Neto'te 16
16
Mba bo bwe Ismaél là
1Saraï nzwi Abram lo ke bwe mén mfà yi. Saraï lo ghù mo' nkuan i ze mènnzwi, ngon Egipto, lén se Agar. 2Saraï tshob Abram ndù: Tshù, Tshùaben ghù me be kebwe; se'e, me le't'o, ndo' nkuan àm ze mènnzwi, be mo' ndù me tshùa njam i ngù mén mandum. Abram ju' ntshu nzwi i. 3Ndùlala Saraï lo' nkuan i ze mènnzwi Agar, ngon Egipto mfà Abram ndu i mba nzwi i là. A lo be be ndù Abram tswe ntùm ngô Kanaan ngu'njù gham. 4Abram lo' Agar, a be jùm. Ngelaṅ Agar yen ndù a be jùm nà, a to' newag màfa' i. 5Saraï tshob Abram ndù: Tshabte ze Agar tshwèt ntshabt'àm yi là lôt'a wù. Me lo fà nkuan àm ze mènnzwi mum mbu mu, ndonni z'a yen ndù a jùm nà, me tù' à kelo' ngù ju yi num miag mi. A bwô Tshùaben bèn mbe ngatsho'te netèt bag. 6Abram tshob Saraï ndù: Tshù nkuan o ze mènnzwi là, o bèn ngù ntsha num i, ghù yi mb'o bèn nkô là. Ndùlala Saraï ghùtni Agar, k'a kù nèn ngùanesà.
7Angél Tshùaben yen Agar mbaṅ mo' tumnsi ntse num kônkwa, mbaṅ tumnsi ntse z'a be num manze Shur là, 8ntshob yi ndù: Agar nkuan Saraï ze mènnzwi, o fe à yà, nke nèn yà? A bùnte ndù: Me ke nkù à màfa' àm Saraï. 9Angél Tshùaben tshob yi ndù: Bèn njam ntèt màfa' o, nkab tu o nsi mbwe i. 10Angél Tshùaben tshob yi ndù: Me nsi ghù nzwil o yàme, njàm tà mèn ke ku'ni nesiaṅ i. 11Angél Tshùaben tshob Agar ndù: Tshù wù là z'o be jùm nà, o nsi bwe mén mandum, yab lén se ndù Ismaél, nummbe Tshùaben ju' nz'o ntùm ngùtni o. 12Yen mén nà nsi b'a mba kekwèn tshwèt là. A nsi bù' bu i nsi num njoṅ benntùn fa, bu njoṅ benntùn fa lo nsi num i. Ze dù'ntswe ke nsi tamte boa ze fèt tse.
13Agar yab lén Tshùaben z'a na' ntshob nu yi là ndù: O b'a Nsi z'a be njen nà. Nummb'a lo tshob ndù: A b'a kua' nsen ni ze me yen ntshùa mèn z'a ke njen àm nà ké? 14A ndùlala, bo be ntsiaṅ sen tôntse là Lakaï-Roi, yen nà bagt'a ndù: Mén z'a be ntùn, mén z'a be njen àm nà. Sen tôntse là b'a netèt Kadèsh bo Béréd.
15Agar #Gal. 4.22bwe mén mandum Abram. Abram tswi lén mén ndù Ismaél. 16Agar lo be bwe Ismaél ndù Abram tswe ngu'njù ṅam bwe'e.
सध्या निवडलेले:
Neto'te 16: BMa
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
La Sainte Bible en Bamiléké-Medùmba © Alliance Biblique du Cameroun, 1993. All rights reserved.