Біблія про закарпатцько романо чіб

Авка, сар іма бутджяне кєздинде те пісінкєрен пал ода, со обачіляпес машкар аменде, сар аменґє передине одала, саве дикгле ода анґлунестар і саве есас совґі про Лав. Авка, те ме рішиндьом міште те предикгєн аґорестар шорос-шоростар те пісінен тукє, драго Теофіл, гой ту те джянес ода сікавібе, саво ту хундял, ода гін чачібе.

Андро одала дівеса, кана есас о Ірод краліс андре Іудєя, джівелас єкг рашай про нав Захарія. Ов есас ле Авіоскєре рашаєндар. А лескєрі ромні есас ле Аароноскєре файтостар, нав лакє есас Єлізавета. Оне дувджяне санас чачібнаскєре анґлал о Дейл, і іґєн фес долікєренас саворе заповіді Раєскєре, і джівенас пал Лескєро лав. Кє ленде на есас чаве: Єлізавета наший ачіля пгарі, і дувджяненґє есас іма бут берша.
Єкгвар, кана есас овра те совґалінен ле Захаріяскєре рашаєнґє, ов совґалінелас анґлал о Дейл. Пал пескєро обичай, рашая чіде жрєбій, і Захарія маїндя те заджян андро Раєскєро храмос те тгувінен сагошно тгув. І акор, сар тгувінелас о сагошно тгув ле Девлескє, саворо нийпос модлінеласпес аврунестар. А сікадяпес лескє анґєлос Раєскєро, і тердьолас пре чачі сийра ле алтаріскє кай тгувісальолас. Сар лес дикгля о Захарія, чудаліндяпес і іґєн даранділя. Та о анґєлос лескє пгендя:
— На дара, Захарія, бо тийрі молітва шунді, а те тийрі ромні Єлізавета ловтярела тукє ле час, і ту дега лескє о нав Іоанн. І ейла тут барі бахт те радишаґос. І бутджяне радисальона, сар ов увльола, бо ов ейла баро анґлал о Рай. І на пієла е мол, ані нісаво матяркєрдо піїбе. А іма андрал о пгер пескєра дакєро ейла пгердо ле Свентне Духога. А бутджянен ле Ізраєльоскєре нийпостар вісарела ко ленґєро Рай, о Дейл. Ов джяла анґлал Лесте андро духос те андре зор Іліяскєрі, гой те вісарен о їле даденґєре ко чаве, а кадален, саве на шунен, — ґодяверіпе ле чачібнаскєре манушен, те кійсітинен о нийпос кє оди оврі, сар авела о Рай.
Та о Захарія пгендя ле анґєлоскє:
— Пал состе ме ода прінджярава? Бо ме іма сом пгуро, і мійрі ромні іма андро берша.
Акор лескє о анґєлос отпгендя:
— Ме сом анґєлос Гавріїл, ода, саво тердьол анґлал о Дейл. І ме бічадо важ ода, гой те вакєрав туга, і те пгенав тукє када Радишаґоскєро Гійрос. А канакє ту ейга нємо, і на ейга гонно те вакєрен джі кє ода дівес, адик ода ейла, важ ода, кай ту на патянлял мійре лавенґє, саве обаченапес андре пескєрі овра.
А о нийпос ужарелас ле Захаріяс і чудалінеласпес, соске ов авка буталік залікєрдяпес андро храмос. Та сар авля аврі, на бійріндя кє ленде те превакєрен. І оне ахаліле, со ов дикгля знаменіє андро храмос. Ов сікавелас ленґє ле вастенца, бо ачелас нємо.
А сар преґейле лескєре дівеса те совґалінен, Захарія отґейля андро пескєро кгєр. Пал одала дівеса лескєрі ромні Єлізавета ачіля пгарі, і панч чон на сікавеласпес ле манушенґє, і пгенелас:
— Авка манґє кєрдя о Рай, сар закамля те лен мандар е ладж анґлал о мануша!

Про шовто чон есас бічадо анґєлос про нав Гавріїл ле Девлестар андро галілєйсько фоврос, со вічінелпес Назарет, кє чай Марія. Ой есас манґаді ле ромескє про нав Йосип, саво есас андало родос ле Давідоскєро. І сар заавля анґєлос кє лате, пгендя лакє:
— Бахт тукє, ту хундял благіпе! О Рай туга!
А ой чудаліндяпес лескєре лавенґє, і думінелас, со шай обозначінел ода палікєрібен. І акор анґєлос лакє пгендя:
— На дара, Марія, бо о Дейл сікадя кє туте благіпе!
А канакє ту ачега пгарі, і ловтярега ле Час, і дега лескє нав Ісус. Ов ейла баро, і Лес вічінкєрена о Ча Майопрунескєро. І дела Лескє о Рай о Дейл о тронос лескєре дадескєро Давідоскєро. І кралінела про саворо родос ле Яковскєро міндик, і Лескєре краліпнаскє на ейла ніґда аґор.
А Марія пгендя ле анґєлоскє:
— Сар ме шай авав пгарі, те ме минґ ромес на джянав?
А анґєлос лакє отпгендя:
— О Свентно Духос авела пре туте, е зор Майопрунескєрес учарела тут андре. Важ ода те чаворо, со тутар увльола, ейла Свентно, і вічінена Лес о Ча ле Девлескєро.
Дикг, акєс, тийре файтостар Єлізавета. Пре лате пгенен, со ой наший ловтярел, а ой іма гіні шовто чон пгарі, і ой гіні андро берша. Бо пріґ о Дейл нане нісаво лав айсо, саво Ов те на бійріндялас те кєрен.
І акор отпгендя Марія:
— Ме сом ле Раєскєрі совґалкіня, мі ачелпес манґє пал тийро лав.
І акор анґєлос латар отґейля.

Андре одала дівеса е Марія скіндяпес і ґейля сіґ андро фоврос, саво есас машкар Іудєякєре брегі. Заавля андро кгєр ко Захарія і палікєрдя ле Єлізаветакє. Сар шундя е Єлізавета о палікєрібен ле Маріякєро, закгелдя андре лате о чаворо, і Єлізавета есас пгердярді Свентне Духога, і пгендя зорале ганґога:
— Ту сал бахталі машкар саворе ромня, і бахтало ода Чаворо, со гіно андре туте! Ко ме сом айсі, со мійре Раєскєрі дай авля кє манде? Сар ме шундьом тийро палікєрібен, радишаґога закгелдя о чаворо андро мійро пгер! Бахталі ту сал, бо патянлял, і ачелапес тукє ода, со пгендя о Рай!
Марія отпгендя:
— Мійрі вовді барарел ле Раєс,
а мійро духос радисальол важо Дейл,
Саво ратинел ман,
бо дикгля пре Пескєрі цікні совґалкіня.
А канакєстар ман саворо родос вічінела бахталі,
Майзораледер кєрдя манґє баро!
І Лескєро нав свентно!
Девлескєро лачіпе сікавелпес про саворе роди,
про одала, со Лестар пес даран.
Лескєре вастега кєрде баре бувтя:
Ов розтранля баріканен, кай тговенаспес аврі андро пескєро їло,
ле зорален чідя тейле пал ленґєро тронос,
а ваздня чоре манушен.
Ле бокгален чалярдя лачіпнага,
а ле барвален бічадя нісога,
лепердя о лав, саво диня амаре даденґє,
ле Авраамоскє і лескєре чавенґє,
гой мієл міндик лачоїлескєро про векі,
і поможіндя ле Ізраєльоскє, Пескєре совґаскє.
Марія ачіля ле Єлізаветага варекай трін чон, а паліш вісаліля кгєйре кє песте.

Кана Єлізаветакє авля овра те ловтярен, і ой ловтярдя ле час. Сар доджянле лакєре сомсійди те о файтос, со о Рай сікадя лакє Пескєро лачіпе, радисальонас лага. Про охтото дівес ґейле те обчінен ле чаворес, і камле лескє те ден о нав пало лескєро дад, Захарія. Та лескєрі дай Єлізавета пгендя:
— Наа, лескєро нав ейла Іоанн.
Акор лакє отпгенде:
— Ніко нане андре тийро файтос, кас увлягас айсо нав!
І оне кєздинде те сікавен, і пгученас ле вастенца ле дадес, саво нав ов камел те ден ле часкє. Ов пескє манґля дескіца і пісіндя пре лате: «Лескєро нав Іоанн». І саворе чудаліненаспес.
І єкгваресте кє лесте вісаліля вакєрібе, і ов кєздиндя те вакєрен і те ашарен ле Девлес. Акор саворен обхундя е дар, со паж ленде джівенас. А пало цейлі партоскєрі Іудєйсько пгув есас лав пало ода. Саворе, ко ода шунде, думіненас андро пескєро їло:
— Ко ейла када чаворо?
А ле Раєскєро васт есас пре лесте.

Захарія, о дад ле Іоанноскєро, пгердісаліля ле Свентне Духога і пророкінелас авка:
— Ашардо Рай, о Дейл ле Ізраєльоскєро,
саво авля те дикгєн Пескєро нийпос і ціндя лен аврі.
Андал родос Давідоскєро, Пескєре совґас,
Ов бічадя аменґє зоралес, саво анела аменґє ратипе,
авка, сар Ов іма чірлатунестар вакєрелас
пріґ свентне пророка.
Ов ратинела амен ле амаре врагендар,
те андало васта саворен, ко амен мержінел.
Ов сікадя о лачіпе амаре даденґє,
і на забістердя Пескєро свентно заветос,
кошкєрібен, саво Ов диня амаре дадескє
ле Авраамоскє,
те ратинен амен андало васта врагенґєре,
гой те совґалінен Лескє бі е дар,
і те авас анґлал Лесте чачібнаскєре і свентне
саворо амаро джівіпе.
А ту, чаворея, ейга вічіме пророкос Майопрунескєро,
бо джяга анґлал о Рай,
гой Лескє те кійсітинен о дром,
гой те ден Лескєре нийпоскє те джянен,
со Ов одмукєла ленґє о бійні і ратинела лен.
Амаро Дейл гіно іґєн лачоїлескєро,
Ов бічавела аменґє Тосарутно Шветлос пало нєбос.
гой мі ачел шветлос одаленґє, ко бешел андре цма те андре дар мерібнаскєрі,
гой те анен амен про дром, саво анел ко мірос.
Чаворо баролас і зоральолас духога. Ов джівелас андре пустиня джі кє ода дівес, адик на сікадяпес Ізраєльоскєре нийпоскє.

Dengar Лукастар 1