मर्कूस 14
14
येशूने सेमेब
मत्ती २६:१-१६; लूका २२:१-६
1 #
प्रस्थान 12:1-27
अम्बजे ङ्हीया ङ्येदे निस्तार मेस्ये क्यङ् पूला चेब अखमिरीजे दीन्बर ख्य। पूस्र्या केन्यू मेस्ये यहूदी पन्डेयूदे येशूने चूङ्देबे सेने दाऊ च्यूक्दीन ख्य। 2“दीन्बरजे बीलने अन्चील्लाचीदे, नत्र मीयू नङ्ने हुलदङ्गा क्यूप्पने” यदेबे थमयूदे येक ख्य।
3 #
लूका 7:37,38 येशू बेथानिया तजे कुष्ठ बीद लादीकब मी सिमोनजे कीम्ने कङ् चने टूनूब मदी त्यादे लूङ्कार्जे तीयाँने कूम लू पर्देब बस् रब जटामसीजे मूरगू रेत्दे। ङूदे तीयाजे लू पर्देबे हम्ब भस् रब जटामसीजे मूर्गू येशूजे टने फैम्मीदे।
4तर कोइ-कोइ मीयू हम्ब मदीदे येरे चेब सेम् अम्पर्दीदेबे प्रो लङ्दे मेस्ये त्यादे त्याने यदे, “येर कूम लू पर्देब मूर्गू चेने खेर पूबे? 5चेनेयलो हम्ब कूम लू पर्देब बस् रब मूर्गू चाँदीजे से सोम् मन्द्रामूलीयली थेप् नोर्ने सोङ्देबे हम्ब नोर् दूख्प्रेब मीयूने कोम्मे ख्व ख्यङ्दे।” होर्दे थमयूदे हम्ब मदीने फ्राचीदे।
6तर येशूदे यदे, “क्यूत्दे, नमयू चेने हम्ब मदीने ङ्येरेरे येन? अम्ब मदीदे ङैने सोरोज्य कामत्या चीम्मे ख्यङ्। 7#व्यवस्था 15:11दूख्प्रेब मीयू नमयूप्रे येतार्ने क्यूक्क्य। होरेक्यूत्देबे थमयूने नमयूदे सेम्पर्दीब कलङ्नेयली तोङ्मे खूइय। तर ङ नमयूप्रे येतार्ने अन्क्यूर्। 8अम्ब मदीदे च चे ख्व हम्ब ङूदे चीत्दे। अम्ब बस् रब मूर्गू ङैजे ङ्वने छेल्देबे ङूदे ङैजे ङ्व बोपयली खूम्ने छ्योम्मे ख्यङ्। 9तम्दम्ने ङ नमयूने यीय, केने-केने संसारजे का-मुलुकने सूगब खबर स्योक्क्य, हम्ब नेयूने हम्ब मदी ह्वे चेने ङूजे कामजे सार्या चीक्क्य।”
10येशूजे बाह्र स्यूस्स्यायू नङ्ने यहूदा इस्करियोतदे येशूने ङ्येप्से पीनने केन् पूस्र्यायू ट्याने गीलीदे। 11यहूदाजे पो तदेबे थमयू सोरो सूग्कदे, मेस्ये ङूने नोर् पीन्क्य यदेबे कबुल चीत्दे। होर्दे येशूने केर्बे चूङ्स्येपीन यदेबे ङूदे दाऊ च्यूक्तीदे।
प्रभु-भोज
मत्ती २६:१७-३५; लूका २२:७-२३
12क्यङ् पूला चेब अखमिरी दीन्बरजे पात्ता खूम्जे दिनने, निस्तार-दीन्बरजे स्वान् बलि पीन ख्य, स्यूस्स्यायूदे ङूने लोत्दे, “ङी केने प्रदेबे नैजे लागि निस्तार-दीन्बरजे भत्यार् तयार चे?”
13होर्दे येशूदे रङ्से स्यूस्स्यायू नङ्ने स्यूस्स्या ङ्हीने येरे यदेबे कूल्बीदे, “नमयू सहरने प्र, हैयाने नमयूदे गाग्रीने क्यू प्ल्येत्देबे प्रेनब मीत्यादे नमयूने तूय ङूजे ङ्ये-ङ्ये प्र। 14हम्ब मी कम्ब कीम्ने प्रीय हम्ब कीम् नोबोने य ‘गुरुज्यूदे य ख्यङ्, ङैजे स्यूस्स्यायूप्रे टूङ्देबे निस्तार-दीन्बरजे भात्यार् चब ङैजे ङ्योवजे कोठा केने ख्यङ्?’ 15होर्दे ङूदे नमयूने तो फ्याताल्ल्याने सोरो ज्य छ्योदेब कोठा केन्त्या तम्मीय, मेस्ये हैयाने नमयूदे ङीनजे भत्यार् तयार ची।”
16कन्छ्वाब हम्ब स्यूस्स्यायू सहरतेले गीलीदे, हन्छ्वाब येशूदे यप्रने थमयूदे तूदे, मेस्ये थमयूदे निस्तार-दीन्बरजे भत्यार् तयार चीत्दे।
17नूस्यूङ् क्यूट्टब येशू बाह्र जना स्यूस्स्यायूप्रे रदे। 18#भजनसंग्रह 41:9थमयू भत्यार् चेनूब येशूदे यदे, “तम्दम् पो ङ नमयूने यीय, नमयू नङ्ने ङैप्रे चैनब त्यादे ङैने धोका पीन्क्य।”
19थमयू अम्ब पो तदेबे सेम् नदे, होर्दे पलोपलो येशूने “हम्ब ङ औ?” यदेबे थमयूदे लोक्कीदे।
20येशूदे स्यूस्स्यायूने यदे, “बाह्र जना नङ्ने त्या ख्यङ्, हम्बदे ङैप्रे थल्ने क्यङ् नूक्न ख्यङ्। 21चेनेयलो धर्मशास्त्रने लिख्दीये प्रने मीजे च प्रने पर्दीय, तर धिक्कार हम्ब मीने, सूदे मीजे चने धोक पीन्क्य! हम्ब मी अन्जन्मीदीलो ज्य क्यूर ख्यङ्दे।”
22होर्दे चेनूब येशूदे क्यङ् टेल्देबे असी पीन जेनमेस्ये क्यङ् फाच्या पूत्दे, मेस्ये ङूजे स्यूस्स्यायूने पीन्देबे यदे, “ना, अम्ब ङैजे ङ्व ख्यङ्।”
23होर्दे पील लाने टेल्देबे परमेश्वरने धन्यवाद पीनमेस्ये येशूदे स्यूस्स्यायूने पीन्दे, मेस्ये थमयू क्वादेने हम्ब पीलदे थूङ्दे। 24#प्रस्थान 24:8; यर्मिया 31:31-34होर्दे येशूदे थमयूने यदे, “अम्ब सर् कबुल ङैजे का ख्यङ्, कूम मीयूजे लागि अम्ब का फैन्क्य। 25तम्दम्ने, ङ नमयूने यीय, परमेश्वरजे राज्यने सर् क्यूत्देबे अन्थूङ्दासेमे ङ अङ्गुरजे सीदे फेरि अन्थूङ्।”
26होर्दे भजन त्या प्वे जेनमेस्ये, थमयू हैयादे योङ्देबे जैतून गङ्तेले गीलीदे।
27 #
जकरिया 13:7
येशूदे थमयूने यदे, “नमयू क्वाने ङैने पोङ्देबे प्रीय, चेनेयलो येर्बे लिख्दीये ख्यङ्, ‘ङैदे सोम्प्रङ्बने सेक्क्य, मेस्ये स्वान्यू स्वा-स्वा क्यूत्देबे थर्बीय।’ 28#मत्ती 28:16तर ङ सोम्बो क्यूत्देबे लङ्रमेस्ये नमयू यली खूम् गालीलने प्रीय।”
29पत्रुसदे येशूने यदे, “सूजो स्यूस्स्यायू क्वादेने पोङ्दे प्रलीने ङ नने कलङ्बेये अम्पोङ्यी।”
30होर्दे येशूदे पत्रुसने यदे, “तम्दम्ने, ङ नने यीय, नदे नप्मून्दे कप ङ्हीफे ठ्वा यली खूम् नदे ङैने सोम्फे सेमे अन्स्ये यदेबे यीय।”
31तर पत्रुसदे होरे अन्ची यदेबे ट्यादे, “नैप्रे ङ सीबने पर्दीली ङ नने अन्स्ये अन्-य।” होर्दे थमयू क्वादेने होरप्रने यदे।
गेतसमनी बगैँचाने येशूजे प्रार्थना
मत्ती २६:३६-४६; लूका २२:३९-४६
32होर्देङ्येदे येशू ङूजे स्यूस्स्यायूप्रे गेतसमनी यब नेने गीलीदे, मेस्ये येशूदे स्यूस्स्यायूने यदे, “ङ प्रार्थना चीत्दा नमयू अयानेने टूनू।” 33येशूदे पत्रुस, याकूब मेस्ये यूहन्ना ङूप्रे स्योल्गीदे, मेस्ये ङू सोरो केर्चीदे केर्चीदे क्यूत्दे मेस्ये सोरो अन्सूग क्यूत्दे। 34ङूदे थमयूने यदे, “ङैजे आत्मा सीबतासेमेने सूर्त रदेबे सोरो सेम् ठ्व ख्यङ्। नमयू अयाने टूङ् मेस्ये अन्ङ्यूम्लाबे जाग्राम टूङ्।”
35होरे यदेबे येशू तीलाने गीलीदेबे सने पून्छ्यल् क्यूत्दे, मेस्ये क्यूर खूलो ङैफ्याने र मैब अम्ब सकस्जे बील हर्दीमी यदेबे प्रार्थना चीत्दे। 36होर्दे येशूदे यदे, “अब्बा, प, नदे साप्ता कामने चे खूइय। जेम्से अम्ब पील ङै ट्यादे हर्दीपी। तर ङैजे सेम्दे मनप्र दी, नैजे सेम्दे मनप्र क्यूस्स्य।”
37येशू ल्वारब स्यूस्स्यायू ङ्यूम्म्या प्रेनब तूरदे। ङूदे पत्रुसने यदे, “सिमोन, च न ङ्यूम्न औ? च न घण्टा त्याये जाग्राम टूङ अन्ख्व? 38नमयू अन्ङ्यूम्लाची, होर्दे प्रार्थना ची, मेस्ये नमयू पापने अम्फस्तीप्रस्य। तम्दम्ने आत्माब तयार ख्यङ्, तर ङ्वने बोङ् त्वो।”
39फेरि येशू गीलीदेबे खूम्जे प्रने प्रार्थना चीत्दे।
40फेरि स्यूस्स्यायू टून नेने ल्वारब थमयू हन्छ्वाबये ङ्यूम्नब तूदे, चेनेयलो थमयू ङ्यूम्म्या थूदेबे म्या पूकने अन्खू, मेस्ये येशूने चै जवाफ पीन यदेबे चेत्याये अन्ह्वेर।
41येशू सोम्फे पोलोने ल्वारदे, मेस्ये स्यूस्स्यायूने यदे, “च नमयू चूजो सेमेने ङ्यूम्देबे आराम चीन्न औ? जेम्से बील फ्योरदे। ले, मीजे च चूङ्देबे पापीयूजे लाने पीम्बे मेख्यङ्। 42लङ्, जेम्से प्रे! ले, ङैने धोका पीनब मी फ्योरदे।”
येशू चूङ्गब
मत्ती २६:४७-५६; लूका २२:४७-५३; यूहन्ना १८:३-११
43येशूदे पो क्यम्नूब ङूजे बाह्र जना स्यूस्स्यायू नङ्ने यहूदा यब हैयाने खात्याने फ्योरदे। यहूदाप्रे पीर्ग मेस्ये पार्च्या टेलब मीहुल ख्य। पूस्र्या केन्यू, यहूदी पन्डेयू मेस्ये धर्म गुरुयूदे थमयूने कूल्बे ख्य।
44येशूने धोका पीनब स्यूस्स्यादे थमयूने येरे लतप्त्या चीदे ख्य, “ङैदे सूने म्वाइँ चीक्क्य, ङूने येशू क्यूक्क्य, ङूने चूङ्देबे चेलाबे स्योल्गी।” 45होर्दे यहूदा येशू ट्याने सरासर् गीलीदेबे “ओ गुरु”, यदेबे ङूने डम्बने म्वाइँ चीत्दे। 46होर्दे थमयूदे येशूने ङ्येप्दे। 47येशू ट्याने मेर्नब मीयू नङ्ने त्यादे पारच्या योन्देबे पात्ताकेन् पूस्र्याजे त्वोने खान्दीदे मेस्ये ङूजे ङ्यलम् न थे प्रेकदे।
48येशूदे थमयूने यदे, “च नमयूदे खूमान्नेप्र पारच्य मेस्ये पीर्ग टेल्देबे ङैने चूङ्र औ? 49#लूका 19:47; 21:37येतार्ने मन्दिरने लोम्मीनूब ङ नमयूप्रेने ख्य, मेस्ये नमयूदे ङैने अन्चूङ्। चेनेयलो धर्मशास्त्रने लिख्दीयेब पो पूरा क्यूस्स्य।” 50होर्दे स्यूस्स्यायू क्वादेने ङूने पङ्देबे ग्येइ।
51रङ्से ङ्वने सूतीजे कोला इस्रात्या तोलेब स्योर्ब त्या येशूजे ङ्ये-ङ्ये रदे, थमयूदे हम्ब स्योर्बनेये चूङ्दे, 52तर कोला पोङ्गीदेबे ङू च्यङ्लीने ग्येइ।
येशू यहूदीजे पात्ता केन् सभाजे खूम्दे
मत्ती २६:५७-६८; लूका २२:६६-७१; यूहन्ना १८:१२-१३,१९-२४
53मीयूदे येशूने पात्ता केन् पूस्र्या ट्याने कूदीदे, मेस्ये हैयाने पूस्र्या केन्यू, धर्म-गुरुयू मेस्ये यहूदी पन्डेयू क्वाने रूप् क्यूत्देबे टून ख्य। 54पत्रुसदे चीन्तङ्देमेस्येने येशूजे ङ्ये-ङ्ये रदेबे पात्ता केन् पूस्र्याजे य्वे नङ्ने ग्योयीदे होर्दे हैयाने सीन्त्रीयूप्रे टूङ्देबे ङू मी तूप्न ख्य।
55पूस्र्या केन्यू मेस्ये यहूदीजे पात्ता केन् सभाने मीयू क्वादेने येशूने से पर्दीय यदेबे प्रमाण मल्दे, तर थमयूदे दीसी चैत्याये अम्प्रे। 56येशूने अन्ज्य चेने कूम मीयूदे लूच्च गवाही पीन्दे। तर थमयूदे पीनब गवाही अन्डीक्।
57कोइ-कोइ मीयू लङ्देबे येशूजे विरुद्धने येरे यदेबे गवाही पीन्दे, 58#यूहन्ना 2:19“मीजे लादे बन्देब अम्ब मन्दिर ङूदे हूल्देबे, मीजे लादे बन्दे अम्पर्देब सूजो मन्दिर ङ सोम्म्याने बन्दीय’ यदेबे ङूदे यब ङीदे तदे।” 59तर थमयूदे यब गवाही अन्डीक्।
60पात्ता केन् पूस्र्यादे मीहुल अन्द्रने लङ्देबे येशूने लोत्दे, “चेने जवाफ अम्पीन? अम्ब मीयूदे नैजे विरुद्ध चीत्देबे पीनब गवाही च ख्यङ्?” 61तर येशू पारा अम्पूल्लाबे टूङ्दे, मेस्ये चै जवाफ ये अम्पीन्।
फेरि पात्ता केन् पूस्र्यादे येशूने लोत्दे, “न क्वादेने मन्देब परमेश्वरजे च ख्रीष्ट औ?”
62 #
दानिएल 7:13
येशूदे यदे, “अ, ङ ख्यङ्। त्याफे नमयूदे मीजे चने सर्वशक्तिमान परमेश्वरजे स्येत्तेयोर् टूनब मेस्ये मूने ख्यब मूक्पयूप्रे रेनब तङ्क्य!”
63पात्ता केन् पूस्र्यादे ङूजे कोला प्र्याङ्देबे यदे, “जेम्से ङीनने सूजो गवाहीयू चेने चेदे? 64#लेवी 24:16नमयूदे ईश्वरजे न प्वेब तदे। नमयूदे च मन ख्यङ्?”
होर्दे थमयू क्वादेने ङूने दोष लैदीदेबे यदे, “ङूने सेक्क पर्दीय।” 65होर्दे कोइ-कोइदे येशूने छ्योम थर्दे, मेस्ये ङूजे त्वा उप्देबे ङूने ठरीदे यदे, “लो य, नने ठरेब मी सू?” होर्देङ्येदे सिपाईयूदे ङूजे जिम्मा कीन्दे, मेस्ये ङूने ठरीदे।
पत्रुसदे येशूने अन्स्ये यब
मत्ती २६:६९-७५; लूका २२:५६-६२; यूहन्ना १८:१५-१८,२५-२७
66पत्रुस मो य्वेने टून ख्य, हन्छ्वाब पात्ता केन् पूस्र्याजे त्वोमयू नङ्ने त्या हैयाने रदे, 67मेस्ये ङूदे पत्रुस मी तूप्नब तङ्देबे ङूने चेला लेत्देबे यदे, “नैये नासरतजे येशूप्रे ख्यन्।”
68तर पत्रुसदे दी यदे, “नदे चे पो य, ङैदे चेत्याये अङ्को।” होर्दे पत्रुस फीजे मूल ख्योतेले गीलीदे। हन्छ्वाबने कप ठ्वादे।
69हम्ब त्वोमदे हैयानेये पत्रुस तङ्देबे फेरि होने ख्यब मीयूने यदे, “ङूये येशूजे मी नङ्जे त्या ख्यङ्।” 70तर पत्रुसदे फेरिने ङ दी यदे।
तर खात्यालाबे ती-छो मेर्नब मीयूदे फेरि पत्रुसने यदे, “तम्दम्ने नैये थमयू नङ्जे त्या ख्यङ्, चेनेयलो नैये गालीलीजे मीने क्यूत्देन्।”
71तर ङूदे कसम चदेबे रङ्से तेने दी यदेबे यदे, ङैदे लूच्च य ख्यङ् यलो परमेश्वरदे दण्ड पीन्स्य, “नमयूदे यब मी ङैदे स्येनेअन्स्ये।”
72हन्छ्वाबने कप पर् ङ्ही ठ्वादे, “कप पर् ङ्ही ठ्वायली खूम् नदे ङैने सोम्फे अन्स्ये यीय यदेबे येशूदे यब पो पत्रुसदे ह्वेरदे।” होर्दे हम्ब पो ह्वे चीत्देबे ङू क्वाँ-क्वाँ ङूदे।
Terpilih Sekarang Ini:
मर्कूस 14: सर् कबुल
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Ghale New Testament © Nepal Bible Society, 2011.