Jọn 1
1
Ekpo Ọnhu aghuḍum
1Ẹḅel emiighom mọ, Ekpo Ọnhu phọ ịrol li. Ekpo Ọnhu phọ ịrolan ni Ẹnaan. Ekpo Ọnhu phọ kụ Ẹnaan phọ. 2Ẹḅel emiighom mọ Ekpo Ọnhu phọ ịrolan ni Ẹnaan. 3Ekpo Ọnhu phọ kụ ẹdi Ẹnaan ẹsighe bọ ẹlemom oomo phọ ạraraar phọ. Ịphen edi bọ mụ́lem mọ ọdi múlho bọ. 4Ekpo Ọnhu phọ kụ azin aghuḍum mọ, kụ aghuḍum mọ ạkuen kụ ạḍiḅaal awe. 5Ạḍiḅaal phọ rẹmu ghan sịphe ufiri phọ kụ ufiri phọ kőḍime ḍịḅaal phọ.
6 #
Mat 3.1; Mạk 1.4; Luk 3.1, 2 Ẹnaan irom ni oniin oye dị oghol mọ ạJon. 7Ọdi aru ọghaaph ịlo ạḍiḅaal phọ ọḅeni awe, pịdi oomo awe ọtuan nyọdi ọnaghan dom mọ kụ omeeraam. 8Ọdi rꞌaloor ọdi kạ́ḍiḅaal phọ ạḍiphe phọ. Aru ni ọghaaph ịlo ạḍiḅaal phọ bịn. 9Ọkar ạḍiḅaal phọ resoorom ghan bọ oomo awe rẹnyaaghian ghan ni omite ịsien aḅirini phọ.
10Ekpo Ọnhu phọ ịrol ghan ni sịen aḅirini phọ. Ọdi kụ ọdi Ẹnaan ẹsighe bọ ẹlemom aḅirini phọ, kụ aḅirini phọ úlegheri nyọdi. 11Ọdi aru ni ẹmha ọdi kụ awe ẹmha phọ ọdi nyọdi ụ́sighe ụloghoma. 12Kụ buniin ụsighe ni nyọdi ọloghoma, ọḅile omeeraam ḍien phọ ọdi. Bụen phọ kụ ẹdi ọdi ạngo bọ ịikpo mọ oḍighi nmụny phọ Ẹnaan. 13Bịdi úgbiighiom ologhi bịn kụ ọmaraghi bọ nmụny phọ Ẹnaan. Ụ́mar bịdi oopho ẹmaram, ịdipho eḍighinom ịyaar ịḅaal rꞌiphulupul. Ẹnaan rꞌaloor ọdi kụ Ọde phọ ạbidi.
14Ekpo Ọnhu phọ imite ni eye kụ erughan rꞌayira, kụ yoor ụmiin ni eghuan phọ ọdi, dị ẹḅaram ẹeḍiom, ọghor phọ rꞌigey. Ẹphen phọ kụ eghuan Ogina Ọony phọ Ẹnaan.
15ẠJon ạghaaph ni ịlo ọdi, ạlooghiom ghan mọ, “Ọphon phọ kụ ọdi mị ạghaaph ghan bọ aghol mọ, ‘Ọdi phọ ọony ịbaam-ọman ạmi ni kụ upu ni ịmi, ịdi eḍighi bọ ọdi odi ni kụ ogbi bọ ọmar ạmi.’”
16Ịsiphe ẹeḍiom ạḍiseph phọ ọdi kụ ẹdi yira mạar bọ ọghor atum ọghor. 17Ịdipho aMozis ạar bọ iilogh phọ aruom we kụ ẹdi ạJizos Kraist ạpham bọ ọghor phọ rꞌigey phọ arumom. 18Oye Ẹnaan kọ̋miin ghan. Ogina Ọony phọ ọdi, ọpo odi bọ ipholophool Ọde phọ bịn kụ ọdi agananami bọ nyọdi.
Ọghaaph phọ ạJon oburogh mụum mọ
(Matiu 3.1-12; Mạk 1.1-8; Luk 3.1-18)
19Mem mọ ạbuo aJu phọ aJeruselem orom bọ riil ạrikia rꞌạbuo aLivai mọ opuru Jọn mọ, “Nạ ạnhian?”
20ẠJon óghel ọphagharanaan phọ, ạḅile ghụn ni ạghaaph agananami amitiom mọ, “Mị kụ káMesaya phọ.”
21 #
Mal 4.5;
Dut 18.15, 18 Bịdi mọ, “Kụ nạ phọ ạnhian? Nạ Ilaija ḍụghum?”
Kụ ọdi mọ, “Eeye, kạ́mi.”
Bịdi opuru mọ, “Nạ kụ oyil phọ ọpo oguanaan bọ ḍụghum?”
Kụ ọdi ạphagharanaan mọ, “Eeye.”
22Kụ bịdi mọ, “Ụḅeni iyoor oye dị nạ aru! Yoor rọwa ọsighe ọphagharanaan phọ ạna oḅulemi ọghiomaan ạbuphe urom bọ iyoor. Nạ ạḅem ika ịlo aloor ạna?”
23 #
Azay 40.3
Kụ ạJon mọ, “ ‘Mị kụ ẹḍogh oye phọ rẹlooghi bọ ẹpe ẹdala phọ mọ:
“‘Kọghoron eesela eten dị Ọmoogh-we phọ katelhe!’”
Ịphen kụ ẹdi Azaya oyil phọ Ẹnaan ạḅem bọ.
24AFarisi phọ kụ urom bọ bịdi. 25Kụ bịdi opuru Jọn mọ, “Nạ kụ útu bọ Mesaya phọ, mụghumo Ilaija, ḅịle kẹn mọ oyil phọ ọpo oguanaan bọ, uḍighi ika kụ nạ raburogh bọ weye mụum mọ?”
26Kụ ạJon mọ, “Mị ạsighe mụum kụ raburogh ghan we. Ogbo anyina, oye ạmeera ni dị nyina ílegheri. 27Mị kụ ụphur aru nyọdi. Kụ mị ụ́kar ụman ghạlamo rꞌọkporion arokoro phọ ọdi.”
28Oomo phọ ịphen phọ imite ẹpe Betani ẹḅeenyom Ọphiiny ạJodan, sịphe ạJon ạrol bọ raburogh ghan we mụum mọ.
Ọony Oyool-Ọga phọ Ẹnaan
29Ḍio dị etum bọ pạ, kụ ạJon ạmiin Jịzos dị ratu ọteeny ọdi, kụ ạḅem mọ, “Ọphon phọ kụ Ọony Oyool-Ọga phọ Ẹnaan eseere bọ ọtagharanam aḅirini phọ esi ịkaraph phọ ạbidi! 30Ọphon phọ kụ oye phọ mị ạḅem bọ mọ, ‘Mị kụ ụphur aru nyọdi, kụ ọdi kụ ạbugh upu ịmi, ịdi eḍighi bọ ọdi odi ni kụ ogbi ọmar aani ạmi.’ 31Mị úlegheri ghan ọdo phọ oye phọ dị katu bọ, kụ ọlo mị uru ọsighe ghan ạmuum kụ owurogh awe oḍighi ịlo aweye Ịzirel kolegheri nyọdi.”
32Ịphen kụ ịdi ạJon ạghaaph bọ mọ, “Mị ụmiin ni dị Uwaloor Iigbia phọ ạḍua kꞌạke ịdipho ọkurughozo, kụ asoor kụ ạrolom ẹmhu ọdi. 33Mị úlegheri ghan ọdo phọ oye phọ dị katu bọ, kụ Ẹnaan phọ ẹpe irom bọ ịmi ọsighe ạmuum kụ owurogh awe kụ ịḅeni ịmi mọ, ‘Nạ kạmiin ni dị Uwaloor Iigbia phọ katu asoor kụ ạtolom ẹmhu oye. Ọdi kụ oye phọ rạsighe ghan bọ Uwaloor Iigbia phọ kụ kawuroghom we mụum.’ 34Mị mạmiin ni kụ ạkaaph bọ rịḅeni ghan inyina mọ ọdi kụ Ọony phọ Ẹnaan.”
Ạbuḅel ạbumatuan phọ ạJizos
35Ḍio phọ etum bọ pạ, ạJon rꞌịyal ạbumatuan ọdi ụḅile ni ọmeera sịphe phọ, 36kụ ọdi ạmiin dị ạJizos arelhe raten, kụ ạḅem mọ, “Pọrono sịen Ọony Oyool-ọga phọ Ẹnaan!”
37Ịyal phọ ạbumatuan phọ rọnaghan ịduon phọ, kụ ọdaph Jịzos. 38ẠJizos akiton aphogh kụ ạmiin dị bịdi rọdaph nyọdi kụ apuru mọ, “Nyina rẹwa ghan eeghe?”
Kụ bịdi ọphagharanaan kụ opuruom mọ, “Rạbai, nạ atugh ḍighen?” (Ẹmhu ạRabai phọ pọ ọtughemia.)
39Kụ ọdi mọ, “Itu ẹmiin aani,” kụ bịdi ọdaph ọghi kụ ọmiin esi phọ dị arugh bọ, kụ ọrolan rꞌọdi opol aḍio phọ ạḍiphe. (Eḍighi ephu inya asuo dulhe.)
40Sịphe ịyal phọ ạbuphe ọnaghanan bọ Jọn kụ ọdaph bọ Jịzos, oniin Ạndru umor aSaimon Pita. 41Egina amem bịn Ạndru ạghi ạmiin Saimon umor phọ ọdi, kụ ạḅeni mọ, “Yoor mọmiin Mesaya phọ!” (Ẹmhu aMesaya phọ pọ “AKraist”.) 42Kụ ọdi ạsighe Saimon aruomonaan Jịzos.
Kụ ạJizos aphogh nyọdi kụ ạḅem mọ, “Nạ aSaimon ọony phọ ạJon. Ḍien ạna kokol mọ aKifas.” (Ịduon phọ kẹn pọ aPita phọ ni, kụ ẹmhu phọ pọ “aḍighiigh”.)
ẠJizos ạmagh Filip rꞌạNataniel
43Ḍio phọ etum bọ pạ, ạJizos ạḅemom ologhi mọ ọno kạki Galili. Kụ ọdi ạwa Filip ạmiin kụ ạḅeni mọ, “Ụdaph aani ịmi!” 44AFilip phọ ọlo aBetsaida ẹmha phọ ạbuo Ạndru rꞌaPita. 45Kụ aFilip ạwa Nạtaniel ạmiin, kụ ạḅeni mọ, “Yoor mọmiin oye phọ ọpo ạrinya iilogh phọ aMozis rꞌịgeeghi ariil phọ Ẹnaan ẹghaaph bọ ịlo ọdi. Ọdi ạJizos ọony ạJosef, ọnyo ạNazeret phọ.”
46Kụ ạNataniel apuru mọ, “Igey kẹḍua ni Nạzeret etu ḍụghum?”
Kụ aFilip ạphagharanaan mọ, “Tue ni kụ ạmiin aani!”
47Kụ ạJizos ạmiin Nạtaniel dị ratu ọteeny ọdi, kụ ạḅem ịlo ọdi mọ, “Ịmiin aani. Ọphon phọ ọkaraghi ọnyo Ịzirel. Iigbegheḍiom loor ọdi ílho.” 48Kụ ạNataniel apuru nyọdi mọ, “Nạ ulegheri ịmi ika?”
Kụ ạJizos mọ, “Mị ụmiin ni nyịna, mem mọ nạ ạrol bọ pạ azin oreeny-ạfig phọ kụ aFilip nyịna kọ̋magh bọ.”
49Kụ ạNataniel mọ, “Ọtughemia, nạ kụ Ọony phọ Ẹnaan. Nạ kụ Ọdaam ẹmha phọ Ịzirel.”
50Kụ ạJizos mọ, “Nạ ụtuan dị mị mạḅeni bọ nyịna mọ mị ụmiin ni nyịna pạ azin oreeny-ạfig phọ kụ ameeraam bọ ḍụghum? Ạraraar dị nạ kạmiin kẹbugh epu ịphen phọ.” 51#Emi 28.12Kụ ọdi ạḅeni nyọdi mọ, “Mị ạkar rịḅeni ghan inyina mọ nyina kẹmiin ni okuaḍio phọ dị maghughuronu, rꞌạruukpaany phọ Ẹnaan dị rọsinyighu, ọḅile rosoorom Mọony phọ Oye.”
Terpilih Sekarang Ini:
Jọn 1: ẠḌI
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS