Ntendo 10
10
Kolinelio ʉkʉmitanga ʉ Petelo
1Mʉkɨsalɨ ka Kaisalia aɨʉkolɨ mʉntʉ naɨwitangwa Kolinelio, aɨɨza mankata midale nɨla anyambita igana naɨlɨkumʉkile “Idale nɨla Kɨitalia.” 2Kolinelio nɨ antʉ amitolakwe aɨɨmʉkʉlya Itunda. Aɨwɨaaɨɨlya antʉ ɨdʉ nʉ kʉmʉlompa Itunda mahikʉ ɨhi. 3Lʉhikʉ lʉng'wɨ ng'ʉng'wɨ, anga saa kenda itɨ, mʉmʉloto wɨkaona, Malaɨka wang'wi Itunda ʉkʉmʉzɨɨla nʉ kʉmʉɨla, “Kolinelio.”
4Kolinelio wɨkamʉgoza kʉwoa wɨkalʉnga, “Isekʉlʉ, Ʉkʉlʉnga ʉlɨ?”
Malaɨka wɨkamʉɨla, “Itunda wagomba ɨmalompi ako, ingɨ waona nʉ ʉaɨɨlya wako kʉ ahimbɨ hangɨ shanga ʉkɨwa. 5Itungo ɨlɨ lagɨɨlya antʉ ang'wɨ alongole kʉ Yopa amitange mʉntʉ ʉng'wɨ lina lakwe Simoni lina lyʉlya witangwaa Petelo. 6Mʉntʉ ʉyʉ wikalania nʉ Simoni mʉnonia ndɨlɨ nyʉmba akwe ɨkolɨ mʉnshembo alʉzi.” 7Naɨ wahega ʉ Malaɨka wang'wi Itunda ʉyʉ naɨ ʉkitambʉlya nʉ Kolinelio, Kolinelio wɨkaitanga anyamʉlɨmo akwe abɨɨlɨ palʉng'wɨ nʉ mʉmboi ʉng'wɨ nʉwɨmʉkʉlya Itunda naɨɨza yine nɨantʉ awo nɨɨmitʉmɨla. 8Kolinelio wɨkaaɨla makani ɨhi naza apumɨe, sʉnga wɨkaalagɨɨlya alongole kʉ Yopa.
9Lʉhikʉ naɨ lʉtyatile anyamɨlɨmo ang'wa Kolɨnelio aɨahumbeela kingɨla mʉ kɨsalɨ ka Yopa, itungo nɨla saa mʉtandatu ng'ʉng'wɨ Petelo wɨkanankɨla mitembe kʉmʉlompa Itunda. 10Petelo naɨ wahung'wa nzala. Naɨakɨlɨ akʉnoneelya indya, wɨkahola mʉloto. 11Wɨkaona igʉlʉ lalugʉka nɨ kɨntʉ anga mʉgolole ʉkʉlu ʉkʉsimigwa pihɨɨ ɨze ʉambɨɨwe mpelo yakwe yɨhi innɨ. 12Mʉmʉgolole nʉwanso aɨyimole mpyani yɨhi niyaikalɨ niigenda ni ikalɨ niyagula ni nyʉnyi. 13Sʉnga wɨkija lʉli, “Petelo, ʉka ʉsɨnze, ʉlye.”
14Petelo wɨkasʉkɨɨlya, “A a, Isekʉlʉ wane. Ʉnene ɨza nkɨlɨ kʉlulya kɨntʉ kɨhi nɨkɨgiigwe mʉmalagɨɨlyo ang'wa Musa, kʉlya ang'wɨ nɨkɨkʉmʉsasha mʉntʉ waleke kʉgombeka kʉmʉkʉlya Itunda.”
15Wɨkija lʉli nʉlanso nkʉa akabɨɨlɨ, “Leka kʉlʉnga igiigwe kʉlya intʉ yɨhi niyigombigwe ni Itunda” 16Mʉloto nʉanso ʉkisʉkɨɨla nkʉa itaatʉ, sʉnga mʉgolole nʉwanso wɨkasʉkigwa kigʉlʉ.
17Petelo naɨ wakɨlɨ ʉkikolya mʉloto ʉwʉ ng'waao ntʉni, antʉ awo naɨ alagɨigwe nʉ Kolinelio ɨkamɨpumpugɨɨlya ɨ nyʉmba ang'wa Simoni mʉnonia ndɨlɨ ɨkimɨka pa mʉlango. 18Ɨkapɨndʉla nʉ kʉkolya “Itɨɨ apa ʉkolɨ mʉzɨɨla nʉwitangwa Simoni Petelo.
19Petelo aɨwakɨlɨ ʉkʉsɨganɨɨlya mʉloto nʉanso, Ng'wahʉ wɨkamʉɨla, “Simoni, akolɨ antʉ ataatʉ akʉʉduma. 20Ʉka, sima, leka kisinsɨla kʉlongolania nɨeso kʉnsoko nene nɨalagɨɨye.” 21Petelo wɨkasima nʉkʉaɨla ɨantʉ awa naɨ alagɨigwe nʉ Kolinelio, “Nɨmʉkʉnduma ingɨ nene. Mʉzɨɨe ntʉni apa?”
22Antʉ awa ɨkamʉsʉkɨɨlya, “Kʉlagɨigwe nʉ mankata ʉ Kolinelio nɨɨza mʉntʉ mʉkende, nʉɨmʉkʉlya Itunda nʉkʉsanigwa nɨ Ayahudi ɨhi. Nʉyo ʉlagɨigwe nʉ Malaɨka wang'wi Itunda wakitange kitolakwe, wahume kija nkani yɨhi nʉkʉmʉɨla.” 23Sʉnga ʉ Petelo nɨantʉ nɨanso ɨkingɨlania mʉ nyʉmba wɨkaanoneelya ɨ ndalo.
Mʉdaʉao Petelo wɨkalongolania nɨantʉ nɨanso azeityatile nɨanyandʉgʉ ang'wɨ kʉpuma kʉ Yapwa. 24Lʉhikʉ nʉla kabɨɨlɨ ɨkapika kʉ Kaisalia. Kolinelio nɨ anyandʉgʉ akwe nɨ apakupɨ nɨ ahʉmbaʉya naɨʉanile. 25Petelo naɨʉkingɨla pamʉmpita, Kolinelio wɨkamʉsɨngɨɨlya wɨkatugama pa mɨgʉlʉ nʉkʉmʉkʉlya. 26Petelo wɨkamʉʉsha wɨkamʉɨla, “Imɨke, nʉnene ga nɨ ng'waa mʉntʉ ʉdu anga ʉewe.” 27Petelo naɨakitambʉlya nʉng'wenso wɨkingɨla mʉnyʉmba wɨkahanga antʉ ɨdʉ ilʉndɨɨe. 28Petelo wɨkaaɨla, “Mʉlɨngile kɨna nsuta mʉntendo yitʉ Ayahudi kihanja nɨ antʉ nɨ shanga Ayahudi ang'wɨ kʉmʉgendeela. Itunda ingɨ ʉndagɨɨe kɨna kʉgiigwe kenda kʉ mʉntʉ wɨhi nʉkomilwe ʉpiti ang'wɨ mʉbɨɨ. 29Itɨ naza ʉnintangile shanga nisinsɨe. Itungo ɨlɨ kʉlompa ʉmbɨle ʉnintangɨe ntʉni?”
30Kolinelio wɨkasʉkɨɨlya, “Mahikʉ ataatʉ nakɨla, itungo anga lɨlɨ aɨkʉlompa mʉnyʉmba, ng'ʉng'wɨ masaa kenda itɨ. Kʉpumpugɨɨlya mʉntʉ ʉtugae ngʉo melʉpee wimɨkile pa ntongeela ane, 31wakalʉnga, ‘Kolinelio, wigigwa ɨmalompi ako ni masongelyo ako agombwa ni Itunda. 32Ingɨ lagɨɨlya antʉ alongole kʉ Yapwa akolye mʉntʉ ʉng'wɨ witangwa Simoni Petelo, mʉntʉ ʉyʉ ingɨ mʉgeni mʉ nyʉmba ang'wa Simoni mʉnonya ndɨlɨ, nyʉmba akwe nɨɨza ɨkolɨ pa nshembo alʉzi.’ 33Kʉlʉlo nalagɨɨlya antʉ kʉng'wako, nʉewe watenda iza kʉza. Itungo ɨlɨ ʉsese kɨhi kʉkolɨ apa ntongeela ang'wi Itunda kʉtegeeye ʉkʉɨle makani ɨhi Isekʉlʉ nʉkʉlagiiye.”
Petelo ʉkʉtanantya Nkani Nza
34Papo ʉ Petelo wɨkandya kʉtambʉla, “Nalɨnga kɨna Itunda shanga wɨkoma, 35Ingɨ Itunda wɨagomba antʉ ɨhi nɨakʉmʉkʉlya shanga wɨkela apembeeye ihɨɨ kɨɨ. 36Ʉlʉ lʉlʉ lʉkani lang'wi Itunda nʉlagɨigwe kʉ Aisilaeli, wazetanantya Nkani Nza niya matiliga kʉkɨɨla kʉng'wa Yesʉ Kilisito Isekʉlʉ nʉwa antʉ ɨhi. 37Mʉlɨngile ikani ɨlo naɨlɨpumɨe kʉ Yʉdea ɨhi kandɨɨlya kʉ Galilaya ʉ Yohana Mʉbadisi naɨwakondya kʉatanantɨɨlya antʉ lʉkani lakwe nʉla ʉbadisigwa. 38Kɨnyaʉlɨ Itunda aɨʉmʉhoile ʉ Yesʉ mʉnya kʉ Nazaleti mʉ Ng'wahʉ Ng'welʉ nʉ ʉhumi. Nkɨka yɨhi naɨwendile nʉkʉtenda makani nɨmaza nʉ kʉakomya antʉ ɨhi naɨza aonewe ningulu yang'wa Shetani, kʉnsoko Itunda aɨwɨpalʉng'wɨ nʉyo. 39“Ʉsese kɨakʉɨɨli amakani ɨhi naɨitʉmilwe mʉ Yʉdea nɨ Yelusalemu. Aɨamʉbʉlagile nʉ kʉmʉkoma mʉ mʉsalaba. 40Ingɨ lʉhikʉ nʉla kataatʉ Itunda wɨkamiʉsha sʉnga wɨkamʉpa ʉhumi nʉwakigeeleka kʉ antʉ, 41shanga aɨwigeelekile anga kʉ antʉ ɨhi, ingɨ kʉng'witʉ Itunda naɨʉkʉhoile kʉtule kɨakʉɨɨli akwe, ingɨ ʉsese naɨkɨlizania nʉkʉng'wezania apa naɨ wakondya kiʉka kʉpuma kʉashi. 42Nʉyo aɨʉkʉlagɨɨye kʉtanantye Nkani Nza kʉ antʉ ɨhi nʉkʉmʉɨla kɨna Yesʉ ng'wenso Itunda naɨʉhoile kʉtula mʉlamʉli kʉ antʉ nɨ apanga nawa nɨakule. 43Amanga ang'wi Itunda ɨhi aɨatambʉe kɨna mʉntʉ wɨhi nʉʉkʉhʉɨɨla ʉkʉlekelwa mɨlandʉ kʉkɨɨla lina lang'wa Yesʉ.”
Antʉ ɨhi nɨ shanga Ayahudi akʉmʉsɨngɨɨlya Ng'wahʉ Ng'welʉ
44Itungo ʉ Petelo naɨʉkʉtambʉla inkani izi, ngulu a Ng'wahʉ Ng'welʉ ɨkaasimɨɨla antʉ ɨhi naɨategeeye inkani niyanso. 45Antʉ awa naɨabadisigwe naɨazile palʉng'wɨ nu Petelo ɨkakʉɨlwa kʉona kɨna Itunda wahunʉla ʉhumi nʉwa Ng'wahʉ Ng'welʉ mʉ antʉ nɨshanga Ayahudi. 46Aɨaalɨngɨle kʉnsoko aɨaigulye akʉtambʉla kʉntambʉ ngɨɨza azemʉlʉmbɨɨlya Itunda. Papo ʉ Petelo wɨkalʉnga, 47“Itɨɨ, ʉkolɨne mʉntʉ wɨhine nʉhumile kʉagilya antʉ awa aleke kʉbadisigwa kʉ mazi? Amʉsɨngɨɨlya u Ng'wahʉ Ng'welʉ anga ʉsese naɨkʉmʉsɨngɨɨye.” 48Kʉlʉlo wɨkalagɨɨlya antʉ ɨhi abadisigwe kʉ lina lang'wa Yesʉ Kilisito. Sʉnga antʉ ɨkamʉlompa ʉ Petelo wishiɨ nɨenso kʉ mahikʉ makeehʉ.
सध्या निवडलेले:
Ntendo 10: IBV
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The New Testament in Isanzu @The Word for The World International and Isanzu Language translation. All rights reserved