Matyo 24
24
(Mak 13:1-2; Luk 21:5-6)
Yeso gâ mbɔʼ aŋu e ma ngo tsɔŋɔ ndɔngwe kɛ́ ngɛ
1Èndzobo chɛ Yeso à nyɛrɛ efwɔ ndɔngwe kɛ sa ngɔ̀ɔ ngɛ, bɔ bɛɛrɛ abwa ngɔ zeʼ sa tee na aŋu a me byɛ ndɔngwe kɛ̀ è me nara ngɛ. 2Yeso gâ ebe angɔ kpe, “Ɔ̧̀ɔɔ mbɔn zɔ ela bɔnɔ gimkpaʼ, mmɛ ga endɔn kpe etye deʼ eŋwàʼ ke ma ngo nɔ afwɔ mɔ bo, bɔ ba ngo mùnù atye zɔnɔ gimkpaʼ sàa a chwâ.”
Ǹgoʼro mane enyii
(Mak 13:3-13; Luk 21:7-19)
3Aŋu Yeso à me tsɔmɔ edɔm egu Olifs ngɛ, bɔ bɛɛrɛ abwa ngɔ zeʼ ebe engɔ ene egeʼ ma gà ebe engɔ kpe, “Ngà toʼro èndzobo chɛ abwa zɔnɔ gimkpaʼ ma ngo gli ngɛ gɛ̀rɛ̀ tòʼrò anɛ̂ yɛ a ma ngo tee kpe ne endzobo njɛ é zeʼ mane endzobo ebe ese é ngùdù ngɛ.” 4Yeso gíì ebe angɔ kpe, “Mbɔn zɔmmɔ angɔn, mbɔn ke le gho deʼ ndooro angɔn bo, 5mbɔʼnga bɔ akɛkɛ ba ngo zeʼ sa ndooro kpe mbɔɔ ne zeʼ ene ekumu ngu, gɛ̀rɛ̀ ma ga kpe ‘Mmɛ na Ǹtɔmzhwaʼa’ ene aghɛʼ zɔnɔ, e ndooro bɔ akɛkɛ. 6Mbɔn ba ngo zo bɔ ma ngwè ebiri ebara mfɔn gɛ̀rɛ̀ zo ekɔn ene ebiri e nyɛrɛ abɛɛ tsɛrɛ, bɛʼngɛ mbɔn ka bum, abwa zɔnɔ ya gli, e ke me tee kpe endzobo ngùdu shi zeʼe bo. 7Ebɛ ba ngo ngwè àmɔ̀ àmɔ̀, m̀fɔ̀rɔ̀ gɛrɛ sa ngwè m̀fɔ̀rɔ̀, jɛbo ya ngo nyii chwâ gɛrɛ binni akwâ gimkpaʼ. 8Abwa zɔnɔ ya ngo mwɔ na aye me kɛʼ é be, ŋwɔ klada sa nɔmɔ engɔ nɔ.
9Angɔ ba ngo bèrè angɔn ge angɔn eblabwo abɔ byɛ e ma ngo ndɛ̀ʼ enyii endɔn gɛ̀rɛ̀ zhudu angɔn ngɛ. Bɔ gimkpaʼ ba ngo gwè angɔn mbɔʼ mmɛ. 10Efwɔ endzobo ǹgoʼ zɔnɔ, bɔ akɛkɛ ke ma we le ebɛrɛtaa ene mmɛ bo. E ba sa fɛ̀rɛ̀ enji egho we gɛrɛ sa gwè egho we. 11Éngɛ bàmɛnɛkɔn andɔɔ akɛkɛ ba zeʼe ndooro bɔ akɛkɛ. 12Ǹchù ya ngo ghɛʼ akwâ gimkpaʼ ene aghɛʼ yɛ edoʼ yɛ bɔ à me le ene abɔ abê ngɛ sa myɛ. 13Bɛʼngɛ abɔ e ma ngo klini etaa bwɛn anji ngùdu ngɛ, e ba ngo pwèerè angɔ. 14E ba ngo sɛ̀ɛrɛ̀ ekɔn ǹchwɔ̀ mbɔʼ ebwa m̀fɔ̀ Ngwe efwɔ ese gimkpaʼ mbɔʼtye bɔ gimkpaʼ nɛɛ éŋwaʼa, éngɛ ese ngùdu.”
Ambokɔʼ Èklɔ̀
(Mak 13:14-23; Luk 21:20-24)
15“Mbɔn ba ngo zɔ ambokɔʼ yɛ a ma ndɛʼ èklɔ̀ yɛ Àmɛnɛkɔn Ngwe Danyɛ à ga ngɛ, a me tama efwɔ ndɔngwe kɛ̀.” (Zɔʼrɔ nɛɛ ǹji ene ebwa wunɔ). 16Éngɛ abɔ byɛ e ma tsɔmɔ a Judeya ngɛ, dɔrɔ ngɔ̀ɔ namma edɔm agu. 17Egho wɛ me tama ekere ndɔ mɔ ngɛ ke we kla ngɔ̀ɔ nu ala deʼ efwɔ ndɔ shi sa dɔrɔ bo. 18Egho wɛ mwɔ ekwâ ngɛ ke kpe mbè we klo nu ǹdidɔ̀m ndze bo. 19Ǹgoʼ ya ngo mwɔ̀ efwɔ enji byɛ ebe ayebum mane ebli bwɔ bwad. 20Mbɔn tsaʼra Ngwe kpe ebwa wunɔ ke gli ne endzobo enimi m̀bò kà anji ku̧ru bɔ Juu bo. 21Ǹgoʼ yɛ e ma ngo mwɔ efwɔ èndzobo chɛ ngɛ yà me ngoʼo fɔɔ ǹgoʼ yɛ à shi dye mwɔ nyɛrɛ ene eklada ese é bwɛn ànchwɔ̀ ngɛ. Tsɛ̀ʼ ebwa tsɛrɛ gɛrɛ ma yà mwɔ ne ewunɔ nɔ bo. 22Mala Ngwe a ne shi chweere enji ǹgoʼ byɛ deʼ bo, shi gho deʼ ŋwaʼ aye ne ma tyè ekɔʼɔ bo. Ngwe a wu chweere anji bɔnɔ ene egha abɔ byɛ engɔ a shi pwɔ̀nɔ angɔ ngɛ. 23Èndzobo chɛ, mala gho deʼ ga endɔn kpe, “Kɔʼɔ Ǹtɔmzhwaʼa yɛ zɔ̀ kà è ze ande.” Ka ebɛrɛ ene engɔ le. 24Bɔ akɛkɛ ba ngo sa gà andɔɔ endɔn kpe mbɔɔ ne Ǹtɔmzhwaʼa, akɛkɛ gɛrɛ zeʼe byɛ e mwɔ bàmɛnɛkɔn andɔɔ ngɛ. E ba ngo le anɛ̂ abwa kɛ́ mane abwa zodo zodo é ndooro angɔn, ka de mwɔ abɔ byɛ Ngwe à shi chidi ngɛ mala e me zamma. 25Mbɔn zhuru, mmɛ shi tòʼro abwa zɔnɔ endɔn dye a sa gli. 26Mala bɔ ga endɔn kpe, mbɔn kɔʼɔ engɔ wɛ efwɔ akwânked, mbɔn ka aŋu ngɔɔ, kà e ga kpe è wû è me namma anɔ, mbɔn ke le ebɛrɛ ene angɔ bo. 27Ŋwɔ gho wa ngo zeʼ na m̀bò ma ghɔbɔ ma pɛɛ akwâ ezob bɔ gimkpaʼ ma zɔ nyɛrɛ abɛɛ gli etaranchwe ngɔ̀ɔ bwɛn abɛɛ turu etaranchwe. 28Afwɔ yɛ ala ku mwɔ ngɛ edwaʼa ba kɛdɛ aŋu.
Èndzobo chɛ Ŋwɔ Gho ma ngo zeʼe ngɛ
(Mak 13:24-27; Luk 21:25-28)
29“Endzobo ŋwaʼ yɛ enji ǹgoʼ byɛ ma fɔɔ ngɛ, etaranchwe fa ngo di fíi, eta ne wu bla bo, ńtɔrɔta turu nyɛ̀rɛ̀ zèʼe ezob, ela gimkpaʼ ezob gɛrɛ ba ngo njiʼri àmɔ̀. 30Éngɛ èndzobo chɛ anɛ̂ Ŋwɔ Gho ma ngo gli ezob ngɛ, bɔ gimkpaʼ edɔm chwâ ba ngo kù̧u aŋu e ma zɔ aŋu Ŋwɔ Gho ma zeʼe nè ekama mane enɛŋɛrɛkɛ efwɔ m̀bɛ̀ʼ ngɛ. 31Èndzobo chɛ e ma fee emboo ngɛ, è wa ngo saa engere mɔ efwɔ ebɛɛ kwɛ̀ edɔm chwâ, e klada ene abɛɛ ese zɔ ngɔ̀ɔ ngùdu ene azê, è shùnu bɔ mɔ byɛ a shi pwɔ̀nɔ ngɛ.”
Ebwa é bɛɛrɛ mbɔʼ azɔd akla
(Mak 13:28-31; Luk 21:29-33)
32Yeso ga ebe bɔ bɛɛrɛ abwa mɔ kpe, “Shi azɔd akla tee ebwa wu endɔn, èndzobo chɛ atɔ mɔ klada sa tsɔʼrɔ ngɛ, mbɔn nɛɛ kpe enimi m̀bò a sa zamma é zeʼe. 33Nkirinkin endzobo mbɔn zɔ anɛ̂ bɔnɔ ngɛ mbɔn nɛɛ kpe engɔ a sa zamma é zeʼe, a shi mbin. 34Mmɛ ga éŋwaʼa endɔn kpe ekyɛ bɔ zɔnɔ yà ne kudu gimkpaʼ bo bwɛn èndzobo chɛ abwa zɔnɔ ma yà gli ngɛ. 35Ezob mane chwâ yà fɔɔ bɛʼngɛ ega ngu yà ne fɔɔ.”
Gho deʼ ke nɛɛ anji yɛ kà èndzobo chɛ abwa zɔnɔ ma ngo gli ngɛ bo
(Mak 13:32-37; Luk 17:26-30, 34-36)
36Yeso wu ga ebe bɔ bɛɛrɛ abwa mɔ kpe, “Tsɛ̀ʼ gho deʼ me nɛɛ anji kà endzobo yɛ abwa zɔnɔ ma ngo gli ngɛ bo, ka de mwɔ engere ezob kà ŋwɔ Ngwe, à tye àtɛ zhiʼ me nɛɛ. 37Èndzobo chɛ Ŋwɔ Gho ma wu zeʼ ngɛ, e yà mwɔ ne ebwa à gli endzobo Noa ngɛ. 38Efwɔ endzobo Noa, aŋu ndim a ne shi shwe bo ngɛ, bɔ a na nde ma ŋwɔ, anɔm nu aye, e gɛrɛ ma ndɛʼɛ aye ene elô bwɛn anji yɛ Noa à nyii efwɔ ekpe ngɛ. 39Angɔ à ke nɛɛ ebwa wɛ à ma gli ngɛ bo, bwɛn èndzobo chɛ ndim à shwe zɔɔ angɔ bɔ gimkpaʼ ngɛ. Na aŋu e ma ngo mwɔ èndzobo chɛ Ŋwɔ Gho ma ngo zeʼ ngɛ. 40Èndzobo chɛ bɔ fyee ba ngo ma fwɛʼ ekwâ, e shuʼ egho bi, êwè tye. 41Aye fyee ba ngo ma gwo ela afwɔ gwo ela, e shuʼ eŋwàʼ, êwè tyɛ. 42Éngɛ mbɔn zɔmmɔ angɔn sa kɔʼɔ mbɔʼnga mbɔn ke nɛɛ endzobo yɛ masa ngɔn ma ngo zeʼ ngɛ bo. 43Mala gho ndɔ à me nɛɛ èndzobo chɛ ejii ma zeʼe ǹklì ngɛ, è ke ma bwɛrɛ bo, è wa tsɔmɔ ekere sa kɔʼ ne bɛrɛ kpe ejii toʼo ndɔ ngɔ bo. 44Éngɛ ngɛ, mbɔn gɛrɛ ndèerè angɔn mbɔʼnga Ŋwɔ Gho wa ngo zeʼe efwɔ endzobo yɛ mbɔn ne ma kɔ̀ʼ engɔ bo ngɛ.”
Gho afwɛʼ wɛ ma ga éŋwaʼa ngɛ na awɛ?
(Luk 12:41-48)
45Enjitsɔ gho afwɛʼ wɛ ma ga éŋwaʼa gɛ̀rɛ̀ me zɔmmɔ ngɛ na awɛ? Gho afwɛʼ éŋwaʼa ne egho wɛ masa ma gè engɔ ene ato ebe abɔ afwɛʼ be, e ma ndɛʼ ende ebe angɔ ene endzobo ǹchwɔ̀ ngɛ. 46Ato ebe bɔ afwɛʼ wa ngo gɛnɛ amɔ èndzobo chɛ masa mɔ ma zeʼe zɔ engɔ ma fwɛʼ afwɛʼ zɔnɔ ngɛ. 47Mmɛ ga éŋwaʼa endɔn kpe masa wɛ wa ngo gè egho afwɛʼ wunɔ shi è sa kɔʼɔ ela ngɔ gimkpaʼ. 48Bɛʼngɛ mala gho afwɛʼ ngɔ mwɔ gho bɔɔbɔɔ, ma zhuŋu efwɔ etaa mɔ kpe, “Masa ngu ke ma zamma zeʼe bo, 49gɛ̀rɛ̀ klada sa sɔmɔ abɔ afwɛʼ abê, sa nde sa ŋwɔ mɔm mane àŋwɔ mɔm. 50Masa mɔ wa ngo ghɛɛbɛ efwɔ anji mane endzobo deʼ yɛ engɔ ne nɛɛ bo ngɛ. 51Masa mɔ wa ngo ndɛʼ enyii kɛ́ ebe engɔ, sàa engɔ sa tsɔmɔ nè bɔ ndooro aghɔɔ, afwɔ e ma ku̧u ma kwo ashwɔ ngɛ.”
Terpilih Sekarang Ini:
Matyo 24: nbt
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2022, CABTAL