Ntendo 3
3
Petelo ʉkʉmʉkomya kɨtele kʉ lina lang'wa Yesʉ
1Lʉhikʉ lʉng'wɨ mpɨndɨ anga saa kenda itɨ, Petelo nʉ Yohana aɨalongoe mʉ malompi pa Nyʉmba ang'wi Itunda. 2Matungo nanso antʉ aɨamʉkekile mʉntʉ kɨtele mʉʉtugwa wakwe, aɨʉkenkilwe nʉkʉtengemekwa pa mʉlango nʉa Nyʉmba ang'wi Itunda nʉitangwa “Mʉlango nʉ Ʉza,” wahume kʉlompa waaɨligwe mpia nɨantʉ nɨakingɨla pa Nyʉmba ang'wi Itunda. 3Kɨtele ʉyʉ naɨ waaona a Petelo nʉ Yohana ahumbeela kingɨla pa Nyʉmba ang'wi Itunda, wɨkaalompa amʉpe mpia. 4Petelo nʉ Yohana ɨkamʉdʉbɨɨla, sʉnga Petelo wɨkamʉɨla, “Kʉgoze ʉsese.” 5Kɨtele ʉyʉ wɨkaapɨlʉkɨla, wazeʉsʉmbɨɨye kʉlija kɨntʉ kʉpuma kʉng'wao. 6Papo ʉ Petelo wɨkamʉɨla, “Nɨmʉgila mpia niyakʉʉpa, ingɨ ɨkɨ nɨnkete kɨko kʉʉpa. Kʉlina lang'wa Yesʉ Kilisito nʉa kʉ Nazaleti, imɨke, ʉlongole.” 7Sʉnga Petelo wɨkamʉamba kɨtele nʉwanso mʉkono nʉwa kɨgoha, wɨkamʉʉsha. Papo paapo malu nɨ mang'weng'we akwe ɨkakoma. 8Wɨkimɨka, wɨkatula genda nʉkʉputangila. Sʉnga ɨkingɨlania nɨa Petelo nʉ Yohana pa Nyʉmba ang'wi Itunda nʉ kʉmʉkʉlya Itunda. 9Antʉ ɨhi naɨ akolɨ pang'wanso naɨamʉona ʉkʉgenda nʉ kʉmʉkʉlya Itunda, 10naɨamʉmanya kɨna yʉyo kɨtele naɨ izɨɨe kʉmʉona wɨɨkwa nʉkilompisa pa mʉlango nʉa Nyʉmba ang'wa Itunda nʉitangwaa “Mʉlango nʉ Ʉza,” ɨkakʉɨlwa nanguluu shanga ɨkalɨnga nɨkɨmʉpantɨkile.
Petelo ʉkʉtanantya pa Nyumba ang'wi Itunda
11Kɨtele naɨʉkomigwe ɨkakʉɨlania nɨ a Petelo nʉ Yohana, antʉ ɨhi ɨkakʉɨlwa ɨkatula mankɨɨla pa kɨanda kang'wa Solomoni. 12Petelo naɨ waona itɨ wɨkaatambʉɨla, “Ʉnyenye Aisilaeli, nɨkɨ mʉkʉɨwe ɨkani ɨlɨ itɨ? Haɨ ka mʉkʉgozee itɨ, ituile anga kʉ ʉhumi witʉ ang'wɨ kʉ ʉkende witʉ kamʉtendeela ʉmʉntʉ ʉyʉ wahume kʉgenda? 13Itunda nʉwa agʉkʉ itʉ, Ibulahimu nʉ Isaka nʉ Yakobo, ʉmʉkʉiye mitʉmi wakwe ʉ Yesʉ. Nʉwanso yʉyo ʉnyenye naɨmʉmʉsuɨpile nʉkʉmʉhita ntongeela ang'wa Pilato, nɨ itɨ Pilato aɨʉlamʉe watungʉɨlwe walongole. 14Ʉnyenye aɨmʉmʉhitile Yesʉ hangɨ nɨ Mʉkende, mɨkalowa mʉpegwe mʉntʉ nɨ mʉbʉlagani. 15Itɨ gwa mɨkamʉbʉlaga ʉyo nɨ ng'wandyo nʉwa ʉpanga, Itunda ingɨ wɨkamiʉsha. Ʉsese kɨakʉɨɨli a makani nanso. 16Kʉhʉɨɨla lina lang'wa Yesʉ kɨko kɨmʉpee ngulu mʉntʉ ʉyʉ nɨmʉmʉine hangɨ mʉmʉmanyile. Ʉhʉɨɨli wakwe kʉng'wa Yesʉ wʉwo ʉmʉponilye lʉkʉlʉ ʉmʉntʉ ʉyʉ anga nɨmʉine.
17“Itungo ɨlɨ aluna ane, nɨngile kɨna aɨmʉmʉtendee ʉ Yesʉ kʉnsoko shanga aɨmʉlɨngile, anga atongeeli anyu naɨatendile. 18Ingɨ kʉkɨɨla nzɨla ɨyɨ Itunda ʉkamɨnkɨɨye lʉkani naɨ ʉtanantilye ɨkalɨ kʉkɨɨla amanga akwe ɨhi, kɨna ʉ Kilisito wakwe wagigwe. 19Ingɨ mile itʉnʉ, mʉmʉsʉkɨle Itunda, wahume kʉmʉlekela mɨlandʉ anyu. 20Itʉmi nanso Isekʉlʉ wamʉpeze matungo akiloa nʉkʉmʉlagɨɨlya ʉ Yesʉ Kilisito naɨ ʉmʉhoile kʉnsoko anyu. 21Naɨ ʉtakɨwe kʉsaga kigʉlʉ ahume kʉpika matungo akʉnonigwa ʉpyaa maintʉ ɨhi, anga Itunda naɨʉtambʉe kʉkɨɨla amanga akwe nɨelʉ kʉpuma wandɨɨlyo nʉa ʉnkumbigʉlʉ. 22Musa nʉyo aɨʉtambʉe, ‘Isekʉlʉ Itunda wanyu ʉkʉmʉleta mʉmanga wakwe anga ʉnene kʉpuma mʉ aluna anyu, mʉtakɨwe kʉmija yʉyo mʉnkani ɨhi nʉkʉmʉɨla. 23Mʉntʉ wɨhi nɨshanga ʉkʉmija ʉ mʉmanga ʉyʉ nʉ wang'wi Itunda, ʉkʉkong'wa nɨ antʉ ang'wi Itunda nʉ kʉbʉlaga.’ 24Amanga ang'wi Itunda ɨhi kandɨɨlya Samweli nawa ɨhi naɨ atyatilye, aɨatambʉe nʉkʉpumya ʉmanga nʉwa makani nɨɨkatendeka mahikʉ aya. 25Ʉnyenye maile mɨana a amanga hangɨ ana ilago anga Itunda naɨ wilagile nɨ agʉkʉ anyʉ, wazemʉɨla ʉ Ibulahimu, ‘Kʉkɨɨla wileli wako, ndʉgʉ yɨhi mʉ ʉnkumbigʉlʉ yɨkʉkembetwa.’ 26Itunda, naɨ wakondya kʉmiʉsha Mitʉmi wakwe, wɨkatongela kʉmʉlagɨɨlya kʉ ng'waanyu, ingɨ wamʉkembete mʉntʉ wɨhi mʉ ng'waanyu nʉ kʉmʉpa ʉhumi nʉwakʉleka kitʉma ʉbɨ.
सध्या निवडलेले:
Ntendo 3: IBV
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The New Testament in Isanzu @The Word for The World International and Isanzu Language translation. All rights reserved