Luqaasa 19
19
Qaraxa Qanxisiya Zakiyoosa
1Yesuusi Iyaarko gelidi aadhees. 2Yan Zakiyoosa geetetiya qaraxa qanxiseyisata halaqay de7ees. I daro dure. 3I Yesuusi ooneko be7anaw koyis. I qanthi gidiya gisho asaa darotethaafe dendoysan Yesuusa be7anaw danda7ibeenna. 4Yesuusa be7anaw koyidi I biya ogiyas sinthe woxi bidi issi boobba mitha bolla keyis.
5Yesuusi he bessaa gakishe dhoqu gidi be7idi, “Zakiyoosa, hachi ta ne son pee7anaw bessiya gisho elle wodha” yaagis. 6I ellesi wodhidi ufaysan Yesuusa mokis.
7He bessan de7iya asaa ubbay hessa be7idi, “Nagaranchuwa soo gelidi moketaniw hanees” yaagidi zuuzumidosona. 8Gidoshin, Zakiyoosi eqidi Godaako, “Godaw, Heko taw de7iya shalo ubbaafe baggaa manqotas immana. Asape aybaka wordon balethada ekidaba gidiko oyddu kushe zaarana” yaagis.
9Yesuusi qassi, “Ha uray Abrahaame na7a gidida gisho hachi atotethay ha soo yis. 10Asa Na7ay yiday dhayidaysa koyanaasanne ashshanaasa” yaagis.#Maato 18:10.
Tammu Minaane Leemiso
(Maato 25:14-30)
11Asay hessa si7iya wode, Yesuusi Yerusalaame matatida gishonne Xoossaa kawotethay ha77i matara qoncana daanida gisho entaw leemiso odis.#Maato 25:14-30. 12Hessa gisho, Yesuusi, “Issi gita asi de7eysi baw kawotethi ekidi yaanaw hara biitta bis. 13Iyaw oothiya aylletape tammata xeegidi issuwas issuwas tammu minaane#19:13 Minaane: Minaaney Girike doona. Issi minaaney issi gallasa oosanchos heedzu ageena damooze gidees. immidi ‘Ta simmada yaana gakanaw ha miishiyara zal7ite’ yaagis.
14“He biitta asay iya ixiya gisho, ha uray nu bolla kawotana mela nu koyoko yaagidi ase iya guyera kiittidosona.
15“Gidoshin, he uray kawo gididi ba biitta simmis. He tammu aylleti I immida miishiyan ay mela zal7idi wodhisidaako eranaw koyidi entana xeegisis.
16“Koyroysi yidi, ‘Godaw, ne taw immida miishey haraa tamma wodhis’ yaagis.
17“Iya Goday, ‘Neno ammanetida aylliyaw lo77o oothadasa. Neeni guuthaban ammanetida gisho new tammu katamata bolla maata immas’ yaagis.
18“Nam7anthoy yidi, ‘Godaw, ne taw immida miishey haraa ichasha wodhis’ yaagis.
19“Goday iyako, ‘Newuka qassi ichashu katamata bolla maata immas’ yaagis.
20“Heko heedzanthoy yidi, ‘Godaw, ta curqan xaaxada naagida ne miishiya hannashu. 21Ayis giiko, neeni nebaa gidonnaba ekeysanne ne zeronnaba cakiya iita asi gidiya gisho new yayyas’ yaagis.
22“Iya goday zaaridi, ‘Neno iita aylliyaw ne doonatho ta nena pirdana. Ta wothonnaba ekeysanne zeronnaba cakiya asi gideysa ne eriko, 23ta yada ta miishiya wodhera ekana mela zal7iya asaas ayis immabikii?’
24“Iya goday he bessan eqidaysatako, ‘Iyara de7iya miishiya ekidi tamma wodhisidaysas immite’ yaagis.
25“Enti, ‘Godaw, iyaw kaseka tammu minaaney de7ees’ yaagidosona.
26“Goday, ta hintew odayis; ‘De7iya ubbaas hari guzhetana, shin baynaysafe haray atto iyaw de7iyaraka eketana.#Maato 13:12; Mar 4:25; Luqa 8:18. 27Gidoshin, ta enta bolla kawotonna mela koydaysata he ta morketa ha ta sinthe ehidi gora7ite’ gis” yaagis.#Maato 25:14-30.
Gita Bonchon Yerusalaame Geluwa
(Maato 21:1-11; Mar 11:1-11; Yoha 12:12-19)
28Yesuusi hessa odidaape guye, entafe sinthe hemetidi Yerusalaame bis. 29Shamaho zuma#19:29 Shamaho zuma: Shamahoy daro doliya zuma guussu. bolla de7iya Beetefaagenne Bitaane matida wode ba tamaaretape nam7ata kiittidi, 30“Hinte sinthan de7iya gutaa biite, hinte yaa gakiya wode oonika toggonna qashetidi de7iya hare mari demmana. Iya billidi haa eki yiite. 31Oonika, ‘Ayis billeetii?’ gidi oychiko, ‘Goday iya koyees’ yaagite” yaagis.
32Kiitetidaysati bidi I gidaysada hanin be7idosona. 33Enti hare maraa billishin godati be7idi, “Hare maraa ayis billeetii?” yaagidosona.
34Enti zaaridi, “Goday iya koyees” yaagidosona.
35Yaape hare maraa Yesuusako ehidosona. Banta ma7uwa hare maraa zokon yeggidi Yesuusa hare maraa bolla utisidosona. 36Asayka I biya ogiya bolla banta ma7uwa hiixidosona.
37Shamaho zuma dugethe wodhisiya ogiyako matiya wode, taybon keehi daro asay enti be7ida malaalsiyaban ufaytidi banta qaala dhoqu oothidi,
38“Godaa sunthan yaa kawoy anjetidaysa
saluwan saroy
ubbaafe dhoqa saluwan bonchoy
Xoossaas gido”
yaagidi Xoossaa galatidosona.#Maz 118:26.
39Asaa giddofe issi issi Farsaaweti Yesuusako, “Astamaariyaw, ne tamaareta hayzite gada hanqeta” yaagidosona.
40I entako, “Enti si77i giiko shuchati waassana” yaagis.
41Yesuusi Yerusalaame matishe katamaa be7idi iyaw yeekis. 42“New saro gidanaysa hachi ne eridaba gidiyakoshin, ha77i ne ayfiyape geemmis. 43Ne morketi ne yuushuwa diridi dumma dumma ogiyara nena teqidi un7ethiya wodey yaana. 44Nenanne ne dirsaa garsan de7iya ne nayta dhaysana. Issi issi shuchu denthidi laallana, ayis giiko Xoossay nena ashshanaw yaa wodiya erabaaka” yaagidi iw yeekis.
45Hessafe guye, Yesuusi Xoossa Keethi gelidi zal7eyisata yaape goodis. 46Qassi, “ ‘Ta keethay Xoossaa woossiya keethi gidana’ gidi xaafetis, shin hinte ta keethaa pangata gongolo oothideta” yaagis.#Isa 56:7; Ermi 7:11.
47Gallas gallas xoossa keethan tamaarsees. Kahineta halaqati, higge astamaaretinne deriya cimati iya wodhanaw oge koyoosona.#Luqa 21:37. 48Gidoshin, asa ubbay iya timirtiya banta wozana yeggidi si7iya gisho, entaw oothanabay dhayis.
सध्या निवडलेले:
Luqaasa 19: GFBLVF
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The Word for the World International and The Word for the World Ethiopia