約翰 10
10
羊欄个比喻
1耶穌又講：「𠊎實在㧯你等講，入羊欄，無對門，反轉對別位𨃟過去个，就係賊仔，係強盜。 2對門入去个，正係羊个牧者。 3掌門个為佢開門；佢个羊認識佢个聲。佢照名仔喊自家个羊，帶牠兜出來。 4佢將自家个羊全部帶出來，就在牠兜个頭前行；佢个羊仔跈等佢，因為牠兜認識佢个聲。 5牠兜毋愛跈生份人，反轉會閃走，因為毋識生份人个聲。」
6耶穌㧯佢等講這個比喻，總係佢等毋會明白佢所講个係麼介意思。
好牧者耶穌
7所以，耶穌又㧯佢等講：「𠊎實在㧯你等講，𠊎就係羊个門。 8比𠊎先來个，全部係賊仔，係強盜；總係羊仔毋聽從佢等。 9𠊎就係門；對𠊎入來个，一定會得救，自由出入，尋到草埔。 10賊仔入來，就係愛偷，愛㓾，愛毀滅。𠊎來个目的係愛使𠊎个羊仔 #10:10 「𠊎个羊仔」原文直譯係「牠兜」。得到生命，就係豐豐富富个生命。
11「𠊎係好牧者；好牧者為到羊犧牲生命。 12若係請來个工人，毋係牧者，羊仔也毋係佢个，佢一看到豺狼來，就放掉羊仔逃走；豺狼攻擊羊群，趕散牠兜。 13工人逃走，因為佢係請來个，無關心羊群。
14-15「𠊎係好牧者。像阿爸認識𠊎，𠊎也認識阿爸；共樣，𠊎認識𠊎个羊，𠊎个羊也認識𠊎。𠊎為到牠兜犧牲生命。 16𠊎還有其他个羊，無在這羊欄中；𠊎一定愛將牠兜尋轉來，牠兜也會聽𠊎个聲；兩群愛合做一群，同屬一個牧者。
17「阿爸惜𠊎，因為𠊎甘願犧牲𠊎个生命，為到愛再得到生命。 18無人能將𠊎个生命搶走，係𠊎自願犧牲个；𠊎有權犧牲，也有權再得到它。這係𠊎對吾爸領受个命令。」
19 猶太人又為到這兜話引起紛爭。 20佢等當中有好多人講：「佢被鬼附身！佢發癲了！樣愛使聽佢？」
21也有兜人講：「被鬼附身个人無可能講出這種个話！鬼會醫好瞙目个目珠嗎？」
猶太人棄絕耶穌
22在耶路撒冷，慶祝獻殿節个時到了；該時係冬天。 23耶穌在聖殿个所羅門廊下行； 24猶太人圍等佢，對佢講：「你愛𠊎等疑狐到幾時呢？坦白㧯𠊎等講，你係基督麼？」
25耶穌應講：「𠊎早就㧯你等講過，總係你等毋肯信。𠊎奉吾爸个名所做个事就係𠊎个證據； 26總係你等毋信，因為你等毋係𠊎个羊。 27𠊎个羊聽𠊎个聲；𠊎認識牠兜，牠兜也跈等𠊎。 28𠊎賜佢等永遠个生命，佢等毋會滅亡；無人能將佢等對𠊎个手中搶走。 29吾爸將佢等賜給𠊎，佢比麼介都還較大 #10:29 「吾爸…還較大」有兜古卷係「吾爸所賜給𠊎个，比麼介都還較大」。，無人能將佢等對阿爸个手中搶走。 30阿爸㧯𠊎係一體。」
31這時，猶太人又拿石頭愛㧹佢。 32耶穌對佢等講：「𠊎識顯明阿爸愛𠊎做个多多善事給你等看；你等到底為㖠項事愛拿石頭㧹𠊎？」
33 猶太人講：「𠊎等毋係為到善事來㧹你，係因為你侮辱上帝！你不過係人，還敢自家當做上帝！」
34耶穌講：「你等个法律書敢毋係有寫，上帝識講：『你等係神』？ 35𠊎等知聖經个話係永遠毋會改變个。連該兜接受上帝真道个人，上帝也稱佢等做神； 36𠊎係阿爸所揀選又差派來世間个；𠊎講𠊎係上帝个孻仔，你等樣般又講𠊎侮辱上帝呢？ 37若係𠊎無行吾爸个事，你等就毋使信𠊎； 38若係𠊎有行，你等雖然毋信𠊎，也應當信𠊎所做个，好使你等確實知：阿爸在𠊎底背，𠊎也在阿爸底背。」
39因為恁樣，佢等又想愛捉佢，總係佢對佢等个手中閃走。
40耶穌又轉到約旦河个對面，到約翰頭擺行洗禮个所在，住在該位。 41有盡多人來就近佢。佢等講：「約翰毋識行過神蹟，總係佢所講關係這人个話全部係確實个。」 42在該位，有盡多人就信耶穌。
Terpilih Sekarang Ini:
約翰 10: THV12Hdb
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© The Bible Society in Taiwan, 2012
All rights reserved
© 台灣聖經公會版權所有 2012