Iranian Azeri Bible

اَبرامین آروادی سارایین اوشاغی اولموردو. اونون هاجر آدیندا مئصئرلی بئر کنئزی وار ائدی. سارای اَبراما ددی: «باخ، رب منئم بطنئمی باغلاییب کی، اوشاغیم اولماسین. کنئزئمله یاخینلیق ات، بلکه اوندان اوشاق صاحئبی اولارام.» اَبرام سارایین سؤزونه قولاق آسدی. اَبرامین آروادی سارای، کنئزی مئصئرلی هاجری گؤتوروب اَری اَبراما وردی کی، اونا آرواد اولسون؛ بو احوالات او زامان باش وردی کی، اَبرام کَنَعان تورپاغیندا اون ائل یاشامیشدی. اَبرام هاجرله یاخینلیق اتدی و هاجر بویلو اولدو. هاجر بویلو اولدوغونو گؤرنده خانیمینا حقارتله باخماغا باشلادی. سارای اَبراما ددی: «منئم تحقئر اولونماغیما سن سبب اولدون. من کنئزئمی سنئن قوینونا وردئم، او دا بویلو اولدوغونو گؤرنده منه حقارتله باخماغا باشلادی. قوی سنئنله منئم آرامدا رب حؤکم اتسئن.» اَبرام سارایا ددی: «کنئزئنی سنئن ائختئیارینا ورئرم، اونا نه ائسته‌یئرسن، اِت.» سارای کنئزی ائله یاوا رفتار اتمیه باشلادی و کنئزی اونون یانیندان قاچدی.
ربّئن مله‌یی اونو چؤلده بئر بولاغین یانیندا، شور یولونداکی بولاغین یانیندا تاپدی. مَلَک اونا ددی: «ای سارایین کنئزی هاجر، هارادان گلئب، هارایا گدئرسن؟» هاجر ددی: «من خانیمیم سارایین یانیندان قاچیرام.» ربّئن مله‌یی اونا ددی: «خانیمینین یانینا قاییت و اوندان ائطاعت ات.» ربّئن مله‌یی سؤزونه داوام وردی: «سنئن نسلئنی لاپ چوخالداجاغام، اِله کی، سایی-حسابی بئلئنمیه‌جک.» سونرا ربّئن مله‌یی اونا ددی:
«باخ، سن بویلوسان،
بئر اوغول دوغاجاقسان.
اونون آدینی ائسماعئل قویارسان،
چونکی رب سنئن ذلئل‌لئیئنی اشئدئب.
او، وحشی اِششَک کئمی بئر ائنسان اولاجاق:
او هامییا،
هامی دا اونا ضئدّ چیخاجاق،
بوتون قارداشلاری ائله چکئشمه ائچئنده یاشایاجاق.»
هاجر اونونلا دانیشان ربّه ددی؛ «سن منی گؤرن تاریسان.» چونکی او دمئشدی: «آیا من دوغرودان منی گؤرن تارینی گؤرموشم؟» بونا گؤره ده بو بولاق «بئر لَخایی رویی» آدلانیر. او، قِدِشله بِرِدئن آراسیندا یرله‌شئر.
هاجر اَبراما بئر اوغول دوغدو و اَبرام هاجرئن دوغدوغو اوغولون آدینی ائسماعئل قویدو. هاجر ائسماعئلی اَبراما دوغاندا، اَبرامین هشتاد آلتی یاشی وار ائدی.

Dengar یارادیلیش 16