Ayat Alkitab yang Popular daripada Matyu 5

Kongsi

Ma a̱nia wa, á̱ mbyia̱ a̱tyu a̱ na tyia̱ long fi̱tila a̱ sii kyiak kham a̱ nkup hu a̱ni bah. Da̱ a̱kwonu a̱kya, á̱ ni̱ sak hu da̱ a̱tyii wa, ku ka sai konyan mali ka. “Ma a̱nia wa, nyi yok sai a̱tsotswat swat nyin hu ku ghwut kpa̱sai konyan a̱ lii, da̱nian konyan a̱ ka dyep A̱tyia̱ nyin wu a̱ shya̱ tswazwa ka a̱ni.

“Nyin bya yet sai hu mi̱ swanta hu. Ma̱nang a̱keang ka̱ shya̱ tazwa a̱fan a̱ni, á̱ si̱ mi̱n niat sai nka hu bah.

A̱gwaza tyei a̱li̱ba̱rka da̱ á̱niet, ba̱ byia̱ a̱za̱za̱rak nfwuo a̱ni. Mat ba̱ na li A̱gwaza.

A̱gwaza tyei a̱li̱ba̱rka da̱ á̱niet ba̱ fwuong zong ma̱ng mashyi a̱ni, mat ba̱ nyia̱ tsotswat nang A̱gwaza nchat a̱ni. Mat A̱gwaza na tyia̱ mba ba̱ shya̱ nkyang nang ba̱ chat a̱ni, ba̱ swa̱i.

A̱wot n bu mbeang shei nyin hu. Nyi chat á̱niet ba̱ lak li nyin a̱ni! Nyi bu naai A̱gwaza da̱nian á̱niet ba̱ ya̱shuk nyin a̱ni!

“A̱gwaza tyei a̱li̱ba̱rka da̱ á̱niet, ba̱ li lat mba hu da̱ a̱vwuo nggu a̱ni. Mat ba̱ yet mman Tyok Ma A̱gwaza tswazwa nia.

A̱gwaza tyei a̱li̱ba̱rka da̱ á̱niet, ba̱ tyei swat nyinyang a̱ni. Mat á̱ na yei mba mman A̱gwaza.

A̱gwaza tyei a̱li̱ba̱rka da̱ á̱niet, ba̱ shya̱ ma̱ng byian fwuo mat a̱ka̱tuk nyia̱ mba wu a̱ni. Mat á̱ na shyim mba nfwuo na.

A̱gwaza tyei a̱li̱ba̱rka da̱ á̱niet nang á̱ ya̱shuk mat yet tsotswat mba hu a̱ni. Mat ba̱ yet mman Tyok Ma A̱gwaza tswazwa nia.

A̱gwaza tyei a̱li̱ba̱rka da̱ á̱niet ba̱ fwuong kunak á̱ghyang á̱niet a̱ni. Mat mba meang, á̱ na fa̱k kunak ba.

“A̱gwaza tyei nyin a̱li̱ba̱rka ka̱nang á̱niet lyiat nyin lihyat, ba̱ si̱ bu ya̱shuk nyin, a̱wot ba̱ si̱ bwoi a̱ka̱laa á̱ tyei nyin, ba̱ si̱ bu tyam nyin ma̱ng kuzang tangka̱i a̱ka̱tuk a̱lyiat, mat nang nyi ngyet á̱niet khwi nung bya a̱ni. “Nyi fa̱k a̱lyia̱ a̱sai di̱ si̱ a̱hwa! Nyi gwai ba̱t! Mat nyi shya̱ ma̱ng a̱gba̱ndang zang a̱ fwuong nyin Ma A̱gwaza tswazwa a̱ni. A̱wot nyi jhyung nang ma a̱nia wa á̱ ku nya̱shuk a̱yaata̱m a̱kwonu A̱gwaza ba gbangbang.

A̱gwaza tyei a̱li̱ba̱rka da̱ á̱niet ba̱ ghyuai á̱pyia̱ mba a̱ni. Mat ba̱ na ya gado a̱byin hu.

“Nyin bya yet nfak na mi̱ swanta hu. A̱wot ki̱ nfak na tyak ta̱m nna hu, zang ta̱m hwa na̱ bu na nyia̱? Á̱ na weam nfak na, a̱wot á̱ shai na ma̱ng a̱ti̱tak nang a̱buk kyang a̱ni.

Mat a̱nia, ku yet ta hwa nyi yet á̱tsatsak á̱niet, ma̱nang A̱tyia̱ nyin wu a̱ shya̱ tswazwa ka ngyet a̱tsatsak a̱ni.”

Da̱ a̱kwonu a̱kya, nyi yok a̱lyiat nyin na na̱ yet a̱fang. Ka̱ nyi shim na nyia̱ kyang, nyi tyia̱ ‘Ii.’ Ka̱ nyi shim bah, nyi tyia̱ ‘Kaai.’ A̱wot ka̱ nyi shyi shyishyi ji̱ swak a̱nia a̱ni, ji̱ neet da̱ a̱vwuo A̱ta̱nyeang kya.

“Nyi ka̱n fa̱k á̱ tyiet nyin mi̱ doka ji nyia̱, ‘Ku yet ta hwa, ka̱ a̱yin ti̱n ang tswa a̱li jhyung, ma a̱nia wa á̱ na nti̱n si̱ nggu jhyung. Ka̱ a̱ ma nti̱n ang a̱nyung a̱nyiung kya, ma a̱nia wa á̱ na nti̱n a̱si̱ nggu a̱nyiung.’ A̱wot n bu mbeang shei nyin hu. Nyi yok nyia̱ na̱nvan nyi tan a̱ka̱tuk ma̱ng a̱ka̱tuk da̱ a̱tyu a̱ nyia̱ nyin a̱ka̱tuk a̱ni bah! Ka̱ a̱yin lwi ang di̱ lihyat di̱ kpang bwak yak ang hu, a bu bwuak kpang bwak myian hu, gu lwii.

Mat a̱nia, ku nang a̱tan tswa a̱li a̱zayak ang wa na tyia̱ a fa̱k di̱dang nyia̱ a̱ka̱tuk, ti̱n ji ji̱i̱p. Ku na lan a lyin kap nyiung mi̱ vam ang hu, nang á̱ na nta a̱jhyem vam wu ma̱ a̱nga̱ngak ndong sang sangba̱p a̱ni. Ma a̱nia wa, ku nang a̱tan bwak yak ang wa na tyia̱ ang a nyia̱ a̱ka̱tuk, tyat hu ji̱i̱p! Ku na lan a lyin kap nyiung mi̱ vam ang hu nang á̱ na ntyia̱ a̱jhyem vam ang wu ma̱ a̱nga̱ngak ndong sang sangba̱p a̱ni.