If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

तिन्हा रोज्जे यूहन्ना बपतिस्मा दैणे वाला यहूदियां प्रदेश री बियाबान जगाह् अन्दर आई करी ए प्रचार करणा लग्गेया, “अपणे पाप्पां का तौबा करी लेयो, किजोकी स्वर्ग रा राज नेड़े आई गे रा है।” यूहन्ना बपतिस्मा दैणे वाला से ही मणू जिसेरे बारे अन्दर यशायाह भविष्यद्वक्ता ने पवित्रशास्त्र बिच बोल्लेया थिया,
“बियाबान अन्दर कुसकी री अवाज आया करदी है,
प्रभु रा रस्ता तैयार करो,
तिन्हेरी सड़कां सीद्दी करो।”
यूहन्ना ऊँट रे बालां रे बणे रे कपड़े पांदा थिया, अते तिसेरी कमर बिच चमड़े रा पट्टा बन्ने रा हुन्दा थिया, से टिड्डे अते जंगली मखीर खांदा थिया। यरुशलेम, यहूदिया, यरदन अते आस्से-पास्से रे सबणी इलाकेयां रे मते सारे मणू यूहन्ना बपतिस्मा दैणे वाले का आये। तिन्हा लोक्कां ने अपणे-अपणे पाप्पां का तौबा करी के यरदन नदी बिच यूहन्ना बपतिस्मा दैणे वाला का बपतिस्मा लित्तेया। जां यूहन्ना बपतिस्मा दैणे वाले ने मते सारे फरीसी ते सदूकी लोक्कां जो बपतिस्मा लैणे तांइ अप्पु का आंदे दिख्खेया, तां तिन्हा जो बोल्लेया, “ओ जहरिल्ले कीड़ेयां रे बच्चेयों, तुसा जो कुसने परमेश्वर री सजा का बचणे तांइ खबरदार कित्तेया?” अपणे कम्मां कने साबित करो कि तुसा अपणे पाप्पां का तौबा करी लित्ते री है ते दोबारा पाप्पां बिच मत पैंदे। अते अपणे-अपणे मनां अन्दर ए मत सोच्चो कि असा रा प्यो अब्राहम है, किजोकी मैं तुसा जो बोलदा, कि परमेश्वर इन्हा बट्टेयां बिच का भी अब्राहम तांइ औलाद पैदा करी सकदा। अवे परमेश्वर रे हिसाब-किताब रा झोंटू बूट्टे री जड़ पर रख्खे रा है, ताकि तिस मणू जो कट्टी दे जे जिस बूट्टे सांई हिन जिन्हा पर खरा फल्ल नी लगदा, से बूट्टा जड़ का बड्डी दित्तेया जाणा ते फुक्की दित्ता जाणा।
“मैं ता पाणी कने तुसा जो पाप्पां का तौबा करणे रा बपतिस्मा दिंदा, पर जे मेरे का बाद आणे वाला है, से मेरे का जादा ताकतवर है ते मैं तिन्हेरी चप्पल चुकणे जोग्गा भी नी है, तिन्हा ने तुसा जो अप्पु पवित्रात्मा ते आग्ग कने बपतिस्मा दैणा। तिन्हेरा छज्ज तिन्हेरे हत्थां बिच है, अते तिन्हा ने अपणे खलाड़े जो खरा करी साफ करणा, कणक जो खत्ते अन्दर इकट्ठा करणा, ते भूह् जो तिस आग्ग अन्दर फुक्की दैणा, जे कदी भी नी बुझणी।”


उस बेल्ले यीशु गलील का चली करी यरदन रे कनारे यूहन्ना का बपतिस्मा लैणे तांइ आये। पर यूहन्ना ए बोल्ली करी तिन्हा जो रोकणा लग्गेया कि, “मेरे जो ता तुसा का बपतिस्मा लैणे री जरुरत है।” अते तुसा मेरे का आये? पर यीशु ने तिसजो ए जवाब दित्तेया, “इस बेल्ले इय्यां ही होणा दे, किजोकी असा तांइ सही ए है कि इय्यां ही सारी धार्मिकता जो पूरा करण तां यूहन्ना ने तिन्हेरी गल्ल मन्नी लेई।”
ते यीशु बपतिस्मा लेई करी तिस्सी बेल्ले पाणी का बाहर आई गे, ते दिख्खो, तिन्हा तांइ स्वर्ग खुल्ली गेया, अते तिन्हा ने पवित्रात्मा जो इक्क कबूतर सांई उतरदे अते अपणे उपराल्ले आंदे दिख्खेया। अते दिख्खो, स्वर्ग बिच का ए अवाज आई कि ए मेरा प्यारा पुत्तर है, “जिस का मैं बड़ा-वरी खुस है।”

Dengar मत्ती 3