Lükɛ̀n 22
22
Ɛcüìcüì-bɔ̀ ke ji Zhezü ɛyri
(Nyɛ́n nyan Matie 26:1-5; mán Markɛ̀n 14:1-2; mán Zhan 11:45-53 wrú lɔ mɛ̀n)
1Abùtùkumɛ́n-kɔ́ koran bì léyi ye bi Ɛẅɛnwrɔn-bemɛ̀n-cì nɔn nkɛ́n eburi. 2Ɔwɔ-cice-bɔ̀ cüìcüì mán ɛnyanmàn-gbànvri-anka-yé-bɔ̀ ke ji ɛyri ô kè di Zhezü owúemɛ̀n, tɛ́n ye sú fɛcüè.
Zhüda krɔn kpehɛ́n ô kɛ̀ ẅɛn Zhezü kɛ̀ tán ɛcüìcüì-bɔ̀
(Nyɛ́n nyan Matie 26:14-16; mán Markɛ̀n 14:10-11 wrú lɔ mɛ̀n)
3Zɛtɛn, anwa-wrɔn bru Zhüda léyi ye bi Iskariɔtɛ̀n nɔn ɛnbɔrɛ mɛ̀n, nɛ́n léyi nɛ̀n dú Zhezü sɛnkɛn-bɔ̀ lɔ ɔtɔn nɔn. 4Zhüda hɔ́n dɔ́ Ɔwɔ-cice-bɔ̀ cüìcüì hɔ̀n mán Ɔwɔ-cice-wɔn-nan-bɔ̀ wrɔn cüìcüì ankà, ô yɔ nyan ɔmu le nɛ lɛ hán ô nɛ̀n ẅɛn Zhezü nɛ̀n tán yɔ nɔn. 5Yɔ cüɛ̀n kɩ yɔ wá Zhüda ɔkùa ɔmùan. 6Zhüda shrì kɩ bukru ke jí ɛyri kɛ̀ ẅɛn Zhezü kɛ̀ tán yɔ, ô fɛcüè ke bɩ́ nyriɛn.
Zhezü hán yɔ yɛ gbrɛ́ Ɛẅɛnwrɔn-bemɛ̀n-cì-nyanmán-bì ci-zî
(Nyɛ́n nyan Matie 26:17-25; mán Markɛ̀n 14:12-21; mán Zhan 13:21-30 wrú lɔ mɛ̀n)
7Ɛnbì lɔ cɔ̀, hɩ vra léyi yɛ koran abùtùkumɛ́n-kɔ́-nyanmán-bì lɔ nɔn, hɩ ye wri kɔ̀kɔ̀sɛ̀-ẅì hɔ̀n, yɛ gbrɛ́ Ɛẅɛnwrɔn-bemɛ̀n-cì ci-zî nɔn. 8Zhezü wá Piɛrɛ̀n mán Zhan ɔkɔhɔ̀n, kɩ kɛ dɔ́ yɔ le: “Nyɛ́n hɔ̀n nyɛ́n gbrɛ́ bɔ́ Ɛẅɛnwrɔn-bemɛ̀n-cì koran ci-zî lɔ.” 9Yɔ yrɛ Zhezü le: “Tɛyri de e ji le bɔ̀ hɔ̀n gbrɛ́ ɛci lɔ nɛ́n?” 10Nɛ dɔ́ yɔ le: “Nyɛ́n die nukùɛ: Ɛnvra léyi nye le bru anmàn nɔn, nyɛ́n lɛ srɔ́n ɔwrɔn tɔ̀n ɛsù, nɛ̀n wɔrɔ ɛnshi sî. Nyɛ́n cɔ́ nɛ̀n nyɛ́n hɔ́n ɛbemɛ̀n, ɛyri léyi ne le bru nɔn, 11ô nyɛ́n dɔ́ ebɩ́-nɛ́n-zi le: ‘Ankà-yé-wrɔn ke yrɛ mɛ́n le: ɔwɔn léyi mɛ̀n mán m'ɛsɛnkɛn-bɔ̀ mɛhi bɔ́ le zî abutùkumɛ̀n-kɔ́-nyanmán-bì ci-zî lɔ nɔn towá?’ 12Kɩ ne le yé nyɛ̀n ɔwɔn wú ɔwɔndà cüìcüì léyi ɛci lɔ fɛn sɛkru ɛmɛ̀n nɔn. Nanvrɛn de nyɛ lɛ gbrɛ́ ɛci nɔn.” 13Yɔ hɔ̀n kɩ yɔ cɔ́ ɛci lɔ fɛn krɔn, hán ɔmu le Zhezü dɔ́ yɔ, kɩ yɔ gbrɛ́ Ɛẅɛnwrɔn-bemɛ̀n-cì-nyanmán-bì ci-zî.
Ɛẅɛnwrɔn ci-zî prɔnprɔn
(Nyɛ́n nyan Matie 26:26-30; Markɛ̀n 14:22-26; mán Kpàkpà 1 Korɛntɛ̀n anmàn-bɔ̀ 11:23-25 wrú lɔ mɛ̀n)
14Ɛnvra léyi ɛci-zî vra cɔ̀ nɔn, Zhezü mán n'ɔkɔhɔ̀n-wá-bɔ̀ ci tɛbrɛ̀ wú. 15Nɛ dɔ́ yɔ le: “Andɛ̀n ɛbɛ de mɛ̀n wá kpankpan le nyɛ́n mán mɛ̀n mɛhi bɔ̀ zî ɛnyanmán-bì ci-zî ndɔ lɔ yakɛ mɛ̀n kán ɛgbàn nɔn. 16Ɔmuhi, mɛ dɔ́ nyɛ̀n le, mɛ́n sɩ̀ vru zî ɛci ndɔ lɔ hàn kɩ kɛ lɛ krɔn ɛnvra léyi n'ɛwú ankà-dɔ̀ kɛ lɛ sá nmù Anhobɩ́ Nɛ̀ncüì-dúyri nɔn.” 17Nɛ̀n bɩ́ ɛntán glashɛ̀n, nɛ́n tán Ɔwɔ ɔkùɛn kɩ nɛ dɔ̀ le: “Nyɛ́n bɩ́ ɛntán glashɛ̀n ndɔ lɔ, nyɛ́n dɛ́ ny'edomɛ̀n; 18ɔmuhi, mɛ dɔ́ nyɛ̀n le, zɛtɛ̀ lɔ mɛ́n sɩ̀ vru mi ɛntàn wɔnsɛn hàn kɩ Anhobɩ́ Nɛ̀ncüì-dúyri kɛ lɛ và.” 19Zɛtɛn nɛ̀n bɩ́ abùtùkumɛ́n, nɛ̀n tán Ɔwɔ ɔkùɛn, nɛ̀n voyan abùtùkumɛ́n lɔ nɛ̀n tán yɔ, kɩ nɛ dɔ̀ le: “Ndɔ lɔ dú m'eduwrú léyi yɛ tán nyɛ̀n. Nyɛ́n hán ndɔ lɔ m'ankà-tro mɛ̀n.” 20Nɛ̀n tán yɔ ɛntàn glashɛ̀n lɔ ɛci-zî trɔmɛ̀n, kɩ nɛ dɔ̀ le: “Ɛntàn glashɛ̀n ndɔ lɔ dú Ɔwɔ mìrɛ̀n wrù léyi m'ɛnkrɛ̀ lɔ cüe ny'ɛkruhú, ô kè di nyɛ̀n dalɛfuɛ Ɔwɔ zìwú nɔn. 21Tɛ́n nyɛ́n nyan: Ɔwrɔn léyi ke di mɛ̀n owúemɛ̀n nɔn, dú ɛnu lɔ, tɛbrɛ̀ wú, nɛ́n mán mɛ̀n mɛhi. 22Ankàẅì, ɔwrɔnẅì Ẅì ke le wù, hán ɔmu le Ɔwɔ wá tán nɔn; tɛ́n muzhíe dú tán ɔwrɔn léyi ke le di nɛ̀n owúemɛ̀n nɔn!” 23Yɔ bukru yɔ yrɛ y'edomɛ̀n, ɔwrɔn léyi dú yɔ ɛmɛ̀n hɩ ke jí kɛ̀ hán eci ndɔ lɔ nɔn.
Antɔ́n de dú ecüìcüì nɛ́n?
24Zhezü sɛnkɛn-bɔ̀ bukru kɛ wrɔ́n ecüì ɛshishiemɛ̀n, ô yɔ nyri y'ɛmɛ̀n lɔ ɔwrɔn léyi ke le dú ecüìcüì nɔn. 25Zhezü kɛ dɔ́ yɔ le: “Ɛnhibù wú anmàn nɛ̀ncüì hɔ̀n ẅɛn ɛyri, kɩ anwrɔn hɔ̀n léyi ẅɛn ɛkɔrɛ̀srɔn y'ɛwú nɔn, kɛ hán yɔ ye bi yɔ ‘Anvrɛn-hán-bɔ̀.’ 26Tɛ́n kè sɩ̀ dù ɔmu lɔ kɛ̀ tàn nyɛ̀n. Tɛ́n ɔwrɔn léyi ẅɛn vɔ̀nshɛ́ ny'ɛmɛ̀n lɔ nɔn, ke ji le nɛ̀n dù kɛ̀ hán sùgban-ẅì hɔ́, ô ɛkɔrɛ̀levri-wrɔn lɔ kè dú eci-bɩtan-wrɔn. 27Kɛ̂, antɔn de ẅɛn vɔ̀nshɛ́, nɛ́n léyi nɛ̀n yɛ́ tɛbrɛ̀ wúɛ, kale nɛ́n léyi, nɛ̀n dú eci-bɩ̀tan-wrɔn nɛ́n? Ɔwrɔn léyi yɛ́ tɛbrɛ̀ wú nɔn kè sɩ̀ dù hiɛ. Zɛtɛn mɛ tɛn, mɛ̀n dú nyɛ̀n ɛmɛ̀n hán le eci-bɩtan-wrɔn hɔ́! 28Nyɛ́n dú mɛ̀n ɛtɛsɛ̀n ɛnvra lɔ fɛn m'ɛgbàn-kàn lɔ mɛ̀n; 29kɩ ɔmu zri léyi Ɔwɔ Zi wá mɛ̀n Anhobɩ́ Nɛ̀ncüì-dúyri antamɛ̀n nɔn, ɔmu zri lɔ, mɛ̀n mán me bɩ mɛ wá nyɛ̀n antamɛ̀n: 30nye le zî ɛci kɩ nye le mi ɛnshí mɛ́n tɛbrɛ̀ lɔ wú, Anhobɩ́ Nɛ̀ncüì-dúyri, kɩ nyɛ lɛ yɛ́ ɛgbú-tobù wúɛ, ô nyɛ́n ci Izraɛlɛ̀n mɛ̀n kru ɛvà-anhyrɛ̀ lɔ ɛmrɛ̀n.”
Zhezü kɛ dɔ̀ le, Piɛrɛ̀n kɛ lɛ crɔn ɔmuàn n'ɛtɛsɛ̀n
(Nyɛ́n nyan Matie 26:31-35; mán Markɛ̀n 14:27-31; mán Zhan 13:36-38 wrú lɔ mɛ̀n)
31“Simɔn, Simɔn! E die nukùɛ: anwa-wrɔn sán, ô yɛ jɔ̀kɔ nyɛ̀n kɛ hán ɔmu le yɛ kua saka-ẅì yɛ jrɔ́ ɛci ɛmɛ̀n nɔn. 32Kɩ mɛ́n sɛ̀n mɛ̀n tán mɛ́n ô ankàẅì-bùtan ke bɩ́ trɔ mɛ́n. Kɩ ɛnvra léyi e le vru ɛ̀ và cɔ́ mɛ̀n nɔn, ɛ̀ tán ɔmuan-ẅì hɔ̀n ecüì.” 33Piɛrɛ̀n kɛ dɔ̀ le: “Ɛẅɛnwrɔn, mɛ̀n krɔ́n kpehɛ́n, ô mɛ̀n mán vɛ́n mɛhi bɔ̀ hɔ́n anwɔn-mɛ̀n-wá-wɔn mɛ̀n, ô mɛ̀n mán vɛ́n mɛhi bɔ̀ wù.” 34Zhezü mrɛ́n nɛ̀n ɔmùan le: “Mɛ dɔ́ mɛ́n annànwɔrɛ mɛ̀n, Piɛrɛ̀n, ɔkɔ̀sɔ̀ cüì ke sɩ̀ di nkù ɛnyɔncì lɔ, kɩ ɛ lɛ crɔn ɔmuàn andɛ̀n anhɔ̀n le, è sɩ̀ nyri mɛ̀n.”
Ɔkùa, kotoku mán anhà-kɔ́n-nyan
35Zɛtɛn Zhezü kɛ dɔ́ yɔ le: “Ɛnvra léyi mɛ̀n wá nyɛ̀n ɔkɔhɔ̀n hɩ nyɛ́n sɩ̀ bɩ̀ ɔkùa, kotoku mán annanwrú nɔn, ɛci ẅɛn nyɛ̀n ɛmiàn?” Yɛ dɔ̀ le: “Eci zriɛmɛ́n”. 36Zɛtɛn nɛ dɔ́ yɔ le: “Tɛ́n zɛtɛ̀ lɔ ɔwrɔn léyi kɛ ẅɛn ɔkùa nɔn, ke jí le nɛ̀n bɩ, hɩ zri lɔ de dú tán ɔwrɔn léyi ẅɛn kotoku nɔn; kɩ ɔwrɔn léyi kè sɩ̀ ẅɛ̀n anhà-kɔ́n-nyan nɔn, ke ji le nɛ̀n hɛ́ n'ɛwú ceci, ô nɛ̀n wɔ́ anhà-kɔ́n-nyan tɔ̀n. 37Ɔmuhi, mɛ dɔ́ nyɛ̀n le, ke jí le ankà léyi Owrú Prɔnprɔn merɛ̀n m'ɛwú nɔn, kɛ sá nmù: ‘Yɛ krɛ́ nɛ̀n yɛ wá eci-gbangbàn-hán-bɔ̀ mɛ̀n.’ Annànwɔrɛ mɛ̀n lɔ ankà léyi ye merɛ́n m'ɛwú nɔn, kɛ lɛ sá nmù.” 38Ɛsɛ̀nkɛn-bɔ̀ lɔ kɛ dɔ̀ le: “Ɛẅɛnwrɔn, nyàn anhà-kɔ́n-nyan anhyrɛ̀.” Kɩ Zhezü kɛ dɔ̀ le: “Kɛ hán anvrɛn hán!”
Zhezü kɛ sɛ́n Ɔwɔ nkpò tɔ̀n wú, ɛẅì-shi-tɛ̀-tɔ̀n léyi ye bi olivie nɔn n'ankɛ̀tɛ mɛ̀n
(Nyɛ́n nyan Matie 26:36-46; mán Markɛ̀n 14:32-42 wrú lɔ mɛ̀n)
39Zhezü srɔ ɛntrɛ hán ɔmu le dú n'edùci nɔn, kɩ hɔ́n nkpò tɔ̀n wú, ɛẅì-shi-tɛ̀ léyi ye bi olivie nɔn n'ankɛ̀tɛ mɛ̀n. N'ɛsɛnkɛn-bɔ̀ kɛ́n nɛ̀n ɛsɛ̀n yɔ hɔ̀n. 40Ɛnvra léyi nɛ̀n cɔ́ ɛyri ndɔ lɔ nɔn, nɛ dɔ́ yɔ le: “Nyɛ́n sɛ́n Ɔwɔ, ô nyɛ́n bɩ́ bore ɔwɔɛ̀n-nyan mɛ̀n.” 41Zɛtɛn nɛ̀n cɔhɔ́ y'ɛtɛ̀sɛ̀n nɛ́n sɔnba ɔhɔnán, kɩ nɛ̀n shɛ́n annankruemɛ̀n, nɛ sɛ́n Ɔwɔ 42nɛ dɔ̀ le: “Dade, ke dú kɛ ɛ cüɛ̀n hô, ɛ̀ hán ɛgbàn-kàn glashɛ̀n ndɔ lɔ kɛ̀ cɔhɔ́ mɛ̀n ezìwú. Ɛnvra lɔ fɛn ke bɩ́ dú eci léyi mɛ cüɛ̀n nɔn de kɛ̀ hán nɔn, tɛ́n hɩ le e ji nɔn.” [43Zɛtɛn anhobɩ́-kuyüre-wrɔn tɔ̀n srɔ ô kɛ̀ tán nɛ̀n ecüì. 44Zhezü dú ejüeziemɛ̀n kɩ nɛ sán sɛ́n Ɔwɔ edùyiemɛ̀n. N'ɛnwrù lɔ srɔ ɛnkrɛ̀ kɛ srá cüe ɛnhibɩ́ɛ.]
45Ɛnvra léyi nɛ̀n sɛ́n Ɔwɔ trɔ nɔn, nɛ̀n tɔhú, nɛ̀n vá n'ɛsɛnkɛn-bɔ̀ ɛtɛ̀sɛ̀n kɩ nɛ̀n cɔ́ yɔ yɔ dú obòto mɛ̀n kɩ ndà wri yɔ. 46Nɛ dɔ́ yɔ le: “Cɛci kruhú kɛ, nyɛ dí ndà? Nyɛ́n tɔhú, nyɛ́n sɛ́n Ɔwɔ, ô nyɛ́n bɩ́ bore ɔwɔɛ̀n-nyan mɛ̀n.”
Zhezü ẅɛn vra
(Nyɛ́n nyan Matie 26:47-56; mán Markɛ̀n 14:43-50; mán Zhan 18:3-11 wrú lɔ mɛ̀n)
47Nɛ̀n dú ankà-dɔ́ mɛ̀n kɩ fɛcüè srɔ. Zhüda léyi dú Zhezü sɛnkɛn-bɔ̀ lɔ ɔtɔ̀n nɔn, nɛ́n de nɛ̀n dú fɛcüe lɔ ezì; nɛ́n sɔnba Zhezü ɛtɛsɛ̀n ô nɛ̀n wá yi angbà mɛ̀n. 48Tɛ́n Zhezü kɛ dɔ́ nɛ̀n le: “Zhüda, angbàmɛ̀n-wá-mɛ̀n de ɛ hɛ́ ɔwrɔnẅì Ẅì nɛ́n?” 49Ɛnvra léyi Zhezü tɛsɛ̀n-bɔ̀ lɔ kán eci léyi kɛ lɛ wɔɛ̀n nɔn, yɔ yrɛ nɛ̀n le: “Ɛẅɛnnwrɔn, bɔ̀ bɩ́ bɔ́ anhà-kɔ́n-nyan lɔ bɔ̀ kɔ́n anhà hà?” 50Kɩ y'ɛmɛ̀n lɔ ɔtɔ̀n bɩ́ anhà-kɔ́n-nyan, wi ecice-wrɔn cüìcüì ci-bɩtan-wrɔn ezì kɔrɛ̀ nukù. 51Tɛ́n Zhezü kɛ dɔ́ le: “Nyɛ́n teze, kɛ hán anvrɛn hán!” Zhezü tɛ́ eci-bɩtan-wrɔn lɔ nukù ɛkɔrɛ̀, kɩ nɛ́n kɔrɛ̀. 52Zɛtɛn Zhezü kɛ dɔ́ ɛci-ce-bɔ̀ wrɔn cüìcüì, Ɔwɔ-cice-wɔn-yrí-nan-bɔ̀ cüìcüì mán ɛcüìcüì-bɔ̀ léyi vá nɛ̀n ɛẅɛn yri nɔn le: “Ke ji le nyɛ́n và, nyɛ́n bɩ́, anhà-kɔ́n-nyan mán antɛ̀ mɛhi, kɛ hán le anwrɔn-wri-wrɔn de dú mɛ̀n nɛ́n? 53Ɛnvra lɔ fɛn mɛ̀n mán nyɛ́n mɛhi bɔ́ dú ɛcice-wɔn lɔ mɛ̀n, kɩ nyɛ́n sɩ̀ ji mɛ̀n ɛẅɛn yri. Tɛ́n wacɛ̀n ndɔ lɔ dú nyɛ́n mán ɛyri-yɔwɔ korɛ̀-srɔn tɛ́n.”
Piɛrɛ̀n crɔn ɔmùan Zhezü tɛsɛ̀n
(Nyɛ́n nyan Matie 26:57-58,69-75; mán Markɛ̀n 14:53-54,66-72; Zhan 18:12-18,25-27 wrú lɔ mɛ̀n)
54Yɛ ẅɛn Zhezü, ye bɩ́ nɛ̀n yɔ hɔ̀n kɩ ye sɩ́ nɛ̀n ɛcice-wrɔn cüìcüì nanvrɛn ɛbemɛ̀n. Piɛrɛ̀n dú yɔ ɛmɛẅi esù she. 55Yɛ kɛ́n ɛnhyà ebɩ́ wanzi kɩ Piɛrɛ̀n mán bɩ́ ɛyri ɛnhyà tɛ̀sɛ̀n. 56Eci-bɩ̀tan-hi tɔ̀n kán nɛ̀n, nɛ̀n yɛ́ ɛnhyà tɛ̀sɛ̀n; ɛnnyɔnwrɔn lɔ kɛ nyan nɛ̀n kɩ kɛ dɔ̀ le: “Ɔwrɔn ndɔ lɔ mɛhi mán yɔ dù!” 57Tɛ́n Piɛrɛ̀n crɔn ɔmùan kɩ kɛ dɔ́ nɛ̀n le: “Mɛ̀n sɩ̀ nyrí nɛ̀n.” 58Ɛnvra cá vacì, ɔwrɔn nyàntɛn tɔ̀n kán nɛ̀n, kɩ kɛ dɔ̀ le: “Vɛ́n mán è dú anwrɔn hɔ̀n lɔ ɔtɔ̀n!” Kɩ Piɛrɛ̀n mrɛ́n ɔwrɔn ndɔ lɔ ɔmùan le: “Hɔ̂, kè sɩ̀ dù mɛ̀n.” 59Wacɛ̀n zri vacì kɩ ɔwrɔn nyantɛn vru kɛ dɔ́ ankà zri lɔ ecüemɛ̀n: “Annànwɔrɛ mɛ̀n, ɔwrɔn ndɔ lɔ mɛhi yɔ dù, ɔmuhi nɛ̀n dú Galile wrɔn nɔn.” 60Tɛ́n Piɛrɛ̀n mrɛ́n ɔmùan le: “Mɛ́n sɩ́ nyri ankà léyi e ji ɛ̀ dɔ̀ nɔn, vɛ́n ɔwrɔn ndɔ lɔ.” Hɩ vra zri léyi nɛ̀n dú ankà-dɔ́ mɛ̀n nɔn, ɔkɔ̀sɔ̀-cüì tɔ̀n di nkù. 61Ɛẅɛnwrɔn crɛ ɛmɛẅi nyan Piɛrɛ̀n esheshiemɛ̀n. Zɛtɛn Piɛrɛ̀n ankà bru, ankà léyi Ɛẅɛnwrɔn dɔ́ nɛ̀n nɔn: “Ɔkɔ̀sɔ̀ ke sɩ̀ di nkù ɛnyɔn-cì lɔ kɩ ɛ lɛ crɔn ɔmùan andɛ̀n-anhɔ̀n le, è sɩ̀ nyri mɛ̀n.” 62Piɛrɛ̀n srɔ ɛntrɛ kɩ ke wú eyú edomɛ̀n bruemɛ̀n.
Zhezü wora mán n'egorɛ
(Nyɛ́n nyan Matie 26:67-68; mán Markɛ̀n 14:65 wrú lɔ mɛ̀n)
63Anwrɔn hɔ̀n léyi kɛ nán Zhezü nɔn kɛ hán nɛ̀n ɛnhyürɛ̀ kɩ ke gorɛ nɛ̀n. 64Yɔ vá nɛ̀n eci ezì kɩ yɔ yrɛ nɛ̀n le: “Antɔn gorɛ̀ mɛ́n hán? Tro!” 65Kɩ yɔ vru yɔ dɔ́ nɛ̀n ɔwora-ankà bobrebe ndɔ hɔ̀n.
Ye sɩ́ Zhezü ankà-dɔ̀-trɔ-bɔ̀ zìwú
(Nyɛ́n nyan Matie 26:59-66; mán Markɛ̀n 14:55-64 wrú lɔ mɛ̀n)
66Ɛnvra léyi ɛcɛ̀n cüe nɔn, Zhüifɛ̀n-bɔ̀ cüìcüì hɔ̀n, Ɔwɔ-cice-bɔ̀ cüìcüì mán ɛnyanmàn-gbànvri-ankà-yé-bɔ̀ bɔrɛ y'edomɛ̀n ɛkru. Yɛ hán ye bɩ́ Zhezü yɔ vá ankà-dɔ̀-trɔ-bɔ̀ zìwú, 67kɩ yɔ yrɛ nɛ̀n le: “È dú ebɩ̀die-wrɔn hàn? Ɛ̀ dɔ́ bɔ̀.” Zhezü mrɛ́n yɔ ɔmùan le: “Ke dú kɛ mɛ dɔ́ nyɛ̀n, nyɛ́n sɩ̀ bùtan ankàẅì, 68kɩ ke dú kɛ me yrɛ nyɛ̀n ankà, nyɛ́n sɩ̀ shri mɛ̀n anmùan mɛ̀n. 69Tɛ́n Bukru zɛtɛ̀ lɔ ɔwrɔnẅì Ẅì kɛ lɛ yɛ́ ɛkɔrɛ̀srɔn Wɔ ezì-kɔrɛ kɔrɛ̀a.” 70Yɔ lɔ fɛn yɔ mrɛ́n ɔmùan le: “Zɛtɛn è dú Ɔwɔ ẅìɛ?” Nɛ̀n mrɛ́n yɔ ɔmùan le: “Hɩ de nyɛ́n dɔ̀ nɔn: mɛ̀n dú Ɔwɔ ẅì.” 71Zɛtɛn yɔ dɔ̀ le: “Bɔ́ sɩ́ vru ji dalɛfuɛ-di-wrɔn zriɛmɛ́n. Bɔ́ dùku bɔ̀ yá n'anmùanmɛ̀n-ankà-dɔ̀!”
Terpilih Sekarang Ini:
Lükɛ̀n 22: ƐAA03
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.