Matius 9
9
Agatn monyamani urakng inyo lumpuh, Yesus mombutian diri-Nyo bokuaso moamputi dosa
(9:1-8)
(Mrk. 2:1-12; Luk. 5:17-26)
1Jadi, Yesus ongko boko murid-Nyo noi' ko dalapm porohu ongko monyomboraki agi' danau Galilea nantai. Lopas nian, Sio sampai ko kota-Nyo siku'.#9:1: Masudnyo, kota Kapernaum, tompat Yesus tinggal. 2Ongko, boboropo urakng datakng mombaba' urakng sakit lumpuh inyo mangkakan di pucu' tikar. Timpu Yesus moniant sia' pocayo obai Sio bokuaso, Yesus bopandir ko urakng lumpuh nantai, “Somadikan-Ku, jangan gola', obai dosa kolai udah diamputi.”
3Ado boboropo guru agama Yahudi mondinga' nantai. Sia' mula'i bopikir dalapm hati, “Urakng ni'in mohayam Allah!”#9:3: Bayo Allah inyo ulih moamputi dosa
4Apo, Yesus mongotohu'i pikiran sia'. Jadi, Io bopandir, “Pikiran dalapm hati kaitn jahat! 5Monurut kaitn mono inyo lobih mudah? Mongatoan ‘Dosa kaitn udah diamputi’ damo ‘huas ongko bojalatn cam’. 6Apo watu ni'in Aku honda' moniant'an ko kolai obai di pucu' bumi ni'in Ana' Monsio bokuaso moamputi dosa.” Ongko Yesus bopandir ko urakng lumpuh nantai, “Huascam, angkat kotidu'an kolai, huatan pulakngcam ko rumah kolai!”
7Hagar urakng nantai huas ongko pulakng. 8Watu boko urakng moniant nantai, sia' gola' obai kuaso-Nyo. Sia' momuji Allah inyo moonji'i kuaso sama'an nantai ko monsio.#9:8: Kato ‘monsio’ ni'in banya' rotinyo. Mungkitn bayo Yesus dimasud di si'itn, apo Sio momakai kuaso-Nyo oca' ‘monsio’ ulih diamputi aman sia' pocayo ko Sio. DAMO Mungkitn ‘monsio’ boroti Yesus ongko boko murid-Nyo obai Allah moonji'i kuaso ko sia' pakai' monyamani. Apo bayo Allah ongko Yesus ado kuaso pakai' moamputi dosa.
Yesus bokawal agatn boko urakng inyo dianggap kinyo boi'
(9:9-13)
(Mrk. 2:13-17; Luk. 5:27-32)
9Lopas nantai, Yesus botula' doi' santai. Sio moniant ado siku' urakng Yahudi inyo monagih pajak pakai' pomorintahan Romawi. Damonyo Matius, tongahan dudu' di rumah tompat pongumpulan pajak. Yesus bopandir ko Matius, “Tuyut Aku cam!” Matius nantai bodiritn ongko tuyut Yesus.
10Lopas nian, Yesus ongko boko murid-Nyo makatn di rumah Matius. Ado banya' ponagih pajak huatan boko urakng inyo bodosa datakng jumpat makatn bosamo-samo agatn sia'. 11Watu nantai boko pomimpitn agama Yahudi doi' kolompok Farisi moniant hal nantai, sia' bopandir ko boko murid Yesus. Kato sia', “Ma'apo guru kaitn makatn bosamo-samo agatn ponagih pajak ongko boko urakng bukai inyo bodosa?”#9:11: Boko pomimpitn agama Yahudi momakai sotilah ni'in pakai' morendahan boko urakng inyo dianggap kinyo cucu'. Ponagih pajak kotakng dibonci' urakng Yahudi bukai obai sia' bokorojo pakai' pomorintahan Romawi. Sia' pan mongumpulan pajak lobih banya' daripado inyo ditontuan pomorintah.
12Apo Yesus mondinga' pomandiran sia' nantai. Jadi Sio bopandir, “Boko urakng inyo sehat kinyo pontikng dokter. Apo boko urakng sakit pontikng dokter. 13Jadi, botula' huatan polajaricam masud doi' pomandiran Allah ni'in: ‘Daripado momposombahan kurbatn bonatakng ko Aku, Aku lobih honda' oca' kaitn mooso salu' ko urakng bukai.’#9:13: Doi' buku Hosea 6:6. Obai, Aku datakng kinyo pakai' moningkau sia' inyo moanggap dirinyo bondar. Apo Aku datakng pakai' moningkau boko urakng inyo bodosa oca' sia' moninggalan boko dosa sia'.”
Yesus monjolasan alasan boko murid-Nyo co bolampah
(9:14-17)
(Mrk. 2:18-22; Luk. 5:33-39)
14Lopas nantai, boko murid Yohanes Pombaptis datakng. Sia' bopandir ko Yesus, “Koi ongko boko urakng Farisi opat bolampah. Ma'apo boko murid Duatn cado?”
15Timbas Yesus ko sia', “Dalapm poumpamoan ni'in watu pongantitn lolaki ado bosamo agatn pokawalannyo di pogai kawitn, pasti sia' kinyo salu'. Apo watunyo paca'an datakng, pongantitn lolaki dikuti' doi' sia'. Watu nantai, sia' paca'an bolampah.
16Co nyiant urakng inyo monambal birat di baju manah agatn kotota'an koitn inyo ija' boharu. Obai aman ubo nian, koitn inyo ija' boharu paca'an ngorisut ongko mombirat baju manah nantai. Lalu birat di baju nantai paca'an monjadi lobih bosar. 17Agatn contoh bukai, co nyiant urakng monyimpatn anggur boharu ko dalapm kantong kulit inyo manah. Urakng kinyo molabuhan nantai obai watu anggur boharu mongombakng, kantongnyo pocah. Jadi kantongnyo rusa' ongko anggurnyo tumpah. Anggur inyo boharu gola' disimpatn ko dalapm kantong inyo boharu jam. Ongko, kododuonyo totap tosimpatn agatn boi'.”#9:16-17: Koitn boharu ongko anggur boharu molambakan porubahan inyo dironcanaan Allah sobolupm Sio bulah somuo isi dunia. Porubahan nantai tojadi watu Allah monyiuh Rajo Inyo Dijanjian-Nyo datakng ko dunia ni'in. Agatn poumpamoan ni'in, Yesus monjolasan urakng gola' monyadari diri obai pikiran huatan hati sia' gola' diporboi'i-Nyo. Bayo urakng inyo pocayo obai Yesus Rajo Inyo Dijanjian Allah ulih diporboi'i.
Yesus bulah siku' urakng bobia' kocit bobali' hidup huatan Yesus monyamani siku' urakng botina'
(9:18-26)
(Mrk. 5:21-43; Luk. 8:40-56)
18Pontongahan Yesus bopandir ko boko murid Yohanes Pombaptis nantai, ado siku' urakng kopala' rumah sombayakng datakng ko Sio. Io tundu' monyungkapan di hadapan Yesus. Katonyo, “Ana' botina'ku hoyu' ja' mati. Apo datakng bo. Cama' bo io, ongko io paca'an bobali' hidup.” 19Jadi, Yesus bodiritn. Sio ongko boko murid-Nyo botula' tuyut kopala' rumah sombayakng nantai.
20-21 Dalapm pojalatan ko su'utn, ado siku' urakng botina' inyo sakit pondarahan.#9:20-21: Kito co tohu pasti ponyakit pondarahan ni'in. Mungkitn mosalah lampat-tapih, damo mosalah darah koluar doi' bagian bukakng-tubuh inyo bukai. Udah duo bolas tohutn manahnyo io boponyakit nantai. Io bopandir dalapm hatinyo, “Biar pan aku bayo moncama' rumbai jubah Yesus, pasti aku paca'an nyamanam!” Jadi, io mohampiki Yesus doi' bolikat#9:20-21: Mungkitn botina' nantai gola' obai udah tohu Yesus bokuaso. Monurut boko guru poraturan agama Yahudi, io dianggap kotor obai bodarah. Jadi, mungkitn jam io gola' ditogur damo dihukupm. ongko moncama' rumbai jubah-Nyo. 22Apo Yesus mongilikng huatan moniant botina' nantai. Kato-Nyo, “Somadikan-Ku, jangan gola'. Kolai nyamanam obai kolai udah pocayo ko Aku.” Watu nantai jam, botina' nantai nyamanam.
23Lopas nantai, sia' tuntunkam di rumah kopala' rumah sombayakng nantai. Yesus mansu' ongko moniant boko poniup sulikng monombuh nyanyian bulikng-undu'. Banya' jam boko urakng camuh. 24Ongko Sio bopandir ko sia', “Koluarcam, obai bobia' nantai kinyo mati. Io bayo tidu'.” Apo, sia' monontao'i Sio. 25Lopas boko urakng nantai koluar, Yesus mansu' ko dalapm kamar bobia' nantai. Watu Yesus moncanggapm longannyo, bobia' nantai bobali' hidup ongko bodiritn. 26Ongko borito mongona'i nantai tosebar ko somuo doerah nantai.
Yesus monyamani duo urakng buto
(9:27-31)
27Lopas Yesus botula' doi' santai, ado duo urakng buto mombodapan Sio. Sia' mondongkakng-mondorah, “Yesus, Rajo doi' koturutan Daud!#9:27: Rajo doi' koturutan Daud nantai sobut'an bukai pakai' Kristus, ‘Rajo Inyo Dijanjian Allah.’ Kasihicam koi!” 28Timpu Yesus mansu' ko dalapm rumah, koduo urakng buto nantai datakng ko Sio. Yesus botakutn ko sia', “Pocayo cado kaitn aman Aku ulih monyamani kaitn?”
Sia' monimbas, “Au, Tuhatn, koi pocayo.”
29Jadi Yesus moncama' mato sia' kapikng bopandir, “Tojadicam ko kaitn sama'an inyo kaitn pocayo'i!” 30Ongko sia' ulih moniant agi'. Ongko, Yesus morarakng sia' agatn togas. Kato-Nyo, “Jangan bokisah mongona'i ni'in ko sopo pan!” 31Apo sia' botula' mongisahan mongona'i Yesus di somuo doerah nantai.
Yesus monyamani urakng bisu
(9:32-34)
32Pontongahan koduo urakng nantai koluar rumah, ado urakng bisu dibaba' ko Yesus. Urakng bisu nantai korasu'an roh jahat. 33Lopas Yesus monundukng roh jahat nantai, urakng bisu nantai ulih bopandir agi'. Urakng banya' hiratn. Kato sia' “Kojadian sama'an ni'in bolupm kalo tojadi di Israel!” 34Apo boko pomimpitn agama Yahudi doi' kolompok Farisi bopandir, “Sio monundukng boko roh jahat momakai kuaso Rajo Sitatn!”
Yesus mooso salu' ko urakng banya'
(9:35-38)
35Yesus bokolilikng ko somuo kota ongko desa. Sio mongajar dalapm boko rumah sombayakng urakng Yahudi. Sio momboritoan Kabar Boi' mongona'i Koraja'an Sorugo. Sio pan monyamani boko urakng doi' somuo macapm ponyakit. 36Watu Sio moniant urakng banya' nantai, Sio salu' agatn sia' obai sia' dalapm kosusahan huatan kotakng momontikan potulukan, samo sama'an boko domba inyo kinyo bisi gombala. 37Jadi, Sio bopandir ko boko murid-Nyo, “Hasil inyo pontikng dihanyi cukup banya', apo urakng bokorojo pakai' mohanyinyo bayo sodikit. 38Jadi, mintocam ko Umputn lakau oca' Sio mongiripan lobih banya' urakng bokorojo pakai' mohanyi hasil tanaman-Nyo.”#9:38: Kiasan ni'in bomasud, ado cukup banya' urakng inyo honda' pocayo ko Yesus, apo bayo sodikit urakng pakai' momboritoan mongona'i Sio. Jadi bodoacam ko Allah oca' Sio mongiripan lobih banya' urakng pakai' momboritoan mongona'i Yesus.
सध्या निवडलेले:
Matius 9: TBDS
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन