut aba seaygeadaanyi; gwarooroochi Nuhu sea ASEETA. 10Ak gwaji Nuhu orju samwagu, Shemu ea Hamu ea Yafet.
11Iimuchu gamunyiit ng'eanyiida aba madeeda ASEETA, ak ghwanyiit jeeda ng'eanyiida ng'asheega munyas. 12Hean gang'ula ASEETA ng'eanyiida, ak ghwadaah gideaba nimunyiit; aba gideaba naweadinga sean bea buuneeda nimunyasiidi aba badayda ng'eanyiida. 13Ng'ata gwayeesha ASEETA Nuhu, “Neagasayi gideaba gaydagul uhuuda buuneesean; aba gideaba ng'eanyiida ninyiit ng'asheega munyas aba badahuuka nyaawa; ng'ula, gaydahuuyda saawa ea ng'eanyiida. 14Asi sisiina geaw maleambooda haw bea mareambiida; ak gibwaashaadi jeeda ghoah ghoorajeega aba jeeda maleambooda, ak gimuuwni jih ea bwadaw aba hideeda ea maleapna. 15Asi nih gichea sinda geawunda maleambooda, nung' gaba geatin bughalaji samwagu, baraknata nung' gaba geatin haradam ea damanamughuush, nea geawunda gal humng'eeda ginung' gaba geatin diktam ea damanamughuush. 16Ak gisini badayda maleambooda, ak giihaadi aba badayda geatinagi, ak gisini gidaghuuta aba murdeeda maleambooda, ak gisini ghoorajeega siroap roap was heeda hiing'aada ea heeda agweena ea heeda diyeada. 17Aba gideaba ng'ula gaydanung' ghwahidu roopta haw jea ghwanung' gagulda ng'eanyiida, ak ghwalas uhuuda fuga munyas sean mideawa eaweega aba hing'eadayda humng'eeda; haleanjeeda sean mida badayda ng'eanyiida gaygameewa. 18Ak gaydasin neajeeda sea ang'iing'i; ak gajuna jeeda maleambooda, ang'iing'i ea orjoagaagu, ea gatmoadaang'u, ea gadeemga orjoagaagu. 19Ea gilinyoo ea diyeayi gil, gaygeanuunan iyeenya iyeenya ak ginung' gaweay jeeda maleambooda, ak ghaghu sea ang'iing'i; iissa gigeanu jurukta ea gheamata. 20Gwasunu eara dariidaka gaba nih bea heeluutka nyaawa, ea diyeanga aba heeluutka nyaawa, ea diyeanga sean badiina jeesinga aba badayda sigeeda aba heeluutka nyaawa, giliwas gil nung' gapkeana iyeenya jeeda maleambooda indi, ak ghaghu. 21Ak giyaadi gilinyoo ea hamita siyeaga, ak giidiing'di; ak gayghoah hamitaang'u ea daanyaawa.” 22Hean gwasin Nuhu ng'asheesu; gwasin ng'asheega sean rukusa ASEETA.
सध्या निवडलेले:
GIING'EETA 6: BG15
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The Bible in Datooga © Bible Society of Tanzania, 2015.