Májiye 4
4
Setani n'aŋes káhinu Yesu eehoofoor
(Mark 1.12-13; Luk 4.1-13)
1Náami Búwejet Beenabe bu ni bija ni Yesu t'eramba i kaanuku Setani eeŋeso káhinu eehoofoor. 2N'ariiko kunak bakan bákasuba lám áñoofaariit; bujoñjol nu bujoko. 3Setani n'atof aŋaaboo abe n'aano:
—Kane arko múniyo awe a̱amo fu Añi ite Atambatun, a̱sok bujuju bonde beehosanooro, béeyemi kumburu.
4Bare Yesu n'ásafino aano:
—Busokeesok ti *Míkiñjin mu kaanuku: «Búñoofoiit barebare biyino fu kákinineŋ húŋgowulan n'aroŋ, bare ni kirim ku fe k'Atambatun kaŋk'asok#4.4 Buluwa bu 8.3..»
5Ahaban, Setani n'aja ne o Serusalem, hikinu heenabe hu. N'asiiŋano t'ewulen ite *Enuuf ite Atambatun 6abe n'aano:
—Arko múniyo awe a̱amo fu Añi ite Atambatun, a̱julan bija t'etaam; ábuki busokeesok ti Míkiñjin mu kaanuku:
«Atambatun kasoku emalaka yeene keejukari,
abe boko kayitii tu sumoŋiiin
kaanuku humuum kuwoti itim kíbiŋan t'ejuju n'a̱nuf#4.6 Élookiin i 91.11-12..»
7Yesu n'ásafino aano:
—Busokeesok yooŋ ti Míkiñjin mu kaanuku: «Atum'a̱jeeŋan Atemit Atambatun úuwe#4.7 Buluwa bu 6.16..»
8Setani n'asooñ aja ne o ti hike hirij heeliite-liit. N'áwufooro aduna i ereyi fe, n'ebaj i yeeemo i te yo 9abe n'aano:
—Buroon bondu fe, íñje kawunii bo kane arko á̱asukaayam abe n'a̱sokorooram.
10Náami Yesu eeeno:
—A̱ja Setani! Ábuki busokeesok ti Míkiñjin mu kaanuku: «Á̱sukaay Atemit Atambatun úuwe, abe n'á̱jiŋgitan hágilao, o unoono taŋ#4.10 Buluwa bu 6.13..»
11Ahaban, Setani n'awaso toko eeja. Náami emalaka kabina ti Yesu abe ni katofotooro.
Yesu n'ajab burok boone Gálile
(Mark 1.14-15; Luk 4.14-15)
12Hi Yesu ajame hu kaanuku Saaŋ akuleekul#4.12 A̱juk Májiye 14.3., n'aja *Gálile. 13Ariikeit *Nasaret, bare n'aja akin *Káfernawom, eke ésuk yeeemo ti kaakaŋa *han hite Gálile, t'etaam ite Sabulon ni Neftali. 14Iyu i bije fii kaanuku hirim honde *h'Esayi *ayiŋana ite Atambatun abine hu asok ni hibaj. Aanaan:
15«Etaam ite Sabulon, n'etaam ite Neftali,
inde han hu, ni kane a̱kan kaayelu kite *Surdeŋ,
Gálile, ésuk ite keenooto ku Esuwif!
16Bokondu kéeyemie ku t'ébaani
kajukajuk meejaaŋe wililil!
Abe kéekinaanie ku t'ésuk yéebaanie i yite eket i,
meejaaŋe mu míŋaasino#4.16 Esayi 8.23-9.1.!»
17Áfiitin tu kóŋkeyin ni Yesu ajabe fu kawaare, aŋ'aane ésuk i:
—Ariwatanooro kinij koonuun keejakut ku, ábuki *Jáyi jite Atambatun júlohenno!
Yesu n'aruw embaala bakabaakiir
(Mark 1.16-20; Luk 5.1-11)
18Yesu áyemia ti bija bu ti katafa kite *han hite *Gálile, n'ajuk embaala bákasuba, Simoŋ (ii kaane Piyeer) n'at'o Andere ti káfiiten embaalu ti han hu. 19N'aaniin:
—Áririboorin n'íñje, abe n'iŋ'íhinuun áriiyemi embaala kúŋgowulan.
20Toko-toko yooŋ, ni kawasan simbaalu sooniin keeriboor ne o.
21Katofa diŋgilis, n'ajuk Saakiin n'at'o Saaŋ, biñi bite Sebede, boko tu busoona booniin ni faafiin Sebede ti kajokoor simbaalu sooniin. N'aruwiin. 22Toko-toko yooŋ, ni kawas faafiin nu busoona bu keeriboor ne o.
Yesu n'awaare, abe n'aritan kéesomute ku
23Yesu n'añaahoor *Gálile ereyi fe, aŋ'aliiken ésuk i ti *ñáalawum ñu, n'awaare Hirim Heetoofe hu hite *Jáyi jite Atambatun, abe n'aritan ésomuta i, bakate wúsomut wánowan, ni kéetime ku fe. 24Huruwu hoone ni hijamo t'ésuk ite Siri fe, abe ésuk i n'iŋi kabino ni bakan bakate wúsomut wánowan, ni keeemo ku ti sílaam su: butum ki sirab sujoke ku, kiŋki kaney, ni kéetime ku. Abe Yesu n'aŋ'aritaniin kareyi fe. 25Bakan keehooje-hooj n'iŋi kanabano, kéenuutina Gálile, Serusalem, *Súde, ni bimbi kaane Kikinu Sumoŋu, ni kane a̱kan kaayelu kite *Surdeŋ.
Terpilih Sekarang Ini:
Májiye 4: cwt
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.