Matié 8
8
Jésu bu kema go kaja labia
(Mark 1:40–45; Luk 5:12–16)
1Kiddin ga Jésu ba gesingu a ca kubung na, kalang ga yaué combu kobi. 2Kema go kaja ’erga gusi, ddi poi gomdi tumoi dugo, ddi yei wa: Bagulong, ji nia dar na, ji bbal ca beleng carara. 3Jésu tar kobi cili, ddi yei wa: ’Enung dar ca ji bel carara. Kobipadda kema go kaja lé belé carara. 4Kardené Jésu yei wa: La angal, ddo ji yoi kema pena henga lé kua ’eno, ama ’era, ji gel gusin gusu go tibé, ji wal tibé go Mois ba si ca gelé kalang mam ca jia wai labia.
Jésu bi asengar go gumu go Rom kogé marnei labia
(Luk 7:1–10)
5Kiddin ga Jésu ba andong Kapernom na, gumu go asengeriyong aru kogé ’erga gusi ca olei jégené. 6Ddi yei wa: Bagulong, marneng woi wo gulong, ddiang hoamya do sayé, ddi gel cin bbani ’eno. 7Jésu yei wa: ’Enung da ’yé bi labia. 8Ama gumu go asengeriyong aru kogé jogu yei wa: Bagulong, ’enung bbala go ca ji andong tang ’eno, ama ji ya kual mera, marneng da wai labia. 9Cawa ’enung kema go to dono do gemdong gang togé, asengeriyong wo to dono doang bu’. ’Enung yei go pena wa: ’Era na, ddi ’yé, ’enung yé koné wa: ’Erang na, ddi ’erga. ’Enung yé marneng wa: La kua na, ddi lé. 10Kiddin ga Jésu ba jé kual lé main kain na, ddi pedei bbani ’eno, ddi yégé kalang go kobei wa: ’Enung yegenga cindi waldong wang: ’Enung waia kema go bo cindi go main kain pena a duro ga Israél ’eno bering. 11’Enung wa yegeng ddang com: Kalang combu ’erga a toiné dang a cainé, ka jom kebu do a duro Leu do dang ni daiang Abraham, dang Isak, dang Jakob. 12Ama ka tai karang go Leu ka ni dong duro delem. Ka ’elang yidé go kégé. 13Kardené Jésu yai gumu go asengeriyong aru kogé lé wa: ’Era tain, ddi lang nain bbalé ca bo cindi goin. A kiddin lé padda na, gumu go asengeriyong aru kogé marnei lé wai labia.
Jésu bigé kalang ga hoamya combu labia
(Mark 1:29–34; Luk 4:38–41)
14Jésu ’yé ta Piér gulong, ddi wai Piér malgi dang wié ca gasalong, dur wa loa. 15Ddi sam kuaba, dur lé dda, to sai dang, to légé gié.
16Kiddin ga teba ba ddobu na, ké gol kalang gang habé ga ddisin combu, ké ’yang nagé gusu Jésu, ddi tor habé ga ddisin cong danga kual goi go yo mera, ddi bu kalang ga hoamya labia mam bu’. 17Ddi lé henga la ca ser to Esai go cogelé kebu go Kumu koi kual goi go ba yé wa: Ddi ai todero duana bua, ddi tai hoamya dona a gusuna cong bu’.
Ké ga daré kobé Jésu
(Luk 9:57–62)
18Jésu sol kalang ga yaué combu dang lurei dugo, kardené ddi yégé anjama gai wa: Dda na haddegeng ca tagu kuaba koné. 19Kema go gelé so go Kumu koi ’erga gusi, ddi yei wa: Bagulong, ’enung da kobin kiddin ga jia ’yé kené mam. 20Jésu jogu yei wa: Tela danga ’umburong ga bua, ceddung kau danga gulondigé bu’, ama Kema Kurondi dang kiddin ga woié ca bogé gelalé ’eno. 21Anjama koné yei wa: Bagulong, ddang ’enung oré ’embeang bang jua. 22Ama Jésu jogu yei wa: Kubang, dda ga maré ké ’embu temai dogé.
Jésu nar kal doarang
(Mark 4:35–41; Luk 8:22–25)
23Jésu nai duro kuburo, anjama gai ’yang nai. 24Kobipadda kal go gumu durong cin tagu lé, doyé sai, kang papsong won kuburo, ama Jésu woia kung. 25Anjama gai ’yé gusi, ké libi, ké yai wa: Bagulong, minna, na wa basang. 26Jésu jogu yégé wa: Cawa ma keng lé muro ga? Bo cindi gogeng bbania mena ga? Kardené ddi sai, ddi nar kal dang kang ga tagu lé, ddi bberajégé, kiddin jal juam bbani ’eno. 27Ké mam sol kagelokemo, ké yé wa: Kema la wang ma, kal kang kang ga tagu ké jé kual goi kain ga?
Jésu bu kalang sua goang habé ga ddisin labia
(Mark 5:1–20; Luk 8:26–39)
28Kiddin ga Jésu ba ’yé tagu kuaba koné ca gesong ga Gaderén na, kalang sua sai a ca kemgané, ké ’yé gusi. Kalang lé kanga habé ga ddisin, ka isin bbani ’eno, kema bbal ca halé duro giyong lé ’eno. 29Ké osum soi tumoigé, ké ’engeri wa: Kumu Kurondi, ji dar wa a gusuni ga? Ji ’erga kua ca kaidé kual caini tumu jua basé kiddin bbalé ga? 30A kiddin lé suguddong dang nagé na, geri wo kené, ké wa do. 31Habé ga ddisin ol Jésu wa: Ji nia dar ca taieni na, ddani oré andang kederé kosiyong do geri lé kua. 32Jésu yégé wa: ’Erageng, ké andiyong dong a kederé kalang ga sua lé, ké ’yé andiyong kederé kosiyong, kobegépadda kosiyong do geri lé posin geré dderindé a dang bé cin tagu, ké si kang, ké ma.
33Kalang ga magé kosiyong lé, ké geré, ké ’yé duro gulong go gumu, ké aju kual go henga ga ba wai kalang ga sua gang habé ga ddisin lé kogé. 34Kardené kalang ga duro gulong go gumu lé mam, ké andiyong dong ’yé ca solé Jésu, kiddin ga ké ba soli na, ké oli ca kondia ddagé gesong gagé.
सध्या निवडलेले:
Matié 8: TNG1978
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Alliance biblique universelle (United Bible Societies) 1978.