Lükɛ̀n 20
20
Tɛyri de Zhezü kɔrɛ̀levri lɔ ndù kɛ và nɛ́n?
(Nyɛ́n nyan Matie 21:23-27; mán Markɛ̀n 11:27-33 wrú lɔ mɛ̀n)
1Ɛnbɩ̀ tɔ̀n Zhezü ke yé fɛcüè ankà, Ɔwɔ-cice-wɔn lɔ mɛ̀n, kɩ kɛ dɔ́ yɔ Ɛmɛẅi ankà Ankrànkràn lɔ. Ɔwɔ-cice-bɔ̀, mán ɛnyanmàn-gbànvri-ankà-yé-bɔ̀ srɔ, yɔ mán ɛcüìcüì-bɔ̀ mɛhi 2kɩ ke yrɛ nɛ̀n le: “Ɛ dɔ́ bɔ̀, ɛkɔrɛ̀levri léyi ɛ ẅɛ̀n hɩ ɛ hán ɛci hɔ̀n lɔ nɔn, antɔn tán mɛ́n ɛkɔrɛ̀levri ɛ̀ hán ɛci hɔ̀n lɔa?” 3Zhezü mrɛ́n yɔ ɔmùan le: “Mɛ̀n mán me le yrɛ nyɛ̀n ankà. Nyɛ́n dɔ́ mɛ̀n: 4antɔn wá Zhan ɔkɔhɔ̀n kɛ̀ wá ɛnshi ɛnkru, Ɔwɔ kale anwrɔnẅìɛ?” 5Kɩ yɔ bukru yɔ wrɔ́n ecüì, yɔ dɔ́ y'edomɛ̀n le: “Ke dú kɛ bɔ́ mrɛ́n ɔmùan le: ‘Ɔwɔ de wá nɛ̀n ɔkɔhɔ̀n nɔn’, ne le yrɛ bɔ̀ le: ‘Cɛci kruhú kɛ nyɛ́n sɩ́ bú Zhan ankà nyɛ́n tàn ankàẅìɛ?’ 6Tɛ́n ke dú kɛ bɔ́ dɔ̀ le: ‘Anwrɔnẅì de wá nɛ̀n ɔkɔhɔ̀n nɔn hô,’ fɛcüè lɔ fɛn kɛ lɛ srɔan bɔ̀ ɛbù kè wri bɔ̀, ɔmuhi fɛcüè nyri ɔmu le, Zhan dú Ɔwɔ-mùanwú-ankà-dɔ́ wrɔn tɔ̀n nɔn.” 7Zɛtɛn yɔ mrɛ́n nɛ̀n ɔmuàn le: “Bɔ̀ sɩ̀ nyrì ɔwrɔn léyi wá nɛ̀n ɔkɔhɔ̀n nɛ̀n wá ɛnshi ɛnkru nɔn.” 8Zɛtɛn Zhezü kɛ dɔ̀ le: “Kɛ zrɔ, mɛ̀n mán, mɛ́n sɩ̀ dɔ́ nyɛ̀n, ɛkɔrɛlevri léyi mɛ́n ẅɛ̀n hɩ mɛ hán ɛci hɔ̀n lɔ nɔn.”
Ankɛ̀tɛ̀-kɔhɔ̀n-hán-bɔ̀ gbangbàn nyandrɛn mɛ̀n ankà-dɔ̀
(Nyɛ́n nyan Matie 21:33-46; mán Markɛ̀n 12:1-12 wrú lɔ mɛ̀n)
9Zɛtɛn, Zhezü bukru kɛ dɔ́ fɛcüè nyandrɛn ndɔ lɔ mɛ̀n ankà: “Ɔwrɔn tɔ̀n srɛ anzhà-kɛ̀tɛ̀ kɩ bɩ́ ɛkɛ̀tɛ̀ lɔ wá ɛkɛ̀tɛ̀-kɔhɔ̀n-hán-bɔ̀ antamɛ̀n, kɩ nan hɔ́n nɛ̀nnyanmàn esùshe. 10Ɛnvra léyi krɔn anzhà-küɛ nɔn, nɛ̀n wá n'eci-bɩtan-wrɔn tɔ̀n ɔkɔhɔ̀n, kɛ̀ hɔ̀n ke bɩ́ nɛ tɛn ɛci ɛkɛ̀tɛ̀-kɔhɔ̀n-hán-bɔ̀ yri. Tɛ́n ɛkɛ̀tɛ̀-kɔhɔ̀n-hán-bɔ̀ lɔ, kɔ́n eci-bɩ̀tan-wrɔn lɔ ejì, wrɔ́ nɛ̀n, kè sɩ̀ tàn nɛ̀n eci zriɛmɛ́n. 11Ɛkɛ̀tɛ̀-nɛ́n-zi, vru wá eci-bɩ̀tan-wrɔn tɔ̀n ɔkɔhɔ̀n, tɛ́n nɛ́n mán yɔ gorɛ nɛ̀n, yɔ wora nɛ̀n, yɔ hán nɛ̀n nɛ́n hɔ̀n, ye sɩ̀ tàn nɛ̀n eci zriɛmɛ́n. 12Nɛ̀n vru nɛ̀n wá anhɔnmɛ̀n ci-bɩtan-wrɔn ɔkɔhɔ̀n; ɔwrɔn ndɔ lɔ, yɔ wri nɛ̀n eci edú kɩ yɔ kɔ́n nɛ̀n die ɛntrɛa. 13Ɛkɛ̀tɛ̀-nɛ́n-zi, zɛtɛn kɛ dɔ̀ le: ‘Ecitan de mɛ lɛ hán nɛ́n? Mɛ lɛ hán, m'ɛcüɛ́n-ẅì zri lɔ kɛ̀ hɔ̀n; me bútan le nɛ tɛn, yɔ lɛ ẅɛn n'ɛwá.’ 14Tɛ́n ɛnvra léyi ɛkɛ̀tɛ̀-kɔhɔ̀n-hán-bɔ̀ kán nɛ̀n nɔn, yɔ dɔ́ y'edomɛ̀n le: ‘Nyàn ɔwrɔn léyi kɛ lɛ srɔ ɛkɛ̀tɛ̀-nɛ́n-zi ɛnbì tɔ̀n nɔn. Bɔ́ wri nɛ̀n, ô ɛkɛ̀tɛ̀ lɔ kɛ̀ srɔ bɔ́ tɛn.’ 15Kɩ yɔ kɔ́n nɛ̀n die ɛkɛ̀tɛ̀ mɛẅi, ki yɔ wri nɛ̀n.”
Zɛtɛn Zhezü ke yrɛ le: “Ecitan de ɛkɛ̀tɛ̀-nɛ́n-zi kɛ lɛ hán yɔ nɛ́n? 16Ɛkɛ̀tɛ̀-nɛ́n-zi kɛ lɛ và, ne le wri ɔkɔhɔ̀n-hán-bɔ̀ lɔ, kɩ ne le bɩ́ ɛkɛ̀tɛ̀ lɔ nɛ̀n wá anwrɔn nyantɛn antamɛ̀n.” Ɛnvra léyi anwrɔn yá ankà ndɔ lɔ nɔn, yɔ dɔ̀ le: “Eci ndɔ lɔ ke sɩ̀ hán rɔ́!” 17Tɛ́n Zhezü nyan yɔ kɩ kɛ dɔ̀ le: “Ɔwrú Prɔnprɔn ankà-dɔ̀ ndɔ lɔ, n'ɛmɛ̀n dú tɛtán:
‘Obù léyi anwɔn-ku-bɔ̀ teze nɔn,
hɩ de srɔ ɔwɔn-kavà mɛ̀n bù nɛ́n’?
18Ɔwrɔn totɔtɔ̀n léyi ke le bore obù ndɔ lɔ ɛwú nɔn, obù lɔ kɛ lɛ boyɛ nɛ̀n wá; kɩ ke dú kɛ obù lɔ ke bru ɔwrɔn tɔ̀n ɛwú hô, obù lɔ kɛ lɛ zhɛ nɛ̀n kɛ lɛ hán ɛnhi-wɔ̀n hɔ́.”
Ɔwɔɛ̀n léyi ye dí govran nɔn
(Nyɛ́n nyan Matie 22:15-22; mán Markɛ̀n 12:13-17 wrú lɔ mɛ̀n)
19Ɛnyanmàn-gbànvri-ankà-yé-bɔ̀ mán Ɔwɔ-cice-bɔ̀ cüìcüì ke ji ɛyri ô kɛ̀ ẅɛn Zhezü ɛnvra zri lɔ mɛ̀n, ɔmuhi yɔ nyri ɔmu le y'ɛkruhú de nɛ̀n dɔ́ ankà gbàngbàn nyandrɛn mɛ̀n nɔn; tɛ́n yɔ ẅɛn fɛcüè sù. 20Zɛtɛn, yɔ bukru yɔ nán Zhezü. Hɩ le kruhú de, yɔ hán ɛfrɛ́n-bɔ̀ hɔ́n cɔ́ nɛ̀n, ô kɛ̀ krɔn nɛ̀n antanwrɔn n'ankà-yrɛ mɛ̀n, mán n'ankà-dɔ́ mɛ̀n, ô yɔ cɔ́ ɛyri yɛ ẅɛn nɛ̀n yɛ tán ɛkɔrɛ̀levri-bɔ̀ mán govran. 21Kɩ, ye yrɛ nɛ̀n ankà ndɔ lɔ: “Ankà-yé-wrɔn, bɔ́ nyri ɔmu le, ankà léyi ɛ dɔ̀, hɩ e yé nɔn, dú ankàẅì; e sɩ́ ci ɔwrɔn zriɛmɛ́n anvɛ-wú-mrɛ̀n, kɩ e yé ankà annànwɔrɛ esùnàn léyi Ɔwɔ kɛ cüɛ̀n nɔn wú. 22Zɛtɛn, ɛ̀ dɔ́ bɔ̀, bɔ́ ɛnyanmàn lɔ kɛ wá tán le ye di govran-anmàn-wɔɛ̀n, ye dì kale ye bɩ́ diɛ?” 23Tɛ́n, Zhezü nyri yɔ ɛfrɛ́n-ankà lɔ, kɩ kɛ dɔ́ yɔ le: 24“Nyɛ́n yé mɛ̀n ɔkùa-ẅì lɔ ɔtɔ̀n. Picɛ mán ebɩ́ léyi ye merɛ́n ɔkùa lɔ ɛwú nɔn antɔnwrɔn tɛn hán?” Yɔ mrɛ́n nɛ̀n ɔmùan le: “Govran tɛn.” 25Zɛtɛn Zhezü kɛ dɔ́ yɔ le: “Nyɛ́n tán govran eci léyi dú nɛ tɛn, ô nyɛ́n tán Ɔwɔ mán eci léyi dú nɛ tɛn nɔn.” 26Yɔ sɩ̀ cɔ́ nɛ̀n ɛẅɛn-yri, ankà léyi nɛ̀n dɔ́ fɛcüè zìwú nɔn. Kɩ n'ankà-dɔ̀ lɔ dú anvɛmɛ̀n-frɛ́n-ankà tán yɔ, kɩ yɔ lɔ fɛn yɔ kɛ́n ɔmùan hɛ́n.
Owúemɛ̀n-dù-frɔ́-ankà-yrɛ tɔ̀n
(Nyɛ́n nyan Matie 22:23-33; mán Markɛ̀n 12:18-27 wrú lɔ mɛ̀n)
27Anwrɔn hɔ̀n léyi ke sɩ́ bú owuemɛ̀n-dù-frɔ́-ankà kɛ tán ankàẅì nɔn, vá Zhezü ɛtɛsɛ̀n. (Yɔ de yɛ dɔ̀ le owu-bɔ̀ ke sɩ̀ vru vá ɛkɔrɛ-bɔ̀ mɛ̀n.) 28Yɔ yrɛ nɛ̀n ankà kɩ yɔ dɔ̀ le: “Ankà-yé-wrɔn, Mohizì tán bɔ̀ ɛnyanmàn ndɔ léyi ye merɛ́n le: ‘Ke dú kɛ ɔwrɔn tɔ̀n yri ɛnnyɔnwrɔn, kɩ ẅɛn nɛ́n muan-ẅì, kɩ ne wù, nɛ̀n sɩ̀ bî ɛnẅì zriɛmɛ́n, ke ji le nɛ̀n muan-ẅì lɔ kè bɩ́ ɛngrɔn-hi lɔ ô kè bî ɛẅì kɛ̀ tán nɛ́n muan-ẅì léyi nwù nɔn.’ 29Zɛtɛn, anwrɔn-nɛ́n-muan-ẅì hɔ̀n ɔbɔɛ̀n de ndù nɔn. Kpàkpà tɛ́n lɔ yri ɛnnyɔnwrɔn, nwù ke sɩ̀ bî ɛnẅì. 30Anhyrɛmɛ̀n tɛn lɔ yrí ɛngrɔn-hi lɔ, 31anhɔnmɛ̀n tɛn mán. Eci zri lɔ de hán anwrɔn ɔbɔɛ̀n lɔ nɔn, yɔ lɔ fɛn yɔ wù, yɔ sɩ̀ bî ɛnẅì. 32Ɔtrɔmɛ̀n lɔ, ɛnnyɔnwrɔn lɔ mán nwù. 33Ɛnvra léyi owú-bɔ̀ kɛ lɛ frɔ́ nɔn, antɔn de ke le dú ɛnnyɔnwrɔn lɔ nɛ̀n cüì nɛ́n? Ɔmuhi yɔ anwrɔn ɔbɔɛ̀n lɔ yɔ dú nɛ́n cüì hɔ̀n nɔn!” 34Zhezü mrɛ́n yɔ ɔmùan le: “Wúcɔ̀ mán wúyɔ̀ hɔ̀n léyi dú ɛnhibù ndɔ lɔ wú nɔn, ke yrí y'edomɛ̀n; 35tɛ́n, wúcɔ̀ mán wúyɔ̀ hɔ̀n léyi Ɔwɔ mrɛ́n bɩ, ô kè vru kɛ vá ɔkɔrɛ mɛ̀n nɔn, ye sɩ̀ yri y'edomɛ̀n. 36Ye sɩ̀ vru wùɛ, ye dù yɔ hán Ɔwɔ-kùyüre-bɔ̀ hɔ́. Yɔ dú Ɔwɔ-ẅì hɔ̀n, ɔmuhi yɔ dú owúemɛ̀n yɔ frɔ́ nɔn. 37Mohizì dɔ́ kpetemɛ̀n le, owú-bɔ̀ kɛ lɛ frɔ́. Ɛyri léyi ankà-dɔ̀ kɛ dɔ́ ɛnhyà-gbú-ankà nɔn, Mohizì ke bi Ɛẅɛnwrɔn ‘Abrahamɛ̀n Wɔ, Izaakɛ̀n Wɔ, mán Zhakɔbɛ̀n Wɔ.’ 38Zhezü vru dɔ̀ le: Ɔwɔ dú ɔkɔrɛ-bɔ̀ Wɔ, kè sɩ̀ dù owú-bɔ̀ Wɔ; ɔmuhi yɔ lɔ fɛn, yɔ kɔrɛ̀ yɔ dú nɛ tɛ́n nɔn.” 39Ɛnyanmàn-gbànvri-ankà-yé-bɔ̀ janbɔ̀ bɩ́ ankà-dɔ̀ kɩ kɛ dɔ̀ le: “Ɛ̀ dɔ́ ankà zrɔ, ankà-yé-wrɔn.” 40Ɔmuhi, yɔ sɩ́ vru ji yrɛ nɛ̀n ankà nyàntɛn hɔ̀n nɔn.
Ebɩ̀die-wrɔn mán Davidɛ̀n
(Nyɛ́n nyan Matie 22:41-46; mán Markɛ̀n 12:35-37 wrú lɔ mɛ̀n)
41Zhezü kɛ dɔ́ yɔ: “Anhɔntan de yɛ lɛ hán yɛ dɔ̀ le Ebɩ̀die-wrɔn dú Davidɛ̀n mɛẅi wrɔn nɛ́n? 42Ɔmuhi Davidɛ̀n mumù kɛ dɔ́ Ɔwɔ-mrɛ́n wrú lɔ mɛ̀n le:
‘Ɛẅɛmwrɔn Ɔwɔ dɔ́ m'Ɛẅɛnwrɔn le:
Ɛ̀ và yɛ́ mɛ̀n ezì-kɔrɛ̀a hàn mán kɛ̀ cɔ́ ɛnvra léyi,
43me ji mɛ̀n hán v'egbri-bɔ̀
kɛ̀ srɔ v'ɛnan-hɛ́n-wú-ci nɔn.’
44Zɛtɛn Davidɛ̀n ke bi nɛ̀n ‘Ɛẅɛnwrɔn’: Anhɔntan de Ebɩ̀die-wrɔn mán ke le dú Davidɛ̀n mɛẅi wrɔn nɛ́n?”
Zhezü kɛ dɔ́ esùva-wá-ankà ɛnyanmàn-gbànvri-ankà-yé-bɔ̀ tɛsɛ̀n
(Nyɛ́n nyan Matie 23:1-36; mán Markɛ̀n 12:38-40 wrú lɔ mɛ̀n)
45Ɔmuhi fɛcüè lɔ fɛn ke die nɛ̀n nukùɛ nɔn, Zhezü kɛ dɔ́ n'ɛsɛnkɛn-bɔ̀ le: 46“Nyɛ́n wá ny'edomɛ̀n esùva ɛnyanmàn-gbànvri-ankà-yé-bɔ̀ tɛsɛ̀n, yɔ léyi ye beci ɛceci-she mɛ̀n, hɩ yɔ cüɛn ɔwá binyan ɛyri léyi anwrɔn kɛ bɔrɛkru nɔn; ɛyɛ́-yri anvrɛnvrɛn de yɔ ji ɛnvra léyi yɔ bru ɔwɔ-sɛ́n-wɔn mɛ̀n mán ɛci-zî yri vri. 47Yɔ bɩ́ ɛngrɔn-wúyɔ̀ hɔ̀n ɛci edomɛ̀n, kɩ yɔ hán ɛfrɛ́n Wɔ-sɛ̀n sheshe ô, yɔ yé le yɔ dú anwrɔn ankrànkràn. Yɔ lɛ cɔ́ ɛgbàn-wɔ̀ɛn-dì ke le sevri kɛ lɛ hán y'ɛgbàn hɔ̀n lɔ hɔ́.”
Terpilih Sekarang Ini:
Lükɛ̀n 20: ƐAA03
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.