Yohaanisa 12
12
Yesuusa Shitto Tiyida Maccasiw
(Maato 26:6-13; Mar 14:3-9)
1Paasika bonchiya gallasape usupun gallas sinthatidi, Yesuusi hayqope denthida Alaazari de7iya gutaa, Bitaane bis. 2He bessan enti iyaw kaho giigisidosona. Alaazari Yesuusara issife gayta bolla uttidashin, Marti entana imatawusu. 3Mayraama nardoose geetetiya daro al7o geeshsha shitto ehada Yesuusa tohuwa tiyasu. Ba binaanan iya tohuwa quchasu; keetha ubbay shitto sawon tonku gis.#Luqa 7:37-38.
4Shin Yesuusa tamaaretape issoy, Yesuusa aathidi immanaysi, Asqoroota Yihuda, 5“Ayis ha shittoy heedzu xeetu dinaaren bayzetidi, miishey manqotas imetennee?” yaagis. 6I kayso gidida gisho hessa gisipe attishin, manqotas qadhetidi gibeenna. I miishe karxiita oykeysa gidiya gisho ubba wode iyape baw ekees.
7Yesuusi, “Iya baw de7iyaba ta moogo gallasaas minjida gisho iyo aggaagite. 8Manqoti ubba wode hintera daana, shin taani ubba wode hintera de7ike” yaagis.#Zaare 15:11.
9He wode daro asay Yesuusi Bitaanen de7eysa si7idi yaa bidosona. Enti Yesuusa xalaala gidonashin, I hayqope denthida Alaazaraka be7anaw bidosona. 10Hessa gisho, kahine halaqati Alaazaraka qassi wodhanaw maqetidosona. 11Ayis giiko, Alaazara gaason daro Ayhudeti entana ixidi Yesuusa ammanoosona.
Gita Bonchon Yerusalaame Geluwa
(Maato 21:1-11; Mar 11:1-11; Luqa 19:28-40)
12Wontetha gallas Paasika bonchiya bessaa yida daro asay Yesuusi Yerusalaame beysa si7idi, 13Zamba haythi ekidi iya mokanaw keyidosona. Banta qaala dhoqu oothidi,
“Hosaana! Xoossay galatetto!
Godaa sunthan yeysi anjeto!
Xoossay Isra7eele Kawa anjo!”
yaagidosona.#Maz 118:25-26.
14-15Geeshsha Maxaafan,
“Xiyoone katamaw, babofa!
Heko, ne Kawoy hare mara bolla uttidi yees”
geetetidayada Yesuusi hare mari demmidi iya toggis.#Zaka 9:9.
16Yesuusa tamaareti hessa kase akeekibokona. Shin Yesuusi bonchetidaape guye enti hessa ubbaa akeekidosona. Hessi ubbay Geeshsha Maxaafay gidaysada hanis.
17Yesuusi Alaazara duufope xeegidi, hayqope denthida wode iyara de7iya daro asay Yesuusaba markatidosona. 18Daro asay iya mokanaw keyday, I he malaatata oothidaysa si7ida gishosa. 19Hessa gisho, Farsaaweti issoy issuwako, “Nu aykoka oothanaw danda7onnaysa be7ite; dere ubbay iya kaallees” yaagidosona.
20Paasika bonchiya gallas goyinnanaw Yerusalaame bidaysata giddon issi issi Girike asati de7oosona. 21Enti Galila biittan Beetesayda katamaape yida Filphoosako bidi, “Godaw, nuuni Yesuusa be7anaw koyoos” yaagidi woossidosona. 22Filphoosi bidi Indiriyasas odin nam7ay bidi, Yesuusas odidosona.
23Yesuusi entako, “Asa Na7ay, bonchetiya wodey gakis. 24Taani hintew tuma odayis; issi giste ayfey biittan wodhidi wooqonna ixiko barka attees. Shin he giste ayfey wooqiko daro ayfe ayfees. 25Ba shempuwa dosiya oonika dhaysees; ba shempuwa ha alamiyan ixiya oonika merinaa de7os ashshees.#Maato 10:39; 16:25; Mar 8:35; Luqa 9:24; 17:33. 26Taani de7iyasuwan taara daana mela taw oothanaw koyiya oonika tana kaallanaw bessees. Taw oothiya oonaka ta Aaway bonchana.
27“Ha77i ta shempoy daro un7etis; yaatin woygo? ‘Ta Aawaw, tana ha saatepe ashsharki’ yaago? Akay, taani yiday waaye ekanaasa. 28Ta Aawaw, ne sunthaa boncha” yaagis.
He wode salope, “Taani ta sunthaa bonchas; zaaradaka bonchana” giya qaalay yis.
29He bessan eqida daro asay he qaala si7idi, “Hessi dada” yaagidosona.
Harati qassi, “Kiitanchoy iyaw odis” yaagidosona.
30Yesuusi zaaridi entako, “Ha qaalay hinte gisho yisipe attishin, ta gisho gidenna. 31Ha alamey pirdetiya wodey ha77i; ha alamiya haareysi ha77i kare holetana. 32Qassi taani sa7ape dhoqu oosetida wode asa ubbaa taako ehana” yaagis. 33I hessa giday ay mela hayqo hayqaneko entaw qoncisanaasa.
34Daro asay zaaridi, “Nu higgey Kiristoosi merinaw de7eysa odees. Yaatin, neeni woygada, ‘Asa Na7ay dhoqu gaanaw bessees’ gay? ‘I, Asa Na7ay oonee?’ ” yaagidosona.#Maz 110:4; Isa 9:7; Daane 7:14.
35Yesuusi, “Poo7oy hintera guutha wode gam7ana. Hintew dhumonna mela poo7oy de7ishin, poo7uwan hemetite. Dhuman hemetiya asi aw biyako erenna. 36Poo7o nayta gidana mela poo7oy de7ishin poo7uwa ammanite” yaagis.
Yesuusi hessa odetidaape guye bidi entafe geemmis. 37I hessa mela malaatata enta sinthan oothinka ammanibookona. 38Nabiya Isayaasi,
“Godaw, nu markatethaa ooni ammanidee?#Isa 53:1.
Goday ba wolqaa ooddes qoncisidee?”
Gidaysi tuma gidana mela enti iya ammanibookona.
39-40Qassika Isayaasi,
“Enta ayfey xeellonna mela,
enta wozanay akeekona mela,
enti Xoossaako simmin, I enta pathonna mela,
Xoossay enta ayfiya qooqisis.
Enta wozanaa minthis”
gida gisho enti ammananaw danda7ibookona.#Isa 6:10.
41Isayaasi hessa giday, Yesuusa bonchuwa be7ida gishonne iyabaa odida gishosa.
42Gidikoka, Ayhudeta halaqatapeka daroti Yesuusa ammanidosona. Shin Farsaaweti bantana Ayhudeta Woosa Keethafe kessoosona gidi yayyida gisho ammanida gidi qoncen markatibookona. 43Hessa enti oothiday, Xoossan eretanaysafe aathidi asan eretanaysa dosida gishosa.
44Yesuusi ba qaala dhoqu oothidi, “Tana ammaniya oonika tana kiittidaysaka ammaneesipe attishin, ta xalaala ammanena. 45Tana be7iya oonika tana kiittidaysaka be7ees. 46Tana ammaniya ubbay dhuman doonna mela taani poo7o gidada alamiya yas. 47Ta qaala si7idi kiitetonna oonaka taani pirdike. Ayis giiko, taani alamiya ashshanaw yasipe attishin, pirdanaw yabiike. 48Tana ixeysanne ta qaala ekonna oonaka pirdeysi de7ees. Taani odida qaalay wursetha gallas he uraa pirdana. 49Ayis giiko, taani hessa taape odike, shin tana kiitida ta Aaway taani gaanaysanne odanaysa kiittis. 50Qassi iya kiitay merinaa de7o gideysa taani erayis. Hessa gisho, taani odeysi ta Aaway tana oda gidaysa” yaagis.
सध्या निवडलेले:
Yohaanisa 12: GFBLVF
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The Word for the World International and The Word for the World Ethiopia