Yohaanisa 5
5
Gunda Ura
1Hessafe guye, Yesuusi Ayhudeti bonchiya baaliya bonchanaw Yerusalaame bis. 2Yerusalaamen Dorsa Pengiya matan Ibraawetho doonan Beetesayda giya teqetida haathi de7ees. He teqeti uttida haatha matan ichashu shempiya bessati de7oosona. 3[Hessan haathay qaaxanaysa naagiya] daro harganchoti, qooqeti, wobbetinne gundati zin7idosona. 4[Ayis giiko, issi issi toho Godaa kiitanchoy teqetida haathan wodhidi haatha qaathees. Haathay qaaxiya wode koyro gelida uray bana oykida ay hargefeka paxees.]#5:4: Issi issi beni maxaafati paydo heedzas koyro bagganne paydo oydda gujokona. 5He bessan hastamanne hospun laythi hargetida issi addey de7ees. 6Yesuusi yan zin7ida addiya be7idi, qassi daro wode hargetidaysa eridi addiyako, “Paxanaw koyay?” yaagis.
7Harganchoy zaaridi, “Godaw, haathay qaaxiya wode tana haathan yeggiya asi baawa. Taani gelana haniya wode haray taape sinthatidi geli kichees” yaagis.
8Yesuusi iyako, “Denda eqa; ne algaa tookada ba” yaagis. 9Addey iiraka paxis; ba algaa tookidi bis.
Hessi Sambaata gallasan hanis. 10Hessa gisho, Ayhudeti paxida addiyako, “Hachi sa7i Sambaata; neeni ne algaa tookeysi woga gidenna” yaagidosona.#Nahi 13:19; Ermi 17:21.
11Shin addey, “Tana pathidaysi, ne algaa tookada ba gis” yaagidi zaaris.
12Enti iyako, “Nena, ne algaa tookada ba giday I oonee?” yaagidi oychidosona.
13Shin Yesuusi he bessan daro asaa giddora erisonna kanthidi bida gisho addey bana pathiday ooneko erenna. 14Yesuusi guyepe he addiya xoossa keethan demmidi, “Heko, neeni paxadasa; haysafe iitabay nena gakonna mela zaarada nagara oothofa” yaagis. 15Hessafe guye, addey bidi bana pathidaysi Yesuusa gididaysa Ayhudetas odis.
16Yesuusi hessa Sambaata gallas oothida gisho, Ayhudeti Yesuusa goodda oykidosona. 17Yesuusi zaaridi, “Ta Aaway ubba wode oothees; taka oothanaw bessees” yaagis.
18Yesuusi Sambaata bonchona gisho xalaalas gidonashin Xoossay ba Aawa gidi bana Xoossara giigisida gisho, Ayhudeti iya wodhanaw kasepe minthidi koydosona.
19Yesuusi zaaridi, “Taani hintew tuma odayis; Na7ay barka aykoka oothanaw danda7enna. I ba Aaway oothishin be7oysa xalaala oothees. Aaway ootheysa Na7ayka oothees. 20Aaway ba Na7aa dosiya gisho I oothiya ooso ubbaa ba Na7aa bessees. Hinte malaaletana mela I haysafe aadhiya ooso ba Na7aa bessaana. 21Aaway hayqidaysata hayqope denthidi entaw de7o immeysada Na7ayka ba koyeysatas de7o immees. 22Aaway Na7aas pirda maata ubbaa immispe attishin, I oonaka pirdenna. 23Asa ubbay Aawa boncheysada Na7aaka bonchana. Na7aa bonchona oonika Na7aa kiitida Aawaka bonchenna.
24“Taani hintew tuma odayis; ta qaala si7eysasinne tana kiittidaysa ammaneysas merinaa de7oy de7ees. I hayqope de7on pinnida gisho pirdetenna. 25Taani hintew tuma odayis; hayqida asay Xoossaa Na7aa qaala si7iya wodey yaana; hessika ha77i. He qaala si7ey de7on daana. 26Aaway de7os pulto gididaysada Na7aaka de7os pulto oothis. 27Na7ay Asa Na7a gidiya gisho Aaway Na7aas pirda maata immis.
28“Duufon de7eysati iya qaala si7idi dendiya wodey yaana gisho haysan malaaletofite. 29Lo77o oothidaysati de7on daanaw qassi iita oothidaysati pirda ekanaw duufope dendana.#Daane 12:2.
30“Taani ta maatan aybibaaka oothanaw danda7ike. Xoossay taw odidaysada pirdayis. Taani tana kiittidaysi koyaba oothaysipe attishin, ta koyaba oothonna gisho ta pirday tuma.
31“Taani tabaa markatiko ta markatethay tuma gidenna. 32Tabaa markatiya hari de7ees; I tabaa markateysi tuma gideysa taani erayis.
33“Hinte Yohaanisako ase kiittin I tumaas markatis.#Yoha 1:19-27; 3:27-30. 34Taani hessa hintew odey, hinte attana mela gadape attishin, asa markatethi taw koshshin gidenna. 35Yohaanisi muqaadada eexishe poo7is. Hinte guutha wode iya poo7uwan ufaytideta.
36“Shin taw Yohaanisape aadhiya marki de7ees. Taani oothana mela ta Aaway taw immida oosoti tabaa markatoosona; Aaway tana kiittidaysa qoncisosona.
37“Qassi tana kiitida Aawayka ba huuphen tabaa markatees. Hinte iya qaala ubbaraka si7ibeeketa woyko iya malaa be7ibeeketa.#Maato 3:17; Mar 1:11; Luqa 3:22. 38I kiittidaysa hinte ammanonna gisho iya qaalay hinte wozanan baawa.
39“Geeshsha Maxaafatape merinaa de7o demmanabaa hintew daanin enta pilgeeta; enti tabaa markatoosona. 40Shin hinte de7o demmanaw taako yaanaw koyeketa.
41“Asape taani boncho koyke. 42Shin taani hinte wozanan Xoossaa siiqoy baynaysa erayis. 43Taani ta Aawa maatan yas, shin tana mokibeketa. Haray ba maatan yaa wode iya mokeeta. 44Hinte issoy issuwafe boncho koyeysati, issi Xoossaafe yaa galata ekanaw koyonnaysati, waanidi tana ammananaw danda7eetii?
45“Taani ta Aawa sinthan hintena mootiyaba hintew daanopo. Hintena mootanay hinte ufaysan naagiya Muse. 46Hinte Muse ammanidaba gidiyako I tabaa xaafida gisho tanaka ammananashin. 47Shin hinte I xaafidaysa ammanonna ixiko ta qaala waatidi ammananee?” yaagis.
सध्या निवडलेले:
Yohaanisa 5: GFBLVF
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The Word for the World International and The Word for the World Ethiopia