Ayat Alkitab yang Popular daripada 1 Korin 15

Kongsi

Na agrama abarama, ene dena muduna suna meglkwa i, nono kaima ogono nagino kor idre, aimadi kamin kor moramga pre ene adigl gigledi moglsre, kinano suo gudukrio. Te, ene Yagl Kade kogonmo erikwa i, ere yoko edumnedi prikrio! Ene ye kogonmo erikwa i, Yagl Kade kan moglsre, topo wakai okuo norabedi pre mogl, ye kogonmo gigledi ere pai molo!

Yegl paugwa ba nono God di wakai yei tenamga paugwa. I siragl pre nono Yaglno Kade Jisas Krais kogon erumara i mina God ye nono aimadi kamin kor moraiglmedi norsre, geglkwa mabuno nono ta si atne edekrabedi ere noro kodugwa.

Yoba ene bakagl tedre, Goglsre, adigl u kor ta pikramne dinaiglkwa i, ene prikrio. Yoba ka kide yegl didre, mabuno kide erikwa i bogl, ene si dakagl meglbi, ene nomano ama u kide enan, ene mabuno wakai ta boglkre, mabuno kide ama boraiglkwa.

Na yegl moglka ba God na yoko kaima ere wakai ere narsre, na Jisas dedugwa yoba ta moratnedi kogon narukwa. Ye kogon yegl naruko, erika i, u yoko pikrukwa. Jisas dedugwa yoba tau meglkwa i, kogon podo erikwa ba God na kogon naruko, na kogon podo kide kaima erika pre diga. Na diga i, na nana yobuglna mina kogon podo erika pre dikrika ba God yene na moglmara yoko kaima ere wakai ere nare moglko, na kogon podo ere moglka i pre diga.

Te, God kamo bage ta ama yegl dugwa, Geglkwa mem yo, no si atne edinatnga yobugln aglo pame? Doga kade yo, no giugl noratnga aglo pame? dugwa. Geglkwa mabuno erme yobuglo ersre, nono si atne edugwa i, tadaglme erumga pre geglkwa no si atne edugwa. Te, tadaglme mabuno yobuglo ere norukwa i, God lomo prumga ba duglo boramga kuno erekrukwa pre yobuglo ere norukwa.

Yegl paugwa ba ene prio! God kamo ta okna teke paugwa ba erme di norukwa i, ene di tebo, praiglkwa. Nono Jisas yobama ta munga i, mudu ta goglkramga. Tau goraiglkwa ba tau yoko meglbi, Jisas ede ikne unabuka. Ye ede ikne unabuka igne i biugel podo ta boran, yoba gumuglno kubugl kai simere yegl, nono ogono nagino tabre kaima u kor enabuka. Jisas yobama ta gogl kodigwa i adigl u kor pidre, ogono nagino kor aimadi kamin panabuka i ibi, te tau goglkre, yoko moraiglkwa i ama ogono nagino kor kuno yegl inaiglkwa.

Yagl Adam swara tadaglme ersre, geglkwa mabuno i nogugl edumere mere yegl, Krais swara nono adigl u kor enamga mabuno i, i nogugl edugwa. Nono yoba mudu Adam gawama munga pre goramga keme paugwa ba nono ta Krais yugobunomo mina suna umga i, okuo adigl u kor enamga.

I siragl pre nono makandigle ogono nagino erme pai, bugl kide erabuka i, ta pai moglkrabuka paugwa. God nono ogono nagino ere i, heven ogono nagino edenan, ogono nagino kor i, aimadi kamin pai moglsre, kide ta erekrabuka.

Komno kana Krais yene king morabuka paugwa. Ye king mogl, kudamo ikne mudu si atne ede kodidre, kuda ikne swara ta okuo kaima si dudunabuka i, geglkwa mem i, si dudu kodinabuka. Yegl ersre, okuo taragl mudu i pi God Nem tenabuka.