Jone 14
14
Kaitini Dokopi, Kiningi Pii Dokopi, Lete Katenge Dokopi, Dutupa Nambana Leamo Doko
1Jisasame lao pituu, “Nyakama mona kenda nakaeyalapape. Nyakamame Gote tungi pyalapape. Nyakamame namba tungi pyalapapeaka. 2Nambanya Takangenya anda dokonya ruma longo katengena, nambame nyakamanya panda depa lakala pelyo. Ruma longo nakatenge-pyali doko, ruma longo nakatengena lao nambame nyakama langipuli. 3Nambame nyakamanya panda mende depa lakala pelyo. Depa latakala namba katato dokonya nyakama apata katatamanopa lao lanyala ipato. 4Namba pelyo panda dokopa, kaitini dokopa, dolapo nyakamame masilyaminona” lea. 5Dopa leamopa Tomasame baa lamaiyoo, “Kamongo, emba anja pelyepe lao masala naelyamano dokonya, naimame aipa petala kaitini doko, dokona lao masetamape?” lea. 6Dokopa Jisasame baa lamaiyoo, “Kaitini dokopi, kiningi pii dokopi, lete katenge dokopi, dutupa namba. Takange doko katenge dokonya paanya kaitini waka mendenya-kaita napenge. Namba-kisa iki penge. 7Nyakamame namba akali doko-lamo lao masimili doko, nyakamame nambanya Takange doko apata dokona lao masimiliaka. Indupa pituu nyakamame Takange doko kandatala baa doko-lamo lao masilyaminona” lea.
8Dopa leamopa Pilipame baa lamaiyoo, “Kamongo, embame Takange doko naima laitaka pii. Laitaka pitino doko yakana lao naimame masalamanona” lea. 9Dokopa Jisasame Pilipa lamaiyoo, “Pilipa, namba nyakama-pipa gii longo-waka katamano doko, embame namba masala naelyepe? Namba akali doko-lamo lao kandelya endakali dokome Takange doko apata kandengeaka. Dopa pingina, embame aipa pyoo Takange doko laitaka pii lelye? 10Takange doko nambanya mona andaka kalyamopa, namba Takange dokonya mona andaka katenge doko kiningina lao embame masala naelyepe? Nambame nyakama pii langilyo dupa, namba tangeme masoo langya naelyo. Nambanya mona andaka katenge Takange dokome baanya kalai dupa pilyamo. 11Namba Takange dokonya mona andaka kalyopa, Takange doko nambanya mona andaka katengena lelyo doko, nyakamame kiningina lao masalapape. Daa-tamo doko, nambame kalai pilyo dupa kandatala, nambame pii lelyo dupa kiningina lao masalapape. 12Nambame nyakama etete kiningi langilyo: Nambame kalai pilyo dupa pitaka namba tungi pyatami endakali dupame pitami. Nambanya Takange doko katenge dokonya namba pelyo dokome, kalai pipupa kandamino dupa ita minao, nyakamame kalai etete andakele mendapu pitami. 13Nyakamame nambanya kenge dokonya mende pyaka lao tee latamino doko, Takange doko Ikiningi doko-kisa kenge andake nyina lao nambame pyakato. 14Dopana, nyakamame nambanya kenge dokonya mende pyaka lao tee latamino doko nambame pyakatona” lea.
Oli Spirita Epena Latona Leamo Doko
15 “Nyakamame namba auu kaeyatamino doko, nambanya mana setapae dupa wata-minalapape. 16Dokopa nambame Takange doko-kisa tee lakatopa, baame nyakama Nisepenge mende nyakama-pipa kataowaka katataminopa lao dita. 17Nisepenge mende dita doko, kiningi pii lenge Spirita doko. Isa yuu dakenya endakali dupame Spirita doko kanja naeyao, masala naeyaowaka pingima dokonya, dupame Spirita doko kapa pao nyala naengema. Dopaka doko, Spirita doko nyakamanya mona andaka kalyamo doko, tangapi mona andaka kataowaka katata dokonya, nyakamame Spirita doko masingima.
18 “Nambame nyakama muiyene joo kalyepale lao yakinala naeyato. Namba nyakama katatami dokonya pilyoto. 19Gii kuki mendatupa patatamopa, isa yuu dakenya endakali dupame namba kanja naeyalamino. Dopaka doko, nyakamame namba kanjamino. Namba lete katenge dokonya nyakama apata leteaka katatami. 20Gii dokopa, namba Takange dokonya mona andaka katenge-lamo lao nyakamame kandatami. Namba nyakamanya mona andaka kalyopa, nyakama nambanya mona andaka katenge-lamo lao kandatamiaka. 21Nambanya mana setapae dupa nyepala wata-minilya endakali dokome namba auu kaenge. Namba auu kaeyata endakali doko, nambanya Takange dokome baa auwaka kaeyata. Nambame baa auwaka kaeyapala, namba dopale-lamo lao baame kandena lao panasotona” lea. 22Dopa lateamopa Judasa Iskariotame daa, Judasa mende dokome Jisasa lamaiyoo, “Kamongo, embame aipuma naimame iki emba dopale-lamo lao kanjepale lao panasetala, isa yuu dakenya endakali dupame kandena lao panasala naeyatepe?” lea. 23Dokopa Jisasame baanya pii yanu pyakamaiyoo, “Namba auu kaeyata endakali dokome nambanya pii dupa wata-minata. Dopa pitamopa nambanya Takange dokome baa auu kaeyata. Dokopa nambanya Takange dokopa nalimba ipupala baanya mona andaka katatamba. 24Namba auu nakaenge endakali dokome nambanya pii dupa wata-minala naenge. Nyakamame pii silyamino dupa nambanya pii daa, nambanya Takange namba puu lea dokonya.
25 “Namba nyakama-pipa apata kalyamano dakepa, nambame pii datupa nyakama langilyo. 26Dopaka doko, nyakama Nisepenge Oli Spirita doko Takange dokome nambanya kengenya epena lata. Oli Spiritame dupa pitaka nyakama mana langyoo, pii langilyo dupa pitaka masalapale lao nyakamanya masingi tii pisakata. 27Nambanya mona yaepenge doko nyakama-kisa yakinelyo. Mona yaepenge nyakama dilyo doko isa yuu dakenya endakali dupame maingimali pyoo nandilyona, nyakama mona etete kenda kaeyao paka nakaeyalapape. 28‘Nambame nyakama yakinatala pelyo. Pupala nyakama katatami dokonya pilyotona’ lapu doko nyakamame simi. Nyakamame kiningi namba auu kaengema-pyali doko, ‘Namba Takange kalyamo dokonya pelyona’ lapu doko sepala, nyakama eteke pyamili. Aipumape, nambanya Takange dokome namba ita miningi. 29Dutupa ene pyaanya pimupa wambao nambame nyakama langilyo. Dutupa pitamopa nyakamame kandatala namba tungi pyatami. 30Isa yuu dakenya isingi akali doko epelyamo dokonya, namba gii longo nyakama-pipa pii lao kalya naeyalamano. Dopaka doko, baanya pupu lapae dokome namba ita minala naeyalapomo. 31Nambame Takange doko auu kaenge-lamo lao isa yuu dakenya endakali dupame kandena lao, Takange dokome lelyamoli pyoo nambame pingi. Dopana, naima panda dake yakinatala mona sakatalapa” lea.
सध्या निवडलेले:
Jone 14: Enga
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023 Wycliffe Bible Translators, Inc. All rights reserved.