Mataio 13
13
Ko te Talafakatuha o te Tino Lūlū Haito
(Maleko 4.1-9; Luka 8.4-8)
1Ko te aho lava tēnā na fano kehe ai ia Iehu mai te fale, kua fano ki te matāfaga o te vaitūloto, kua nofo ki lalo ma akoako atu ki tagata. 2#Luk 5.1-3Ona ko te tokalahi o te kaifenua kua fakapotopoto fakatāmilo mai ki ona tafa, na hopo ai ki he vaka oi nofo mai ai i kinā, kae ko te kaifenua kua laulaututū ifo i te matāfaga. 3Na fakaaogā e ia nā talafakatuha ke fakailoa ai ki tagata te lahi o nā mea; kua lea vē atu,
“Nae i ei he tino na fano oi lūlū ni fatu haito i tona fatoaga. 4I te lūlūga e ia o nā fatu haito, na pakukū ai iētahi fatu haito ki luga o te auala, oi ōmai ai nā manulele oi kai uma lele. 5Ko iētahi fatu haito na pakukū ki luga o he mea fatufatua e tau hēai he kelekele i ei, ma na vave lele oi tutupu ake nā lau ona ko te kelekele e hē loloto. 6Kae i te fanakega o te la ki luga, na velahia ai nā tamā lākau ma e hēki mataloa kae kāmata oi magumagu, auā ko nā aka e hēki ola lahi ki lalo. 7Ko iētahi fatu haito na pakukū ki te mea e ola ai nā vao mātuituia, ma kua ola ake nā vao mātuituia kua taomia ai nā tamā lākau, ma hē mafai ai ke ola. 8Ka ko iētahi fatu haito na pakukū ki luga o te kelekele lelei oi fua mai ai nā fuāhaito: ko iētahi e fua mai e taki tau helau, ko iētahi e taki tau onohefulu ma iētahi e taki tau toluhefulu.”
9Kua fakauma ia akoakoga a Iehu oi lea vē atu ai, “Kāfai e i ei ni outou taliga, fakalogo mai la!”
Ko te Ala nae Fakaaogā ai e Iehu nā Talafakatuha
(Maleko 4.10-12; Luka 8.9-10)
10Oi ōmamai ai te kau hoko ki a Iehu ma fehili vē atu ki a te ia, “He ā te fakaaogā ai e koe nā talafakatuha i au akoakoga e fai ki nā tino?”
11Kua tali mai ia Iehu, “Kua uma te fakailoa atu ki a te koutou nā mealilo i te Mālō o te lagi, kae ko hēki fakailoa ki iētahi tino. 12#Mat 25.29; Mlk 4.25; Luk 8.18; 19.26Auā ko te tino kua i ei hana mea, ka toe fōki ki ei kae ke lava ai ma totoe mo ia; kae ko te tino e hēai hana mea, ka kave kehe mai ia te ia ke pa lava ki he tamā mea kua ia te ia. 13Ko te ala ia e fakaaogā ai e au nā talafakatuha ke akoako ai ki lātou, ona e kikila o lātou mata kae hē ki lātou kitea, ma e fakalogo kae hē ki lātou lagona pe mālamalama. 14Ma kua taunuku ai ki a te ki lātou te vāloaga a Ihaia e lea mai: Kua vāgana te Atua,
‘Ko nā tino iēnei ka fakalogo ma fakalogo,
kae e hē mālamalama;
ma ka kikila ma kikila,
kae hē ki lātou kitea,
15 #
Iha 6.9-10
auā ko o lātou māfaufau e vālelea,
ma kua poloka e ki lātou o lātou taliga,
ma tapuni o lātou mata.
Anei ake e kitea e o lātou mata,
ma lagona e o lātou taliga,
ma mālamalama o lātou māfaufau,
ma liliu mai ki a te au,
e kō fakamālōlōa ki lātou.’
16“Kae ko koutou, amutia koutou! E kitea e outou mata ma lagona e outou taliga. 17#Luk 10.23-24E takutino atu e au ki a te koutou, e tokalahi ia pelofeta ma tagata o te Atua na fofou lahi lele ke ki lātou kiteagia nā mea kua kitea e koutou, kae e hēki mafai e ki lātou, ma fia fakalogo ki nā mea kua lagona e koutou kae e hēki mafai e ki lātou.
Kua Fakamālamalama e Iehu te Uiga o te Talafakatuha o te Lūlūhaito
(Maleko 4.13-20; Luka 8.11-15)
18“Fakalogo mai la, kae ke iloa e koutou te uiga o te talafakatuha o te lūlūhaito. 19Ko nā tino e ki lātou lagona te fekau e uiga ki te Mālō o te Atua kae hē mālamalama lelei e uiga ki ei, e fakatuha ki lātou ki nā fatu haito na pakukū ki luga o te auala. E hau ia Hātani oi hamu kehe nā mea na totō ki o lātou loto. 20Ko nā fatu haito na pakukū ki luga o te kelekele fatufatua, e fakatuha ki nā tino e ki lātou talia ma te fiafia te fekau i te taimi lava e lagona ai e ki lātou. 21Kae e hē loloto to lātou talitonu, ma e hē tūmau mataloa ai foki; ko te taimi lava e pa mai ai nā puapuagā ma nā fakahāuāga ona ko te fekau, e vave lele oi uma to lātou talitonu. 22Ko nā fatu haito na pakukū ki te mea e ola ai nā vao mātuituia, e fakatuha ki nā tino e ki lātou lagona te fekau a te Atua; kae ko popōlega o te ōlaga ma te mānumanu ki koloa o te lalolagi, kua taomia ai te fekau ma hē fua mai ai ni fua. 23Ma ko nā fatu haito na lūlū ki luga o te kelekele lelei, e fakatuha ki nā tino e lagona te fekau ma mālamalama lelei ai; e fua mai e ki lātou nā fua, ko iētahi e taki tau helau, ko iētahi e taki tau onohefulu, ma iētahi e taki tau toluhefulu.”
Ko te Talafakatuha o nā Vao Kino
24Kua toe fai tētahi talafakatuha a Iehu ki a te ki lātou: “Ko te Mālō o te lagi e fakatuha vēnei. Na lūlū e he tamāloa ni fatu haito lelei i tona fatoaga. 25Kua pa ki tētahi pō ka koi momoe ia tagata, kae hau te tino e fai te tamāloa ma ona fili, oi lūlū nā fatu vaokino ki te mea e i ei nā haito, oi toe fano kehe ai. 26Kua ola ake nā lākau kua kāmata tutupu nā ulu haito, ka kua hula ake ai foki ma te vao kino. 27Oi ōmai ai nā kaukauna a te tamāloa kua lea vē atu ki ei, ‘Te aliki, na lūlū e koe nā fatu haito lelei i te fatoaga; kae na vēhea nei oi ola ai nā vao kino?’ 28Kua tali mai te tamāloa, ‘Ko he tino nei e fili mai ki a te au te na ia faia te mea tēnei.’ Oi lea atu nā kaukauna, ‘E fofou la koe ke olo ki mātou oi laga ki luga nā vao kino?’ 29Kua tali mai te tamāloa, ‘Hēai, auā kāfai e laga e koutou nā vao kino, e ono laga fakatahi ake ai ma nā haito. 30Kae tuku vēia nā haito ma nā vao kino ke ola fakatahi ake ke pa ki te taimi o te helehelega. Ka lea au ki nā tino helehele haito ke laga muamua ki luga nā vao kino ma tanoa lulukuga, ma huhunu. Oi fātoā fakaputu mai ai nā haito ma kave ki loto o toku fale haito.’ ”
Ko te Talafakatuha o te Fatu Hīnapi
(Maleko 4.30-32; Luka 13.18-19)
31Kua toe fai tētahi talafakatuha a Iehu ki a te ki lātou: “Ko te Mālō o te lagi e fakatuha ki he fatu hīnapi na kave e he tamāloa oi totō i tona fatoaga. 32Ko te fatu ia e pito hili ona taigole i lo fatu lākau uma, kae kāfai e ola ake, e kavea ma lākau e pito hili atu ona lahi i lo nā lākau fatoaga uma; ma e ōmai nā manulele oi fai o lātou ōfaga i ona lālā.”
Ko te Talafakatuha o te Fefete
(Luka 13.20-21)
33Kua toe fai foki tētahi talafakatuha e Iehu ki a te ki lātou: “Ko te Mālō o te lagi e fakatuha vēnei. Na kave e he fafine ni fefete oi palu ki ni fuagā falaoa e tolu ke pa lava ki te taimi kua fefete uma ai te paluga kātoa.”
Ko te Fakaaogāga e Iehu o nā Talafakatuha
(Maleko 4.33-34)
34Na fakaaogā e Iehu nā talafakatuha ke fakailoa ai nā mea uma iēnei ki tagata: nae hē mafai ke lea ki a te ki lātou i he mea e aunoa ma te ia fakaaogāgia o he talafakatuha. 35#Hal 78.2Na fai e ia te mea tēnei kae ke taunuku ai te kupu a te pelofeta,
“Ka fakaaogā e au nā talafakatuha ke akoako ai ki lātou;
ka fakailoa e au ki a te ki lātou nā mea nae hē iloa e he tino talu te foafoaga o te lalolagi.”
Kua Fakamatala e Iehu te Talafakatuha o nā Vao Kino
36Kua tukua e Iehu te kaifenua ka kua fano ki loto o te fale. Oi ōmai ai ona hoko kua lea vē atu ki ei, “Fakamatala mai ake ki a te ki mātou te uiga o te talafakatuha o nā vao kino i te fatoaga.”
37Kua tali mai ia Iehu, “Ko te tamāloa na ia lūlūa nā fatu haito lelei ko te Ataliki o te Tagata; 38ko te fatoaga ko te lalolagi; ko nā fatu haito lelei ko nā tino iēnā e o te Atua; ko nā vao kino ko nā tino iēnā e o Hātani; 39ko te fili na ia totōa nā vao kino, ko te Tiāpolo tēnā. Ko te helehelega ko te ikuga tēnā o te ōlaga nei, ka ko ki lātou e helehelea, ko te kau agelu. 40E vēia ona fakaputu nā vao kino ma huhunu i te afi, e vēnā foki te mea ka pa ki ei kāfai e uma te ōlaga nei: 41ka uga atu e te Ataliki o te Tagata ana agelu ke kave kehe mai i tona Mālō ki lātou uma e takitakia ia tagata ki te agahala, ma iētahi e faia te āmiokino, 42ma toli ki loto o te afi kakaha, te mea ka lauē ma katigū ai o lātou nifo. 43Ka ko nā tino e faia te finagalo o te Atua, ka huhulu e vē ko te la i te Mālō o to lātou Tamana. Kāfai e i ei ni outou taliga, fakalogo mai la!
Ko te Talafakatuha o nā Koloa e Tanumia
44“Ko te Mālō o te lagi e fakatuha vēnei. Na maua e he tamāloa he koloa tāua e tanu i he fenua. Kua tumu tona loto i te fiafia oi toe tanu ai e ia ke galo kae fano kua fakatau nā mea uma a ia, oi totogi ai te fenua tēnā mo ia.
Ko te Talafakatuha o te Pēnina
45“Ko te Mālō o te lagi e fakatuha foki vēnei. Ko he tino nae fofou ke fakatau mai e ia ni pēnina tāua, 46i te mauaga e ia o he pēnina e hili atu tona tāua, oi fano ai kua fakatau nā mea uma a ia, oi totogi ai te pēnina tēnā ma ia.
Ko te Talafakatuha o te Kupega
47“Ko te Mālō o te lagi e fakatuha foki vēnei. E i ei nā tino faifaiva na tatao to lātou kupega i te tai ke maua ai ho he itūkāigā ika. 48Kua tumu te kupega, oi toho ai e ki lātou ki gāuta ma nonofo ai ki lalo oi fili nā ika: ko nā ika lelei e togi ki loto o nā polapola ka ko nā ika kino e tīaki. 49E vēnā foki lava te mea ka pa ki ei kāfai e uma te ōlaga nei: ka oatu nā agelu oi fili nā tino agahala mai nā tino āmiotonu 50oi togi ai ki te afi kakaha, te mea ka lauē ma katigū ai o lātou nifo.”
Nā Akoakoga Fou ma nā Akoakoga Tuai
51Kua fehili atu ia Iehu ki nā hoko o ia, “E mālamalama koutou i nā mea iēnei?”
“Io,” kua tali vē mai ki lātou ki a te ia.
52Oi lea vē atu ai ia Iehu, “Ko tēnei la te uiga. Ko nā faiakoga tau tokatahi uma o te Tūlāfono kua akoakogia i nā mea tau te Mālō o te lagi, e fakatuha ki he tino e i ei hona fale, e tuku mai e ia ki fafo nā mea tāua fou ma nā mea tāua tuai a ia mai te potu e teu ai.”
Kua Teteke e Tagata o Nahaleta ia Iehu
(Maleko 6.1-6; Luka 4.16-30)
53Kua uma te fai e Iehu o nā talafakatuha iēnei, oi fano kehe ai mai kinā, 54kua toe foki ki tona nuku. Na akoako e ia ia tagata i loto o nā hūnako, oi na ofo lele ai ki lātou uma na fakalogo ki ei ma fehili ai vē, “Ko fea nei te na maua mai ai e te tagata nei tēnei poto? Na mafai vēhea foki e ia oi fai nā vāvega? 55E hē ko ia tēnei te ataliki o te kāmuta? E hē ko Malia nei tona mātua? E hē ni uho nei e o ia ia Iakopo, Iohefa, Himona ma Iuta? 56E hē ko ona tuafafine uma iē e nonofo i kinei ma ki tātou? Ko fea la te na iloa mai ai e ia nā mea uma iēnei?” 57#Ioa 4.44Ko te mea ia na teteke ai e ki lātou ia Iehu.
Kae kua vāgana atu ia Iehu ki a te ki lātou, “E mamalu te pelofeta i ho he mea, kae vaganā ai i loto o tona nuku, ma loto o tona kāiga.” 58Ona ko to lātou hē fakatuatua e hēki lahi ai ni vāvega na fai e ia i kinā.
सध्या निवडलेले:
Mataio 13: TNT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Tokelauan New Testament © Bible Society New Zealand, 2009.