Yuuẖanna 5
5
Gibijoŋ gina gijo gi libuŋ la Betẖisda
1A dina ma dhuŋun ibidhe ro peth, a ŋidwa ŋa Yahuud je; a Yasuuⓐ alo Urushaliim. 2Libuŋ lijo Urushaliim githo gi suug gwa jaŋal. Lathi Yahuud aici Betẖisda, lijina dunu thudhina. 3Gi dunu ibigwe liji loinyadho lathidhire galo lina luma, a lina liro ŋwudhibaŋ, a lina liro jibijoŋ, a lina laio doi nono a ŋwora, lathidhunijo ŋau dubi galo. 4Kaija kaija athi malaak ule gi libuŋ ganu, ŋwubie ŋau galo; a kwiji gwina gwamadhini ŋwula ŋau ganu kwerkwereny gwagitini momaŋ ŋirainy ŋina ŋuthuŋwulo. 5A kwiji gweta je mine, gwina gwuma jidhileo dhure‐a‐die‐a‐dubaŋ. 6Dina ma Yasuuⓐ aŋa didhre galo, ŋwuliŋa darnu gwiro minoŋ jidhileo joinyadho, ŋwaicinu, Au gwara gwagitini momaŋ a? 7A kwiji gwina gwuma aicinu, Kweleny gwai, maji ma ŋau ubi galo athinyi bujo kwijo gwa dhiny uleje gi libuŋ ganu no; abi minyare nyi gwule, a gwiter madhinani diginy. 8A Yasuuⓐ aicinu, Diro, ŋapai lagram luŋa, ŋalela. 9An kwiji iŋiradha ganu babraŋ, ŋwapai lagram luŋun, ŋwela. Lamun ibile liro lamun la Sabith. 10A Yahuud abiŋaijo kwijo gwina gwigitinu momaŋ, alaicinu, Lamun la Sabith liro; gwati gwiŋir daŋupini lagram no. 11Ŋwulaicinu, Gwina gwigetiny momaŋ gwaicinyinu, Apo lagram luŋa, ŋalela. 12Alothaije galo, alaici, Kwiji gwirau gwina gwaicaŋanu, Diro, ŋapai lagram luŋa, ŋalela? 13A gwina gwigitinu momaŋ athuŋw liŋidhi darnu ei gwiro no; dina ma Yasuuⓐ alo kalo giter, ŋinena jo liji loinyadho mine. 14A Yasuuⓐ aji ŋwubuje gi hekal ganu, ŋwaicinu, Aŋadhi, au gwimagitini momaŋ; athaŋa apo ŋida ŋina ŋike manaŋ no, udubidi ŋidi ŋina ŋikanu ŋila duguŋa. 15A kwiji ela, ŋwabiŋaijo Yahuud, ŋwulaici, Yasuuⓐ gwiro gwina gwigetiny momaŋ. 16A Yahuud ure Yasuuⓐuŋw ŋina, alari gwalrinya, ŋinena apuŋw dhuŋuna ibidhe gi lamun la Sabith. 17Albi Yasuuⓐ aicinu, Babo gwiny gwathapai ŋiro gwortal di ŋinena ro, a nyi ko. 18A Yahuud ari manaŋ gwalrinya, ŋinena munudhuŋw lamun ganu la Sabith, ŋwubarnu ko Kalo giro Babo gwuŋun, ŋwari gwiren nu lubio Kalo gai.
Yasuuⓐ gwaŋajo lijo darnu gwati gwuthi ŋoma dapai ŋiro ŋeda cucun no, abi ŋediŋa Babo gwai gwuŋun
19Al Yasuuⓐ abiŋaijo, ŋwulaici, Titiganu, titiganu, nyi gwa gwacaijinu, Ŋari ŋati ŋuthi ŋoma ŋapai dhuŋuna dheta gwiren no, abi dhuŋwapai dhina dhathuŋw aŋa di Babo gwuŋun apai; a dhuŋun peth dhina dhathuŋw apai athi Ŋari apai ko. 20Babo gwuminyu Ŋare, ŋwaŋajo ŋiro peth ŋina ŋathuŋwulapai; a ŋaji ŋuŋwaŋajo ŋiro ŋina ŋinunu ŋiro ibiŋe, a ŋajalije galo dir. 21Gwiro ŋinena athin Babo direye lijo dai, ŋwulmidhiye; a minoŋ ko laji lal Ŋari direye lina luŋwulare. 22Babo gwati gwakimiyo kwijo gwetipo no, ŋwubidhedha Ŋare ŋelenya peth ŋa dhakimiye. 23A liji peth neye Ŋare, gwiro ŋinena neyina Babuŋw. Gwina gwati gwineyo Ŋare no gwati gwineyo Babuŋw gwina gwukejo no. 24Titiganu, titiganu, nyi gwa gwacaijinu, Gwina gwadiŋini dhuŋuna dhiny, ŋwuminyi ŋeduŋw gwina gwukejiny, gwuthi midhuŋw gwortal, a gwati gwaje dakimini no; gwimubirini dai ŋwela di midhe. 25Titiganu, titiganu, nyi gwa gwacaijinu, Saaⓐa jaji jila, a jo ŋinena, maji ma liji lina limai diŋini gwula gwa Ŋari ŋa Kalo, a lina lidiŋinu lamidhe. 26Gwiro ŋinena uthina Babo midhuŋw; a minoŋ ko ŋwudhedha Ŋare duŋwuthi. 27Ŋwudhedha ŋelenya ko ŋa dhakimiye, ŋinena ruŋw Ŋari ŋa liji. 28Athanya ulidhi galo dir gi dhuŋun ibidha no; ŋinena adhi saaⓐa aji ŋwila, jina jadhi jai liji lina lijo gi del ganu diŋini gwula gwuŋun. 29Altuya; lina limapai dhuŋuna dhina dhiŋir, aladire, alamidhe; a lina limapai dhuŋuna dhina dhike ladire dakimini.
Yasuuⓐ gwabiŋu dhuŋuna dhan shahaada gwa gwidom gwuŋun
30Nyi gwiren gwati gwuthi ŋoma gwapai dhuŋuna dheta no; gwiro ŋinena diŋininyina nyakimiye; a ẖukm gwiny au; ŋinena athathiny bupo bupe gwai gwiny no, abi bupe gwai gwa Babo gwiny gwina gwukejiny. 31Ada nyi gwimabiŋi shahaada gwiny gwiren, a shahaada gwiny gwati gwiro titiganu no. 32Gwo gwiter gwina gwabiŋi shahaada gwiny; a nyi gwaliŋa darnu shahaada gwuŋun gwina gwabiŋudhuŋw diginy gwiro titiganu. 33Nyaŋa lukejo lijo di Yuuẖanna, a Yuuẖanna ro shaahid gi dhuŋun dhina dhiro titiganu. 34Nyi gwati gwuminyu shahaada gwa kwiji dogo no; naji babiŋaijo dhuŋuna ibidha dhanya gilaŋini. 35Yuuẖanna gwiro ŋinena lamba lina lathudhe ŋwora kaloŋa galo; a nyaŋa luminyu danya iŋir dugore gi fure gwuŋun ŋwamun coŋ. 36Abi nyi gwuthi shahaada gwina gwinunu di Yuuẖanna; ŋiro ŋina ŋidhedhinyilo Babo dinyilmeaje ŋiro ibiŋe ŋina ŋathinyilapai ŋadhaŋajo lijo darnu Babo gwukejiny. 37A Babo ko gwiren gwina gwukejiny gwiro shaahid gwiny. Nyaŋa lati lidiŋinu gwula gwuŋun gatur no, i athanya aŋadhi no. 38A nyaŋa lati luthi dhuŋuna dhuŋun dagalo no; ŋinena athanya uminyu ŋeduŋw gwina gwukejuŋw no. 39Bupul jitham ganu; ŋinena arinyanu nyaŋa luthi midhuŋw gwortal degen; a jitham ibije jiro shaahid gwiny. 40Athanya doinya diladha diginy, danya uthi midhuŋw. 41Nyi gwati gwuminyu mirejuŋw galo gwa liji no. 42Abi nyi gwiliŋidhaje gwai darnu nyaŋa lati luthi uminyuŋw gwa Kalo dagalo no. 43Nyi gwidhi jiriny jai ja Babo gwiny, nyilbi irini; ada gwiter gwimila jiriny jai juŋun, nyabi uminyi. 44Nyaŋa luthi ŋoma luminyi akwai dina uthanya mirejuŋw galo dagalo gweta gweta, athanyabi bupo majdh gwina gwidhi di Kalo cucun no? 45Athanya arnu nyi gwaji gwajiteje galo di Babo no; gweta gwo gwina gwajiteje galo; Muusa gwiro, gwina gwidhunijanya. 46Ada nyaŋa lina limai uminyi Muusuŋw, nyaŋa liny uminyi ko; ŋinena uladhuŋw diginy. 47Abi ada nyaŋa lati limuminyi jitham juŋun no, abi nyaŋa luminyi dhuŋuna dhiny akwai?
सध्या निवडलेले:
Yuuẖanna 5: HBN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
First published by the British and Foreign Bible Society in 1966.