Mateo 7
7
U Toldu ni Jesus Tungkul tu Pághatul
(Lukas 6:37-38, 41-42)
1Sakay kinagi pa ni Jesus “Dyan moy hatulan u kapareho moy tánni awan kam mahatulan nu Diyos. 2Dipo hatulan kam nu Diyos ayun tu hatul moy tu agum. U nangusosegan moy tu pághatul moy ay siya la be u ihatul nu Diyos nikam. 3Bakin a ketan moy u badit a kasalanan nu kapatkákka moy pero bale awanán moy la u kasalanan a dakál a ginimet moy? 4Dyan kam pumurba a tumulung tu kaparehu moy a te mas badit ti kasalanan nan nikam. 5Mapagkunware kam. Ibutan moy pa u dakál moy a kasalanan para makatulung kam tu agum a magibut tu badit de a kasalanan.
6Dyan moy iyatád tu aso hide u malinis hide a bagay, o ni iyatád u perlas moy tu babuy hide dipo yáyyudakán di la itod sakay duklusán di kam.
7Ni mangaged kam tu Diyos ay atádden na kam. Ni magehyok kam ay metan moy. Ni tumoktok kam tu pintuwan ay bukasan na para nikam. 8Dipo u atanan a magaged ay maatádden sakay u atanan a magehyok ay maketa sakay u atanan a magtoktok ay mabukasan. 9Atádden moy beman ti bito u anak moy ni magaged ti kanán? 10Atádden moy beman ti biklat u anak moy ni magaged ti ikan? Siyempre awan. 11Ni hikam a makasalanan ay tukoy moy a mangatád ti maganda tu anak moy, mas lalo a mangatád ti maganda u Ama moy ti langet tu atanan a mangaged nikuna. 12Gimitán moy tu agum u gustu mo a gimitán be nu agum niko. Sa itod u kahulugan nu Kautusan ni Moises sakay tu toldu nu Propeta hide.”
U Mapiit a Dilan
(Lukas 13:24)
13Kinagi pa ni Jesus “Sumaddáp kam tu mapiit a pintuwan nu langet dipo malawa u pintuwan sakay alisto a lakadán u dilan a tamo ti impiyerno. Makpal u dumilan ti itod a dilan. 14Pero mapiit u pintuwan sakay mahirap u dilan a tamo ti langet. Kanya sasangan la a tolay u maketa ti iye.”
Dyan Palinlang Tu Awan Tatahoden a Propeta
(Lukas 6:43-44)
15Kinagi pa ni Jesus “Umiwas kam tu awan hide tatahoden a propeta. Umangay hide nikam a mapagkunware a mabait pero matapang bál hide. 16Matenggi moy hide tu gimet de. Konna tu kayo o halaman a matengge moy tu bunga na. Maari beman a magbunga ti masarap u masaet a halaman? Siyempre awan. 17Magbunga ti maganda u maganda a kayo sakay magbunga be ti madukás u madukás a kayo. 18Siyempre awan maare a magbunga ti madukás u maganda a kayo sakay u madukás a kayo awan magbunga ti maganda. 19Sakay u kayo a awan magbunga ti maganda ay pukanán sakay ibut tu apoy. 20Kanya matenggi moy u awan tatahoden a propeta hide dipo tu gimet de.”
Parusaan Nu Diyos U Awan Tatahoden a Disepulus.
(Lukas 13:25-27)
21Sakay kinagi pa ni Jesus “Awan atanan a dumulaw nikán a Panginoon ay paghariyan nu Ama ko ti langet. U paghariyan na hide ay u sumunud la nikuna. 22Káddemát nu Aldew nu Pághatul ay makpal u magkagi nikán a ‘Panginoon, pasáddáppán mu kame dipo tu ngahan mo ay kinagi mi u upos mo sakay pinalakad me u demonyo hide. Sakay naggimet kami ti himala tu ngahan mo.’ 23Sakay tábbegán ku hide ‘Awan takam matengge. Makasalanan kam, umadeyu kamon.’ 24Kaya ni ti deya man u mágsaneg sakay sumunud tu intáttoldu ko hide ay u kaparehu na ay u essa a malalake a tolay a nagtolnák tu bilay na tu bito para magin matibay. 25Dummemát u uden a mabegsák sakay dummakál u dinom. Sakay pinahás ti mabegsák u bilay. Pero awan la natumba dipo nakatolnák tu bito. 26Pero ni ti deya man u mágsaneg sakay awan sumunud ay kapareho siya tu essa a tolay a awan ti tukoy a nagtolnák tu bilay na tu baybay. 27Dummemát u uden a mabegsák sakay dummakál u dinum. Sakay pinahás ti mabegsák u bilay. U nangyare ay natumba u bilay sakay nahábba a tahod.”
28Nikuna natapos ti Jesus a nagtoldu ay nagtaka u katolayan tu págtoldu na. 29Dipo nagtoldu siya nide a te kapangyariyan bakán a konna tu mágtoldu hide tu Kautusan ni Moises.
सध्या निवडलेले:
Mateo 7: MBJC
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Pahanan Agta New Testament © Philippine Bible Society and Wycliffe Bible Translators, Inc., 2017.