JOHN 8
8
Phwngngampu Sheko Ja Phopu
1Hüyangpoi Jesu Olive Kahtang te tai. 2Napning shomme I khümjing te leihye. Kahta üngang I neikonne jem, hüyange I shot hüyange imante nyüone wang. 3Ngaokeng nyüopalan hüyange Phariseelanne phwngngampu linge ngohwante phopu sheko ja woipei, hüyange iman üshei sheshao me yongne tam. 4Iman-e Jesute i, “Konnyüopa,” “Hatüo sheko phwngngampu toi linge ngohwante pho. 5Mosa phapu ngaokeng me hükihpu sheko-a longe shüppe toilak she ngohnang. Sha-a nange hangke ilakshi?” 6Iye püokülak hüyange pholak she teihyange iman-e Ite tokke hatüo ngao iyangki. Hüyangpoi Jesu khuhta hüyange I yaklanne kahtok te nyan. 7Iman-e yelakpe Ite ngao tonge yonge ngoh, Iye nganne lei hüyange imante i, “Numan yo me aome ünu yenang Iye tüopa shekote üwangne long shüppe wangtüoh.” 8Nishe I khuhta hüyange kahtok te nyan.
9Aope iman-e tüopa ngao jai, jeiyongpa me wange ja phei me ja she taiye küm. Shekonyu yha yongjing me, hüyange Jesu shaha tüoh. 10I nganne lei hüyange yha te i, “Iman-a üpu, sheko? Sheja nehoi nangte yeyao yeli a?” 11Yha jan, “Üyongpa, ja nehoi yenang,” Jesuwe i, “Hüma-a Taowe-o nang min yao minle. Taitüoh, shaaji ünu tahling.”
Jesu Kahtoknyu Wangngai
12 #
Jn 9.5; 12.35; 1.4. Jesuwe üne-o imante i: “Tao kahtoknyu wangngai. Ao ü-pheite woilakei wangnyak me aope-o yekemlak, hüyangpoi üyin wangngai tüolak.” 13#Jn 5.31-39.Phariseelanne Ite i, “Nange nang jingne saki phanangki; nang saki üting yeje.” 14Jesuwe imante i, “Üjingne Taowe saki phayapoi, ü saki üting, hangjingne Tao ümeken mepu pei hüyange Tao ümeken te tailak Taowe shingnang; hüyangpoi Tao ümeken mepu pei yejema-a ümekente tailak numan-e yeshing. 15#Jn 7.24; 3.17.Numan-e meiye mongpu kih ngao phünnang, Taowe ao ngao-o yephün. 16#Jn 5.30.Hüyangpoi Taowe ngaophün küma-a ütingme phünlak, hangjingne tüome ü-shaha yeje; Tao shonpupa Üpa ü-phei ngohnang. 17#Hin 19.15; Mt 18.16.Numan ngaokeng me hatüo nyanne ngohnang, aope kahta niye saki phalakei, iman-e hanghe I tüopa-a üting. 18Taowe üjingne saki phanang, hüyange Üpa aowe Tao shon Iye üjingne saki phanang.” 19#Jn 14.7.Iman-e Ite tong, hüma-a “Nangpa ümeken me ngohnangki?” Jesuwe janne i, “Numan-e Üpa jeyah Tao jeyah yeshing;” “Numan-e Tao shingma-a, numan-e Üpa-o shinglak.”
20 #
Mk 12.41; Jn 7.30. Jesuwe tüoyin ngao, ngin angjing khümjing me ngao. Hüyange aowe-o I yepho, hangjingne I hipak manngoipe ngoh.
I Lilak Jesuwe Ngaotam
21 #
Jn 7.33-36. Jesuwe üne-o imante nishe i, “Tao taimahlak; numan-e Tao yamlak, hüyangpoi numan ünu me numan lilak. Tao ümekente tai numan taine ye-ok.” 22Jehudilanne i, “Iye hüke inang, tao ümekente tai numan taine ye-ok, tüote leppuwa, Iye yoi nying nyingke toilak ipu a?”
23 #
Jn 3.31; 17.14; 1 Jn 4.5. Jesuwe janne i: “Numan-a üphangpa mepu, Taowa ütokpa mepu. Numan tüopa kahtok jing; Tao tüopa kahtok jingne yeje. 24#Jn 8.28; 4.26; 13.19; Mk 13.6.Tüokhei taowe numante iyangki, numan ünu me numan lilak. Hüyange ‘Taowa I’ she üting manlak manlak numan ünu me numan lilak.”
25Iman-e Ite tong, “Nanga aoshi?” Jesuwe janne i; “Hanghepa taowe numante üwangne muh iyangki, 26Taowe numante ilak maawe ngohnangki hüyange numan jingne ngao phünlak ngohnang. Aowe Tao shon I üting, hüyange Imepu Taowe hanghe jai kahtoknyu te inang.”
27Iye Ipa jeng imante inangshe iman-e yeshing. 28#Jn 3.14; 12.32.Tüokhei Jesuwe imante i, “Aope numan-e Kahta Üha nowe inpu ngelakei ‘Tao ao shi’ numan-e shinglak, tüophei me nakshih Taowa ü-mepu yeje, hüyangpoi Üpawe üte hanghe nyüowe tam, tüopa toi ling she numan-e shinglak. 29Hüyange aowe Tao shon, I ü-phei ngohnang; Iye ü-shaha yetüoh, hangjingne Taowe jinte Iye mongpu ling.” 30#Jn 7.31; 10.42; 11.45.Iye hüke ngaopu jaipu üshei Ite ütinglak.
Ütingpa Pinlan
31 #
Jn 15.7; 2 Jn 9. Tüokhei Jesuwe Ite, ütinglakpu Jehudilan te i, “Taowe nyüopu numan-e jaima-a ütingme numan-a ü-pinlan; 32#2 Kor 3.17; Gal 5.1.numan-e ütingpa-a shinglak, hüyange ütingpawe numan lantamlak.” 33#Mt 3.9; Gal 3.7.Iman-e Ite jan, “Toman Abraham nokli, hüyange toman aope-o ao rhane-o yemeng; hümma-a, ‘Numan lantamlak,’ she nange hanghete leppu?”
34 #
Rom 6.16; 2 Pet 2.19. Jesuwe imante i, “Üting tingha me Taowe numante iphaning: aowe ünu ling I ünu rhapa. 35#Kaht 21.10; Gal 4.30.Rhapa aope-o jinte nokme yengoh; hüyangpoi, Ha jinte ngohnang. 36Hüma-a ühawe numan lantamküma-a numan ütingme lanteki. 37Taowe shingnang numan Abraham noklilan. Hüyangpoi numan-e Tao toine yamnang, hangjingne numan me ü-ngao yenang. 38Taowe Üpa mepu hanghe nge tüopa ngao nang; hüyange numan-e numan Üpa mepu hanghe jai tüo lingnang.”
Jesu Hüyange Abraham
39Iman-e Ite jan, “Toman üpa-a Abraham.” Jesuwe imante i, “Numan ütingpa Abraham hayim ne jeshihma-a, Iye lingpu toikih numane-o linghah shepu; 40Hüyangpoi Taowe lingpu lili Kahwang mepu hanghepa üting jai numan te ilak jingne! Hüyangpoi numan-e Tao toine ngangnang. Abraham-e hükih hango yeling! 41#Hin 32.6; Isa 63.16; 64.8.Numan üpawe hanghe ling numan-e hatüo lingnang.” Iman-e jan, “Toman chingyang halan yeje.” “Toman-e Üpa ja ngohnang, Kahwang I.”
42 #
Jn 13.3; 16.28. Jesuwe imante i: “Kahwang ütingme numan Üpa ne mengshihma-a, numan-e üte kenhah shepu; hangjingne Tao Kahwang mepu pei hüyange tüome ngohnang. Tao ü-nying nyingke peipu ne yeje, hüyangpoi Iye Tao shon. 43Taowe hanghe i numan-e hangne yeshingpu shi? Hatüowa hangne ima-a, numan-e ü-ngao jaine ye-ngangpu jingne! 44#1 Jn 3.8,15; Kaht 3.4; 1 Jn 2.4; Mt 12.34.Numan-a numan üpa kahshih hayim, hüyange numan üpawe mongpu pheite numan woihunang. Üwang memuh I lüntoi lingpupa, hüyange ütingpa phei linglak hango yenang, hangjingne I me üting yenang. Aope Iye tahleih ilakei, I wanglamme hangke mong hüke ngaonang, hangjingne I tahleih ipa hüyange leihpa üpa. 45Hüyangpoi Taowe ütingpa ngao, hüyange tüojingne numan-e üte üting yelak. 46#1 Jn 3.5; Jn 18.37.Numan yo me aowe tao ünu kahta she iye oklak? Taowe numante üting ipu ne mengma-a, hümma-a hangne üte üting yelakpushi? 47Ao Kahwang mepu pei Iye Kahwang ngao jai hunang, numan-e yejai hupute leppuwa numan Kahwang mepu yeje.”
48 #
Jn 7.20; 10.20; 4.9. Jehudilanne Jesute jan, “Toman-e nanga Samaria mepu ja hüyange nangme laa ngohnang she ilak yeshu a?” 49Jesuwe jan, “Üme laa yenang. Taowe Üpate iyeshenang, hüyangpoi numan-e üte ye-i-yeshe. 50Taowe üjingne müktishiwapu yeyam, ja ngohnang Iye müktishiwapu yamnang hüyange ngao phün nang. 51Üting tingha numante iphaning: kahta ütam-e ü-ngao tükke angma-a, Iye aope-o lipu ye-ngelak.”
52Jehudilanne Ite i: “Sha-a toman-e shingnang nangme laa ngohnang. Abraham li, hüyange hipalan li, hüyangpoi nange i, kahta ütamme ü-ngao ngohma-a, Iye aope-o lipu ye-ngelak. 53#Jn 4.12.Toman üpa Abraham li; Abraham phei sheyongpu she nange ine ye-ok, jeya? Hüyange hipalan-o li. Nanga ao she nange teihnangki?”
54Jesuwe jan, “Taowe Ü-nying nyingke müktishiwama-a, ü-müktishiwapu hangne-o yemeng. Aowe Tao müktishiwa ne tam hatüowa Üpa, ao te numan-e Üpa üja she inang. 55Hüyang-poi numan-e I yeshing, hüpoi Taowe I shingnang; hüyange Taowe I yeshing she ima-a, taowe numan kih-e tahleih inang. Hüyangpoi Taowe I shingnang hüyange I ngao angnang. 56#Mt 13.17; Heb 11.13.Numan üpa, Abraham-e, ü-hipak ngelak jingne hoongli-e teih; tüopa Iye nge hüyange mongmei.”
57 #
Jn 2.20. Jehudilanne Ite i, “Nang wangpeng denga nehoi manngoi, hüyange nange Abraham ngetekü a?” 58#Jn 1.1; 17.5,24.Jesuwe imante i, “Üting tingha me Taowe numante ipha ning, Abraham manpuhpe muh Tao ngohyangki.”
59 #
Jn 10.31; 11.8. Tüokhei iman-e Ite shüplak jingne long toon; hüyangpoi Jesu I nying nyingke lo, hüyange khümjing mepu tai.
सध्या निवडलेले:
JOHN 8: KONYBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.