KARARIADI 30
30
1Arawe i Rahel mang mborong tangkeng nakarea ana. Watu e'e i sie nasaki naunge su tuhange, bou e'e nangul᷊i si Yakub, “Onggol᷊eko ia ana, boko ta, ia sarung mate.”
2I Yakub nuwawal᷊uang si Rahel dang nangul᷊i, “Ia i'i Wal᷊inge Mawu Ruata. Ko I Sie nukoa si kau ta nakarea ana.”
3Bou e'e i Rahel nangul᷊i, “I'i l᷊angku i Bilha; katikie dingange tadeau i sie mahinding. Dingang kere'e ia botonge makoa i mama bo i sie.” 4Bou e'e nionggoe i Bilha su kawinge, dang i Yakub nutatamba dingang u l᷊ang e'e. 5I Bilha pia kal᷊uwaenge bou e'e nahinding singkatau ana ko ese. 6I Rahel nangul᷊i, “Mawu Ruata seng nangonggo kal᷊aadili guna ngu kaoku. Niraringihang-E kal᷊iomanengku dang nionggo-E singkatau ana ko ese si sia.” Bou e'e nisighonge ana e'e i Dan.#30:6: Dan: Areng i'i raringihang kere su wahasa ngu Ibrani mangal᷊enge “mamonesi”. 7I Bilha sau pia kal᷊uwaenge dang nahinding singkatau ana ko ese. 8Angkung i Rahel, “Ia seng nutawakal᷊i singapang botonge nundoka tuhangku, dang ia nakauntung,” Ual᷊ingu e'e nisigho ana e'e i Naftali.#30:8: Naftali: Areng i'i raringihang kere su wahasa ngu Ibrani mangal᷊enge “nutawakal᷊i”. 9Su tempo ngi Lea nakahingang himoneu i sie seng ta makarea ana, nionggoe l᷊ange, i Zilpa, si Yakub tadeau makoa kawing. 10I Zilpa nahinding singkatau ana ko ese. 11I Lea nangul᷊i, “Ia nakauntung,” bou e'e nisighonge ana e'e i Gad. #30:11: Gad: Areng i'i raringihang kere su wahasa ngu Ibrani mangal᷊enge “kal᷊auntung”. 12I Zilpa nuhinding singkatau ana ko ese sau, 13dang i Lea nangul᷊i, “Wal᷊inge gampang ia kal᷊uasi! Su orasi i'i kaul᷊i u kowawine sarung mangul᷊i ia ko mal᷊uasi.” Ual᷊ingu e'e nisighonge ana e'e i Asyer.#30:13: Asyer: Areng i'i raringihang kere su wahasa ngu Ibrani mangal᷊enge “kal᷊al᷊uasi”.
14Su tempo ngu manipo gandung, i Ruben nakoa sarang anseri dang nikareae pai se'e kau guna ngu undang,#30:14: musul᷊ung sasuang undang: Su l᷊al᷊ung u wahasa ngu Ibrani “dodayim”. Sasuang i'i kere pia kasiate makasuburi kal᷊uwaeng bou e'e niwawae sarang koa i Lea, i mamange. I Rahel nangul᷊i si Lea, “Onggoko si sia singkodo bou sasuang undang ko nikarea u ana u e'e.”
15I Lea nusumimbahi, “Mborong ta nasahe l᷊ai i kau seng nangal᷊a kawingku? Su orasi i'i i kau mborong manal᷊uka sau mangal᷊a sasuang undang ko nikarea u anaku.”
Angkung i Rahel, “Boko i kau mo mangonggo sasuang undang u ana u e'e si sia, i kau botonge matiki dingang i Yakub huwi i'i.”
16Su tempo ngi Yakub napul᷊e su wal᷊e bou awuhi wawul᷊aeng e'e, i Lea seng nanomahi si sie apiru nangul᷊i, “Katikie dingangku huwi i'i ual᷊ingu ia seng namaehi guna ngu e'e dingang u sasuang undang bou anaku.” Bou e'e i Yakub nutatamba dingange huwi e'e.
17Mawu Ruata nundaringihi kal᷊iomaneng i Lea, dang i sie pia kal᷊uwaenge bou e'e nahinding ana kal᷊imange. 18I Lea nangul᷊i, “Mawu Ruata seng nangonggo si sia l᷊uange watu ia seng nanarakang i Zilpa su kawingku,” ual᷊ingu e'e nisighonge ana e'e i Isakhar. #30:18: Isakhar: Areng i'i raringihang kere su wahasa ngu Ibrani mangal᷊enge “l᷊ang ko niwaehang”, “pia wawaehi”. 19I Lea pia kal᷊uwaenge sau dang nahinding anae ko kanunge. 20Angkunge, “Mawu Ruata seng nangonggo si sia l᷊uange ko masidada takoae sul᷊unge. Su orasi i'i kawingku sarung muhariga si sia, watu'u ia seng nahinding nung ana kol᷊aese,” ual᷊ingu e'e nisighonge ana e'e i Zebulon.#30:20: Zebulon: Areng i'i raringihang kere su wahasa ngu Ibrani mangal᷊enge “muhariga” l᷊au “paraseng”. 21Bou e'e i Lea sau nahinding singkatau ana kowawine ko nisighonge i Dina.
22Bou e'e Mawu Ruata nakatinaung si Rahel; Mawu Ruata nundaringihi kal᷊iomanenge dang nupakakoa si sie nahinding u ana. 23Kuteu i Rahel pia kal᷊uwaenge dang nahinding singkatau ana ko ese. Angkung i Rahel, “Mawu Ruata seng nupakailang u kal᷊ahina su watangengku. 24Mal᷊umbako Mawu mangonggo si sia ana ko ese singkatau l᷊ai.” Ual᷊ingu e'e nisighonge ana e'e i Yusuf.#30:24: Yusuf: Areng i'i raringihang kere su wahasa ngu Ibrani mangal᷊enge “i sie sau mangonggo” l᷊au “i sie mupakailang”.
Nutatawari su tal᷊oara i Yakub l᷊au i Laban
25Suapang i Rahel bou nahinding i Yusuf, i Yakub nangul᷊i si Laban, “Pakawalako ia mapul᷊e sarang wanuaku. 26Walate ia mapul᷊e mumbawa si sire rua kawingku l᷊au manga anaku. I sire seng daku nikarea ual᷊ing u nuhal᷊i si papa akang. I papa akang matitong, ia seng nuhal᷊i kahingang-hingang.”
27I Laban nangul᷊i si sie, “Raringihi horo: Ia nakapundang himoneu Mawu seng nangal᷊amati si sia ual᷊ing i kau. 28Ul᷊ie pira ko ipundokang u.”
29I Yakub nusumimbahi, “I papa akang sisane seng matitong ia seng nuhal᷊i kahingang-hingang, dang binatang i papa akang natamba ul᷊ie ual᷊ingu daku nipal᷊ihara. 30Su horo ia nusumongo, rarotong i papa akang ta singapa, arawe su orasi i'i i papa akang seng nakala. Mawu seng nangal᷊amati si papa akang ual᷊ingu ia.#30:30: ual᷊ingu iaarako maneng sarang apa ia matamai. Orasi i'i seng temponge ia muhal᷊i guna ngu walaghengku sisane.”
31Angkung i Laban, “Inau apa ko mambeng daku ionggo si kau?”
I Yakub nusumimbahi, “Kuhaete i papa akang mangonggo u manga apa. Ia sarung tatapi mamal᷊ihara binatang i papa akang, asal᷊i i papa akang tumuhu ndoku i'i: 32Pakawalako ia su silou i'i mul᷊umal᷊eng su tal᷊oara u apang ghapang u kambing domba ngi papa akang, dang mangal᷊a apang ana u domba ko mal᷊aitung,#30:32: simbau salenang ko tuwei apang ana u domba ko mal᷊aitung. dang l᷊ai apang kambing ko makakuda ko pia wuhie arako pia tonte'e. Kitang e'e wawaehi ko daku i kao. 33Su l᷊ou samuringe i papa akang gampang makatitong apa ia seng nukoa matul᷊iri. Boko i papa akang sumongo guna ngu mutuhung wawaehi sagheriku, dang makawua pia kambing ko takoae tonte'e arako wuhie, arako domba ko wal᷊inge maitung, i Om sarung matitong himoneu binatang e'e seng daku nitako.”
34I Laban nusumimbahi, “Kere'ete! I karua sarung mukoa apang ko nipundokang u e'e!” 35Kateho su l᷊ou e'e i Laban nuhae ngu kaul᷊i u kambing ko ese ko loreng arako pia wuhie dang kaul᷊i u kambing kowawine ko pia wuhie, ko pia tonte'e arako ko pia l᷊aue mawira; i sie l᷊ai nuhae ngu kaul᷊i u domba ko mal᷊aitung. Bou e'e niroie manga anae pangurusi binatang e'e, 36bou e'e i sire natamai dingang u manga binatang e'e nutingkahae bo i Yakub, tilu l᷊ou l᷊al᷊al᷊engang raunge.
L᷊umbei ngu ghapang u kambing domba koa i Laban nipal᷊ihara ngi Yakub.
37Bou e'e i Yakub nangal᷊a manga lelange ko ijo bou kau hawar, kau badam l᷊au kau berangan, dang niwunie simbahageang bou pisinge hakiu nakoa ko pia manga wuhie. 38Nipiloe manga lelange e'e su tingo ngu ghapang u kambing e'e, su l᷊al᷊ung u tampa u inung i sire, watu'u manga kambing e'e mo mul᷊al᷊anaghi su orasi manginung. 39Inau boko manga kambing e'e mul᷊al᷊anaghi su tingo ngu manga lelang e'e, anae sarung ko loreng, arako pia wuhie arako pia tonte'e.
40Bou e'e i Yakub nangal᷊a manga domba mbuhue nipupasaruange sarang manga kambing ko loreng l᷊au ko maitung. Dingang l᷊al᷊eng kere'e i sie nakarea ghapang u binatange sisane dang nipakagheae bou ghapang u binatang i Laban.
41Boko manga binatang ko matatoghasi kapul᷊al᷊anaghi, i Yakub mamilo u manga lelang ko seng mbuae niwunie e'e su tingo ngi sire, su l᷊al᷊ung u tampa u inung i sire. 42Arawe manga lelang e'e ta nipiloe su tingo ngu manga binatang ko l᷊al᷊ome. Inau, kaul᷊i u binatang ko mawawira e'e ko l᷊ome, dang e'e koa i Laban, arawe kaul᷊i u binatang ko mal᷊aitung, ko pia wuhie dang ko pia tonte'e e'e ko matoghasi, dang e'e koa i Yakub. 43Dingang kere'e i Yakub nakoa ko kala kahingang. I sie pia maul᷊i ghapang u kambing domba onta, keledai dingang u manga l᷊ang.
सध्या निवडलेले:
KARARIADI 30: PLT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन