Lukas 19
19
Yexus Hab Xakhais
1Yexus moog txug huv lub nroog Yelikaus, hab yuav dlhau moog. 2Nyob huv muaj ib tug txivneej hu ua Xakhais, nwg yog tug thawj sau se hab nwg muaj nyaj heev. 3Nwg xaav pum seb Yexus yog tug twg, tabsis vim muaj tuabneeg coob heev hab vim nwg yog ib tug tuabneeg qegtaub, nwg txhaj tsi muaj peevxwm pum tau Yexus. 4Yogle ntawd, nwg txhaj dlha fuas suavdlawg ntej hab moog nce ib tsob ntoo xikamaus kuas nwg pum Yexus, ruaqhov Yexus yuav taug txujkev ntawd moog. 5Thaus Yexus moog txug qhov chaw ntawd, Nwg tsaa qhovmuag saib hab has rua Xakhais has tas, “Xakhais, koj cale maajnroog nqeg lug, ruaqhov nubnua kuv yuav moog su huv koj tsev.”
6Xakhais txawm nqeg nrawm nroog lug hab zoosab hlo txaistog Yexus. 7Taagnrho cov tuabneeg kws pum le ntawd, puab txawm pib ywg zumzawg has tas, “Ua lecaag Nwg ho yuav moog su huv tug tuabneeg txhum tsev!”
8Xakhais txawm sawvtseeg hab has rua Yexus tas, “Tug Tswv, Koj saib nawb! Kuv yuav muab ibnraab ntawm tej kws kuv muaj faib rua cov tuabneeg pluag, hab yog kuv tau txhaav leejtwg le ib yaam dlaabtsi lug yuav lawm, kuv yuav them plaub npaug rovqaab rua tug ntawd.”
9Yexus has rua nwg tas, “Nubnua txuj kev cawmdlim tub lug txug rua huv tsev tuabneeg nuav lawm, ruaqhov tug txivneej nuav kuj yog Anplahaas le caajceg hab. 10Tuabneeg Leejtub lug yog lug nrhav hab cawm cov tuabneeg kws pluj lawm.” #Math 18:11
Zaaj Lug Pevtxwv Has Txug Peb Tug Tubqhe
(Mathais 25:14-30)
11Thaus cov tuabneeg tseem taabtom noog Yexus has ntawd, Yexus txawm has ib zaaj lug pevtxwv rua puab noog ntxiv, ruaqhov Nwg tub moog yuav txug rua huv lub nroog Yeluxalees, hab puab xaav tas Vaajtswv lub Tebchaws tub yuav tshwm lug taamsim ntawd. #Math 25:14-30 12Yexus has tas, “Muaj ib tug txivneej kws muaj meejmom taabtom yuav sawvkev moog rua lwm lub tebchaws dleb-dleb, kws luas yuav muab nwg tsaa ua vaajntxwv, tomqaab ntawd nwg maamle rovqaab lug. 13Thaus nwg yuav moog, nwg hu nwg kaum tug tubqhe lug hab muab nyaj rua puab ib leeg 10 minas;#19:13: 1 minas yog npaum le koj khwv nyaj peb lub hlis. hab has rua puab tas, ‘Mej coj cov nyaj nuav moog ua laagluam moog txug nub kws kuv rov lug.’ 14Tabsis nwg cov pejxeem ntxub nwg heev, puab txawm khaiv tuabneeg lawv nwg qaab moog hab has tas, ‘Peb tsi kaam yuav tug tuabneeg nuav lug ua peb tug vaajntxwv.’
15“Thaus luas tsaa nwg ua vaajntxwv lawm, nwg txhaj rovqaab lug tsev. Nwg tau hu kuas cov tubqhe kws nwg muab nyaj rua lawm tuaj cuag nwg seb puab coj moog ua luam tsaam pistsawg. 16Thawjtug tubqhe lug has tas, ‘Tug tswv, 1 minas kws koj muab rua kuv, kuv coj moog ua luam tsaam 10 minas ntxiv.’ 17Tug tswv has tas, ‘Zoo heev, koj yog ib tug tubqhe kws zoo! Vim koj ncaajnceeg rua tej yaam kws miv-miv, kuv yuav tsaa koj ua tug kws kaav kaum lub nroog.’ 18Tug tubqhe thib ob lug has tas, ‘Tug tswv, 1 minas kws koj muab rua kuv, kuv coj moog ua luam tsaam 5 minas ntxiv.’ 19Tug tswv has rua tug tubqhe ntawd has tas, ‘Koj yuav tau ua tug kws kaav tsib lub nroog.’
20“Muaj dlua ib tug tubqhe lug has tas, ‘Tug tswv, 1 minas kws koj muab rua kuv nyob ntawm nuav; kuv muab phuam qhwv khaws ca zoo-zoo. 21Kuv ntshai koj, ruaqhov koj yog ib tug tuabneeg nruj heev. Koj muab tej kws tsi yog koj cog, hab koj sau tej kws tsi yog koj tseb.’ 22Tug tswv has rua tug tubqhe ntawd tas, ‘Tug nam tubqhe kws phem! Kuv yuav rautxim rua koj lawvle tej lug kws tawm huv koj lub qhovncauj lug! Koj tub paub tas kuv yog ib tug tuabneeg kws nruj heev, kuv muab tej kws tsi yog kuv cog, hab kuv sau tej kws tsi yog kuv tseb. 23Ua lecaag koj tsi muab kuv cov nyaj coj moog tso rua huv txhaab nyaj? Sub thaus kuv rov lug, kuv txhaj tau kuv qhov nyaj rovqaab lug hab tau paaj ntxiv?’ 24Tes nwg txawm has rua cov tuabneeg kws sawv ntawd has tas, ‘Mej cale muab 1 minas ntawm nwg coj moog ntxiv rua tug tubqhe kws muaj 10 minas.’
25“Puab has rua tug tswv has tas, ‘Tug tswv, tug ntawd tub muaj 10 minas lawm ne!’ 26Tug tswv teb tas, ‘Kuv qha rua mej has tas, tug kws muaj lawm, tseem yuav muab tsaav ntxiv rua nwg; tabsis tug kws tsi muaj dlaabtsi le, txawm yog yaam nyuas miv-miv kws nwg muaj xwb los tseem yuav muab rhu tawm ntawm nwg moog. #Math 13:12; Malak 4:25; Lukas 8:18 27Zagnua, kuv cov yeebncuab kws tsi kaam yuav kuv ua puab tug vaajntxwv, mej cale coj puab lug ntawm nuav hab muab puab tua taabmeeg kuv!’ ”
Yexus Moog Huv Yeluxalees Yaam Muajyeej
(Mathais 21:1-11; Malakaus 11:1-11; Yauhaas 12:12-19)
28Thaus Yexus has le nuav taag, Nwg txawm moog ua puab ntej rua sau lub nroog Yeluxalees. 29Thaus Yexus moog yuav txug lub zog Npefakhes hab lub zog Npethanis kws nyob ntawm lub Roob Txiv Ntoo-Roj, Nwg txawm khaiv ob tug thwjtim ua Nwg ntej moog, 30hab qha obtug has tas, “Meb moog rua huv lub zog kws nyob tom meb hauvntej. Thaus meb moog txug huv lawm, meb yuav pum ib tug mivnyuas neegluav kws yeej tsi tau muaj leejtwg caij dlua le, khi ca rua ntawd. Meb muab dlaws hab caab lug rua ntawm nuav. 31Yog muaj leejtwg nug meb has tas, ‘Meb muab dlaws moog ua dlaabtsi?’ Meb teb tug ntawd has tas, ‘Tug Tswv#19:31: Tug Tswv; lossis nwg tug tswv. xaav siv.’ ”
32Obtug txawm moog hab pum txhua yaam lawvle Yexus tau qha rua obtug. 33Thaus obtug tseem taabtom dlaws tug mivnyuas neegluav txujhlua, tug tswv neegluav ntawd txawm nug obtug has tas, “Meb muab dlaws moog ua dlaabtsi?”
34Obtug teb tas, “Tug Tswv xaav siv,” 35tes obtug txawm caab tug mivnyuas neegluav lug rua Yexus. Obtug hle obtug ob lub tsho ntev lug pua tug mivnyuas neegluav nrauqaum rua Yexus caij. 36Thaus Yexus caij tug mivnyuas neegluav taug kev moog, tej tuabneeg suavdlawg hle puab tej tsho lug pua huv txujkev.
37Thaus Yexus moog yuav txug lub nroog Yeluxalees, txug txujkev kws nqeg ntawm lub Roob Txiv Ntoo-Roj lawm, tes cov tuabneeg coob-coob kws yog Yexus cov thwjtim txawm cale pib ua Vaajtswv tsaug hab qhuas Vaajtswv nrov-nrov vim tej txujci tseemceeb kws puab tau pum: 38“Thov Vaajtswv foom koobmoov rua tug vaajntxwv kws lug huv Vaajtswv lub npe lug! Thov kuas sau ntuj muaj kev kaajsab lug hab kuas Vaajtswv tau ntsejmuag!” #Nnkauj 118:26
39Cov Falixais qeeleej kws nyob huv cov tuabneeg coob-coob ntawd has rua Yexus tas, “Xwbfwb, Koj has Koj cov thwjtim kuas nyob tuabywv!”
40Yexus teb puab has tas, “Kuv qha rua mej has tas, yog puab nyob tuabywv, los tej pobzeb yeej yuav pib qw tuaj le ntaag!”
Yexus Quaj Rua Lub Nroog Yeluxalees
41Thaus Yexus moog ze lub nroog Yeluxalees lawm, Nwg pum lub nroog hab Nwg txawm quaj vim hlub lub nroog ntawd; 42Nwg has tas, “Kheevlaam nubnua koj paub tas dlaabtsi txhaj yuav ua rua koj muaj kev kaajsab! Tabsis nwgnuav koj tsi pum tej ntawd. 43Muaj ib nub koj cov yeebncuab yuav tuaj puab ntsaayeej vij koj, hab yuav tuaj txhua cegkaum tuaj puav koj. 44Puab yuav ua rua koj hab cov tuabneeg kws nyob huv koj kuas puamtsuaj taag huv tuabsi. Puab yuav tsi tseg ib lub pobzeb kuas ca nyob lub chaw qub le, vim koj tsi paub tas lub sijhawm twg kws Vaajtswv tau lug paab koj lawm!”
Yexus Moog Rua Ntawm Lub Tuamtsev
(Mathais 21:12-17; Malakaus 11:15-19; Yauhaas 2:13-22)
45Dlhau ntawd, Yexus txawm moog rua huv lub Tuamtsev hab pib ntab tej tuabneeg kws tuaj ua laagluam kuas cale tawm moog. 46Nwg has rua puab tas, “Vaajtswv tej Lug tau sau tseg has tas, ‘Kuv lub Tuamtsev yog lub tsev thov Vaajtswv.’ Tabsis mej muab hloov lug ua qhov chaw rua tubsaab nkaum!” #Yaxaya 56:7; Yelemi 7:11
47Yexus najnub qha huv lub Tuamtsev. Cov thawj povthawj hlub, cov xwbfwb kws qha Kevcai, hab cov thawjcoj huv cov pejxeem xaav muab Yexus tua, #Lukas 21:37 48tabsis puab nrhav tsi tau kev ua dlaabtsi, vim tej tuabneeg suavdlawg nyam noog tej kws Yexus qha hab yeej tsi xaav kuas puab nplaam ib yaam dlaabtsi le.
Terpilih Sekarang Ini:
Lukas 19: HNJ2022
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2022 United Bible Societies. All rights reserved.