ወንጌል ዘሉቃስ 14
14
ምዕራፍ 14
ዘከመ ፈወሶ እግዚእ ኢየሱስ ለቅብው በዕለተ ሰንበት
1 #
6፥6-20፤ 11፥37። ወእምዝ ሖረ ወቦአ ቤተ አሐዱ ብእሲ እምነ መልአኮሙ ለፈሪሳውያን በሰንበት ከመ ይብላዕ እክለ ወእሙንቱሰ ይትዐቀብዎ። 2ወሀሎ አሐዱ ብእሲ ቅብው ቅድሜሁ። 3#ማቴ. 12፥10-11። ወአውሥአ እግዚእ ኢየሱስ ወተስእሎሙ ለጸሐፍተ ሀገር ወለፈሪሳውያን እንዘ ይብል ይከውንሁ በሰንበት ፈውሶ ወሚመ ኢይከውንሁ። 4ወአርመሙ ወነሥኦ ወፈወሶ ወፈነዎ። 5#13፥15፤ ማቴ. 12፥11፤ ዘፀ. 21፥33። ወይቤሎሙ እመቦ አሐዱ እምኔክሙ ለእመ ወድቆ ላሕሙ አው አድጉ ውስተ ዐዘቅት አኮኑ በጊዜሃ ያነሥኦ በዕለተ ሰንበት። 6ወስእኑ አውሥኦቶ በእንተ ዝንቱ ነገር።
በእንተ ኢያፍቅሮ ርእሰ ምርፋቅ
7 #
ማቴ. 23፥6። ወይቤሎሙ ለእለ ሀለዉ ውስተ ምሳሕ ወመሰለ ሎሙ ወመሀሮሙ ሶበ ርእዮሙ እንዘ ይትባደሩ ውስተ ርእሰ ምርፋቅ። 8ወይቤሎሙ እመቦ ዘጸውዐከ ውስተ ምሳሕ ወሖርከ ኢትርፍቅ ውስተ ርእሰ ምርፋቅ ክቡር እመቦ ዮጊ ይመጽእ ዘይከብረከ። 9እስመ መጺኦ ድኅረ ይብለከ ዝኩ ዘጸውዐከ ኅድግ ሎቱ ዘንተ ገጸ ወትገብእ ወትትኀፈር ውእተ ጊዜ ወትወርድ ውስተ ምርፋቅ ዘይቴሐት። 10ወእመሰ ቦ ዘጸውዐከ ወሖርከ ርፍቅ ውስተ ታሕታይ ምርፋቅ ከመ ሶበ መጽአ ዘጸውዐከ ይበልከ ዐርክየ ዕርግ ውስተ ዘይትሌዐል ምርፋቅ ወውእተ ጊዜ ይከውነከ ክብረ በቅድመ ኵሎሙ እለ ይረፍቁ ወይመስሑ ምስሌከ። 11#ማቴ. 23፥12፤ 18፥14። እስመ ኵሉ ዘአዕበየ ርእሶ የኀሥር ወዘአትሐተ ርእሶ ይከብር። 12ወይቤሎ ለዘጸውዖ ሶበ ትገብር በዓለ ወምሳሐ አው ድራረ ኢትጸውዕ አዕርክቲክ ወአኀዊከ ወአዝማዲከ ወጎረከ ወቢጸከ አብዕልተ ከመ ይጸውዑከ እሙንቱሂ ወይከውነከ ፍዳ በኀቤሆሙ። 13#ዘዳ. 14፥29። አላ ሶበ ትገብር በዓለ ወምሳሐ ጸውዕ ነዳያነ ወምስኪናነ ወዕዉራነ ወስቡራነ። 14#ዮሐ. 5፥29። ወብፁዕ አንተ እስመ አልቦሙ ዘይፈድዩከ ወባሕቱ ትትዐሠይ አመ ይትነሥኡ ጻድቃን። 15#13፥29፤ መዝ. 36፥9። ወሰሚዖ ዘንተ አሐዱ እምእለ ይረፍቁ ይቤሎ ብፁዕ ውእቱ ዘይበልዕ እክለ በመንግሥተ እግዚአብሔር።
በእንተ እለ ተጸውዑ ውስተ ድራር
16 #
ማቴ. 22፥1-10። ወይቤሎሙ እግዚእ ኢየሱስ አሐዱ ብእሲ ገብረ ምሳሐ ዐቢየ ወዐሠሮሙ ለብዙኃን። 17ወሶበ በጽሐ ዐሡር ፈነወ ገብሮ ይጸውዖሙ ለእለ ዐሠሮሙ ወሶበ በጽሐ ጊዜ ምሳሕ ሖረ ገብሩ ወይቤሎሙ ለእለ ዐሠሮሙ ንዑ እስመ ወዳእነ አስተዳለውነ ምሳሐ። 18ወአበይዎ ኵሎሙ ኅቡረ በአሐዱ ቃል ወይቤሎ ቀዳማዊ ገራህተ ተሣየጥኩ ወእጽሕቅ ከመ እፃእ ወእሑር እርአያ ወበሎ ረሲ ሊተ ከመ ዘኢአበይኩ። 19ወይቤሎ ካልኡኒ ኀምስተ ፅምደ አልሕምት ተሣየጥኩ ወአሐውር እርአዮሙ ወእፍትኖሙ ወበሎ ረሲ ሊተ ከመ ዘመጻእኩ ወኢአበይኩ። 20#1ቆሮ. 7፥33። ወሣልሱኒ ይቤሎ ብእሲተ አውሰብኩ ወበእንተዝ ኢይክል መጺአ። 21ወገብአ ገብሩ ወነገሮ ከመዝ ለእግዚኡ ወእምዝ ተምዐ በዓለ ቤት ይእተ ጊዜ ወይቤሎ ለገብሩ ሑር ፍጡነ ውስተ መራሕብት ወውስተ አስኳተ ሀገር ወአምጽእ ሊተ ዝየ ነዳያነ ወጽኑሳነ ወምስኪናነ ወዕዉራነ ወስቡራነ። 22ወእምዝ ይቤሎ ገብሩ ገበርኩ እግዚኦ በከመ አዘዝከኒ ወዓዲ ቦ መካን። 23#ዘፍ. 19፥3። ወይቤሎ እግዚኡ ለገብሩ ሑር ፍጡነ ውስተ ፍናው ወውስተ ጥቅመ ሀገር ወበግብር አብእ ሰብአ ከመ ይምላእ ቤትየ። 24#ማቴ. 21፥43። እብለክሙ ከመ አሐዱሂ እምእልክቱ ሰብእ እለ ጸዋዕኩ ኢይጥዕምዋ ለበዓልየ።
ዘከመ ይደሉ ተሊዎተ እግዚእ ኢየሱስ
25 #
18፥29-30፤ ማቴ. 10፥37-38። ወእምዝ እንዘ የሐውሩ ምስሌሁ ብዙኃን ሰብእ ተመይጠ ወይቤሎሙ። 26#ማቴ. 10፥37፤ 16፥24፤ ዘዳ. 13፥6-9፤ 33፥9። ዘይመጽእ ኀቤየ ወይፈቅድ ይትልወኒ ለእመ ኢጸልአ አባሁ ወእሞ ወብእሲቶ ወቤቶ ወውሉዶ ወአኀዊኡ ወአኃቲሁ ወዓዲ ነፍሶሂ ኢይክል ከዊነ ረድእየ። 27#9፥23፤ ማር. 8፥34። ወዘኢይጸውር መስቀሎ ወኢይመጽእ ይትልወኒ ኢይክል ከዊነ ረድእየ።
በእንተ ምሳሌ ዘሐነጸ ማኅፈደ
28ወእመቦ አሐዱ እምኔክሙ ዘይፈቅድ ይሕንጽ ማኅፈደ አኮኑ ይቀድም ወይነብር ወየሐስብ ፃእፃኦ እመቦ ዘየአክሎ ከመ ይሣርር መሠረቶ። 29ከመ ሣሪሮ መሠረተ ለእመ ስእነ ፈጽሞ ኵሎሙ እለ ርእይዎ ይእኅዙ ይሣለቁ ላዕሌሁ። 30እንዘ ይብሉ ዝንቱ ብእሲ አኀዘ ይሕንጽ ወስእነ ፈጽሞ። 31ወእመኒ ፈቀደ ንጉሥ ይሑር ይጽብኦ ለካልእ ንጉሥ አኮኑ ይቀድም ወይነብር ወይመክር ለእመ ይክል በእልፍ ጸቢኦቶ ለዘይመጽእ ኀቤሁ ምስለ ክልኤ እልፍ። 32ወእመ አኮሰ እንዘ ርኁቅ ውእቱ ይፌኑ ሐዋርያተ ትንብልና ኀቤሁ ወይዜንውዎ ሰላመ። 33ወከመዝ እንከ ኵሉ ዘእምኔክሙ ዘኢወፅአ እምኵሉ ወዘኢይትናከር ኵሎ ዘዚኣሁ ንዋየ ኢይክል ከዊነ ረድእየ። 34#ማቴ. 5፥13፤ ማር. 9፥50። ሠናይ ውእቱ ጼው ወእመሰ ጼው ለስሐ በምንት እንከ ይቄስምዎ። 35#8፥8፤ ማቴ. 13፥44። አኮኑ ይገድፍዎ አፍኣ ወኢይበቍዕ ለምድር ወኢለምዕላደ ድኵዕ#ቦ ዘኢይጽሕፍ «ወኢይበቍዕ ለምድር ወኢለምዕላደ ድኵዕ» ዘቦ እዝን ሰሚዐ ለይስማዕ።
सध्या निवडलेले:
ወንጌል ዘሉቃስ 14: ሐኪግ
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन