توریت شریف: پَیدایش 6

1جدوں دُنیا اپر لوک بہُوں ہوݨے گئے تے اُنہاں نیاں تیہاں جمیاں، 2اللّٰہ تعالیٰ نے نیک بندیاں اُنہاں کُڑیاں کی تکیا جیہڑیاں بہُوں سوہݨیاں سݨ۔ تاں اُنہاں اِنہاں کڑیاں وِچوں چُݨی کے بیاہ کیتا۔ 3فِر رب آخیا، ”مہاڑی رُوح ہمیشہ واسطے اِنسان وِچ نی رہݨ لغی، کِیئانکہ او صِرف فانی مخلوق اے. ہُݨ تُوں بعد او 120 سالاں تُوں زیادہ جِیݨے نی رہݨ لغے.“

4اُنہاں دیہاڑیاں وِچ، تے بعد وِچ وی، جدُوں اللّٰہ تعالیٰ نے نیک بندے اُنہاں کُڑیاں کول گئے تے اُنہاں کولوں تیہاں تے پتر جمے، دُنیا وِچ دیو موجود سݨ. اے پُراݨے زمانے نے مشہور جنگجُو سݨ.

5رب تکیا کہ دُنیا وِچ انساناں نے غُناہ بہُوں ہوئی گئے اݨ، تے اُنہاں نیاں سوچاں تے خیال لگاتار صِرف پہیڑے ہی اݨ. 6او پَچھتایا کہ میں اِنسان کی بݨائی کے دُنیا وِچ رخی شوڑیا، تے اُس کی بہُوں دُکھ ہویا. 7اُس آخیا، ”جہیڑے میں اِنسان بݨائے سݨ میں اُنہاں ساریاں کی، زِیمی پر رینگݨے آلے تے ٹُرنے آلے جانوراں تے پرندیاں سمیت، ختم کری شوڑساں. میں پَچھتاݨا آں کہ میں اُنہاں کی بݨایا سی.“ 8پَر رب حضرت نُوح پر خُوش سی۔

9حضرت نُوح نا قصہ اے اَے۔

حضرت نُوح اِک چنگے تے راستباز بندے سݨ، تے اپݨے زماݨے نیاں لوکاں وِچ صِرف او ہی اِک نیک بندے سݨ۔ او قُربِ اِلٰہی وِچ رہݨے سݨ۔ 10حضرت نُوح نے تہرے پترسݨ، جنہاں نے ناں سام، حام تے یافثؑ سݨ۔

11پر دنیا نے لوک اللّٰہ تعالیٰ نی نظر وِچ بِگڑے وے سݨ، تے پُوری دُنیا ظلم و تشدد نال پہری وی سی. 12جِتھے وی اللّٰہ تعالیٰ تکݨا سی، دُنیا نے سارے لوک خراب سݨ، کِیئانکہ اُنہاں ساریاں اپݨے طور طریقے بِگاڑے وے سݨ. 13اِس واسطے اللّٰہ تعالیٰ حضرت نُوح کی آخیا، ”میں ساریاں لوکاں کی ختم کرنے نا فیصلہ کیتا، کِیئانکہ پُوری دنیا ظلم و تشدد نال پہرݨ گئی اے۔ میں اُنہاں کی زِیمی سمیت بِلکل تباہ کری شوڑساں. 14پر تُوں آپے واسطے سرُو نی لکڑی نی اِک بڑی کشتی بݨا، تے اُس وِچ کوٹھریاں تیار کری کے اُس نے اندر تے باہر تارکول لائی شوڑ۔ 15اِس طرح کریاں کہ کشتی نی لمبائی 450 فُٹ، چوڑائی 75 فُٹ، تے اُس نی اُنچائی 45 فُٹ رخیاں۔ 16کشتی نی چھت اِس طرح بݨایاں کہ اُس نے تھلے ڈیڈ فُٹ نا گلہ ہووے. تے کشتی نے اِک پاسے دروازہ رخیاں، تے اُس نیاں تہرے منزلاں بݨایاں۔ 17میں اِتنا بڑا سیلاب پیہجساں کہ او زِیمی نے سارے جانداراں کی ماری شوڑسی. زِیمی پر سب کج فنا ہوئی جاسی۔ 18پر میں تہاڑے نال مہاڑا عہد قائم کرساں. اِس واسطے تُوں کشتی وِچ بہی جا، تے تہاڑے نال تُہاڑی زناݨی، تُہاڑے پُتر تے اُنہاں نیاں زناݨیاں وی ہوݨ۔ 19فِر تُوں جانوراں نی ہر قسم نا اِک اِک جوڑا اپݨے نال کشتی وِچ رخیاں، تاکہ او تہاڑے نال جِیݨے رہݨ۔ 20ہر قسم نے پرندے، زِیمی پر ٹرنے تے رینگݨے آلے جانور جوڑیاں وِچ تُہاڑے کول اچھسݨ تاکہ او وی جِیݨے رہݨ۔ 21تے ہر قسم نیاں کھاݨے نیاں چیزاں وی آپے کول رخی کہن، تاکہ اے تُساں تے جانوراں نے کھاݨے واسطے ہوݨ۔“

22جس طرح اللّٰہ تعالیٰ آخیا، سب کُج حضرت نُوح اُسے طرح ہی کِیتا۔

Terpilih Sekarang Ini:

توریت شریف: پَیدایش 6: phr

Highlight

Kongsi

Salin