Jon 2
2
2:1-12 Iesu Ririeta, Uvu Kaverea Vaini Ninduturia Re.
1-2Fefera ungagha seriguturia-da ambova, naa ragaro Kana, Galili Frovensi anava, yagera ari banau ueta, Iesu da nue banauva arie. Kotú Iesu unda ambo nimbide beago aghi jufirieta, aná banauva igiguturie. 3Aghade banau ueta, vaini sidara urieta, Iesu da nuemi undú eghá ririe, “Vaini sidara etue.”
4Aghá ririeta, Iesu na mino ririe, “Aya,#2:4 Baiboro dumeniva, imó evetu tutuno enava gaita roravore. Anada bee mo, Jon umó Grik gaami, evetu gefirie. Avotago, namonde amó ayadu verua urota, jo “evetu” rambi egegasire. Amindu, námane eve aya gefirere. dodu andava rere? Anda fefera jo furá bubambi re.”
5Aghá riria-du, Iesu da nuemi buro kakatodu eghá ririe, “Unda daiyagha radua aghagonu egege!”
6Jiusi enemboda agho dariva sei ingo seghea, undari undidigeta urie. Aghá-gea, uvu dimbari ovu singoi manemi uubu egegarinu dano, ingo yoveni-yoveniva dabako avo ititiguturieta vitirie. Ovu dabako aná 100 lita da inono re.
7Aghá uria-du, Iesu na buro kakatodu eghá ririe, “Uvu tava ea bua fufuge, ená ovu jojabebeiva rurukadi, beda-beda egegoe!” Aghá ririeta, buro kakatomi uvu didimbugea bua furia, rurukuturieta, ovu mane beda-beda urie.
8Anada ambova, Iesu na eghá ririe, “Avoreta, rekago dimbua bua igige, banauda kofiri righari-du ututugadi!”
Aghá ririeta, buro kakato unda riria aghagonu ea aria, banauda kofiri righaridava ututurieta, 9aná uvu kaverea vaini ninduturia-nu, aná banauda kofiri righari undia gerurie. Atá, vaini niavoreta furia, umó jo gambi re. Tago buro kakatomi gigiguturie. Aná banauda kofiri righari mana-mana urie-gea, aghi ituturieta aria, aná evetu yagera uria embó bua furieta, 10undava uriga urie, “Enembo dano eghá egegeta rousue. Vaini taubananu ututugeaveta, esega enembo undia beforo biruru egegeaveta, vaini muno tefo ambova ututa rousue. Tago, imó ená vaini taubana righia vitara, ambova rei-ututoravore!”
11Iesu ená ivata anogha unda tutunova Kana naa Galili Frovensiva urieta siroruturie. Fefera aghade, unda ano duroghade iruguturieta, unda ambo nimbi gigigea gaabee egeguturie.
12 #
Mat 4:13
Anada ambova, Iesu nuegha, unda ambobo vivide, kotú unda ambo nimbide vovoriguturie. Aria bubua, fefera dumeni númane avo Kafoniam naava desea vitirie.
2:13-22 Iesu Na God Du Tafaroro Ari Kambova Buburituria Re.
(Matyu 21:12-13; Mak 11:15-17; Luk 19:45-46)
13 #
Ex 12:1-27
Avo iririgutueta, Jiusi enemboda Serigea Yari Banauda fefera utua uria-du, Iesu erea, Jerusalem yavurie. 14Aria bubua, God du Tafaroro Ari Kamboda* ghouka rova terua geruria mo, embobomi oka burumakaude, sifide, kotú dii uku mino-mino ututugea, guri bubugutueta gerurie. Anada kasava guri yayo ari kakato asusumbea buro egegutueta gerurie. 15Aghá gerurota, eri eininu bua anami sifide burumakaude kotú aná enembode dano dea tuviturieta, isaghava bububuguturie. Kotú guri yayo#2:15 Ii, gaga Mat 21:12 anada tuva guri yayo ari enembodu daiyagha gembari vitia-nu irugea gia, tanana adi! ari enemboda guri mane dea rifi-rafa urieta vovorueta, faro mane righia averegea tefo urie. 16Dii mane utua guri reisi-rururia enembodu eghá ririe, “Nímanda dii mane bubugea isaghava bububuge! Nímane daiyagha aghá egegutueta, anda Afada Kambo guri utua bari kambesi aghago etu?” 17#Ps 69:9Aghá ririeta, námane unda ambo nimbi gaga Buka Seiva gefirieta vitia-nu nundubuturera, aná evere:
“Anona inda kambodu neno buta rora,
aná eto-bato ivarimi anda neno rova evarigo eta rouvie.”
18Aghá ririeta, Jiusi enembomi mino regeguturie, “Ivata anogha donu adi sirorota, námane gigigea, God na ano utueta, inda ari-bari etora-nu gaabee egega?”
19 #
Mat 26:61; 27:40; Mak 14:58; 15:29 Aghá regeguturieta, Iesu mino númandu eghá ririe, “Ená kambo dea bebejegadora, anona fefera bakodeda rova rekago righota eraita rouvie.” 20Anada ambova, Jiusi enembomi eghá ririe, “Ená Tafaroro Kambo ghaeko 46 da rova egeguturie. Daiyagha inona fefera bakodeda rova righota eradu?” 21Aghá ririe-tago, Iesu unda tamodu rirota, kambo gaa ririe. 22Anada ambova, umó amburarivareta erorurieta, unda daiyagha riria, unda ambo nimbi nundubuturie. Aghade God da Gaga sei riria-de, kotú Iesu da riria gagade dano gaabee egeguturie.
2:23-25 Iesu Enemboda Neno Nundubari Dano Gari Re.
23Serigea Yari Banauda* feferava, umó Jerusalem irirota, ivata dumeni urieta siroruturieta, enembo oruaruabe gigigea, umó gaabee egeguturie. 24Aghá egeguturie-tago, Iesu jo númane gaabee ambi re. Anada bee mo, enemboda neno nundubari dano umó gerurie. 25Númanda nundubari bemi regegota ningasua, o jo regegambi egegasua, aná avore. Anada bee mo, númanda neno rova nundubari daiyaghago egegeta uria, umó seibe gia tanana eta urie.
सध्या निवडलेले:
Jon 2: BJZ
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2017, Wycliffe Bible Translators, Inc. All rights reserved.