Mataayo 4
4
Sitaani kaasakya Yeesu
(Maariko 1:12-13; Ruuka 4:1-13)
1Kimwi Mwoyo Omutaakatiifu ˆnaatangasha Yeesu ˆnaamusira mw-ibhara insonga Sitaani#4:1 Sitaani. Ringira riingʼana rinu mu-Mangʼana Amakomeeye. amusakye. 2Yeesu ˆnaamara-yo nsiku makumi gana, mu-ngeta na mu-mwisi eeyimirega ebhyokurya. Ginsiku giyo ꞉gyeejire gyawa, omweko ngumuruma muno. 3Niwe Sitaani ˆnaamuuja-ko ˆnaamubhwira ati, “Raabhe uri Mwana wa Nyamuwanga, siiga amagina ganu gayinduke gabhe mikaate.” 4Nawe Yeesu weeki ˆnaamusubhya ati, “Ikaamirwe mu-Makaamo Amataakatiifu ati, ‘Obhurame bhwa omuunu bhutari ku-bhyokurya era, tari akabha muungwa ku-goone kutyo ganu Nyamuwanga kaaika.’#4:4 Ringira Ekiyiityo kya Ebhiraagiro 8:3.”
5Niwe Sitaani ˆnaamuyikya mu-musi omutaakatiifu ogwa Yerusareemu, ˆnaamuyambaasha iiguru ku-kiisonge kya riiyekaru#4:5 Riiyekaru. Ringira riingʼana rinu mu-Mangʼana Amakomeeye. rya Nyamuwanga, 6ˆnaamubhwira ati, “Raabhe ni awe Omwana wa Nyamuwanga, iijungira ansi, kwa okubha ikaamirwe mu-Makaamo Amataakatiifu ati,
‘Nyamuwanga kaaragirira bhaamaraayika bhaaye bhakwangarire,
na owugwira mu-mabhoko geebhwe,
waasiga okwikuujura okuguru kwawo kw-igina.’#4:6 Ringira Ijabhuri 91:11-12.”
7Nawe Yeesu ˆnaamubhwira ati, “Kweki ikaamirwe ati, ‘Waasiga okusakya Raatabhugenyi Nyamuwanga waawo.’#4:7 Ringira Ekiyiityo kya Ebhiraagiro 6:16.”
8Gayo ꞉geejire gaawa, Sitaani ˆnaayikya Yeesu iiguru ku-kiima ekireera muno. ˆNaamweresha ginkama gya ekyaro kyone kutyo, na obhuniibhi bhwagyo, 9ˆnaamubhwira ati, “Ukanyiifukamira nundamya, enikuyaana ebhiinu bhiyo bhyone kutyo.” 10Niwe Yeesu ˆnaamusubhya ati, “Sooka anu, Sitaani! Ikaamirwe mu-Makaamo Amataakatiifu ati, ‘Ramya Raatabhugenyi Nyamuwanga waawo, ukorere emirimu omwene era.’#4:10 Ringira Ekiyiityo kya Ebhiraagiro 6:13.”
11Niwe Sitaani ˆnaamusiga. Ayoayo, bhaamaraayika bha Nyamuwanga mbaaja mbamusakira.
Yeesu kaamba emirimu gyaye abhweru
(Maariko 1:14-15; Ruuka 4:14-15)
12Mmbe, Yeesu ˆnoongwa ati Yowana Omubhatiisha ꞉aariga abhoyerwe mu-jeera. ˆNeemuka ayo, ˆnaasubha Gariraaya. 13Gariraaya eyo, Yeesu ˆnaangʼaanya okusooka mu-musi gwa Naajareeti, ˆnaagenda okwikara mu-musi gwa Kaperinawumu. Kaperinawumu ꞉gwariga guri ku-ngego ya omwaro gwa Gariraaya, mu-bhyaro bhya Jabhurooni na Naafutaari. 14꞉Aagendere eyo, insonga riingʼana rinu Nyamuwanga ꞉aaikire okuturira ku-muragi Isaaya rikuumire ati,
15“Niri na iingʼana ku-bhaanu bha mu-kyaro kya Jabhurooni na ekya Naafutaari,
bhanu bheekaaye ayeeyi na omwaro gwa Gariraaya,
na iingʼambu ya oruuji rwa Yorodaani,
Gariraaya enu bheekaaye abhaanu bha mu-bhyaro ebhindi.
16Abhaanu bhanu bheekaaye mu-kisuute,
woori abhaaja okurora obhweru obhunene,
na bhanu bheekaaye mw-irengeesi rya orufu,
bharimirikirwa muna obhweru bhwa riisuubha rya katondo.”#4:15-16 Ringira Isaaya 9:1-2.
17Okwambira ku-kabhaga kayo, Yeesu ˆnaamba okuraasisha abhaanu ati, “Munuge ebhikayo bhyemwe muyindukire ku-Nyamuwanga, kwa okubha obhukama bhwa mu-rwire bhuri ayeeyi!”
Yeesu kaamba okusora abheeyigira bhaaye
(Maariko 1:16-20; Ruuka 5:1-11)
18Bhunu Yeesu ꞉aaribhataga ku-ngego ya omwaro gwa Gariraaya, ˆnaarora bhaanu bhabhiri bhari bha nda yimwi, Simooni unu ꞉aatogwaga Peetero na Ndereya. ꞉Bhaariga mbatega riikokooro, kwa okubha abhabhiri bhayo ꞉bhaariga bhari bhategi. 19Yeesu ˆnaabhabhwira ati, “Muuje, mubhe bheeyigira bhaani! Anye nibhakore mubhe bhategi bha abhaanu.”#4:19 Bhategi bha abhaanu. Insonga yeende-ko ni ati bhasooshe abhaanu okusooka mu-bhikayo bhyebhwe, mbabhakumanya amwi bhabhe mw-ikemba rya abhaanu bha Nyamuwanga. 20Ayoayo, mbasiga riikokooro ryebhwe, mbamuseeta.
21Yeesu ˆnaagenda-wo imbere kutooto, ˆnaarora abhamura bhabhiri abha Jebhedaayo, Yakobho na Yowana. Abhabhiri bhayo ꞉bhaariga bhari mu-bhwato bhari amwi na esemwene, mbasobhooraga riikokooro ryebhwe. Yeesu ˆnaabhabhirikira. 22Ayoayo mbasiga ayo obhwato na esemwene, mbamuseeta.
Yeesu keeyigisha abhaanu na okuwosha abharwaye
(Ruuka 6:17-19)
23Yeesu ꞉aariga ˆneeyinda Gariraaya yoone kutyo ˆneeyigishaga mu-masunagoogi#4:23a Mu-masunagoogi. Ringira riingʼana Riisunagoogi mu-Mangʼana Amakomeeye. geebhwe. ꞉Aaraasishaga abhaanu Amangʼana Amajomu#4:23b Amangʼana Amajomu. Ringira riingʼana rinu mu-Mangʼana Amakomeeye. aga obhukama bhwa mu-rwire, ˆnaawoshaga na amarwara ku-mbaga. 24Ginkuma gya Yeesu ngiswerana ekyaro kya Siiriya kyone kutyo. Abhaanu mbamusirira abharwaye bheebhwe bhoone kutyo, bhaanu bha amarwara ga mbaga nyafu, na bhanu bhaanyankire, bhanu ꞉bhaariga bhawungirwe ebhiwi, abhagwi bha ekitwe, na bhanu ꞉bhaariga bhafuuye emibhiri. Yeesu ˆnaabhawosha bhoone kutyo. 25Mmbe, bhaanu bhaafu muno mbamuseeta okusookerera Gariraaya, Dekapoori, Yerusareemu, Ebhuyawudi na ku-ngʼambu ya oruuji rwa Yorodaani.
Terpilih Sekarang Ini:
Mataayo 4: kya
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2023, Wycliffe Bible Translators, Inc. All rights reserved