Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወእምድኅረ ስሱ መዋዕል ነሥኦሙ እግዚእ ኢየሱስ ለጴጥሮስ ወለያዕቆብ ወለዮሐንስ እኁሁ ወአዕረጎሙ ደብረ ነዋኀ እንተ ባሕቲቶሙ። ወተወለጠ ራእዩ በቅድሜሆሙ ወአብርሀ ገጹ ከመ ፀሐይ ወአልባሲሁኒ ኮነ ጸዐዳ ከመ በረድ። ወናሁ አስተርአይዎሙ ሙሴ ወኤልያስ እንዘ ይትናገሩ ምስሌሁ። ወአውሥአ ጴጥሮስ ወይቤሎ ለእግዚእ ኢየሱስ እግዚኦ ሠናይ ውእቱ ለነ ሀልዎ ዝየ ወእመሰ ትፈቅድ ንግበር በዝየ ሠለስተ ማኅደረ አሐደ ለከ ወአሐደ ለሙሴ ወአሐደ ለኤልያስ። ወእንዘ ዘንተ ይትናገሩ ናሁ ደመና ብሩህ ጸለሎሙ ወናሁ መጽአ ቃል እምውስተ ደመና ዘይብል ዝንቱ ውእቱ ወልድየ ዘአፈቅር ዘቦቱ ሠመርኩ ወሎቱ ስምዕዎ። ወሰሚዖሙ አርዳኢሁ ደንገፁ ወፈርሁ ጥቀ ወወድቁ በገጾሙ ዲበ ምድር። ወቀርበ እግዚእ ኢየሱስ ወለከፎሙ ወይቤሎሙ ተንሥኡ ወኢትፍርሁ። ወአንሥኡ አዕይንቲሆሙ ወአልቦ ዘርእዩ ወኢመነሂ ዘእንበለ እግዚእ ኢየሱስ ባሕቲቱ። ወእንዘ ይወርዱ እምደብር አዘዞሙ እግዚእ ኢየሱስ እንዘ ይብል ኢትንግሩ ወኢለመኑሂ ዘርኢክሙ እስከ አመ ወልደ ዕጓለ እመሕያው እሙታን ይትነሣእ። ወተስእልዎ አርዳኢሁ እንዘ ይብሉ እፎ ይብሉ ጸሐፍት ኤልያስ ሀለዎ ይምጻእ ቅድመ። ወአውሥአ እግዚእ ኢየሱስ ወይቤሎሙ እወ ኤልያስ ይቀድም መጺአ ወያስተራትዕ ኵሎ። ወባሕቱ እብለክሙ ከመ ኤልያስ ወድአ መጽአ ወኢያእመርዎ ወባሕቱ ገብሩ ላዕሌሁ ኵሎ ዘከመ ፈቀዱ ወከማሁ ለወልደ ዕጓለ እመሕያውኒ ሀለዎ ይሕምም እምኔሆሙ። ወእምዝ አእመሩ አርዳኢሁ ከመ በእንተ ዮሐንስ መጥምቅ ይቤሎሙ።

ወበጺሖ ኀበ ሕዝብ ቀርበ ኀቤሁ ብእሲ ወሰገደ ሎቱ እንዘ ይትመሐለል ወይብል፤ እግዚኦ ተሣሀል ሊተ ወልድየ እስመ እኩይ ጋኔን አኀዞ ወያንገረግሮ ወበአርእስተ አውራኀ ይሣቅዮ ወመብዝኅቶሰ ያወድቆ ውስተ እሳት ወቦ አመ ያወድቆ ውስተ ማይ። ወአምጻእክዎ ኀበ አርዳኢከ ወስእኑ ፈውሶቶ። ወእምዝ አውሥአ እግዚእ ኢየሱስ ወይቤ ኦ ትውልድ ኢአማኒት ወዕሉት እስከ ማእዜኑ እሄሉ ምስሌክሙ ወእስከ ማእዜኑ እትዔገሠክሙ አምጽእዎ ሊተ ዝየ። ወገሠጾ እግዚእ ኢየሱስ ወወፅአ ጋኔኑ እምላዕሌሁ ወሐይወ ወልዱ በይእቲ ሰዓት። ወእምዝ ቀሪቦሙ አርዳኢሁ እንተ ባሕቲቶሙ ይቤልዎ ለእግዚእ ኢየሱስ በእንተ ምንት ንሕነ ስእነ አውፅኦቶ። ወይቤሎሙ እግዚእ ኢየሱስ በእንተ ሕጸጸ ሃይማኖትክሙ አማን እብለክሙ እመ ብክሙ ሃይማኖት መጠነ ኅጠተ ሰናፔ ወትብልዎ ለዝ ደብር ፍልስ እምዝየ ኀበ ከሃ ወይፈልስ ወአልቦ ዘይሰአነክሙ። ወዝንቱ ዘመድ ኢይወፅእ ዘእንበለ በጾም ወበጸሎት። ወእንዘ ያንሶስዉ ውስተ ገሊላ ይቤሎሙ እግዚእ ኢየሱስ ሀለዎ ለወልደ ዕጓለ እመሕያው ያግብእዎ ውስተ እደ ሰብእ። ወይቀትልዎ ወአመ ሣልስት ዕለት ይትነሣእ ወተከዙ ጥቀ አርዳኢሁ ሰሚዖሙ ዘንተ።

ወበጺሖ ቅፍርናሆም መጽኡ እለ ጸባሕተ ዲናር ይነሥኡ ኀበ ጴጥሮስ ወይቤልዎ ሊቅክሙሰ ኢይሁብኑ ጸባሐተ። ወይቤ እወ ወበዊኦ ውስተ ቤት አቅደመ እግዚእ ኢየሱስ ብሂሎቶ ምንተ ትብል ስምዖን ነገሥተ ምድር እምኀበ መኑ ይነሥኡ ጸባሐተ ወጋዳ እምኀበ ውሉዶሙኑ ወሚመ እምኀበ ነኪር። ወይቤ እምኀበ ነኪር ወይቤሎ እግዚእ ኢየሱስ እንጋ ውሉዶሙሰኬ አግዓዝያንኑ እሙንቱ። ወባሕቱ ከመ ኢያንጐርጕሩ ሑር ውስተ ባሕር ወደይ መቃጥነ ወዘቀዳሚ አሥገርከ ዓሣ ንሣእ ወክሥት አፉሁ ወትረክብ ዲናረ ስጢጥራስ ዘውእቱ አርባዕቱ ድርህም ኪያሁ ንሣእ ወሀቦሙ ህየንቴየ ወህየንቴከ።

Dengar ወንጌል ዘማቴዎስ 17