Matyo 7
7
Mə Tsɔ́ʼtə nə́ Əsáʼ pɨ pə́ Ndaʼə
(Luk 6.37, 38, 41, 42)
1Kɔ gho tsɔ́ʼtə əsáʼ pɨ pə́ ndaʼ ńjî ńgə́ kɔ əsê kə́ ńtsɔ́ʼtə əghô əsáʼə. 2Ńté ńgə́ əsêndú páʼ ghö tsɔ́ʼtə nə́ əsáʼ pɨ pə́ ndaʼ ə́wɨ́, pə́ yǐ kə́ tsɔ́ʼtə əghô lə́ ə́lə́ələ́. Ndzaŋ gho kə́ʼ nə́ fɛ̂ nə́ pɨ, lə́ tsɔʼə ndzaŋ pə́ yǐ nə́ kə́ kə́ʼ ə́fɛ̂ nə́ gho. 3Lə́ ghɛlə̂ akə̂ gho tə́ ńnáŋə mɔ́ akəmə atítíə á chî nə́ nələ́g mɔ́mɛ́ əgho ḿbə́ ńkě chî təmbɔʼ gho zə́ənə akəmə nkwə́ŋ páʼ a chî nə́ á nələ́g gho pô? 4Gho yǐ lǎa lə́ ə́lɛ́ pɔŋə́ sóŋ nə́ ndim gho ńgə́, tíʼ maŋ fógə mɔ́ akəmə atítíə nə́ á nələ́g gho, páʼ akəmə nkwə́ŋə á chî nə́ nə́ nəzô nələ́gə? 5Ngaŋməfɨg! peg ə́fógə akəmə nkwə́ŋ zə̂ a nələ́g gho ńjî ńgə́ gho chígə́ ńjɨ́ əliʼ əshîʼnə ńtíʼ ə́fógə mɔ́ atítí wə̂ á nələ́g ndim gho.
6“Kɔ nə́ fɛ̂ əpú páʼ pɨ́d ŋwaʼ nə́ á mbô məngwûə, pó yǐ sɛdnə̂ zoŋ fɛ́lə áwə́ənə́. Kɔ nə́ maʼ əpú pi əshîʼnə á mbô pəkwúneemə, pó yǐ nəŋtə̂ tsɔʼə nə́ məkoolə.”
Pítə, Chwaalə̂, Póʼtə
7Pítə nə, pə́ yǐ fɛ̂ nə́ pəənə́, chwa nə, pɨ yǐ zə́ənə, póʼtə nə, pə́ yǐ ŋáʼ ntsǒndɛ̂ á mbô pəənə́. 8Ńté ńgə́ ŋwu ntsəm páʼ ä pítə nə́, ä kwáalə, ŋwu páʼ ä chwa nə́, ä zə́ənə, nə́ ŋwu páʼ a póʼtə nə́, ntsǒndɛ̂ ə́ yǐ ŋáʼnə.
9Əwə a chîə á mə́m pɨ páʼ mbɔʼ mɔ́ əyǐə a pítə apéenə məkálə́ a fɛ̂ ngɔʼ á mbô yə́? 10Kɨ a pítə əshû a fɛ̂ nóolə á mbô yə́? 11Təmbɔʼ pɨ páʼ nə́ pə́ nə́ ngaŋə́ghɛlə təpɔŋ, nə jîə a mə́ fɛ̂ nə́ əpú pi əshîʼnə á mbô pɔ́ pɨ́ á yǐ ńtíʼ ḿbə́ pə́ ə́lɛ́ nə́ Tǎ əwɨ páʼ a chî nəpóolə, á mə́ fɛ̂ nə́ əpú pi əshîʼnə á mbô pɨ pó pítə nə́ yə́. 12Lə́ələ́ pə́ ńgə́ anuə atsəm páʼ gho kɔŋ nə́ ńgə́ mbɔʼ pɨ pə́ ghɛlə̂ á mbô gho, kə́ ńgɛlə̂ azô ə́lə́ələ́ á mbô pó, ńté ńgə́ lɛ̌ ndzaŋ noŋkə Mosisə pó ndzeʼkə́ məntúmə́sê ə́ sóŋ nə́.
Mɔ́ kə́nyaŋ Ntsǒnkáʼə
(Luk 13.24)
13Kwú nə́ pə́ nə́ mɔ́ kə́nyaŋ ntsǒnkáʼ ńté ńgə́ tə́kɔʼ ntsǒnkáʼ wə̂ lə́ yi páʼ wɨ́d pwɔ́dnə nə́, páʼ wɨ́d ə̈ ghɛn nə́ á ndú nəwûə, pɨ pə́ kə́ ńkwúnə ə́wɨ́ ńnə́ənə. 14Ńté ńgə́ ntsǒnkáʼ páʼ wɨ́d ghɛn nə́ á ndú nchîmbî ə́ kə́gə, ndú yi wɨ́ ə́ tyantə̂, pɨ pə́ kə́ nə̈ ńdaŋə̂ á mə́ ghɛn nə́ ə́wɨ́ pó kə́ ńkə́gə.
Atǐ pó Mənta Míə
(Luk 6.43, 44)
15Lɔg nə́ ndɛd nə́ məntúmə́sê mə́ məfɨgə, pö yǐəə á mbô pɨ lə́ ándó məmbéŋ mə́ ndzɛlə, ḿbə́ ńchî lə́ ándó əfunə́ páʼ nji ə́ tə́ nə́ ńdzáŋə ághóobə́. 16Nə́ yǐ jîə ághɔ́b lə́ nə́ mənta mɔ́b pö zə́m nə́. Pə́ chî lə́ ńdagə̂ pyâ á mə́m kɨ́kɔb kəənə lámə́sə á mə́m məŋkɨ́nkɨ́ə? 17Lə́ələ́ á pə́ ńgə́ atǐ yə əshîʼnə á zə́mə mənta mimə əshîʼnə, atǐə təpɔŋə á zə́mə mənta mə́ təpɔŋ. 18Mbɔʼ atǐ yə əshîʼnə á kě mənta mə́ təpɔŋ zə́m pô, atǐə təpɔŋə á kě mənta mimə əshîʼnə kə́ ńdzə́m pô. 19Atǐə atsəm páʼ á kě nə́ mənta mimə əshîʼnə zə́m pô pə́ kə́ʼ ḿmaʼə̂ əsê ńtoonə̂ nəkyɛlə́. 20Lə́ələ́ pə́ ńgə́ nə́ yǐ jîə ághɔ́b laŋ lə́ nə́ mənta móobə́.
Pɨ páʼ pö fɨg nə́ mbɨ əzoobə́
(Luk 13.25-27)
21Lə́ kě ŋwu ntsəm páʼ ä sóŋ nə́ nə́ maŋ ńgə́, “Mmaʼmbî, Mmaʼmbî” páʼ á yǒ nə́ kwúnə á mə́mə anuə nəfoonə nəpó pô, lə́ pɨ páʼ pö faʼ nə́ mənu páʼ Tǎ mə á nəpóolə ä lɔ nə́, lə́ pó páʼ pó yǐ nə́ kwú ə́wə́. 22A yǒ pə́ alě yi wɨ́ pɨ pə́ nɨ́ nə́ pə́ sóŋə á mbô maŋ ńgə́, Mmaʼmbî, pəg kə lə́ ńkě anǔəsê nə əlɛ́n əghô sóŋə, ńkəmə̂ pɛ̌sê ńkə́ ə́faʼ əkɨʼnəmə́nu pi nɨ́ nə́ nə́ əlɛ́n əghô? 23Maŋ tíʼ ńkyaʼə̂ ághɔ́b ńgə́, maŋ nə ńkě áwɨ́ jí pô, lǒo nə áwə́ənə́ á əshî maŋə, ngaŋə́ghɛlə təpɔŋ.
Ngaŋə́póomə Məláʼ Pɛ́n Pɛ̌
(Luk 6.47-49)
24Lə́ələ́ pə́ ńgə́ ŋwu ntsəm páʼ a zóʼ nə́ atséebə mə jɨ ńnéŋə zə́ələ́ á mə́mə afaʼ, a chî lə́ ándó ŋwu páʼ a nə ńjî nə́ ənu ḿbɔ́ ndɛ̂ əjǐə a ndu ngwúbə. 25Mbəŋ ghɛd ńtsóolə á əsê, mənkǐ mə́ kɔ́ʼ, kəfəələ a kɔ́ʼ ńtə́m ndɛ̂ yi wɨ́, lə́ jɨ́d pə́ ńkě wǔ pô, ńté ńgə́ pə́ nə ńtə́mə achîə ají lə́ á ndu ngwúbə. 26Lə́ ŋwu ntsəm páʼ a zóʼ nə́ atséebə mə jɨ, ńkě zə́ələ́ á mə́mə afaʼ néŋ pô a chî lə́ ándó akəkógə́ ŋwu páʼ a kə pɔ́ nə́ ndɛ̂ əjǐə á ndu məŋkwâʼlə̌. 27Mbəŋ ə́ yǒ ńdǒo mənkǐ mə́ kɔ́ʼ, kəfəələ á kɔ́ʼ ńtə́m ndɛ̂ yi wɨ́ ə́ wǔ tə ə́shaʼkə̂ tsɔʼə ntsəmə.
28Əghâ ándó Yeso a nə ḿməgtə̂ nə́ á mə́ sóŋ nə́ ndɛn mənu ghɛn lə, ndzeʼkə́ əjǐ ə́ kɨʼnə̂ a ŋwu məsɔŋə́ a nə ńchî nə́ aliʼ yi wə́, 29ńté ńgə́ a nə ńdzéʼkə ándó ŋwunə a túg nə́ mətəənə ńkě pə́ ándó ngaŋə́zéʼkə pənoŋkə pɔ́b pô.
Terpilih Sekarang Ini:
Matyo 7: azo
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk