Rute 2
2
Rute Kegyaŋeena Boase
1Na Naomi dana loŋto ŋon ɔ ba lee ɔ baale Ɛlimɛlɛke loŋtoro man. Ɔ dana ɔ wose te ɔ wose man dana obuo. Ɔ yele yɛna Boase.
2Wee daale Moabe alo Rute ŋon yako Naomi nyiaa, <<Yela maa gyu wɔɔse ŋan man na me kaa gyalase aboŋ ŋan bɛɛ kɛrɛɛ tina yela nɛ. Mberem ŋolo waa wii maŋ na waa yela maa sila e.>>
Keŋte Naomi mɔ yako e nyiaa, <<Me bu, ta.>> 3Mena dɔɔ Rute gyuuwɔ wɔɔ daale man na ɔ silana baŋ bɛɛ kɛrɛɛ nɛ wɔlewɔle, ɔ ne gyalase aboŋ ŋan bɛɛ kɛrɛɛ tina yela nɛ. Te kɔŋawɔ nyi wɔɔ keŋ man ɔ be gyu nɛ yɛɛ Boase ŋon ɔ loŋto yɛna Ɛlimɛlɛke nɛ wui.
4Te kyare ya te Boase lee Bɛtelɛhɛm kɔŋ te ɔ doo tomyɛɛra baŋ nɔɔ nyiaa, <<Wurubuarɛ waa seŋ ɛ wɔle!>> Te tomyɛɛra baŋ mɔ kpaa e nyiaa,
<<Wurubuarɛ waa hiraa nyaŋ mɔ!>>
5Botɔɔ te Boase bɔɔse tomyɛɛra siamante ŋon nyiaa, <<Dekpaŋalaŋ woŋti man yaa alebu kei leewɔ?>> 6Te tomyɛɛra siamante ŋon tiranɔɔ fa e nyiaa, <<Ŋon yɛna Moabe alo ŋon ɔ be sila Naomi lee Moabe kɔŋ nɛ. 7Ɔ sola maŋ nyi, maa yela waa sila tomyɛɛra baŋ na waa gyalase aboŋ ŋan bɛɛ kɛrɛɛ tina yela nɛ. Lee nebo nebo keŋ ɔ be kɔŋ nɛ, ɔ gyakaa ɔ ne yɛɛ tom kaalii debaŋ kei. Ɔ gyuuwɔ ke kyaa kefɛɛ keŋ tɛɛ fɛɛfo kyomii.>>
8Keŋte Boase yako Rute nyiaa, <<Me bu tei maŋ. Na gyu wɔɔ daale man ke gyalase aboŋ ya te na lee kɛbo mɔ ya. Kyaa kɛbo kpuna ala baŋ bɛɛ yɛɛ tom fa maŋ nɛ. 9Kɛɛ botɔɔ keŋ balaŋ baŋ ne yɛɛ tom nɛ na n ke sila ala baŋ. Ma te yako me tewulɛɛ baŋ nyi be na tina neŋ ya. Debaŋ kamasɛ keŋ loŋboaneŋ de kyaŋ neŋ na, gyu ke kyee loŋ lee osuŋse ŋan me tewulɛɛ be kyekii loŋ baŋee nɛ man nyɔɔ.>>
10Te Rute tisiwɔ buŋ mo ɔ sia buŋ tɛɛle man te ɔ yakowɔ nyiaa, <<Weera te me nombia gyoo n sia te n na gyueŋ maŋ ŋɔɔle kei dɔɔ mena?>>
11Te Boase mɔ tiranɔɔ fa e nyiaa, <<Be yako maŋ ŋan pou n be yɛɛ fa nya awu leenaŋ debaŋ keŋ n baale ba yem, na mena keŋ n be tina n kya na n naa na n donɔɔ yela kɔŋ n kyaa balaŋ baŋ n ba gyeŋ wɔ see ya gyaŋ nɛ. 12Degbeŋgyoo waa tɔ neŋ kpene keŋ n be yɛɛ nɛ kom. Degbeŋgyoo ŋon ɔ yɛɛ Iseraetena Wurubuarɛ e, ŋon n be yeu kagyoo ɔ beŋkelɛɛ tɛɛ nɛ waa tɔ neŋ kom nideli.>>
13Keŋte Rute yako e nyiaa, <<Me gbeŋgyoo, n te wii maŋ nideli. N te fɛɛ me wɔe te n kolosi nɔɔwoya gyoŋ nyiŋan fa nya alebu. N kɛɛna na ma dokoso yɛna nya alebia kɛwɔ man ŋolo gba ya>>
14Kelii debaŋ keŋ baa di weenɛɛ nɛ Boase yako Rute nyiaa, <<Kɔŋ kɛbo. Kaa lɛɛ weenɛɛ ŋaale na n ka mo milaa kelem keŋ na n ke di.>>
Rute kekɔŋ kaa kyaa kpuna tomyɛɛra baŋ nɛ, ɔ faa e wamela awɔkee ŋan ŋaale. Ɔ taowɔ baa nideli kaase ŋaale gba. 15Rute ka koro nyi ɔ kaa gyalase bela nɛ te Boase yako ɔ tomyɛɛra baŋ nyiaa, <<Nyi akpaa ɔ tɔɔsee lee ŋan ɛ be kɛrɛɛ see nɛ man koraŋ na ɛ na tɔ e gbɛɛ ya. 16Kenaŋ wɔle koraŋ na ɛ bese lese ŋaale lee ŋan ɛ be bake nɛ man lɔ e na waa tɔɔsee. Ɛ na kalena e ya.>>
17Mena dɔɔ Rute tɔɔseewɔ aboŋ ŋan menɛɛ kelii balinɔɔ. Ɔ ke tuku ŋan ɔ be gyalase nɛ pou na ɔ nyiŋa tasa tɔɔ. 18Ɔ moo ŋa gyu dɛɛ te wa awu naa ŋan pou ɔ be nyim nɛ. Keŋte Rute moo weenɛɛ ŋan ɔ be dii kaase nɛ fa wa awu ŋon.
19Keŋte wa awu bɔɔse e nyiaa, <<Aleŋ yaa n ke gyalase kɛŋa pou lee gyɛŋ? Aleŋ yaa n gyuuwɔ ke yɛɛ tom? Wurubuarɛ waa hiraa walaŋ ŋon ɔ ba boele neŋ nɛ.>>
Keŋte Rute yako wa awu walaŋ ŋon ɔ be gyu ke yɛɛ tom ɔ wɔɔman nɛ. Ɔ yako e nyiaa, <<Balee ŋon mɔɔ gyu ke yɛɛ tom ɔ wɔɔman gyɛŋ nɛ yele yɛna Boase.>>
20Te Naomi yako ɔ bu alo Rute nyiaa, <<Wurubuarɛ ŋon ɔ gyakaa ɔ ne wii balaŋ baŋ be kyaana be sia na baŋ bɔɔ yekee nɛ waa hiraa Boase.>> Keŋte Naomi besewɔ yako nyiaa, <<Balee ŋonaŋ yɛɛ da loŋto gbagba e. Ɔ yɛɛ balaŋ baŋ kaboena nyi baa kɛɛ de dɔɔ nɛ man ŋolo e.>>
21Botɔɔ te Moabe alo Rute ŋon yako Naomi nyiaa, <<Balee ŋonaŋ koraŋ yako maŋ nyiaa, <Kpuna ma tomyɛɛra kɛwɔ kaboena ɛ ka mo kɛrɛɛ ma aboŋ ŋan pou taŋ.>>>
22Keŋte Naomi yako ɔ bu alo Rute nyiaa, <<Me bu, akpaa n sila wa alebia baŋ na dei kela. Nawolo nyi akpaa n gyu walaŋ wɔle ŋolo wɔɔman nɛ, n te kɛɛ ya na ŋolo waa kaa yɛɛ neŋ kolo kum daale.>>
23Mena dɔɔ Rute sila Boase alebia baŋ ɔ ne gyalase kaboena be kɛrɛɛ aboŋ na kameese ŋan pou taŋ. Kei wɔle pou na ɔ kyaa wa awu ŋon gyaŋ.
सध्या निवडलेले:
Rute 2: NTR
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
2026 Ghana Institute of Linguistics Literacy and Bible Translation