मर्कुस 5
5
अ़क्छा चाकावालावाआ लाउओ म़ना
मत्ति ८:२८-३४; लुका ८:२६-३९
1येसु खोन्कि अ़चुकाखेङ्चि गालिल धियाङ्वामाओ अ़ह्याउधेत गेरासेनस धिखाहुप्दा म़ताला। 2खोन्कि येसु नावादाङ्का बुङ्खाया म़लोन्ताङावा अ़क्छा चाकावालावाआ लाउओ म़ना येसु तुप्सि एप्मालादाङ्का ता। 3मो म़ना एप्मालाचिदात्नि युङालुक्ता। म़नाचिआ मो चोक्माय़चिआछाङ छुम्मा मान्ऱअ़दाङा। 4देकिनालो ब़द्धेकादु खोसोओ अ़छुक खोन्कि अ़लाङ चोक्माय़चिआ खोन्कि नेलाचिआ अ़छ़सायुङ्साङा, मेन खोसाआ चोक्माय़चि फुत्तुखाइसुङुचि, खोन्कि नेलाचि ओरुखाइसुङुचि। साङ्आछाङ खो क़म्मा मान्ऱअ़दाङा। 5खो अ़खाखुत खोन्कि अ़खोलेन एप्माराचिदा खोन्कि भ़ऱचिदु पात्याङ्सा खोन्कि लुङ्ताक्आ खेन्वान्नान्चिन्सा हुवालुक्ता। 6खोन्कि खोसाआ येसु अ़थायाङ्काङा खाकिना लोत्याङ्सा बाना, खोन्कि खोक्कोसोओ अ़चुबुदा बोम्सान्चिन। 7खोन्कि अ़धिवाङ य़ङ्आ पात्याङ्सा खोक्को लो, “झारादाङ्का तोक्पो निनाम्हाङ्ओ अ़चुछा येसु, खानानिन्आ अ़ङ्का दे मुमा त़लाप्ङाङाऩङ ओ? निनाम्हाङ्ओ अ़चुऩङ्दा अ़ङ्का खानानिन लोनाङ्नानिन, अ़ङ्का दुखा मान्प़दानि!” 8देकिनालो येसुआ मो चाकावालावा बुया अ़लोवायुङ्सा, “मो म़नाएदाङ्का लोन्ताखारा!” 9खोन्किना येसुआ मो अ़सेना, “आम्ऩङ दि ओ?” खोसाआ खोक्को लासुलो, “अ़ङ्ऩङ #५:९ रुहुप : ब़द्धे चाकावालावाचि अ़क रुहुप माङ्नालो अ़क्भुङ म़लिसाकि मो म़ना अ़लावाओसा ओवात्नि अ़ऩङ लिसाओ। खोन्कि बुया छाप्माय़ङ ग्रिक बाइबलदा ‘लेजियन’निछाङ छाप्याङ। रोमि रात्खामिचि ३,०००दाङ्का ६,००० म़याआङाओचि ‘लेजियन’नि म़लोङुचि।रुहुप ओ, देकिनालो आन्कान्का ब़द्धे याइन्येन्का।” 10खोन्कि मोसाआ अ़दु-अ़दु येसु बुउ, “ओ चाकावालावाचि ओ धिखाहुप्दाङ्का बुङ्खाया मान्लोन्खान्दानुम्च़म।” 11मो भ़ऱदु अ़धिवाङ अ़लोका भाक्चि म़चान्ताङा। 12खोन्कि चाकावालावाचिआ येसु अ़लोवा, “भाक्ओ अ़लोकादा आन्कान्का खान्नि खोन्किना आन्कान्का मोचिएदा वाङ्मा प़नि निकिना येसु अ़बुआ!” 13खोन्किना येसुआ मोचि खात्मा म़प़चि। खोन्किना चाकावालावाचि म़लोन्ताकि भाक्चिहुत्दा म़वाङा। खोन्कि ह्वा हजारालेका भाक्ओ अ़लोकाचि ह्वाल़ङ्मादाङ्का धियाङ्वामा ह्युत्नि ह़क्ह़क्ह़क्वा म़लोराधाकि मोचि धियाङ्वामादा वाम़लुम्तासुवा। 14मो भाक काचान्चि म़फुङ्साखारा, खोन्कि सहरा खोन्कि तेन्दाओ म़नाचि मोचिआ मो य़ङ खाम़एत्तुचि। खोन्कि दे लिसायुङ्साओ, मो खाङ्सि म़नाचि मोदा म़ता। 15मो म़नाचि येसुएदा म़ता, खोन्कि अ़खाहिदा मो चाकावालावाआ लाउओ म़ना नुवाकिना तित हुम्साकि मोदा युङाङाओ अ़खा। खोन्कि मोचि झारासोओ अ़चुक़माकारा। 16खोन्कि काखाङ्चिआ मो चाकावालावाआ लाउओ म़ना खोन्कि भाक्चि दे म़लिसाओ मोसोओ अ़तुक्वादा म़नाचि खाम़एत्तुचि। 17खोन्किना मो म़नाचिआ येसु “आन्काओ धिखाहुप्दाङ्का लोन्ताखारानिन”नि खोक्को अ़लोवा। 18खोन्कि येसु नावादा म़वाङाङाहिदा मो चाकावालावाआ लाउओ म़नाआ खोक्कोएनान अ़क्नि खात्मा निकिना बुउ। 19मेन येसुआ खो मान्प़अ़दा। खोन्कि खोक्कोसाआ खो अ़लोवा, “आम्खिम खारा, खोन्कि आम्म़नाचि निनाम्हाङ्आ आम्को निकि दे ऩमुवायुङ्सा, खोन्कि खाना देम सोमाऩतुक्तायुङ्सा, मोचि खाएत्तुचि।” 20खोन्किना मो म़ना खारालावा, खोन्कि येसुआ खोसोओ निकि झारा काचिचि अ़मुवाओ अ़तुक्वादा देकापोलिस्दा खालुमा पुङ्सु, खोन्कि झारा म़नाचि दोम्तुदोचि।
याइरस्ओ अ़मेत्छाछा छा खोन्कि अ़क्छा तुआङाओ मेत्छामा
मत्ति ९:१८-२६; लुका ८:४०-५६
21येसु नावालाम्पा धियाङ्वामाओ अ़ह्याउधेत्या म़लासाखारा। खोन्कि खोक्को धियाङ्वामाओ अ़केम्दा म़युङाङाहिदा ब़द्धे म़ना मुक्लाचि येसुओ अ़चुऱङ्कोप्नि म़कोवान्चिन 22खोन्किना यावायोक खिम्दाओ अ़क्छा बुसुवा याइरस अ़ऩङ मुवाङाओ मोदा ता, खोन्कि खोसाआ येसु खाकिना खोक्कोसोओ अ़चुलाङ्दा बोम्सान्चिन, 23खोन्कि अ़साकोङ्वाहुत्याङ्काङा खोक्को लो, “अ़चुप्पो अ़ङ्मेत्छाछा छा तुक्कि स़मादामा मुयाङ। बानानिन्कि मोएदा आम्नुओ छुक युक्निप़नि, खोन्ओसा मो नुकि ह़ङ्ने।” 24खोन्किना येसु याइरस्एनान म़खारा। खोन्कि ब़द्धे म़ना मुक्लाचिआ खोक्को अ़त़ङ्ता, खोन्कि येसुओ अ़चुऱङ्कोप्नि रोम्पोङ्पोङ्वा म़लिसा। 25खोन्कि बारकादोङ बुयादाङ्का ह़ सोन्मायुङ्मा सारिमाआ लाउओ अ़क्छा मेत्छामा मो म़ना मुक्लादा युङाङा। 26मोसाआ ओक्तो कामेत्चिएदाङ्का ओक्तो मेत्मान्युङ्मान्चिन्आ ब़द्धे दुखा तोक्तायुङ्सा, खोन्कि मोएदा युङाङाओ झारा सामाचि याङुचिउयुङ्सु, खोन्नुछाङ मो मान्नु, मेन नुमाओ अ़फान्दा च़लोक सारिमाआ य़त्तुदो। 27मोसाआ येसुओ अ़चुतुक्वादा एनुयुङ्सु, खोन्कि म़ना मुक्लादा खोक्कोसोओ अ़चुदेङ्याङ्का ताकि येसुओ अ़चुतित्ओ अ़चोम्दा नोप्तु। 28देकिनालो मोसाआ अ़मिन्मादा मिना, “अ़ङ्का खोक्कोसोओ अ़चुतित ओन्ङा नोप्तुङ्नुछाङ अ़ङ्का नुङालाप्ङा।” 29खोन्कि मोन्ग़रिङा मोसोओ ह़ सोन्मा सारिमा छेक्ता खोन्कि अ़याम्दाओ अ़सारिमा नुवाओ मोसाआ सिन्तु! 30खोन्कि येसुआ अ़चुसावा खोक्कोएदाङ्का लोन्ताखाराओ अ़सिन्ताकि च़क्नि खोक्को म़ना मुक्ला ह्यात्नि म़हुसान्चिन्कि म़सेनुचि, “साङ्आ अ़ङ्तित नोप्तु?” 31खोक्कोसो अ़चुकाखेङ्पाचिआ अ़लासालोवा, “म़ना मुक्लाआ ऩछ़रिन्येन्ओ खानानिन त़खाम्किछाङ खानानिन, ‘साङ्आ अ़ङ्का अ़नोप्ताङ?’नि त़य़ङिन्येन?” 32मेन खोक्को कानोप साङ ओ निकिना येसुआ अ़चुऱङ्कोप्नि म़चोउयुङ्सुचि। 33खोन्किना मो मेत्छामाआ दे लिसाओ, मो सिन्तुकिना अ़क़माआ धुन्याङ्सा येसुओ अ़चुबुदा ताकि अ़चुबुदा बोम्सान्चिन, खोन्कि झारा अ़छ़ङ य़ङ खाएत्तु। 34खोन्कि येसुआ मो मेत्छामा अ़लोवा, “अ़ङ्छा ओ, आम्साकोङ्छ़ङ्आ खाना त़नुसायुङ्सा। सेवाङ्नि खारा। आम्सारिमादाङ्का खाना त़नुने।” 35येसु म़चेवाङाहिदाङा यावायोक्खिम्दाओ बुसुवा याइरस्ओ अ़खिम्दाङ्का अ़क्छा म़ना ताकि खो लो, “आम्नुओ मेत्छाछा छा ना सुवादाचिआ! हान काचिन्पा दुखा मान्प़दानुम।” 36मेन येसुआ मोचिओ अ़चुय़ङ मान्एन्दान्वा म़चुवाकि यावायोक्खिम्दाओ बुसुवा याइरस अ़लोवा, “मान्क़दा, साकोङ्छ़ङ ओन्ङा मुवा।” 37खोन्किना येसुआ पत्रुस, याकुब खोन्कि याकुब्ओ अ़निछा युहन्नादाङ्का नि साङ्छाङ खोक्कोएनान खात्मा मान्प़म़दोचि। 38खोचि यावायोक खिम्दाओ बुसुवा याइरस्ओ अ़खिम्दा म़ताला, मोन्हिदा काचेङ्वा कामुचि, काखाप्चि खोन्कि च़लोक ओत्ओत्ओत्वा म़खावाङाओचि म़खाचि। 39येसु खिम्हुत्दा म़वाङाकि मोचि म़लोचि, “देकि खानानिन काचेङ्वा त़मुन्येन खोन्कि ओत्ओत्ओत्वा त़खाविन्येन? ओ मेत्छाछा छा ना मान्स़दायुक, मेन इम्याङ।” 40मेन मोचिआ खोक्को अ़इत्ता। खोन्किना खोक्कोसाआ मोचि झारा बुङ्खाया म़लोइसुखाइसुचि, खोन्कि मेत्छाछा छाओ अ़पा खोन्कि अ़माकिना खोक्कोसोओ सुम्कापाङ अ़चुकाखेङ्पाचि म़खात्तुचिकि मो मेत्छाछा छा युङाङाओदा म़खारा। 41खोन्कि खोक्कोसाआ मो मेत्छाछा छाओ अ़छुक्दा अ़क़क्ताकि अ़लोवा, “तालिता कुमि!” ओसोओ अ़तुप्माय़ङ, “छाओ, अ़ङ्का खाना लोना, पुवालोन्ता!” 42खोन्कि मो मेत्छाछा छा मोन्ग़रिङा पुवालोन्ताकि ओह्यात्नि-मोह्यात्नि कोन्मा पुङ्सु। मो बारकादोङ बात्तुङु। ओ अ़खाकि मोचि चात्लो दोम्तुदोचि। 43येसुआ मोचि “ओ य़ङ साङ्छाङ खाएत्माइ मान्एत्दानुम्च़म!”नि चात्लो म़लोचि, खोन्किना छा दि-दि चामायु प़म़मेत्तुचि।
सध्या निवडलेले:
मर्कुस 5: bap
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Wycliffe Bible Translators, Inc. All rights reserved.