Génesis 1
1
Itolere coaaunaa Cana Coaunerane
1Jauriaanejeein itolere coaaunaane nunuheneein jetaote, dede, chauratane, naaonjoaihunri coaaunaelu Cana Coaunera. 2Nii bana jetao niheilu caa ena aihane rijijieein atane. Satiin jetaote acau nelu ucuacaain, nocohena tabaineein. Nii jana Cana Coaunera Suujueecha, nii acau choae nerurujuarejetohane jana jetaote:
3“Neeine conora”, naa Cana Coaunerane jaun jetao, necoaaunaelu cono.
4Nitohaneein cono coaaunaain coaraa Cana Coaunerane jana, rai caohatohane jaun jetaote, nocohena caje nii cono leruhin, 5jiichooneein curuaatelu Cana Coaunera. Jana nocohena jetaote janotiinneein curuaatelu. Nitohaneein jetaote le jiichoonihane nainaelu.
6Nii baiha jetaote: “Neeine ita caje acau lerueranura. Aihate ita caje nelerumiin acaura”, naain ita caje acau lerueranu coaaunaa Cana Coaunerane jaun jetao, ita caje neleruelu acau. 7Nitohaneein ita caje acau lerueranu coaaunaa Cana Coaunerane jaun jetaote, ita caje acau leruha nii Cana Coauneraacha coaaunaine jaun jetao, neleruhin cajichi que nedaane jana, rai neleru ecuun nedaelu. 8Nii acau leruera jetaote curuaatelu dedeneein. Nitohaneein jetaote coroata jiichoonihane nainaelu.
9Nitohaneein ita caje neleruha acaune jana jetaote: “Le turijieein netaojiamiin dede nichaji que nelanaala cajichi que nenaa acaute; inanacaaine chaurutanera”, naa Cana Coaunerane rijijieein jetao, ita aina netaojiaelu caa cajichi que enanetojoeein nenaa acau, cucuananeein niicha curuaateei. Niritoha Cana Coaunerane jana, inae jacorohane jaun jetaote, 10nii jacorono curuaatelu atane neein Cana Coaunera. Jana acau netaojianaa jetaote, curuaatelu cucuananeein. Nitohaneein coaaunaain coaraa Cana Coaunerane jana, satiin rai caohatohane jaun jetaote: 11“Omaromiin caa atane que itolere temulecuru atane jana jiinchuru neenihuru, temule inaana inaaurera, chaaen nunaanau lenacaineein inaana inaaurera naaonjoaihunricha”, naa Cana Coaunerane jana, 12omaroha itolere temulecuru atane jana jiinchuru neenihuru, temule inaana inaaurera, chaaen nunaanau lenacaineein inaana inaaurera naaonjoaihunrine jana, coaraa Cana Coaunerane jana jetao, satiin rai caohachae. 13Nitohaneein jetaote, nichata jiichoonihane nainaelu.
14-15Nitohaneein itolere coaaunaacoaane baiha jetaote: “Neeine conooru, chauratane conaain, jiichoo, janotiin, naaonjoaihunri lerueranu que, nii acau leruera beraurosiojoai quera. Chaentechu jataain nelatineein nenacaauru janonaa, ajaanaa naaonjoaihunri coujunacane que nelatiha cuurureeincha”, nae jetao Cana Coaunera.
16Nitohaneein jetaote, coroatajaain cono coaaunaelu, leinjiin tasinujoaain, leinjiin aansijieein, naaonjoaain janotiin, jiichoo, naaonjoaihunri conaeranu que Cana Coaunera. Nii tasinojoaain niicha coaaunai jetaote, jiichoo conaeraneein coaaunae. Jana aansijieein niicha coaaunai jetaote, janotiin conaeraneein teein coaaunaain, arasijieeurune maajeein coaaunaelu. 17Nitohaneein coroatajai cono coaaunaain jetaote, dedeeu teelu Cana Coaunera, chauratane 18que janotiin, jiichoo, naaonjoaihunri conaain, ita caje janotiin aina jiichoo lerueranu que. Nitohaneein coaaunaain coaraa Cana Coaunerane jana jetaote, satiin rai caohachae. 19Nitohaneein jetaote, jena jiichoonihane nainaelu.
20Nii baiha jetaote: “Neeine itolere caa acauhanau lauri ichaohin neenihuru, lauri atane choae jiaauluhin amuenihuru tajaaecuru, naaonjoaihunricha”, nae jetao Cana Coaunera.
21Nitohaneein jetaote, itolere cucuana cuhane ichaohin neenihuru, itolere jataain tabaihuri cucuana cuhane neenihuru naaonjoaihunrine maajeein coaaunaain, itolere tajaaecurune maajeein coaaunaelu Cana Coaunera. Nitohaneein coaaunaacoaain coaraa Cana Coaunerane jana, rai caohachaane jaun jetaote:
22“Arajiin calaojoiin nefaain cucuana cuhanai memoaain, tajaaecurune maajeein arajiin nefaain, chauratane sacuritaain calaohicuchera”, naain jetao nii itolere lauri lauriin niicha coaunaauri coroajeein cojiotae Cana Coaunera.
23Nitohaneein jetaote, saoqui janohane nainaelu.
24Nii baiha jetaote: “Neeine itolere lenonecuru lauri lauriin nunaanau neenihuru, atane choae tijiarohin amuenihuru, nenaanajau irineein neenihuru naaonjoaihunricha”, nae jetao Cana Coaunera.
25Nitohaneein itolere lauri neenihuru coaaunaain coaraa Cana Coaunera jana, satiin rai caohachaane jaun jetaote:
26“Coanete laen enene cacha coaaunaaca. Jerichanejeein cana rijijieein nihane, ateeuru, tajaaecuru, lenonecuru, nenaanajau irineein neenihuru, nunaanau ichaonacaauru, atane choae tijiarohin amunacaauru, naaonjoaihunri amurijiriin itolere ichana naineraneein niha cureeincha”, nae jetao Cana Coaunera.
27Nitohaneein jauriaanejeein neeni cacha coaaunaain jetaote,
jerichanejeein rijijieein jetao coaaunaelu Cana Coaunera.
Nitohaneein quicha, ene, naaonjoaain coaaunaain jetaote:
28“Arajiin bereecohacoaain nefaain, chauratane sacuritaain curuaanaa neeichuru neeuchera.
Chaaen caohachaain ateeuru, tajaaecuru, itolere lauri tijiarohin amunacaauru naaonjoaihunri amurijiriin, caohachaain itolere que nelateein neeuche”, naain jetao acaauru coroajeein cojiotanajae Cana Coaunera.
29Niritoha acaauru raine baiha jetaote: “Aonacuche, itolere temule atane jana jiinchuru neenihuru, temule inaana inaaunrera, chaaen nunaanau lenacaineein inaana inaaurera naaonjoaihunrine inara rai teeun. Acaaurute nelatereein inara lenonenu quera. 30Jana nunaanau ichaonacaauru, atane choae tijiarohin amunacaauru, tajaaecuru, naaonjoaihuri raine ajena teeun acaauru lenonenu quera”, nae jetao Cana Coaunera.
31Nitohaneein itolere niicha coaaunaacoai coaraa Cana Coaunerane jana jetaote, satiin jataain rai caohachae. Nitohaneein jetaote, saota janonihane nainaelu.
सध्या निवडलेले:
Génesis 1: URA
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2005, 2024, Wycliffe Bible Translators, Inc.