Ayat Alkitab yang Popular daripada Paidáish 6

Kongsi

Tab ḲHUDáWAND zamín par insán ke paidá karne se malúl húá aur dil meṉ g̣am kiyá.

Aur ḲHUDáWAND ne dekhá ki zamín par insán kí badí bahut baṛh gayí, aur us ke dil ke tasawwur aur ḳhayál sadá bure hí hote haiṉ.

Magar Núh ḲHUDáWAND kí nazar meṉ maqbúl húá.

Núh ká nasabnáma yih hai: Núh mard i rástbáz aur apne zamáne ke logoṉ meṉ be‘aib thá, aur Núh Ḳhudá ke sáth sáth chaltá rahá.

Aur ḲHUDáWAND ne kahá, ki Maiṉ insán ko, jise maiṉ ne paidá kiyá, rú e zamín par se miṭá ḍálúṉgá; insán se lekar haiwán aur reṉgnewále jándár aur hawá ke parandoṉ tak; kyúṉki maiṉ un ke banáne se malúl húṉ.

Jab rú e zamín par ádmí bahut baṛhne lage, aur un ke beṭiyáṉ paidá húíṉ, to Ḳhudá ke beṭoṉ ne ádmí kí beṭiyoṉ ko dekhá, ki wuh ḳhúbsúrat haiṉ; aur jin ko unhoṉ ne chuná un se biyáh kar liyá. Tab ḲHUDáWAND ne kahá, ki Merí rúh insán ke sáth hamesha muzáhamat na kartí rahegí, kyúṉki wuh bhí to bashar hai; taubhí us kí ‘umr ek sau bís baras kí hogí. Un dinoṉ meṉ zamín par jabbár the; aur ba‘d meṉ jab Ḳhudá ke beṭe ádmí kí beṭiyoṉ ke pás gaye, to un ke liye un se aulád húí. Yihí qadím zamáne ke súrmá haiṉ, jo baṛe námwar húe haiṉ.

Aur Núh ne yúṉ hí kiyá; jaisá Ḳhudá ne use hukm diyá thá, waisá hí ‘amal kiyá.

Aur Ḳhudá ne Núh se kahá, ki Tamám bashar ká ḳhátima mere sámne á pahuṉchá hai; kyúṉki un ke sabab se zamín zulm se bhar gayí; so dekh, maiṉ zamín samet un ko halák karúṉgá.

Tú gophar kí lakṛí kí ek kishtí apne liye baná; us kishtí meṉ koṭhriyáṉ taiyár karná, aur us ke andar aur báhar rál lagáná.

Aur Ḳhudá ne zamín par nazar kí, aur dekhá, ki wuh nárást ho gayí hai; kyúṉki har bashar ne zamín par apná taríqa bigáṛ liyá thá.

Aur jánwaroṉ kí har qism meṉ se do do apne sáth kishtí meṉ le lená, ki wuh tere sáth jíte bacheṉ; wuh nar o máda hoṉ.